استفتاءعن لحوم الابقار

[قرناس تغلب]

السلام عليكم ورحمة الله وبركاته بالنسبه للحوم الآبقارلماذا أغلبية اهل نجدلايأكلونه خصوص جنوب وغرب نجدمع العلم فوائدهاكثيره واقل دسم منغيرها بالنسبه لي لم اكلها إلامره واحده لتجربه والضاهرإن المحل اللي باعنا عطانا شي عمره مهوب صغير.......اخواني من منكم يأكله ولماذا....ومن منكم لايأكه ولماذ

[gentel]

هلا بك اخوي شكلك عاكس العلم (عفوا ) اهل الجنوب والغرب هم اللي طايحينن به اما اهل نجد قليل منهم ياكله ولاكن محاكيك مايصبر عنة خصوصا الله تسمى الباطنةياهي دوا للعليل عموما شكرا لك للطرح

[قرناس تغلب]

هلا اخوي جنتل اقصدجنوب وغرب نجد يعني من الجنوب الخرج الين وادي الدواسر ومن الغرب من المزاحميه إلين تعدى احلبان تقريبي هذاجنوب وغرب نجد شاكرمرورك

[عطيب ومايغيب]

ابشر ولا يهمك طال عمرك على الطاعه

http://www.mekshat.com/vb/showthread.php?t=387184 <تفضل هنا>

[عاشقvtc-4800]

افادوك اخونا

عطيب ومايغيب

تقبل مروري .

[aziz155]

والله ياخوي حنا بوسط نجد ماناكله ولايدخل بيوتنا
والقدر الي يطبخ فيه نرميه على طول هههههههههههه

لكن اعتقد شي متوارث من الاجداد نشرب لبنها بس أما اللحم لا وكلا :)

[ابا الصلابيخ]

صراحة حنا يا أهل نجد مانعرف عن لحم البقر شيئ
الحليب نشربة لكن اللحم ؟؟؟؟

[راعي الطعس]

يا الله من فضلك كله نعمه بس ما نشتهييه بنجد ولا ناكله لو هو بطعم الموز
والمعذره علي الصراحه

[المعي]

بالنسبه لي من فضل الله ..

ماعندي أي عقد ..
وماعندي مشكله في اكله
وعلى العكس اذا كان حسيل (عجل) صغير ستجد طعمه لذيذ جدأ

[عطيب ومايغيب]

والله ياخوي حنا بوسط نجد ماناكله ولايدخل بيوتنا
والقدر الي يطبخ فيه نرميه على طول هههههههههههه

لكن اعتقد شي متوارث من الاجداد نشرب لبنها بس أما اللحم لا وكلا :)

ياصحب هذا الرد الاسم با الانجليز ونا لايمكن افهم لو تسبني وللعلم انا ادرس ثاني ثنوي شرعي هههههههه

لايهم ولاكن جذبني اسلوبك با الرد ونا من اهالي القصيم على قولك وسط نجد

نعنم نحن لاناكل لحوم الابقار على الاطلاق ولو كانت همرجر ونحن لانعلم نأكلها

الغريب با الامر((الحليب والالبان والذبادي لايوجد عليها صور بقر هنا مربط البقره هههههه اقصد الفرس.....))

ويقال بعد لحم الخيل حلال عاد اتحدك تقنع الناس تأكال لحم خيول وعلىآ هل الحال ونقول كما قال ملك ملوك افريقيآ الى الامام زنقه زنقه بيت بيت لايمكن اكل بقر في نجد

[عطيب ومايغيب]

يا الله من فضلك كله نعمه بس ما نشتهييه بنجد ولا ناكله لو هو بطعم الموز


والمعذره علي الصراحه



ههههههههههههههههههه حلوه طعم الموز ياخي قل منجى جيزان شي قسم با الله تاكلها لو ويش

[صخب]

عندنا باقاصي الشمال ما ناكله يمكن لانهم مايعرفونه واغلب حلالهم الابل والغنم

بس انا هاليومين طحت به طيحه ..عز الله انا غافلين عنه لكن لذته شوي والا قصدير

اما مضغوط مايصلح

وترا لحم العجل مذكور بالقران في قصة ابراهيم عليه السلام

[1122334455]

فعلا انا جربته مضغوط بسم الله على الفضل

أما مقلقله صار مزبوط

[سحابة قبله]

شيبان القصيم الاولين والعجز اسألهم ياكلونها

واسألهم عن الفصيل

اما الان الحاشي لا يعلى عليه :)

لحم البقر لو تحطه لربعك ماراح يطقون خبر يحسبونه لحم حاشي

[عدد وحدد]

انا مأكله بس بعد ماقريت ردود الأعضاء تشجعت وان شالله بجرب اخذ لي كيلو يوم

[wafi4sa]

انا من اهل نجد
لا نكل لحم البقر لاسباب غير معروفة
واكثر اللي ما يأكل لحم لها اسباب نفسية فقط
ومن يقول ان البقر غير نظيف طيب لماذا نشرب حليبها بدون تردد
وعني جربت العجل البتلو خارج السعودية بصراحة لذيذ جدا
ولو احصل بتلو لاشتريته بدون تردد

