دراسة تفيد الجميع وبالأخص الي تنسرق سيارته لاسمح الله

[نوفل99]

اخواني اعضاء مكشات عندي خطه ولكن لا تكون ذات فائدة الا بمشاركتكم والدراسه تعتمد على النقاط التالية-
1-الي انسرقت سيارته يحدد نوعها
2-المكان المسروقه منه
3-هل كانت شغالة ام مطفيه
4-مكان العثور عليها
وبذلك نستطيع معرفة اسلوب السارق ومعرفة مكان السيارة في وقت قصير انشاء الله0هذا ونرجوا من العموم المشاركه

[سلفاريو]

كلام جميل وقليل الي يذكره
للاسف نجد ناااااس يرفع موضوع بان سيارته انسرقت ولا يذكر هل السيارة كانت تشتغل ولا طافيه
واذا بغيت منه اجابه لالالالالالالالالالا تجد اجابه ...؟
شكر لك اخوي والله يعطيك العافيه

[نوفل99]

اشكرك على مرورك اخي سلفاريو
ولكن لانجد تفاعل نريد ان نجعل هذا الموضوع تستفيد منه قطاعات وزارة الداخليه كما نستفيد نحن منه

[ماون ماركز]

مشكور يالغالي

ياليت تغير النقطة رقم 3-هل كانت شغالة ام مطفيه
الى 3- الأهمال اللي أدى الى سرقتها

لأن مو شرط تكون السيارة شغالة ..

قد تكون بورشة .. قد يكون المفتاح ضايع .. قد يكون المفتاح ع المرتبة داخل السيارة وهي مغلقة
قد يكون المفتاح في سويتش الشنطة .. أو الباب .. قد يكون المفتاح عمل عليه نسخة ثانية عند محل مفاتيح
كل هذه الحالات حدثت لناس أعرفها .. ما كانت السيارة شغالة . كان المفتاح متوفر للسارق بسبب الأهمال

بالنسبة للتفاعل أنا شايف أن حركة المنتدى كلها طاافيه بشكل مو طبيعي
يمكن وقت الأختبارات ..

وشكرا لك

[نديم الغرباء]

الحين فيه حركة نصب واحتيال مثلا انت تودي سيارتك التلميع او المغسله وتحط المفتاح عنده وتقول انا بجي بعد3 يوم مثلا يجي واحد يقول هذا سياراة اخوي يحاسب ويمشي والمشكله يوم انت تجي تساله تقول وين السياراة
يقول واحد نفر يجي يقول هذا في سياره اخو انا يحاسب ويمشي

[أطلال نجد]

السلام عليكم

موضوع مهم تشكر عليه أخي نوفل 99

في أعتقادي أن قطاعات وزارة الداخلية يعرفون الأسباب والمسببات خلف انتشار سرقة السيارات .

المشكلة أنه لا يوجد تعاون لا من قبل المواطنين من خلال حماية ممتلكاتهم ولا من قبل بعض القطاعات الحكومية بالتعان مع وزارة الإعلام

من خلال نشر التوعية الإعلامية المرئية ، والمسموعة ، والمقروءة .

التوعية مطلب في غاية الأهمية للتقليل من هذه الظاهرة المتزايدة والمستمرة منذ أكثر من عشرين سنة .

شكراً لك

[MjNo0oN]

ان شاء الله اني انا اببداها

السرقه تمة من سنتين تقريباً

السياره ددسن موديل 96
انسرقت من قدام باب البيت في وقت صلاة الفجر و الناس يصلون وكان البنزيم فل
السياره كانت طافيه + مقفله لاكن للاسف اكتشفت بعد ما انسرق ان قفل الباب و السويتش مع الزمن تاكل واي مفتاح قريب من شكل مفتاح الوكاله او متمسح يفتحه ويشغله وهاذا حال اغلب السيارات القديمه من باترول ولاند وددسن وهايلوكس وكابرس
لقيت السياره بعد 3 ايام و الحراميه مامسكو لاكن وجت دلالات انهم صغار في السن مثل ((بقايا زقاير - فشفاش - بباسي - بقايا ماكولات من مطاعم
الي فقدته من السياره ولله الحمد لم افقد شئ غير تانكي النزيم كان مليان ووجت السياره وهو فااااضي وموقفه في ملابق عند مستوصف اهلي في شارع عام قريب من البيت (يابعد بالكثير 5 دقايق بالسياره مع الاشارات) + وجت طقه خفيفه في البدي

و اياضاً سرقة سياره نيسان من نوع مكسيما مديل 99 قبل 6 او 7 سنوات وحسبي الله على من سرقها

مكان السرقه من ملابق العمل في احد المستشفيات الكبرى في وسط مدينة الرياض داخل الملابق الارضية وهي مخصصه للعاملين في المستشفى + السياره مقفله ومامن عليها بانذار

وقت تلبيقي للسياره الساعه 8 الصباح ووقت فقدانها الساعه 11.45 وللأسف ما اتوقع فيه سبب لسرقتها الا انها مكسيما مديل 99 وهي من اسهل سيارات المفحطين في السرقه

ولقيتها بعد 3 اسابيع بدون لوحات متقلبه في احد شوارع التفحيط القريب من حي الدخل وللأسف الشديد مع وجود عسكري وقت التفحيط و وجود بريهه داخل السياره فيها شعر + قوارير مويه + قوارير فيها ماحرم الله + بصماتهم واضحه على شاشة المسجل و الدركسون و التخشيب + الحراميه نزلو من السياره ورتكبو سياره ثانيه من نوع ددسن وانحاشو وقدام العسكري حتى انه ماتجراء ياخذ لوحة السياره الي ركبو فيها
ياله يارب ياكريم انك تشل من كان السبب ياله يارب ياكريم انك تجازيه عاجلاً ليس اجل

