مناطق طرح الطيور

[فهد الجهني]

السلام عليكم اخواني اعضاء منتدى مكشات هاذا اول مموضوع لي طبعا زي منتو عارفين ان كل موسم يجون صقارين مبتدئين وحنا نبي نساعدهم شوي وندلهم على مناطق هجرة الصقور وانا اول واحد ببدا بالمناطق الي اعرفها
1 الشعيبه
2 البلويه
3 الحره
4 الحنو
5 المجيرم
واتمنا من الاخوان الصقارين مساعدت المبتدئين

[عاشق جلاد]

الله يحييك وبين اخوانك وربعك
وتفيد وتستفيد ان شاء الله

تقبل تحياتي :

اخوك عاشق جلاد

[برق شمالي]

من الشمال
1- الحماد من حزم الجلاميد الى حدود الاردن - الاغلب حدود طريف
2- البردويل
3- اشعيب ابلقور
4- السليمانية
5- ....

[مجهم]

السلام عليكم ورحمه الله وبركاته
مشكور على الموضوع وفعلا لازم نعرف اماكن الطيور وبالنسبه لي
بصراحه ما اعرف اماكن الطرح الي بالمملكه بشكل دقيق لاني كنت بالكويت طول حياتي ولا ادل اي موقع غير
الحفر فايليت تفيدونا يا شباب وفعلا موضوع يفيدنا كلنا
وتقبلوا تحياتي للجميع

[الرووقي511]

الساحل كله اماكن طرح من حقل الى جيزان وانا اعتبر منطقة العبور الضيقه صلا الشعيبه لان الطيور تتعداء جده وعلى طول على برق صلا وشاطي الشعيبه والعام الشياهين اللى طرحت فيه واجد وحنا نبي اماكن الطرح فالشمال جهت الحفر غير الحماد الشمالى اللى معروف ان طيره نادر

[فارس الحربي1]

على حسب ماعرفه عندا بالحفر من جهت الشمال لحدود العراق والله اعلم

[خطاف_دبي]

حد يعرف مكان ف الامارات ؟؟؟؟

[راعي تويوتا]

ماعرفه والله الله يوفك ان شاء الله

[الرقعي]

والله الطير ماله مكان محدد يحوم ولي طاح الي برسه وبرد نزل اقرب رجم

[إبتسمـ^_^]

الله يعطيكم العافية

اخواني احد يعرف اماكن طرح بالشرقية ؟

و الله يرزقكم بالنادر

[اباالديبان]

السلام عليكم الطرح في حماد طريف

[اورنس الشمري]

شمال الدبدبة بس كلها سلاح الحدود

[راعي الطييب]

السلام عليكم ورحمه الله وبركاته

بالنسبه لطير ماله مكان محدد وتضمن انه يعبر عن طريقه هذا المكان


الطير يجيبه البراد و الصيد الكثير

[مساح الريضان]

بالكويت وين اماكنها ؟؟

[alazre]

الصقور في الشرقيه
كل مكان بس بعيد عن الديره وقريب من بحر مثل×
جزيرة بوعلي
الخرسانيه
جوسمين×
الزور وانت رايح
السفانيه
منيفه × ×
(منقول)

[الباتريوت]

اسمحو لي بالمشاركة بالشرقية الشمالية التالي
القرعة وهي قلمة خالد والمالحة والعمودة براس مشعاب والظلفين بين السفانية ومشعاب
وطير العمودة مايجيك الا الطريق القاطع من الشواهين
وربنا يوفق الجميع

[ابن الاصيل]

يخوي الطير ماله عنوان هذي ارزاق اذكر قبل جارنا دخل عليهم بالبيت وباعوه بغالي هذي ارزاق مكتوبه

[ابوفوز]

يخوي الطير ماله عنوان هذي ارزاق اذكر قبل جارنا دخل عليهم بالبيت وباعوه بغالي هذي ارزاق مكتوبه

ولكن اخي الطيور الجارحه تلاحظ تنزل على اماكن معين مثل القاع والساحل على البحر
ونلاحظ ان الهجره خطوط تبدا من الشمال الى الجنوب وحسب خبرتي ابتدي من الشمال بغض النظر عن الحماد وهو شاسع لا يمكن تحديده .
اولا نبدا بمقناص الجفر بالاردن الطير بالحومه يشوف القاع بالجفر ويحسبه ماء وينزل والجفر مقناص بالسابق يتخيرون بالاحرار والعجيب بمقناص الجفر انه سهل لا يوجد فيه لاحجر ولا شجر تشوف الطير من بعيد كبير والحصاه الصغيره تشوفها كبيره .
بعد ذلك نتجه لمقناص القميله ومن ثم الثرياء وهبان والحنو واتوقع اقوى موقعين لطرح الوحوش من الطيور وهي خطوط هجره قوية جدا المجيرمه و الحنو
واللي يبي يقنص لازم ما يتعب على الفاضي يروح اماكن فيها خط هجره