المساعد الشخصي الرقمي

مشاهدة النسخة كاملة : مــا رأيكم بالقعود


علي العالى
20/06/2011, 10:22 PM
السلام عليكم
كيفكم ياأعضاء مكشات الكرام..
أبغى رأيكم بالقعود عمره 3سنوات كفحل
وكم يسوا
له تعريف قوي لكن أبغى رأيكم قبل أن أعطيكم تعريفه..
ولكم الشكر ..


http://www.yy44.net/xzgi/lPe97667.jpg (http://www.yy44.net/)


http://www.yy44.net/xzgi/YwY97667.jpg (http://www.yy44.net/)
قزيزالنعام
20/06/2011, 10:38 PM
مرحبا اخوي القعود لابس فيه
العمر طيب وراسه وسط شوي ماله اسبال ولكن الاصل يغير النظر
واعطيه 50%100
ابو الشبرميات
20/06/2011, 10:51 PM
وعليكم السلام ورحمة الله وبركاته

ما شاء الله تبارك الله

القعود ما هوب واضح الصور ما خدمته بالحيل

لكن من مزاياه اللون والوبرة والاذن طيبات

الغارب والرقبة والسبال وسط

واذا القعود وراه اصل لاتفكه الا بعد ما تشوف انتاجه

وعسى ربي يرزقك منه فوق ما تتمنى

,,,
شخابيط.
20/06/2011, 11:08 PM
علمنا بساسه من امه وابوه ونعطيك الراي يصلح ولا مايصلح
راعي العشاير
20/06/2011, 11:09 PM
ماشاء الله تبارك الله

البعير يعود الاصله وساسه مايهم الشكل
والله من بعير شكله مووووقف وانتاجه قصب ومن بعير شكله ردي وانتاجه يداحم في شبوك التحدي

والله يرزقك من واسع فضله
SS1
21/06/2011, 12:51 AM
القعود بشكل عام وبدون التدقيق في بعض العذاريب البسيطه طيب ويصلح فحل بنسبة 80%

ولكن انت مايهمك الشكل كثر مايهمك الانتاج

ولكن الناس الان تتجه للفحول الزيان المنتجه كاسرع وسيلة لضمان انتاج البعير وجودته

ولكن اذا الفحل هد نفسه على قولتهم بزينه وطيب انتاجه ياسلام وهذا المطلوب
محب الخيال
21/06/2011, 02:45 AM
القعود ما هوب واضح الصور ما خدمته بالحيل

لكن من مزاياه اللون والوبرة والاذن طيبات

الغارب والرقبة والسبال وسط
أميرالعشاق
21/06/2011, 03:00 AM
ماشاء الله تبارك الله...وأترك التعليق لأهل الخبرة.....وفق الله الجميع
سامي ابوعلي
21/06/2011, 10:49 AM
القعود هجر ، عرقوبه طيب ، رقبته قصيره ، راسه صغير وماله سبال ، وخشمه قصير ، على شكله الحالي ماينفع فحل ، وان كان اصله زين جرب انتاجه واحكم.... ولك تحياتي
علي العالى
21/06/2011, 09:10 PM
بيض الله وجيهكم جميعا
وماقصرتوا ورحم الله ولدينا ووالديكم وجميع المسلمين
وشكرا على أرائكم وتفضلكم..

القعود ولد الشيخ فحل ابن ملافخ وجده الشيخ فحل الأمير سلطان بن محمد
وأمه هلاله نار على علم معروفه
والله يكتب لنا ولكم الخير
وبنفحله إن شاء الله ونشوف إنتاجه إن الله أعطانا عمر .
محمد الظاهري
22/06/2011, 02:42 AM
الله يطرح فيه البركه
وفي نظري انا اشوفه انه وسط عادي
لئن فيه اجزاء في جسمه
لم تكتمل للزين
عندك راسه وسط لئن هامت الراس
والعرنون ماهو نازل او طويل
والغد
صغيره والسيف وسط
والغارب كذالك
والنحر اقل
والروك ماهو كل هاذا
وسنامه متوسط في جسمه او متراجع بنسبه قليله
انا اشوف انك لا تستعجل على تفحيله
إلا اذا كان سلاله طيبه وام طيبه ونسل طيب
هاذا غير
لئن عندنا فحول معروفه
وهي من سلاله الباتل الفحل المشهور
اعرف ناس ضربو من عندنا وانتاج وسط
لئن الناقه لها دور
ووقت الضراب له دور بعد

اتمنى لك كل خير
تحياااااتي
هاوي الجوف
22/06/2011, 03:41 AM
مشالله تبارك الله فحل طيب ومكحل ومزيون واقيمه 10 من 10
صاحب السعاده1
22/06/2011, 07:40 AM
فحل طيب مواريه زينه واعتقد ان الصوره ماخدمته ودائما
التصوير يختلف عن الطبيعه
ماشاء الله تبارك الله
علي العالى
22/06/2011, 05:17 PM
الله يجزاكم خير
ويعطيكم العافيه