شراء السيارات من الامارات

[عبدالله210]

اخواني الاعزاء
السلام عليكم
وش نصايحكم للي يبي يشتري سيارة من الامارات 2006
جكس ار؟
وين يروح؟اسعار المعارض هناك؟افضل الاسواق؟
هل فيه حراج مثلنا والا بس في المعارض؟
وتراي ماجيت الامارات قبل ولااعرف شي بالسيارات؟
نصايحكم ويعطيك العاافيه
تحيااتي

[هاوي الطيب]

مساك الله بلخير يا غالي اوووول شي في سيارات الامارات المستخدمه خاصه الجيووب يكوون ملعوب فيه يعني مفحط فيها طبعااا هذااا اغلب الجيوب سواء الاند ولا الباترول ولاكن اذا ربي وفقك وطيحك فيه واحد نظيف
طبعا الظاهر والله اعلم انه مافيه حراج بس اللهم يوقف سيارت ويعلمك كم انسلمت وايش شي تبيه تحت امررك

[عبدالله210]

افضل المعارض دبي والا الشارقة؟
اوقااات فتح المعاارض؟
طريقة التصدير والجمرك؟
شكرااا هااوي الطيب على الرد
تحياااتي لك
بانتظاار المزيد من اهل الخبرة

[فهدالاحمد]

نصيحه لك اخوي0قبل اسبوع كنت هناك مفيه فرق بالسعر
لاتعب حالك0والجيوب غاليه

[جي اكس ار2000]

اتصل على جوالي المغرب وان شاء الله افيدك بعض المعلومات

0500070343

[فرخ قطا]

وانا نفس السؤال ناوي اطلع للامارات
وادور باترول وشلون طريقة الدفع لازم اصرفهن ولا اي شي
شفت اسعارهن بالنت الصراحه مغريه نرجو الافاده

[قمة افرست]

السلام عليكم ورحمة الله وبركاته


نصيحة يااخوان من مجرب


لاتشتري من الامارات اي شي مستخدم
اغلب السيارات مرشوشه متعرضه لحوادث يتم التعديل فيها وطبعا الي يقدرون يبدلونه من التشليح زي باب او رفرف بحيث تبين رشة الوكالة يبدلونه غير اللعب بالعداد يتغير الطبلون كامل وموجود بالتشليح سيارات من اليابان يتم استيرادها وتشليحها لهذا الهدف
فنادرا تلقى سيارة ماجاها رش والمصيبة تلقى بعضها شاص معدل
وعذر طبعا اصحاب المعارض ان اي سيارة هناك لوجاها حكه بسيطه لايتم بيعها او تامينها حتى ترش
وهذا صحيح بس يستغلونه لايهام الي مايعرف
الورش الي بالشارقه وانا اتكلم عن الشارقه ومن تجربة شخصية
نصهم او كلهم الامن رحم ربي يعرفون بعض واذا فحصت السيارة يقولك سليمة نفس كلام صاحب المعرض
وطبعا فيه اتفاق بينهم ويتابعون اي ورشة تروح فالحذر الحذر من هؤلاء النصابه
ذمة لاتدور
طبعا النظيف سعره زي هنا واغلى
الاسعار عندهم
جي اكس ار مرشوش اما كامل او جنب ب100الف موديل 2007 فل كامل
2006 مايتعدى 80 الفالى 85الف
ولاكن المصيبة تلقى السيارة مفككه كامل وملصقه من كل جنب


الوقت من بعد صلاة العصر الى تقريبا 10 مساء بتوقيتنا
الشحن الى الرياض مع التخليص الجمركي البسامي حدود 1200
وزد علية اي مدينة ثانية


