حرارة كابرس 2002

[حاوي الطيب]

سلام عليكم ورحمة الله وبركاته
هلا بالغالين جميع
عندي كابرس LS موديل 2002 انا فاكه وكاله

ذبحني بالحرارة والورش بس يقولون المراوح غيرها طيب مو مشكلة غيرتها وماتكمل 3 شهور الا تخرب ( مراوح اصلي ) للحين بسنه مركب 3 مرات

الحين يقولون غيرها انا مو مقتنع بكلامهم وابي رايكم ونبدأ القصه

السيارة بدون مكيف مافيها مشكلة حرارتها طبيعيه في الغالب ونادرا ترتفع
مع المكيف فيها حالات يعني لو خط سريع المشكله يمكن ماتطلع او تتأخر
لو وسط زحمة ترتفع الحرارة بسرعه
لو طولت السيارة بالدوران ترتفع الحرارة

هنا اتوقع المشكله بالهواء من المراوح لان السيارة وهي تمشي تعوض الناقص من المروحه

طيب نكمل

اغير المراوح وتخرب عقب 3 شهور !!
يعني المراوح مافيها مشكلة في شيء يخربها اعتقد انه كهرب يعني ممكن التماس او غيره

كل الورش يقولون غير مراوح وفحصت كمبيوتر وقال مراوح وانا ماقتنعت
شيكت على الفيوز لقيت 2 محترقين وغيرتهم

وغيرت كتاوت المراوح الي يمين بالكبوت 2 رمادي و 1 ابيض
وماتغير شيء وماتوقعت يفرق شيء اصلا بس قلت يمكن

تعبت بجد تعبت وخسرت ولا ابي استمر بمسلسل غير مروحه وارجع بعد 3 شهور لنا
والورش وش عليهم اسهل شيء غير ونشوف

الجد الموتر له معي 9 سنين حرارته صيف وشتاء ماتختلف
لين قلت مره بمجلس هالكلام وعقبها ماركدت ابد الحرارة
بديت اقتنع انه عين بجد وانا لي سنة اقول عين على وشو موتر قديم وعادي

تكفون الفزعة يالنشامى

[ماون ماركز]

أيش اللي يخرب بالمروحة .. توقف مثلا ما تشتغل ؟
واذا كانت جديدة اول ما تركبها .. الحرارة تكون كويسة ؟

اقتباس = الجد الموتر له معي 9 سنين حرارته صيف وشتاء ماتختلف
لين قلت مره بمجلس هالكلام وعقبها ماركدت ابد الحرارة
بديت اقتنع انه عين بجد وانا لي سنة اقول عين على وشو موتر قديم وعادي

العين حق مافيها كلام ..

جاوب على سؤالي عشان أعطيك تجربة يمكن تفيدك !

[حاوي الطيب]

هلا بك اخوي

ايه توقف ماتشتغل المروحه ولما تطقها مثلا بحديدة تشتغل
وبكره تجي تشغل تشتغل من نفسها

اول ماركب المراوح جديدة الحرارة تكون كويسه بس ماتطول شهر او اثنين
ويصير لازم اطفي المكيف ونرجع للقصة القديمة

[كنز المشاعر]

اخي الكريم انا لدي كابرس 2002 ومراوح الكابرس في حال انك بدلتها لابد ان تتبرمج على كمبيوتر السيارة يعني الكمبيوتر يتحكم بالسرعات اللي بالمراوح فالكثير يقوم بتركيب المراوح ولا يعلم ان لها برمجه على كمبيوتر السيارة لانه اذا لم تبرمج تعطي سرعه واحده فقط وهي الاسرع ولكن اذا تبرمجة تعطي سرعات على حسب احتياج السيارة للتبريد والتي بدورها تتسبب في عطال المروحه واذا كان هناك اللتماس في الاسلاك ثق ثقه تامة ان المراوح لا تستمر اكثر من يوم ولك طريقة تتستطيع برمجة اي شي تركبه بالسيارة وهي انك تفصل اصبع البطارية لمدة لا تقل عن ثمان ساعات بعدها تشبكه وراح يتبرمج اي شي بسيارتك


ان شاء الله اني افدتك

[بدوي جنوبي]

