هل هناك جن في الصحراء

[حر اليدين]

بسم الله الرحمن الرحيم
السلام عليكم ورحمة الله وبركاته

هل صدفت يوم من الايام جنيا او موقف فسرت انه من الجن ننتظر مشاركتكم

انا شخصيا تعرضت سيارتي للدف في وسط عروق الدهنا بحيث انا واخوياي كنا بعيدين عنها تقريبا 100 لم يكن هناك احد بالسيارة
نراها تذهب الى الامام ومرة الى الخلف وسط دهشتنا فقط وصلنا السيارة صلينا المغرب مع العشا لانه كان في الليل ليلة 15 من الشهر وغيرنا المكان ثم اتينا المكان بعد عشرين يوم تقريبا لاحظنا نفس الشي


والله اعلم


تقبلوا تحياتي

حر اليدين

[المموه]

يوجد جن في كل مكان ومنهم المسلم والكافر . وغير الاماكن المعروفه والمذكوره يتواجدون ايضا بالبر حول ممراح الابل والماشيه والفياض احيانا بالليل وسط الفيضه تشوف زول يمر قدامك . فهم امم امثالثنا وعليك بالادعيه المأثوره اذا نزلت مكان . واذا شفته مباشرة قم بالاذان حتى ولو ان الوقت غير وقت صلاة . والله يحفظ الجميع .

[الربذي]

,,,,,,وااااااااااااااااااااااو اخوي حر اليدين
لو مكانك تسان طالعه في راسه نخله
معقوله طيب مالقيتم لهم اثر
تصدق حصلت قصه غريبه المهم يقول الي حصلت له شخصيا انه يرفعه بشعر راسه ويمسك يده (اليد الي تجره لكن مايلقى شي ) !!!!!!
وترتفع البطانيه فوق وتطيح عليه المهم المسكين ومعه ربعه اربع اشخاص مانامو من الخوف وهو جاه القولون من شده الكرب

[نقا خريم]

هههههههههه
اما يرفعه ذي هالجني ماسكت معه هواش
ناس من خوياي طلعوا في مكان ببريده يقاله الغماس ومعهم القدوع والقهوة
يوم قضوا متقهويين راحوا يطلقون رجلينهم ويتمشون شوي
يقولون مابعدنا ابد ولابه سيارات حولنل ولاشينن ابد
يوم رجعنا يقول لقيت القهوة مشروبه والقدوع ماكول ههههههه
والمره الثانيه طلعوا بنفس المحل (يقالهم مايخافون)
وغرزت بهم (العراوي) يوم دفوها وجت تبي تطلع خلاص
والسوّاق حاطها بالاول
يوم ناظروا الا الموتر يوم راح يرجع ورا وبسرعه
يشيلون اثقال شكلهم هههههههههه
الله يكفيناهم واياكم
ودمتم

[1001001]

صحيح اكثر تواجدهم في الصحراء

انا صارت لي سالفة بعد

كنت مع واحد وريحين احد الاحياء القديمه في مدينة الاحساء واسمها ( الكوت )

وراح يسؤال عن واحد

وخلني في السيارة وانا قاعد العب بالجوال والا اشوف السيارة تتحرك وتمشي قدام وانا توقعت اول شي الجلنط مو مشدود

وشده والا هو مشدود وتتحرك قلت ياولد انزل من السيارة
ودور حول السيارة والا هي ماحولها احد

وانا اشوفها تتحرك قدامي

ودق على الرجال وقوله تعال الحين ودني بيتنا

وبعد ماادقيت عليه وقفت لسيارة وتحكرة حوالي 4 متر من مكانها !!!

والله يحفظنا

[العزوم]

السلام عليكم ورحمة الله وبركاته
يالله مساء خير ..........
وش طرا عليك اخوي (حر اليدين) بهالموضوع :d
الجن موجودين ولافيه شك خاصة في المناطق المهجوره والخربات وعند بيوت النمل والرماد والشجر الكثيف ليلا
وقد حصل موقف مشابه:
في احدى ليالي ربيع عام 1413هـ خرجنا من الرياض قاصدين التنهات وكنا متأخرين حوالي الساعة الواحده ليلا
ومتواعدين مع مجموعة اخرى بيلحقونا من الرياض عند الصباح وكان الوعد في منطقة تسمى( الحاويه) بعد مفرق الحفنه شمال 7 كم تقريبا وصلناها على الساعة 2 تقريبا كنا 5 اشخاص قلنا خل نريح قبل الصلاة شوي ونمنا واحد في السياره و4 تحت بالارض كنت اقصاهم من الجنوب وخوياي نايمين الا انا ماجاني النوم ومتكي على الكوع توني بأحط رأسي على المخده الا الدبيك (ارتجاج الارض) ناصيني من جهة الجنوب الغربي واصلني وافز اول ماطراعلي قلت ذود هاجه عسى ماتوطانا واوقف ؟ ماشفت شي!!!!!! اتسمع الصوت ؟ ماهناش
واسمي بالرحمن واعود ابغى انام ونفس الحركه مرة ثانيه
واجلس في فراشي اقرأ آية الكرسي والمعوذات !! لاحظني اللي كان في السياره وسألني وش فيك قلت ماجاني نوم
ونمت حول ساعه وبعدما صحينا وبان النور رحت اقص الاثر في مكان الدبيك ولابه شيْ مره لاجرة ابل ولاغنم ولاشي قالوا الشباب : انت تدور فقع عندك ؟ قلت :ايه
قال اللي كان في السياره يدور جرت اللي هجدنا البارح!!!!!!!!!!!!!!!!!!
بعدين ذكر لنا اكبر الاخوان اللي معنا سالفة هذا المكان وتواجدهم (الجن) فيه من قديم

