موضوعي لأهل الخيل والفرسان نبي منهم نصائح وتوجيه

[ولد الهيافا]

السلام عليكم ورحمة الله وبركاتة

اخواني انا سجلت بهالمنتدى ابي اسألكم واستفسر من اهل الخبره نااااس من اصدقاي نصحوني اسجل هنا

انا رجال حاب اتعلم ركوب الخيل وانا من سكان الرياض وتخبرون لافيه نوادي ولافيه شي نقدر نسجل فيه

فا انا ابي من اهل الخبره يعطون نصايح لركوب الخيل وكذا وكم مده التدريب هذا اول شي

ثاني شي يالربع انا حاب اشتري لي فرس للركوب يعني كم تقريبا احصلها ووين؟؟يعني اقل سعر ممكن اشتري فيه
وثالث شي هل فيه مكان اقدر احطه فيه يهتمون فيه سمعت ان فيه ناس تأجر غرف بالشهر وعليهم كل شي واقدر اجي الفرس بأي وقت واركبه


انا من اهل الرياض والي حاب يساعدني يالربع لايبخل علي تكفون
زمان وانا حاب اركب الخيل لاكن الماديه وامور اخرى حرمتنا

غشيم يالربع بالامور هذي

وفيكم الخير والبركه بالنصايح والارشادات

وبيض الله وجيهكم مقدما ومشكورين

[abo_hoor]

وعليكم السلام ورحمة الله وبركاتة
الشباب ان شا الله مايقصرون معاك شباب اهل الخيل وراح يعطونك ماتبيه من معلومات

[عقيد حرب]

اخوي الغالي الجنادرية ملينان اسطبلات والخرج بعد فية اسطبلات مشهوره ولو حولنا كان خدمتك لكن للاسف ماني من اهل الرياض ومايقصرون الاخوان

[ابغى فرس]

اخوي فيه نادي في الملز اسمه المدرسه الدوليه للفروسيه وانا جربتها والله قمه الروعه
012917564

[كايد]

هلا بك ياغالي
عندك اسطبل بعد نقطة الخرج يدربون12حصةب500ريال
طبعا الرياضة تتعمد عليك اولا هم راح يدربونك على الركوب والثبات على السرج واحترام الفرس للفارس
ثم تبدأ بالخبب والهذب بعدها تصل للفتح (ركض- وولك -الجري السريع كلها نفس الاسم)
طبعا بعد 5حصص 6 راح تتغير وتتعلق بالرياضه بشكل كبير كبير....

شوف الرياضة هذي بالمنطقة الوسطى شبه محتكره على الاثرياء شئ ملاحظ ------------------->>>>
نادي نواف والدولية غالين ويوم تلاقي مدرب ويوم ما تلاقي .
اذا عندك فرصة روح نادي الشارقة بالذيد تدريب على اصوله وارخص من اللي عندنا وكذلك بالشرقية الشباب اللي بطريق ابوحدرية وعندك نادي بالاحساء وعند المنطقة الجنوبية فيه اكثر من 3او 4مدارس تعليم وبرخص ما شاء الله احسنها نادي جياد الشرق بخميس مشيط الشهر 250ريال وتدريب ممتاز اعتبرها مدرسة نموذجية .
انت امام خيارين (بعد ماتتعلم ان شاء الله)
- قفز الحواجز .
- التحمل .

القفز تقريبا راحت علينا يبا لها من عمر صغير ومكلفه جدا جدا (يبا لك جوادين عالاقل للمشاركة في البطولات المحلية واسعارهم دايم غاليه مثل ما هو معروف الخيول الاوربية مشهورة بجبر العظم وتتحمل القفز وخذ اصابات وبهذلة ومكلفة من ناحية العناية والعلاج).
التحمل يالبيه يالتحمل متعه وخفه وما تحتاج عناية مثل القفز ودائم يختارون العربي لتحمله الحر والصحاري واسعارها مناسبة .
بقي سباقات السرعة (الريس) مرحلة مستقبلية .
موفق للخير اهم شئ يكون عندك الاصرار والعزيمة وكل الناس بدأت من الصفر اعرف بطل دولي سباقات تحمل ما بدا يركب الا بعد ما عدا 34سنة .

[ولد الهيافا]

مشكورين يالربع الف شكر لكم الجميع

وانت يالكايد ماقصرت يالطربه كفيت ووفيت وبيض الله وجهك يالغالي اشهد بالله انك ماقصرت

طيب يالغالي مسأله الركوب والتمارين حليناها ان شاء الله بروح للي عند نقطه الخرج الي ذكرته لي وبشترك فيه وبتعلمه بأذن الله

لاكن انا ودي بفرس للركوب عشان ما انسى الهوايه او اتركها بسعر زين يعني من 4000

ياليت يالربع الي يعرفله احد يعطينا رساله خاصه

اخوي العضؤ ((ابغى فرس)) مشكور يالغالي على اعطائي الرقم بتصل فيهم وبشوف وش وضعهم

مشكورين يالربع

[((القناص))]

افادوك الاخوان جزاهم الله خيرا

[ولد الهيافا]

مانستغنى عنكم طال عمرك

[abo eid]

ياطويل العمر تعلم يازين الفروسية

فلوسك تجيب لك حصان للركوب

طبعا لاتشتري الا تشاور واحد خبره بهالمجال

٤٠٠٠ لو تقدر تزيد عليها وتوصل للعشره بتلقا لك فرس

وانا انصحك بفرس تستفيد من الانتاج والركوب ونتضر دام انت توك تتعلم

وخذلك فرس افضل لك ولو انك بجده ضبطة امورك

تحيتي لك