الشراء والشحن
اذا الله وفقك بسيارة وشريت سعرها النظيف زي هنا مافيه فرق يستاهل
تسوي وكالة بمحكمة الشارقة اودبي تقريبا تكلف 120 درهم للي بيخلص الاوراق ويشحنها
والمعروف البسامي بسمه يتم عمل الوكالة
والمعرض يقوم بتسليم السيارة
هذا اذا ماشلح منها شي الافضل بنفسك تسلمها
الجمرك
2006 حدود 2000 جي اكس ار
2007 يوصل 2800 تقريبا جي اكس ار
تاخذ اسبوع لين تصل الرياض
وفيه نقطه حاول تاخذ لوحات التصدير الاماراتية واخفها بالسيارة لان مايعطون السعودية لوحات عشان تاخذ راحتك بالحركة بالسيارة داخل السعودية


تروح بعد ماتستلم السيارة
المواصفات والمقاييس
تدفع 300 ريال بحسابهم رقم 049
والافضل تدخل موقعهم وتسجل معلومات السيارة برقم الشاص وباقي معلومات السيارة والمالك
ثم يعطيك الموقع رقم تدخله اثنا ءالتسديد وصور الصفحة من الموقع
وارفق معها ايصال التسديد
الاوراق المطلوبة
فقط فاتورة الجمرك وصورة بطاقة وايصال التسديد
وتروح بالسيارة ويكشفون عليها شغل روتيني واذا حبوا يعقدونك
يسالك عن طفاية حريق واذا مغيم تشيل التغييم بس نادر ماتصير لانهم موظفين ماشاء قمة بالادب خاصة فرع مكه الفحص للانوار هذا الي شفت
بعدين تروح اقرب منفذ جمركي اي مطار او ميناء وتعطيه اوراق المقاييس الي اخذتها
ويعطيك بطاقة جمركية تروح الفحص
73 ريال تقريبا هذا اذا ماطلع مشاكل بالسيارة
ثم نقل ولوحات تكلف بحدود 700 مع التامين


الشاهد يااخوان نصيحة من محب لكم
مااقول لاتشتري من الامارات ولاكن لاتثق فيهم ابدايستغلون طيبة السعوديين والعالم تعتقد ان الاسعار فيها فرق
والفرق ليس نظافة بل حوادث اصابت السيارات
يعني شي يترقع وشي مايترقع
والكلام ينطبق على جميع السيارات كامري لكزس
والحجة التامين بالامارات مايصير على السيارات الي فيه صدمه لوبسيطه فنضطر نرشها


نقطه اخيرة
العملة طبعا فرق العملة 100الف بحدود 2000 ريال تقريبا او اقل وهذي امرها بسيط
تتفق لو حبيت تشري بالسعودي تقول بدفع لك سعودي كذا ويقبل
واذا اعجبتك سياره نزل مبلغ فيها لاتوافق على طول وتشوف السعر رخيص وماتصدق بيوافق لاتخاف
طبعا الي بيسافر بالطيران وبياخذ معه كاش عشان يختصر الوقت مثلا عن التحويل وفرق العمله
لازم يسجل المبلغ وهو طالع بجمرك المطار وياخذ وصل لوفرضا ماشريت وتعرضت لتفتيش هناك بيسالون من وين هالمبلغ
طبعا من فوق 60 الف ريال سجلها

اي شي يحمل علامة استيراد من الامارات لازم تركز كثير بموضوع الفحص وهذا مايعني عدم وجود نظيف لاكن احذر وافحص فحص دقيق




كفانا الله واياكم شر النصابين

[0أبومحمد0]

انا جاي من الشارقه الاسبوع اللي راح
شريطيتهم عراقين وصخين
وصراحه ما شفت فرق في الاسعار يستاهل

[ديرتي نجد 999]

الأمارات قبل عشر سنوات كنا نحصل سيارات زينه

أما الآن نصيحتي اشتر من ديرتنا -- ابرك وأفضل مئة مرة

وأنا انصح اي سيارة مصدرة من الخليج لا تحرص على شرائها

[كاشت بالمريخ]

قمة افريست ماقصر وجزاه الله خير
..
وكلامه منطقي..لا ابعد حد
..

