ماطور كهرب جديد بـ 249

[aziz2727]

الاخوه الاعزاء
يامرحبا وسهلا فيكم

نزل ماطور جديد في كارفور بقيمة 249 ريال صغير ووذيف وصناعته صينية وميزاته :
650 و ط
6 ساعات عمل
البنزين خلط مع زيت
يمكن اخفاء الصوت بأبعاده عن الموقع 7 متر .
سعة البنزين 4.2 لتر
اسم الماطور gasoline gemerator ap 950
عليه ضمان 7 ايام استرجاع النقود
واعتقد سنه ماني متأكد صيانة

انا شريته يوم الخميس الماضي بس اخوي راح بيشتريه يوم السبت قالو له سعر الماطور 290 ؟؟ طبعا" استغرب اخوي وقال كيف ؟ اخوي شاريه يوم الخميس بملبغ 249 !! قالو ايه يوم الخميس والجمعة يكون فيه عرض للاسعار .

[مغرز]

بارك الله فيك ومشكور على المعلومه

[1001001]

طيب وين المكان؟؟؟؟؟؟؟؟؟

[سهيم الليل]

[b]السلام عليكم ورحمة الله وبركاته
اخي الكريم الله يبارك لك فيه ولكن ابي انصحك اذا جيت تخلط الزيت مع البنزين لازم يكون الخلط بقياس معين وحسب توصية المصنع
لاني الصراحة شريت واحد العام الماضي وأظن ان ماركته تايقر صنع صيني من كارفور وبنفس القيمة تقريباً واول ماشتغل يازينه ومن ثم خرب وديته يصلح لكن مافيه فايده ولااعلم هل هذا من خلط الزيت مع البنزين يعني اني ماضبطته او ان الماطور لك عليه

[aziz2727]

اخوي مغرز هلا فيك وشكرا" على المرور

الاخ 1001001 هلا فيك والله وهذا يباع الله يسلمك في كارفور على طريق خريص والا فيه واحد جديد على مخرج 5 بالرياض

الاخ سهيل الليل .. هلا بك والله .. والزين في هذا الماطور انه يوجد معه مقياس مخصص لكمية الزيت التي يجب وضعها مع البنزين بس اهم شي يكون زيت مخصص بالخلط هذا اهم شي

ويا هلا بالجميع

[سواق الوايت]

تسلم والله يعطيك ألف عافية

[الشاقي]

تسلم الله يعافيك

[عيناوي اصيل]

اخواني ما انصحكم به
صناعة صينيه اذا خرب ما له قطع غيار
صراحه كان عندي واحد وخرب وفشلني في الكشته
صوب عمان ورميته في نفس مكان الكشته

والسموحة منكم

[جلوبلستار]

مشكور اخوي عزيز وياليت لو حطيت له صوره .. الصيني مشكلته ما ينوثق به في الكشتات وخرابه كثير ( احسن من كذا شريحه شمسية 50 × 50 سم - سعرها 900 الى 1000 ريال - وبطارية 120 امبير ووصل بينهم سلك ولك وللزمن ما يحتاج بنزين ولا زيت ولا رح للكهربائي ولا ....الخ ) احد الإخوة يستعمل الشريحة في مزرعته من اكثر من 8 سنوات وما شية زي الحلاوة يشغل عليها 4 لمبات يوميا )
وعموما مداخلتي هذي من زود الميانه ولا تنقص للموضوع قيمة ومشكور مرة اخرى .

[مطوع]

والله ياهو رخيص
بشتري مثله
الله يسلمك

[راعي المطاريش]

أخوي جلوبلستار ( ترى تعقدت من كتابة معرفك )

ياليت تعطينا فكرة أوضح عن الفكرة التي ذكرتها من وين أجيب الشرائح الشمسية وهل هناك شيء جاهز يباع ولا أحد يضبطه له لاشك انها فكرة ممتازة ...

ولا يهون صاحب الموضوع الأصلي ....

[الابهق]

الأخ عزيز وباقي الأخوان
مساكم الله بالخير
اليوم مريت على كارفور وشفت الماطور اللي تتكلمون عنه وتراه تقليد للتايقر واسمه ( سوبر تايقر ) وتراه من شكله خرطيييييييي والدليل شوفوا مفتاح التشغيل ( on ---off) بغيت أطفي الماطور وعيا يطفي والزر اللي قلت لكم عنه مايرجع لوضعه الطبيعي .وسعره لازال ب249ريال .... والأصلي ( تايغر) شوفوه عند ساكو
ولكم تحياتي وتقديري

[ابوقاسم]

ياريت واحد من اللي عندهم فكرة عن الالواح الشمسية يفيدنا في الموضوع او.......
ياريت يكتب لنا موضوع خاص عن الفكرة اتعم الفائدة وعذرا لصاخب الموضوع لتداخل الموضوعات مع بعضها .....

