شاهي مكتوم ؟ لاتدخل اذا ماكنت راعي كيف

[غيّام]

السلام عليكم ورحمة الله وبركاته





الطريقه عاديه وليست بالجديده على بعضكم

وهي انك تحط مويه في البريق لين يفوح ثم تحط السكر وتخليه يقلب له شوي ثم وخر البريق عن النار وحط شاهي ربيع او ابوجبل بس لاتكثر التلقيمه

ثم بعد ذلك غط الثعبه ( المكان الليي يصب من منه البريق ) بقصدير ثم لحف البريق ببطانيه او فرشه او خيشة رز المهم غطه تغطيه كامله وخله 7 دقايق ( على بالي دقيق) المهم لاتخاف اذا كنت مغطي البريق زين انه يبرد
وبعد كذا وخر الخلاقين اللي على البريق وشله بشوووويش عشان ماتتحرك التلقيه وخذلك بياله

وسلمني على راسك اذا ما كيّف

0
0
0
0
0
هذه طريقتي في تصليح الشاهي وانا احط بريق تفويح القهوه وابريق الشاهي يطبخون سوا جنب بعض واذا زليت القهوه في الدله غطيت البريق مايمدي الربع يخلصون من القهوه الا الشاهي لهم بالمرصاد


وجزاكم الله خيرا

والسلام عليكم ورحمة الله وبركاته

[أسامة]

مشكووووووووووووور على الفكرة الجميلة

[rayiig]

تقفى ياغيام
خذنا على قد عقلنا
يعني الطريقة مرة ثانينية بشوووووووووييييييش
ههههههههههههههههه

وشلون نحطه بخيشه

[المشهور]

طريقة مخمخة على الشاهي

بس انا عندي مشكلة ؟؟؟ ألا وهي ان البريق يبرد بسرعة وش الحل هقوكم ؟؟؟

ولكم جزيل الشكر ،،،،،،

[غيّام]

اسامه : اشكرك على مرورك وجزاك الله خيرا

rayiig : وش دعوى يابعدي فيك البركه وانا اخوك 00
انا اقصد انك تغطي البريق اما بفراش او خيشه او اي شئ يصلح انك تغطي به البريق عشان يحافظ على حرارته (كنك مغطي لك بزرن مصخن)
وجزاك الله خيرا

المشهور : ابد الله يغفر لك اذا غطيته زين بتروح السبع دقايق وهو مافكر انه يبرد 00
واشكرك على المرور

[العتيبي]

تسلم اخوي غيام على الطريقه الممتازه

وعندي معلومه وهي عن ابريق الشاهي او الغوري ويكون شكله عادي مثل الي نعرفه ويجي بداخله مثل السله تحط الشاهي التلقيمه فيه وتصك الغطاء وتخليه يطبخ وتتركه لحد مايغلي وتحاول انه يطول لان الشاهي هنا ماراح يجيه ماء بيطلع طعم الشاهي عن طريق البخار الي يجيه من الماء واشربه وشف كيف يحك بالراس والابريق هذا جلست ابحث عنه اكثر من 7 اشهر وطحت فيه مره في محل في محافظة شقراء وشريت منه ثلاث .. اتمنى تجربه لانك بتدعي لي وقتها

تحياتي

فيصل

[الاداري]

طريقه حلوووه

ومجربه 100%

ويوجد جراب خاص بتغطيت البريق الخاص بالشاي

[bo_s3ayed]

ماشاء الله عليك اخوي غيّام مبين عليك راعي كيف اجل اكيد طريقتك في القهوه مميزه بعد عطنا طريقتك في القهوه خلنا نستفيد

[بدر بريدة]

ياويليييييييييييييييييييييييييييييييييييييييه عليك "غيام "



والله ياراسي عقب هالشاهي يبي يزعق بالخامس ...

هههههههههههه




مشكوووووووووووور على الشاهي المحكور

[nahham]

تسلم ياغيام ياكييف شاي

الاخ مشهور بالنسبة لبرودة الشاهي بسرعه : كان عندنا عمال في المزرعه يجيبون حصاة كبيره لكن تدخل وسط البريق ويغسلونها ويسوونها داخل البريق يقولون الحجر ما يبرد بسرعه

لكن انا ما جربت

شكرا

[ثــــايـر]

نصيحه اللي يبي الشااااهي مزااااج وطيب ميه بالميه ....

اذا حط الورق على الماي المغلي يبعده عن النار علشان لايقلب الماي والورق فيه ..يعني اذا قلب الماي والورق فيه لو قلبه وحده يخرب على طووووول ولا يضبط ابدااااا ...

دمتم بخير ..

[ساق الجواء]

بالعكس أطعم شاهي عندي أن تجعل الماء يطبخ بالسكر ثم تضيف ورق الشاهي وتدعه يقلب على النار ثم تسمح لجزء منه بالطيشان على الجمرحتى تنبعث رائحة الشاهي العبقة ثم تتناول الشاهي.

[العاني]

تسلم اخوي غيَام على هالطريقة الحلوه

[حاكم المقناص]

تسلم اخي [غيام]
وجزاك الله خير على هذة الطريقة

[ابو سمر]

طريقة جميلة وهي ما أطبقها في البيت ، اما في البر فإني بعد غليان الماء والسكر ، نضع الورق عليه ، ثم أبعده عن النار قليلا ، لكي لا يقلب كثيرا ويتأثر بحرارة النار ، وبعدما تنتهي من القهوة تجد ورق الشاهي قد نزل لقاع الإبريق وطعمه رائع جدا .

ملاحظة مهمة :

وهي لابد من صنع الشاهي من ماء شديد الحلاوة لكي لا يتأثر بالأملاح ، وكلما زادت نسبة الملح تأثر طعم الشاهي ..

شكرا لك أخي الكريم ..

[ابو شكاع]

جزاك الله خير ياغيام
أجل شكلنا نبي نقعد نقعب من هالشاهي لمين كل شوي ناطق الواحد لم الخلاء ههههههه
تلقاك بالطلعة ما يمديك تسولف مع أخوياك ..كل شوي رايح واحد منا وواحد منا
تسلم ياغيام وماقصرت ....وأن شاءالله أبجررررربه

[الأبرق999]

مشكور ياخوي على هالوصف الجيدة لكن بعض من الناس يشرب الشاهي عن قولت شربنا شاهي ماهو يكيف في شربه

والســـــــــــــــــلام

[ابومرتاح]

احسن شاي شربته هو شاي ابريق الخزف المخدر على الجمر ويكون حلا برا ............