[حر اليدين]

السلام عليكم واعتذر عن الاطالة
الاخ المموه صحيح كلامك وقد سمعت قصص حصلت من هذا القبيل



الاخ الربذي
اول الامر تعجب لكن ماقالت في قلبي قععع الا بعدما برحنا المكان ومثل ماتقول وقد تاصل للطق والتكفيخ وصوت منادي ونار تشتعل

الاخ نقا خريم مرة من المرات احد الثقات رايح مع طريق خريص القديم لقا على جال الخط نار وعندها شايب وعنده بنت شعرها الى ردوفها <--هواا ويوم رجعلهم الا مابه لانار ولا يحزنون


الاخ 1001001 سالفتك حصلتلنا لكن مالقينا لااثر ولا حتا السيارة تحركت من مكانها لانها كانت معشقة ومسحوب الجلنط لكن اذا رحنا بعيد عن الموتر نشوفه يروح ويجي والمشكله انه في طلعه قوية ورمل

[خشم الحصان]

الاخ الغالي
حر اليدين
السلام عليكم
اخي الحبيب غفر الله لي ولك امين ورا ماتطرح سؤال معاكس وهوا هل يوجد انس في البر اذا يوجد انس اذآ
يوجد اهل بسم الله
الله يهديك (الله يقاصرنا ويقاصرهم بالحسان ) موجودين في كل مسان
بس اذا انت وصلت لمكان في اي مكان لا تنساء ابدآ ان تقراء القران و وردك من الاحديث
واذا عانيت فربما انت اوذيتهم في مكانهم فغير مكانك
هذا والله اعلم واجل
اخوك
خشم الحصان

[الكونترولCONTROL]

تعريف الجن : لغة من الجنة و هي الخفاء
وشرعا : عالم مستتر عن الانظار مخلوق من نار ... منهم المسلمون و منهم الكافرون
سخرهم الله لنبيه سليمان ...
و قد تمكن نبينا محمد صلى الله عليه و سلم من احدهم ...و كان يهم ان يربطه في سارية المسجد
لولا انه تذكر قول نبي الله سليمان عليه السلام ( رب اغفر لي و هب لي ملكا لا ينبغي لأحد من بعدي انك انت الوهاب )
فتركه يذهب ...
-------------
الجن عالم خفيف الحركة ( قال عفريت من الجن انا اتيك به قبل ان تقوم من مقامك ... الآية )
( قال الذي عنده علم من الكتاب انا اتيك به قبل ان يرتد اليك طرفك )
كافرهم يسمى شيطانا ...
و المسلمون منهم لا يؤذون الا من يؤذيهم
اما مردتهم فيأتمرون بأمر شياطين الانس من السحرة و المشعوذين و الدجالين ..... الذين يقربون لهم قرابين
ليصبحوا تحت امرهم ...
( و اتبعوا ما تتلوا الشياطين على ملك سليمان و ما كفر سليمان و لكن الشياطين كفروا يعلمون الناس الحر ... الآية)
و لا ينبغي الخوف منهم أبدا .... بل ليس لهم تصرف من دون الله في ملكه و خلقه ...
و لكن ينبغي التحرز من شرهم بالأوراد الشرعية ... و المحافظة على الصلوات و قوة الايمان ..
و قراءة الأذكار في المناسبات المختلفة .... و كثرة تلاوة القرآن ..
و الله اعلم ......
انا سبق ان سمعتهم كثيرا ... و لكن لم ارهم ........

[سلطان الوايلي]

(( اخوي حر اليدين ))

الجن موجود في كل مكان سواء بر أو ديرة أو بحر

والجن لا تستطيع ان تراه على صورته التي خلقه الله عليه , ولكن تراه في صور مختلفه يستطيع ان يتشكل فيها مثل (( يكون في شكل قط أسود أو كلب )) اعزكم الله ولكن لا تره على صورته التي خلقه الله عليها

ولهم من القصص الكثير والكثير ومنها ماحدث عندنا في الشمال قبل كم سنة ان فيه على قد حالهم ساكنين في صندقة أو كوخ وفي يوم من الأيام خرجت زوجة صاحب الكوخ وقامت ونثرت الشاهي وهو حار على الأرض وما سمت بالله وصادف انه انتثر على بيت جني في الأرض .............. انتبهو ياجماعة لإذا بغيت تنثر شي حار او ترمي حاجة لازم تسمي بالله