[sbrit]

وانا يشباب ناوي اروح اجيبلي دينا من هناك الي عنده خبره يعلمناء تكفون

[عزيز الشمري]

انا مع قمة افرست وكلامة صحيح 100%
والله يعطية العافية...
وعبدالله 210 الله يرزقك من واسع فضله

[عبدالله المطيري]

نصيحة :

اللي بيصدر الايام هذي طبعا اذا كان يبي يترزق الله عليك (بالفورتشنر )

اغلبه استعمال اجانب ماجاه كرف انا اعرف واحد له اكثر من الشهرين مزعجنا بالوكالات

على اساس يصدر بأسامينا ويقول فيها خير اقل سياره كسب فيها 10000 ريال

هذا والله اعلم

[سطام ابو سعود]

كلام الاخوان صحيح عن تجربه ولله نصابين الا من هداء لله
اخوي الي تقول الفوتشنر وشي هاذي وكم اسعاره نورنا لله ينورك

[PAJERO]

كلام الاخوان وافي وما قصرواااا
انتبهو من معارض الشارقة سيطر عيلها شلة عراقيين
الله اعلم بتصرفاتهم وحيلهم
عليكم بابو ظبي والعين
ولا من الديرة احسن واحسن

[دروب العارض]

ايش الا صاير في سيارات ميتسوبيشي باجيرو ..

يقولون ان فيه احد وكلاء الامارات باع الباجيرو فل كامل في الرياض بــ 115 الف بس ..

وضرب السوق هنا بقوة ...

[رقبة حاشي]

ايش الا صاير في سيارات ميتسوبيشي باجيرو ..

يقولون ان فيه احد وكلاء الامارات باع الباجيرو فل كامل في الرياض بــ 115 الف بس ..

وضرب السوق هنا بقوة ...
وانت الصادق ب 114000 ريال 2011 عند المسند بدون ضمان
والوكاله 126000ريال

[قرناس سبيع]

مساك الله بلخير اخوي انا كلامي ان الامارات اغلب مواترهم جيوب وطبعن حقت تفحيط وترهيم اا انت ناوي تشتري سياره روح لقطر وشف المواتر تقبل مررورري والله يرزقك بالموتر الي نضيف وانت تستاهله

[Vortech]

قطر اقرب ولكن مدري يمكن اغلى من الامارات ولكن الشئ الاكيد انه الفحص ما يتفق مع المعرض.

في امان الله...

[جلمود الحره]

الأمارات قبل عشر سنوات كنا نحصل سيارات زينه

أما الآن نصيحتي اشتر من ديرتنا -- ابرك وأفضل مئة مرة

وأنا انصح اي سيارة مصدرة من الخليج لا تحرص على شرائها


مابعد هالكلام.................. والله انه صادق وتكفون كبوا هالديره والله انك تنقهر يوم تشوف ابناء ديرتك يلعبون عليهــــــم بعض الجنسيات العربيه المرتزقه شي يقهر لا وبسعر اغلى من هناء والعيشه نار وكذللك السكن
ياخوي مالها داعي كل هالمرمطه خلك تدفع فرق وتريح نفسك والله يحفظك

[مجالس الرجال]

قطر هي اللي به اللعب بالمواتر
الامارات اذا انت ماتملك الخبرة بالفحص فلا تروح علشان فرق كم الف ويمكن يغشونك
طبعا فيه سيارات معينة مثل البرادو والفورشنر تلقاه مع اجانب ولا جاه لعب اقصد ترهيم
لكن يبقى البدي هو المشكلة

[alboss777]