[القصيعة]

والله يأخوي اللي فيه خلط زيت مع بنزين لاتقربه أنا شريت دباب لأخواني يخلط الزيت مع البنزين ودمر الدباب بعد كم أسبوع وهذه طايح بالحوش.
وشكراً.


أبو عبدالله.

[aziz2727]

هلا والله بالجميع
حبيت بس اوضح شي .. اخوي طلع بالماطور للبر وكشت ليله كامله ومريت عليه ذيك الليله .. ما شاء الله شغل الماطور زين مره ومدد كشتته الى ليلتين وسألته وش العلوم ؟؟ قال ابد شغله زين ولا فيه عذروب .. عاد مدري هو علشان الماطور جديد شغله زين او انه فعلا" شغله زين ..طبعا" كلام الاخون على متمه ان الماطور مهوب شي او فعلا" شغله زين ولا يبان الا اذا الواحد جربه اكثر من مره في البر .. وما طرحت الموضوع الا لتعم الفائده للجميع ويستفودون اخواني الكشاته .
وبارك الله في الجميع

[aziz2727]

اخوي راعي الطاريش
ما شاء الله تبارك الله .. ما شاء الله تبارك الله .. ما شاء الله تبارك الله
الله يخلي لنا ولك ما عطى ويصلح لنا ولك ولكل مسلم النيه والذريه .

[الفهد9097]

السلام عليكم ورحمة الله وبركاته


أخواني الاعزاء الماطور و الطاقة الشمسيه كلها وجع راس
شوري عليكم ياشباب محمول كهرب يباني (600) واط اسواد (220) فولت
سعره (120) ريال تقريبا افضل من الماطور يكفي انه يباني الصنع اربع لمبات زي الحلوه يشغلها وعندي واحد له سنه وشوي ماشي مثل العسل والله الحمد هذا الراي قولو ماشاء الله

ناسف على هذي المداخله .....

[albara]

[SIZE=6]السلام عليكم
انا شريت الماطور اول ما فتح كارفو
وطلعت فية مرتين لية ثم ليلتين
وكل ليلة من 7 الى 9 ساعات متواصلة وما فيه اي مشكلة
بس كمية الخلط وطريقتها منيب متأكد منها ولا حتي نوع الزيت الي استخدم
لاني احط مع تفليلة التانكي كاس كامل (الكاس الأزرق الى داخل التانك الي جاي معه للوزن)
واستعمل اي نوع زيت القاه للسيارة يا ليت اذا احد يعرف الوزن الصحيح للزيت ونوع الزيت يعلمني
لأنه اعجبي والله وودي احافظ عليه وتحياتي.... :good:

[راعي الوفاء]

نفس الماطور باسماء متعددة
شريته من العثيم ب 229
صراحة زين للي يبيه طلعة وحدة سبوعين مثلا
واستخدام بسيط (10 لمبات 40 وات ) وغير كذا يضعف
لكن ما انصح به للي يبيه استخدام كل صيف ولو بشكل بسيط

[1001001]

ياشباب في مثل هذا الماطور بالاحساء
؟؟؟؟؟؟؟؟؟؟

[هلا بريدة]

Aziz2727 مبروك ولا إشتغل يومين!!!!!!!!!!!!!!!!!!!!!!!!!!!!!
كثر خيره دخل قيمته دبل كل ليله249 ريال

[هويدي]

السلام عليكم

شاكر لك اخي الكريم طرحك وحرصك على تعميم الفائده لأخوانك الاعضاء

والشرائح الشمسيه اللتي ذكروها الاخوان شفتها في الرياض شارع الريل ( الغرابي بجانب بيع الجنوط المستخدمه والبطاريات)

ونا عن نفسي استخدم المحول الياباني وماشي زي الحلاوه ولله الحمد

واللي يبي يريح عمره من المحول والمواطير يدبل لموتره بطاريتين ولمبه بالكبوت وتفي بالغرض

مع التحيه للجميع