ولو تجيب مفروم لحم بقري وتحط عليه بهارات وتسويه سمبوسة والله مادرى عنه
الذي يقول نشم ريحته
ولنا قصه بذلك على هذا التجربه مع واحد من الأصدقاء
وسلامتكم

[abu fares]

الامر لا يعدوا كونه أمور تربينا عليها وكل واحد يحب ما تربى عليه وينكر غيره


بالمناسبة


عملت في احدى القرى القبلية كان اهلها يكرهون السمك ويعيبون على من ياكله بينما يطيحون في التونة طيحت الويل


-----------------

النهاية اما لحم غنم والا بلاش

[ذعذآع]

وعليكم السلام ورحمة الله وبركاته
كلها انعام يا الله لك الحمد والناس اذواق ولا يتساون بالثقافه والعلم
بعض الردود تحس ان العضو متحجر ياكل الضب فصيل السحالي وجرابيع فصيل فأري ويكره العجل !!!
لا ويقول يكب ماعونه لا حول ولا قوة الا بالله وش هالبطر الله لا يبلانا هذا من اسباب النقمه والفقر

مع ان العجل اخف شحم وازكي ريح واسرع نضج من الغنم والجزور
وامرض القلب والضغط ما جت الا من الغنم لكن عاد وش تقول ؟!

ولله الحمد ما نكره شي حلال غنم حاشي عجل تيوس سمك دجاج سمك طيور يا الله من فضلك

اللي بالرياض انصحكم بمحلات روابي المرعى مزارعهم وعلفهم طيب والتجربه خير برهان

عافاكم الله

[mjjjed]

سبحان الله كلا على حسب ماتربى وتعود عليه وكلها انعام نحمد الله ونشكره
والعروف ان لحوم الضان والماعز اكثر دهون وكليسترول من البقر والابل

[* ابو باسل *]

ياخي كل العالم صارت تاكل لحم بقر الحين واولها ضهور مطاعم الوجبات السريعه وكلها لحوم ابقار ولايغرك بعد بعض مطاعم المشويات تقدم لحم البقر مشوي والكل يطلب لحم والله مادرى وش السالفه وعلى العموم لحم البتلو عز الله انه لذيذ وخاصه لاجاك مشوي ابعد وشمر وقل بسم الله .
وقال ايش قال نجد ماياكلونه ابد ياخي انا كنت اعرف واحد راعي ملحمه يماني انه يبيع لحم البقر على انه لحم حاشي وان اكثر زبائنه من اهل نجد لحم حاشي لحم حاشي وانه يضحك ويقول لحم بقر والله ماجبو خبره
طبعا يقصدون بدون عضم لانه مضبط له لحم بالكيلوا بدون عضم والكل يشرب مرق ماجاب خبر .
ويوم قالي عن هالكلام ماعاد جيته وعلمت الربع بوضعه مع العلم اني انا مااخذ من عنده غير من الحشوان المعلقه ياربع ياثمن ولا اخذت منه بالكيلوا ابد ولمعرفتي بولده من فتره طويله هو الي قالي يوم سألته عن الحم بعد ماشفت واحد اخذ منه .
وكل الي في الحاره عرفوا بالي صار وصار مشهور ببيع لحم البقر على انه لحم حشوان والى الحين والله انه ياخذون منه وتحصله معلق 4 الى خمسه حشوان ونها مايجي باليل ماعاد منها شي .

[أبوتركي ومحمد]

أخوتي الكرام لحم العجل الصغيرمن أفضل اللحوم ويسمى بالبتلو وكذلك بالحسيل ويجي لون اللحم فاتح وواضح أنه صغير في العمر وجربوه ومن جربه راح يدعي لي إن شاء الله وترى ماألوم اللي مايحبه والسبب رح أكثر محلات الجزارة والمقاصب وشوووف :confused::eek::no:نادراًماتجد لحم عجل0

[ابن القريات]

مادام انه حلال وش يمنع من أكله
لاكن مثل ان بعض اهل الجنوب مايحبون أكل الجمل
فبعض أهل الشمال لايحبون لحم البقر

[الخولاني]

يا زين سمبوسة العجل الصغير قسم بالله تضرب في الدماغ
لا والسليق حق لحمها علاج
واذا زينت منها قفر الله الله على الطعم

[بداية رحال]

البعض يقول ما نأكل لحوم الأبقار ويمكن هو قاعد ياكلها ولا يدري

مثل الشاورما والهمبرجر والمفروم في المعجنات والسمبوسة وغيرها كل ذي لحوم أبقار وانت قاعد تاكلها أجل على بالك تيوس ههههههههه

[ناصر- التميمي]

لحم البقر من افضل اللحوم وجربته بطرق عده
وللعلم المطاعم اللي تبيع ستيك ولابيتزا اغلبهم يستخدمون لحم البقر
فا وش الفرق ؟
اللي اتوقعه اننا ماتعودنا عليه فا بعضنا مايستصيغه

الف تحيه لك واول مشاركه بالمنتدا