السلام عليكم

طويل العمر كاتب الموضوع و الردود - كلامك صحيح 100% بالنسبه للمعروض من سيارات في معارض دبي و الشارقه و لكن بشروط .
- الذي يبحث عن سياره رخيصه فقط بغض النظر عن الجوده هو من يشتري من المدعوم او المشطوب الذي تم اصلاحه .
- اما الذي يبحث عن سياره مناسبه من حيث الجوده و السعر فايضا قد يتعرض للتلاعب الا في النادر.
- اما من يبحث عن الجوده فهناك معارض لا تبيع الا السيارات النظيفه فقط و السعر هنا يكون مرتفع .
لا تفحص السياره ابدا في الحاراج او محلات الفحص بالكمبيوتر حتى لو كان صاحب المحل شايل مصحف و يحلف لك عليه - 98 % نصابين - و الغمزه تكفي كي تكون سيارتك ما فيها شيء.

من الاحسن لك ان تفحص في محلات الفحص الحكومي فقط و الفرق 100 درهم فقط
بمعني في الحاراج الفحص من 100 درهم الى 150 درهم و الفحص مشكوك فيه .
الفحص الحكومي 250 درهم يطلع لك كل عيوب السياره من المصد الى المصد و هي جهة حكوميه لا دخل لها بالمعارض .

اذا اتفقت مع بائع فقط اذكر له انك تريد الفحص لدي المرور و اذكر له الدفع بعد الفحص فقط اذا كانت سيارته ما فيها شيء يوافق و اذا لم يوافق او قال افحص فيالحراج اعلم ان فيها شيء.

اماكن الفحص في دبي :
مرور القصيص / مرور العوير
فحص اينوك / فحص الامارات

اماكن الفحص في الشارقة :
قرية التسجيل

نوع الفحص : اسمه الفحص الشامل
و هو يختلف عن فحص التسجيل او التسفير فحص التسجيل قيمته 100 درهم
الفحص الشامل قيمته 250 درهم

و اذا وفقت و كانت السياره ما فيها شيء - تظهر لهم ورقة الفحص الشامل و يسوون لك خصم على التسجيل 50% من قيمة الفحص و تدفع 50 درهم فقط على التسفير .

و اذا كانت السياره باوراق الجمارك اطلب من البائع المقاصه فهي تغنيك عن دفع الجمارك في السعوديه مرة اخرى .

و دائما اتفق مع البائع على كل صغيره و كبيره قبل الذهاب للفحص و الاحسن لك انك تكتبها في ورقه :

فحص السياره : معروف على المشتري .
تسفير او تحويل السياره : على البائع الا اذا اتفق الطرفان .
ورقة المقاصه : على المشتري قيمتها 200 درهم

و دائما لا بد ان تكون يقضا و فاتح مخك - لانه لا يمكن لا حد ان يضحك او ينصب عليك الا اذا انته وافقت على ذلك .

و اذا احسست بشيء من النصب او الغبن فلا تتردد بطلب الشرطه . و هم دائما يكونون بصفك و لا تتنازل عن حقك ابدا .

اطلب دائما وصل عن اي مبلغ تدفعه حتى لو كان بسيط.
احتفظ دائما بالايصال الذي يعطى لك عن الدفع .

و لا تنسى دائما انت من يقرر ماذا تريد و ليس البائع .

[سآبق الطير]

نصيحه يا خوي لا تروح

اذا مره مصمل أبحث في النت وفي المواقع الامارتيه تحصل شيء نظيف
بس سعره لك عليه مالك فيه مرابح

[الرررحال]

نصيييييييييييحة من أخ

لاتشتري من الامارات
قسم بالله كذب ولعب عيني عينك

الاسبوع الماضي رحت معارض دبي وشفت لي اف جي وجاز وقلت بفحص
قال صاحب المعرض وفر دراهمك الموتر ماعليه كلام وقلت لابد من الفحص

والله ثم والله يوم فحصته لقيته بدون دبل الدبل مفكوك بالكامل والرفرف مغير

لاتشتري منهم الا جديد وبيني وبينك من هنا ازين وأريح.