ومن بعد يوم اويومين وهو ينقلب حالهم الا قام يضربهم بالحصى وسكاكين الطبخ والله العظيم عذبهم عذاب لا يعلمه الا الله ويضربهم (( بالنعول )) اعزكم الله

ولا يدرون وش السالفة وبعد فترة صار يتكلم معاهم ويسولف ويهدد http://www.asmilies.com/smiliespic/evil/036.gif (http://www.asmilies.com) وطلع يسوي كذا عشان ينتقم لزوجتة وعياله الي ذبحتهم مرأة الرجال يوم تنثر الشاهي على الأرض وه حار http://www.asmilies.com/smiliespic/evil/052.gif (http://www.asmilies.com)
ما سمت ولو كان انه قالت : ((بسم الله الرحمن الرحيم )) كان ماقدر يسوي كذا

الوكاد انهم غير مكانهم و جابو شيوخ معروفين في قوة قدرتهم على اخراج الجن ولم يستطيعون انهم يسوون شئ http://www.asmilies.com/smiliespic/crazy/018.gif (http://www.asmilies.com)لدرجة انه صار يضرب الشيوخ بالرضم وجلسو على هالحلة أكثر من سنة

وبعدين صار يرمي عليهم أوراق يطلب منهم أشياء مثل ان فلان يقوم الحين ويسوي شاهي وينزله بالمكان الفلاني ويتركه http://www.asmilies.com/smiliespic/crazy/100.gif (http://www.asmilies.com)(( راعي كيف ))

وتسلط على عيال الرجال يضربهم ويقطع ثياب المدرسة علشان ما يروحون لمدارسهم ولدرجة ان بنت الرجال في الأبتدائي كل ما تجيب كتب يروح يقطعهم وجت مرة للمديرة تبغى كتب وقامت المديرة تهاوش البنت لأنه تحسبها مهمله وهي الي تقطعهن والبنت ماشاءالله عليها ذكية مرة قالت خلص عطيني كتب وابغى اخليهن في طاولتي وماراح اخذهن معاي وشوفي و وافقت المديرة يوم جا ثاني يوم الصبح وتروح المديرة لطاولة البنت الا الكتب متقطعه كلها والله يقولون ثاني يوم قدمت نقل عن المدرسة http://www.asmilies.com/smiliespic/smiliestxt/7_asmilies-com.gif (http://www.asmilies.com)

الأكيد طلب منهم طلب وقالهم انه راح يتركهم إذا نفذو الي يطلبه وقالهم والعياذ بالله انهم يذبحون حوالي 10 ذبايح ويعزمون الناس وفيه ناس يقربون لرجال رفضو يخلون الرجال يوافق ويذبح لأنه نوع من أنواع الشرك وهو الذبح لغير الله وتحمل الرجال فترة شهرين وبعدين نفذ طلبه من قلة الأيمان والصبر وما تحمل

وبعد ما نفذو طلبه ما عاد جاهم ليومك هذا


ومن المواقف المضحكة ان مرة صحفي ماهو مصدق الي يصير وقرر يروح يشوف الرجال ويسوي معاه لقى صحفي ويوم وصل المكان وأول مانزل من السيارة ومشلى مسافة مترين من السيارة والا يجيه السكين طاير من فوق راسة ولو ما نزل راسة راح فيها وهو يركب السيارة وعلى وجهة http://www.asmilies.com/smiliespic/evil/146.gif (http://www.asmilies.com)

والسالفة قريبة يالربع قبل أربع سنوات واشتهرت عندنا وكتبت عنها كذا جريدة منها عكاظ والرياض

[العشة]

فيه الارض اللي وانت رايح للدمام تجيك على اليسار حول رماح مذكورة ومعروفه بالجن ,,

وحصل لنا من زمان مواقف فيها وهي انه مرة كنا في اكا الارض مخيمين ويوم جاء الليل ونمنا ,,

الا يوم قمننا بنص الليل على صوت غنم واصوات واقرشه ونسم صوت جرس القائد من الغنم (( الريس ))

ونسمع صوت الراعي يكح ونقوم ونتشوف بالليل الا ماحولنا احد المهم قلنا ايه يمكنهم بعيدين

يوم صار الصبح وندور اثر الغنم واثر الراعي ولا لقينا غير سكت سيارتنا وعرفنا الدعوى عاد بس عقب مانمنا الحمدلله .

وسلاماتكم .

قال الله تعالى ((وماخلفت الجن والإنس إلاليعبدون )).