مرواح الكابرس غاليه
شف لك بديل اما مرواح سوبارو او مرسيدس

[قناص الأشهب]

أذا ما نفع كلام الشباب غير الكتاوت بكتاوت الماني روح قطع غيار المرسيدس وسئلهم بعلمونك علا طول بالمناسب هو الوحيد اللي أصلي ويتحمل كثير من الشباب جربو ونفعت

[ماون ماركز]

ركب مروحة جمس .. خذ لك مروحتين و وصلها مباشرة مع السويتش بواسطة كتاوت

وأفتك من الكمبيوتر ومن خراب مراوح الكابرس

أنا مركبها على فورد .. ترهيم وشغالة لها 4 سنوات تقريبا لا صيف ولا شتاء
وحدة مع التشغيل .. والثانية بمفتاح يدوي (فاصل)

ولا فيها الأ العافية .. ترن ليل نهار ..

تحياتي

[حاوي الطيب]

اخي الكريم طريقة تتستطيع برمجة اي شي تركبه بالسيارة وهي انك تفصل اصبع البطارية لمدة لا تقل عن ثمان ساعات بعدها تشبكه وراح يتبرمج اي شي بسيارتك


ان شاء الله اني افدتك

معلومة حلوة نفصل الاصبع 24 ساعة يارب ينفع
ولو غيرت المراوح راح افصله 24 ساعه ونقول يارب

[حاوي الطيب]

مشكورين

غاليه معك حق ياخوي
الكتاوت اغيره كامل ؟؟ ياليت توضح
المراوح على السويتش فيها نقطتيني
الاولى صوتها مرتفع
الثانية وهي الاهم لما الكمبيوتر مايسيطر على الحرارة اعرف انه مايسمح للمكيف يشتغل يعني يصير المكيف بدون كمبرسر

[ماون ماركز]

طريقة تتستطيع برمجة اي شي تركبه بالسيارة وهي انك تفصل اصبع البطارية لمدة لا تقل عن ثمان ساعات بعدها تشبكه وراح يتبرمج اي شي بسيارتك




ان شاء الله اني افدتك


كل السيارات والأ نوع محدد يالغالي ؟

[كنز المشاعر]

كل السيارات والأ نوع محدد يالغالي ؟

اغلبية السيارت الامريكية لما تفصل البطارية لمدة ثمان ساعات او اكثر وترجع تشبكها اللي تم تركيبه بالسيارة ولم يتعرف عليه الكمبيوتر راح يتم التعرف عليه بعد شبك البطارية والله اعلم

[حاوي الطيب]

لا اله الا الله محمد رسول الله

تصدقون 8 ساعات واجد كل ماجيت افصل البطاريه طلع لي مشوار
الليلة بفصلها وارقد والصبح نشوف
وربي يسهل الامور

[كنز المشاعر]

بالتوفيق ان شاء الله حبيب قلبي

[maxima20009]

ايي والله وانا بعد السيارة ماعبيت لها ماي لمدة سنة وبعد ماقلت ذا الكلام اليوم الثاني بدأ الحرارة تلعب فيني وربي كرهت السيارة وربي

[بوراشد]

قول الحمدلله وعسى الله يعطيك من خير السيارة ويكفيك شرها أخوك صابته عيون بخمس مواتر وصحته ويا الله من فضلك رضى ولله الحمد وعسى الله لا يحرمنا الأجر

دائماً إياك ولعن الشيء فليس المؤمن بلعان غير حسب ما فهمت يذهب البركة من الشيء والله أعلم

[شعيب المسمى]

اتوقع يبيلك كهربائي فاهم يفحص الكهرب والكويلات .. عموما كان معي مثل موترك خربت مروحه ولحقتها اختها بيوم رحت للصناعيه القديمه بالرياض لمحل الجنوب او غيره من التشاليح عندهم مراوح مستعمله يلقطونها من التشاليح بتلقى عنده خله يطابق الدينمو مع اللي معك ولاتدقق بيقول حق كامري او دايو كلها سوا من نفس الشركة

[الرميح الحربي]

كهرب زايد شيك على الفيوز

[oO-shrqawi-Oo]

اذا المشكله لازالت موجوده خبرني