واياضاَ

تمة سرقة جيب باترول صالون مديل 92 من باب البيت مابين الساعه 1 الليل الى ماقبل اذان الفجر بقليل قبل سنتين في جنوب الرياض

لايوجد اي محفزات للحرامي لسرقتها الا انها من نوع نيسان مديل قديم وهو في البيت من وكالته

وجدت السياره في شمال الرياض وتحديداً خلف اسواق الاندلس الحرامي صدم في سياره موقفه بطرف الصدام الايمن ودخل ركن الصدام في الكفر

والحمد لله لقيتها بافضل حال وبدون اي نواقص ( مع انه كان موجود فيها جميع الاوراق المهمه و جواز السفر و الاثبات واوراق مراجعات حكوميه و صكوك ملكيه لاراضي و بيوت ودفتر شيكات)

طبعاً بعد هاذي الحالات تعلمت امور منها
احرص على الكلبشة الدركسون اذا كان موديل موترك قديم واحرص على الاصلي ولوه غالي
حاول انك تتجنب وضع اي اوراق في السياره مهما كانت الضروف
تقفيل زجاج السياره بالكامل
تغيير اقفال السياره بعد مدة من الزمان (واذا بغيت تعرف متى يجب تغييره اذا لاحصت ان المفتاح تمسح او بادي يتمسح حاول انك تغير قفل السويتش و البيبان) ولا تغرك ان مفتاح السياره مغناطيس تراهم يقدرون يبرمجونه وهي واقفه
تركيب وسائل الامان و الحماية من السرقه وهناك نوعيات كثيره وتكاليفها قليله ومايمنع تركيب اكثر من واحده (مثل الجهاز الموجود في الغرابي ماتشتغل السياره الا بحركه معينه في القير او السعودي الي ابتكر طريقة جديدة للحمايه عن طريق زر يوضع في مكان معين وهناك الكثير الكثير من الوسائل ولو عددتها راح تطول القائمة واسهل وارخص وسيله فصل سلك البطاريه او فصل سلك الديلكو))
طبعاً اهم شي لحماية السياره بعد الله سبحانه وتعالى ادخال السياره داخل البيت + تركيب باب كراج

[الصقري2000]

والله انا انسرقت سيارتي من نوع كامري موديل 2002 تماتيك
هي طبعا اكسرو قزازة فورد احد الاخوان وخذو مسجلها وحصلو مفتاح الكامري داخل الفرد
والتفتو يمينهم الا هذي الكامري ويشغلون ويمشون
....
وتقعد السياره 16 يوم لم يجدها لا شرطه ولا مرور مع انه مبلغ عنها من العائله كلها
المهم بعد ال16 يوم حصلناها على مخرج 12 على ما اضن امام قصر الملك عبدالله
لكن القصه مهي هذي
القصه انه مشى عليها السارق وهو في حالة سكر وبنشر عليه الكفر الامامي وواصل المشي
والكفر قطع الاسلاك واحرق الضفيره ووقفت السياره

بعد ما وقفة السياره نزل السارق من السياره واشر لواحد ووقفله وقام واخذ مفتاح عجل وضرب الي وقف لمساعدته واخذ سيارته وهج(هرب)
وحتا الان لا ندري من السارق واخذنا الكامري وصلحناها والحمد لله
........
في النهايه احب اعطيكم معلومه بسيطه
السارق الي سرق السياره غير منضرها الخارجي بقوه
يعني ركب عليها تضليله وكانت السياره جنوط حديد ركب عليها طيس
وركب عليها لوحات
وفاك الرفرف الامامي(عشان ساهر هههههههههههههههه)
.....
في امان الله

[رسيس نجد]

حسبنا الله عليهم ونعم الوكيل 0 اللهم اكفنا شرهم بما تشاء وانت السميع العليم 0 يا اخوان اكثرو من الدعاء عليهم 0

[ابومبشر]

والله لو فيه تطبيق لاحكام الشريعه ماكان نشوف مثل هذي الجرائم وكل هذي تهاون من قبل الشرطه والمحكمه ؟ اذكر 1418 حرامي عساالله يحرمه من الجنه فتح سيارتي هايلوكس وسرك الجعود .

[بن عساف]

يااخوان الموضوع محيروهم جداوالحرامي حرامي ولا كن افضل طريقة ان تضع في سيارتك جهازجوال مع شريحة
في كان مخفي حتى لاسمح الله لواسرقت سيارتك يسهل الاستدلال عن طريق تحيديد الشريحة.

[أميرالعشاق]

الحل هو تطبيق شرع الله/بقطع يد السارق....
لو قطعت يد السارق لأصبح عبرة لغيره...
سواءً سرق سيارة أو بيت أو محل او غرض او احتال على احد في مبلغ مالي...او غيرها من انواع السرقة..

[alfaiz]

الحل هو تطبيق شرع الله/بقطع يد السارق....
لو قطعت يد السارق لأصبح عبرة لغيره...
سواءً سرق سيارة أو بيت أو محل او غرض او احتال على احد في مبلغ مالي...او غيرها من انواع السرقة..



ما أقول اكثر من كلام اخوي امير العشاق
صدقت والله ياخوي لو يقطعون يده كان ماتجرأ غيره
لكن ماتقدر تقول شي الله يعين على هالدنيا بخير :(