[السنافي 666]

في عجوز في مكه المهم هالعجوز صبت الماء الحار في الحمام ولاصار لها شي الا بعد يوم صار الجني يدغدغها
وكل شوي يقوم يدغدغها والعجوز تظحك وللحين على هذى الحاله
خخخخخخخخخخخخ

[نجم حفرالباطن]

هههههههههههههههههه
بانت علومكم اثريكم خوافين هههههههههههههه

[نجم حفرالباطن]

بكل صراحه انا شفت وبطريقي من الحفر الى عرعر وبنهم ديره تسمى الهبكه وهي معروفه بالجن
وهو في الطريق يشر رجال ولما وقفت والله اذا هو وجه لحم وليس فيه شئ يبين وجه فقلت الهجههههههههه
وبواحد ومايوقفن الاعرعر

[ابورشيد]

وأنا حصل لي نفس موقف اخوي العزوم وفي نفس المكان

[محب النياق]

انا اقول اللي يقرى ورده كامل ويقول الادعيه الماثوره ولا يقعد يوسوس ويخاف مافيه امل يشوف شي...........................

[أبو ثا بـت]

أفى والله .. وشذا الخوف .. ؟؟


ههههههههههه
ترى الجن يدخلوت النت .. تلاقيهم الحين متسدحين في خيمة اليد البري . ياشباب انتبهوا . .!!

[هواوي]

بسم الله الرحمن الرحيم

انا والله صاري عده مواقف وخاصه اني احب اطلع البر لوحدي

ولكن موقف صار عام 1424 يعني قبل سنتين

كنت جالس في فراشي جنب سيارتي الا واسمع ولد صغير يبكي بكاء يقطع القلب صراحه جا في بالي انه ولد انخطف ورموه حولي وما شافوني عشان ظلام
واقوم واركب السياره وسكت الصوت وادور له والف بالسياره ما لقيته قلت يمكن انه يوم شافني خاف يحسبني من الي خطفوه
وارجع نفس المكان وانزل ونفس الصوت يتكرر مره ثانيه والله ياناس بشكل محزن بشكل غير طبيعي بغيت اصيح الحزن عليه واقوم مره ثانيه وادور حول مكاني ويختفي الصوت

اخر شي عرفت انه جن رجعت ونمت داخلالسياره وقريت المعوذات ونمت نومعه الله لا يعيدها كل شوي اقوم اتوقع ان احد بيطل علي من قزاز السياره

لاني الي رحت من المكان ولاني الي قدر ينوم

المكان حول البرج الي على طريق الصمان الي في النفود

اما البارح ليله 9-12-1426 فكنت في البر وتعرفون البارح جو غير طبيعي غيوم ورذاذ خفيف وكنت انا واثنين من اخواي المهم يمر من قدامنا واحد متيييييييين مره واشغلنا كل شوي يمر من حولنا رايح جاي وما بيننا وبينه تقريبا 20 متر وما جا على بالنا الا انه سوداني او واحد مضيع خاصه انا في منطقه قريبه من تالمخيمات اخيرا طفشنا واخذت الكشاف وقمت ابي اروح له وفجئه ما لقيته ادور بالسياره يمين يسار والله ماله اثر شكله جني دب يسوي رياضه

الله يحمينا ويحمي كل مسلم من الخبث والخبائث

[العزوم]

خخخخخخخخخخخخخخخخ

حلوه جني دب يسوي رياضه
بس الظاهر درى ان العيد قرب ويدور له احد يعيد فيه :D

[الربذي]

اخوي الغالي هواوي ياخوك اثاريك مثلى اذا خفت وكنت لحالى ماعندي احد تصدق اني اقول وانا متغطي بالبطانيه ارفع البطانيه شوف اللي واقف عند رجولك !!! تخيلات واحيانا اتخيل واحد يرفع البطانيه عني
ومرات سبحان الله الكل يخاف وانا ماعندي من الشيطان طاري
بالنسبه للي تقول صوت بكاء اعتقد انها ابساس جمع بس تصدق احيانا احسبها طفل يبكي بصوت حزين ويقطع انياط القلوب الرحيمه !
لكن جني دب يسوي رجيم هذا اول مره اسمعها اضحك الله سنك !
والعزوم يتعذر عنه يقول يدور احد يعيد فيه
اذا انه اي الجني يحب المفاطيح فانه يبي يستانس ويفطح باليوم عشر مرات لا حتى الفطور مفطح (الريوق )
ياه ياكثر القصص عندي عن الجن من اناس ثقات وكبار سن وبهم تقوى

[مسافر1]

نعم ولها منازل ولكن ولله الحمد لم يحدث أن شاهدت أو سمعت أصوات لهن لكن أعرف من حدث له ذلك ...

[مترالبران]

بسم الله الرحمن الرحيم

[الساطي]

الاخوه الزملاء ارجوا في البداية إلا يساء فهمي من خلا ل ما سوف أقوله في ردي على هذا الموضوع الذي أرى ان أفضل وقت لمناقشته هو ليالي الشتاء الباردة بجانب المدقئه مع قليل من مشروب الزنجبيل اللذيذ أقول وبالله التوفيق ان مسألة وجود الجن محسومة من الكتاب والسنة والتي أشارت الى قد ره الجن على رؤية الإنس دون ان تشير الى قدره الأخير على ذلك علاوه ان العلم قد اكد وجود عوالم قد لا نستطيع ادراكها بحواسنا المحدوده ولكن ما يطرح من فصص في هذا الشأن اعتقد جازما ان مصدرها الأوحد هو الخرافات المسبقة التي عششت في رؤوس البعض وجعلت لديهم القابلية لتصديق كل ما يقال في هذا الشأن وتتجيير أي صوت ا وحركه في مكان موحش أنها من زملأنا الجن ظلما وعدوانا آنا شخصيا خضت القفار والبحار وبت في البراري والأماكن الموحشة وسمعت الكثير من تلك القصص الممتع ولم أرى ما يدعم تلك الأقاويل عموما كنت أود الإسهاب ولكن بطئي في الكتابه يجعلني أتوقف واكرر راجيا آلا يغضب مني احد فنحن في العيد وكل عام وانتم بخير:no2:

[تواق]

اخواني


الجن في عنهم سوره كامله عنهم في القران الكريم

وطبعا انتم اثريتم الموضوع بقصص عنها وقعت احداثها في البر لكن ياخوان

في موقع عندنا في جده معروف جدا اي واحد يزور حده يسال عنه في حي الصفا

بعد دوار الطائره امام نادي الكي تي جي اعتقد الاراضي هناك سعرها خيالي

لكن قطعه وعليها فله بعد معروضه بسعر بخس مقارنه بموقعها واسعار الاراضي حولها

لكن مافي مستاجر استاجرها وكمل فيها لامطعم ولا قهوه كل اغراضهم يلقونه برا برا في الشارع !!!

لكن يقال الان ان فيه صاحب مطعم مشهور الان يحاول فيه انا من زمان مامريت عليه لكن سالفتها معروفه

ويقدر اي واحد يزور جده يسال عنها

[المهمة الصعبة]

من القصص الطريفة
احد الاشخاص كان ماسكن خط المدينة ومحذرينه الجماعه انه مايمشي المنطقه اللي قبل المفرق حق تبوك يمين والمدينه يسار بالليل لأنه مليانه جن وعفاريت ، خوينا تأخر ووصل المنطقه عقب صلاة العشاء وكان خايف بالحيل المهم وهو ماسكن الخط ومايدري الا وهاكالواحد يضرب
شباك السواق بكل قوه وهو ينهبل وطار عقله من الخوف وكل شوي تجيه ضربه وحط رجله ويعجز يلتفت من الخوف ويوم طلع النهار وقف
ونزل واكتشف ان الضرب كان من مطارة المـــــــــــــــــاء .

[ابوطواري]

الى الاخ الساطي الكلام مافيه فايده راسلني على الخاص وروح اوريك جن او اصوت وشي يطير العقل

اذا كنت في منطقه الرياض

[&..الجوكر..&]

الجن موجودين في كل مكان
في البر يوجد نوع يقوم بعمل نور للتائه لكي يتبعه فإذا تبعه ضلله حتى يهلكه من غير ان يشعر ......

[الأخضر]

صدقت يالجوكر
ويسميها البعض ( الشيفه ) وكل من لحق هالنار ما يقدر ياصلها .

[خيال الغلبا]

في عام 1418هـ ذلك العام المبارك
وعند نزول المطر خرجت انا وصاحب لي من الرياض الى شعبان رماح لاستكشاف الأمطار والعودة في نفس اليوم
وصلنا رماح مع العصر واستمرينا الى المفرق اللي قبل المزيرع فرقنا معه الى ان انتهى الزفلت في عرق الحمراني ــ طبعا قبل اكتمال الزفلت ــفرقنا على العرق واستمرينا في المسير ونسينا انفسنا مع الجو الرائع قمة الإنسجام ماغير نهيجن ونقصد ... ونحمد الله على الخير اللي اقبل ....نزلنا وشبينا الضو يوم اعمرت وقامت منارتها وتقبل ذيك السحابة اللي يحبها قلبك وتنشق السماء وحنا نتسابق للسيارة ...واقبل الليل واقتف النهار واظلمت الدنيا مع السحاب وزادت معه نسبة االضباب والمطر ... وفاضت طرق السيارات التي بين العروق بالماء فأصبحنا لانميز الطرق عن غيرها فسلكنا النفود ...ومعنا القارمن والظاهر اننا اعتمدنا عليها فوكلنا الله اليها
تمثنينا وسط العرق وانعدمت الرؤية تماما ...وفقدنا الإتصال بالأقمار _ القارمن كانت 45 القديمة وليس معنا اريال خارجي والبرد شديد وليس علينا ملابس تكفي ....فأخذنا نتخبط في وسط العرق ....ساعات اطلع مع النافذة لمسح الضباب الذي زاد بشكل غير طبيعي فيذبحني البرد وساعات نغرز وساعات نتفجأ بالنفود واقفا في وجوهنا كالجدار الذي لايمكن تجاوزه كما انه لايمكن أن نرجع لأننا لانعرف ماورائنا ... بالإضافة الى التقطع المستمر في استقبال القارمن ... تلتقط الإتصال دقيقة وينقطع الإتصال عشر دقايق
واستمرينا في هالنفود نبي ننزل بين العروق اهون علينا ولكن كل المحاولات باءت بالفشل ......
في اثناء هذه الأجواء حاولت مع صاحبي أن يتوقف وننام في السيارة والصباح رباح
فرفض لأنه لم يشعر اهله بغيابه
ليل وظلمة ومطر وانعدام رؤية والأرض اللي نمشي فوقها ماندري وشي واليمة ضايعة
في تلك الأثناء توقفنا قليلا حتى استرجعنا انفاسنا
فلما رفعت رأسي اذا بخيمة تبعد عنا قرابة مائتين متر تقريبا وفيها مثل اللمبه المضيئة بقوة
فقلت لخويي تشوف اللي اشوفه
قال الخيمة
قلت ايه
قال وش رأيك
قلت مافيها راي هذي ... توجه لهم ونشوف وش نصير عليه
توجهنا لهم ....نصاهم صاحبي نصو ...قلت لا ابتعد شوي تأدبا معهم
فلما صار بينا وبينهم عشر امتار .......فجأة اختفت
قلت يمكن طبيعة التضاريس اوهمتنا بقربهم ... سكت صاحبي وانا اقتنعت برأيي
ثم استمرينا في المسير قرابة خمسة كيلو ....نطالع لاوالله خيمتنا اللي قبل شوي قدامنا
ونتجه لها مباشرة يوم قربنا ولاوالله نفس الحركة .....
انا دخلني الماء وبديت استرق النظر الى وجه خويي ولاابغاه يشوف وجهي
سكتنا وخيم علينا صمت مطبق ــ مطبق بالموز ـــ
قلت ياابو فلان وش العلم ... قال شوفت عينك ...
وبعد مسافة قريبة ظهرت لنا الخيمة مرة ثالثة ....والله واسوي فيها شجاع وافتح الدريشة وارفع صوتي بالأذان مثل علي مله مؤذن الحرم
يوم تلاشت الخيمة .....ولاعاد شفناها ...الله لايعيدها
وطلعنا على زفلت الصمان تقريبا الساعة الثالثة فجرا ......وتقابلنا سيول الحفر والحفنه والطوقي وفروعها وهي تقطع الزفلت بارتفاع نصف متر في بعض المواضع
واسف على الإطالة

[أبومتعب]

قصة رائعة أخي خيال الغلبا .....

أجمل مافيها الأذان وهروب الجن بعده ...

[الردمية]

:confused: اللي مو مصدق يروح لمكان يسمى شرابث يقع على طريق القصيم وانت جاي للقصيم بعد ام سدرة ثاني معبر جمال على اليمين مكان مخيف جدا تمشي كيلو ونص كلة حصى :j على شكل شعيب والبدو مايقربون حولة سوف تشاهد الجن وكل مايخطر على بالك اباحاول اجيب صور الاسبوع الجاي ابكشت فية واصور :

[الضاري]

الله يحفظنا من شرهم

[الفتى المجازف]

يااخوان لاداعي للقلق والخوف والرهبة
فالله منحنا عقولا نفكر بها واعطانا آيات تتلى وارسل لنا رسولا دلنا للهدى وانار بصائرنا واخرجنا من الظلمات الى النور
هناك آيات قرانية كثيرة وعديدة تتناول هذا الشأن وكذلك احاديث نبوية تفصل في هذا الشأن ووتعمق فيه
فلما اذن الاثارة.؟
هناك مذكرات منتشرة بالمجان في كل مكان في المساجد , المدارس, الأسواق اسمها اذكار الصباح والمساء
من قرءها حفظه الله من الجان والسحر والاذى كل يوم
من قرءها مؤمنا بما فيها في كل يوم حفظه الله من فوقه ومن تحته ومن يمينه وشماله.
حفظ الله الجميع من كل سوء ومكروه
وخذوها مني من حفظ الله في الرخاء حفظه الله في الشده ولا داعي للأثاره

[الرهدن]

الغيلان من الجن
علاجهم كما أخبر النبي عليه السلام /
الأذان
وقد ورد بهذا ألمعنى أحاديث

[عاشـق القمري]

ياشباب حبيت اروي لكم هاذي القصة حصلت لخويااي طلعوووا



طلعة بعد صلاة العشاء وعشاهم معهم لمنطقة بين الراايس ومستوورة



من ناحية الجباال



ومكاان يقاال له ((ابوو غماام)) قبل جبل صبح..المهم وهم رايحين للمنطقه



مشغلين شريط مزمااار ومعرووف الجن تجتمع على ايش المهم وصلووا الديره



اللي يبونهااا ونزلووا الربع بيتعشوون والمهم وشووي واثااري المسجل يشتغل



والله العظيم يطفوون المسجل وبعد شووي يشتغل المسجل الين حركووا من المكاان



وكناا يوم الأربعااء الماضي في نفس المنطقه قبل جبل صبح ونمنااا



براا الخيمة وسبحاان الله



ماأدري وش اللي صحاني تقريباً الساعه 4 قبل الفجر وابي ارجع اناام مافي نووم وبصرااحه



أسمع صووت هرج بالليل وماأبي اصحي أحد من الشبااب عشاان لايقوولووا خايف..المهم يوم صحيناا



الصبح وأسئل وااحد من العياال ويقوولي نفس السالفه أسمع صووت هرررج وماأدري هوو في أحد يهرج



والا الوواحد خاايف..



بس الله يكفيناا شرهاا...

[طير استراحه]

السلام عليكم ورحمة الله ....
اخوي حر اليدين الله يجزاك خير على هالموضوع قاعد اقراه اخر الليل وانا بالبيت لحالي ومع الانسجام كل ماخرفش شي حولي نطيت من الخوف :j وارجو عدم الضحك ياشباب تراني شجاع بس صدفت هالمره :D
وتذكرون القصه المشهوره اللي واحد كان ماسك خط لحاله بالليل وشاف واحد ياشر له ايديه ايدين حمار وانتم بالكرامه ..وخاف الرجال مررررره وشاف واحد ثاني يأشر له قال لازم اوقف يوسع صدري يوم ركب قص عليه قصة الرجال اللي ايديه ايدين حمار قام طالعه الرجال وطلع ايديه قال قصدك زي هذي هههههههههههههههههه
يوم اغمي عليه المسكين الله لايبلانا

[فطومه]

يمممممممممممممممممممممممممممممممممممممه
انتو ماعندكوم تسولفون الا عن الجن .. الله لايبلانها ..
---------------
اخي طير الصراحه مو بلحالك الي يخاف ...
انا بعض الاحيان بلحالي بالبيت اقعد اسكر البيبان ...وتقول لي امي اقعد عندك
اقول لااااااااااااااااااااااااا خليني لو مره بلحالي >>> من زود الشجاعه
اول ماسمعت الباب ينفتح نطيت لغرفتي وظلمت الغرفه وخليت نفسي نايمه ...
علشان الحرامي مايدري عني >>>>> تفكير على مستوا
---------------------
ويا ريان الحربي ... المفروض تقومهم حتى لو قالوا خواف ...
اقومهم ولا يصير شعري شيب ؟؟؟
وشكرا على الموضوع المرعب نص ونص مو مرررررررره ....

[أبومناحي]

وأنا تعرضت سيارة أبوي باصمان إلى الدف

ولولا أن ركض أخوي الكبير ووقف السيارة

ولا كان السيارة هجت ولا رجعت

[أبومناحي]

أما انا ويا الجن سوالف لاتعد ولا تحصا منها
كنت سهران في شهر رمضان طيب
وواطلت السهر حتى مغرب اليوم الثاني وبعدها نمت قعدت الساعه ثنتين باظبص وكنت جوعان لأني مافطرت
وكنت أبغى أنزل الدرج للمطبخ وكان بجنب الدرج مخزن للفرش والمخدات ولحافات وعده البر
المهم كنت أبغى أنزل الى أسمع صوت تيل (( كور صغيرة )) طاخ وطيخ في الأرض وعرفت ووقف في محلي حوالي 11 دقيقه
وكل شوي يزيد الصوت ويزيد بي الجوع ليمن خربتها وقلت بأقوى صوتي (( وخر عني أنا ما سويت لك شي )) كنت في وقتها بصق خامس إبتدائي ولحين كل ما أسمع صوت أطول على صوت التلفزيون علشان مأسمع الصوت

[أبوتركي 999]

بصراحه عندي سالفه شوي تضحك
مرة كنت جالس مع شباب بالديره على الخط السريع يوم جت الساعة 11 بالليل قمت ابغى انام على الطريق عند شعيب لاني مواعد

ناس من الرياض نبي نكشت ومتفق معهم الصباح بهالمكان الي انا نايم فيه ...

كان الجو بارد أي بارد الا جمده .. عسكريم ياجماعة .. قلت أنام بالسيارة وبسم الله وبعد الورد دبيتها نومه ..

وأسمع يا شباب صوت غريب قرقعة بيالات برى السيارة وأقوم واشوف يمين يسار قدام ورى ما فيه شي تعوذت من أخو شارون

ونمت وكان الجو ساكن لاهوى لا سيارات ما فيه الاصوت الزحري الي صادر من حضرتي اثناء التقلبات

السيارة قامت تهز ياشباب تهز تعرفون وشلون تهز وانا قمت بس احط نفسي ما قامت ما ودي أقوم ودي أنه حلم

( على فكره المكان الي أنا نايم فيه يقولون أن فيه جن ) وأنا أقوم بعد قراءة المعوذات وآية الكرسي عشرين مره

تحسبوني نزلت هذا كله علشان اشوف مع الدريشه بس وش اللي يهز السيارة ما لقيت شي حول السيارة

ويجماعة وش أشوف في الجه المقابلة من الخط وبين الشجر أشوف شيين ( يعني اثنين ) يروحون ويجون وبدأ ترجيم الحصى بس ما

يضرب السيارة بالخط وحول السيارة وأحط رجلي ( أتوقع كانت أسرع زبنه بالعالم ) وأروح قدام وانام ويجون الشباب ونكشت

وأسولف لهم ويقولن والله انك منتهي وميت قلب وشلون جاك النوم بعد هاللي شفته .... قلت عادي

رجعت الديرة واعجبني مدح الشباب بالبر قلت أسولف للشله وأبدى أقص لهم اللي صار وصارون يضحكون وتبين أنه منكح من أثنين

منهم كانوا جالسين معي ذيك الليلة ويوم نمت لحقوني ولبقو السيارة داخل الشعيب وبدوا يصرقعون بي ...

ونأسف للاطالة[B

[حر اليدين]

السلام عليكم ورحمة الله وبركاته

اخواني اعزائي الله لايهينكم على الردود والمشاركة والله اني محرج منكم لاني لم اورد اسماءكم نظرا لهذا الكم الهائل من الاعضاء
بالحقيقة انتم اثلجتوا صدري خصووصا موضوعي لقط اربع نجووم :D :D :D :D :D :D مدري خمس


انا اشتركت باكثر من منتدى لم تحصل فيه كثير من التجاهلات لكن مكشات ماهو الا تميز واعضاء متميزين

تقبلوا تحياتي


اخوكم
حر اليدين
:good:

[عمار السفينه]

ههههههههه قصتك ياأخوي طير استراحه مهيب فقش وبس الا فقش بيض ديناصور طيب يوم أغمى على اللي يسوق صحا من النوم والا اييييييش. أضحك الله سنك

[عبدالله الصالح]

ياناس المعوذات

وخل عنك لاصوات هذي


اخوكم القصمنجي ،،،

[أبو حـــمد]

الله الحافظ
عليكم بتقوى الله و المعوذتين ,,, فأثرهما كبير ي كل الأوقات ليس فقط مع هذه المواقف

[dremar]

[align=justify]
حدثني احد زملائي وهو من الثقات ان شاء الله انه في ليلة من الليالي وهو مسافر من المنطقة الشرقية الى مدينة تربة على طريق الرياض مكة المكرمة وعلشان يطرد النوم اخونا مشغل المسجل على السامر ويرقص معهم على الشريط ورافع الصوت على الأخير وشوي الا الرجال كذا يشيك على المرايه يشوف السيارات اللي وراه مــــــاحــــــــــــس الا ها الرجاجيل اللي ماسكين الصف في المقاعد الخلفيه ويرقصون معه على شريط السامر . لاولابسين غتر وطاقينها لطمه (متلثمين )
اخونا وش جاه والله طقته أم الركب ويقول والله اني يوم شفتهم من قوة الخوف احس بطعم قلبي في حلقي ولا عد التفت وغيرت الشريط وحطيت شريط السديس وجلست اسبحن واستغفر الين دخلت بيتنا والحمد لله على السلامه
الشاهد من ها القصه ان الجن خلق من خلق الله سبحانه وتعالى منهم المسلمون والكفار قال الله تعالى في محكم التنزيل (وماخلقت الجن والأنس ألاليعبدون ) صق الله العظيم
ويجب على اخوانا جزاهم الله خير عند السفر ان يذكرو الله وقرأة دعاء السفر وعليهم بالأستغفار والتسبيح والأستماع الى أذاعة القرآن الكريم والأستماع الى المحاضرات الدينيه
وآســـــــــــــف على الأطالة وعلى تواصل

[البجيدي]

ياشباب احد يعرف جني الحماد

اتوقع الي يعرفه سلطان الوايلي لانه من الشمال :D

http://www.mekshat.com/pix/upload/sign/images/mk25687.gif

[ابو دهش]

جني الحماد شكله اذا ماني واهم حمد الطنه

[المـهـتوي]

أكنت في البر ونايم والزملاء يتمشون على رجليهم

جاني واحد كبير في السن وقالي تمشي ولا
توقعته راعي غنم لاننا نسمع أصوات الغنم والكلاب
قلتله لا
قال يكون خير
قلت بالحرف الواحد خير ان شاء الله
وبعدين زاد صوت الغنم والكلاب
وخفت من الكلاب وركبت السيارة
وأحتري الكلاب أتلفت يمين يسار
وين الكلاب لا علم لي
دقيت على الزملاء وقلت لهم الكلاب حول جلستنا قالو نم وسم بالله مافيه غنم ولا كلاب
بعد المكالمه سكرت عيوني وشغلت المسجل قرءان حتى وصلو وغيرنا محلنا
قالو الشباب كان يوم جاك الرجال قلتلة نتعشا ونمشي كان خلاك و ما أزعجك

ودمتم سالمين

[hamad_alsaad]

اذا انت في البر وليل دامس وتشوف شجر او طلح هذا هم الجن. واذا انت في قرية وليل دامس وشفت نخل هذا هم الجن. وش الحل؟ المعوذات واية الكرسي. بس بشرط انك تصلي ولا تاكل حرام ولا ترتكب المعاصي. واذا انت تاكل الحرام وترتكب العاصي ولا تصلي مع الجماعة الجن مايهمهم قرائتك. احسن خلك في المدن واماكن فيها اضاءة وعساك تسلم مايجيك الجن في فراشك:j