هاوي عبث
21/06/2011, 10:26 AM
السلام عليكم ورحمة الله وبركاته
عندي لكم سبحونه كانت جدتي الله يغفر لها ويرحمها ويضيفها رحمتة تسبحنها علينا
في الليل كنا ننام في السطح (( الطايه )) ونفرح متى بس تجي ونلتم عليها يازين ذيك الايام
السالفه تقول كما كانت ترويها لنا الجده : هاك الواحد والواحد الله في سماه العالي وكل ابليس مخزيه الله
كان فيه هاك الفقير اللي يكد على حماره - اعزكم الله – ليقتات لعياله تورد الماء لذا ويحمل غريضات ذيا
وعلى ها الحال وكان عايش ومستور رغم القل كان حامد لربه وشاكر واحيانا تمر الايام مالقا شي يجيبه للعيال
المهم في يوم من الايام وهو معود لبيته هو وحميره ويحصل له ذيك الشاة السمينه وكان ضرعها مليان بالحليب
وهو اللي يسأل من مضيع له شاة من فاقد له شاة مالقا أحد قال الحمد لله هذي عطيتن من الله لي ولعيالي
وهو اللي يجيبها للبيت يوم دخل طارت عيينات الحريمه والعيال من الفرحه وش ذا يا ابو فلان قال :
رزق ساقه لنا الله . قومي احلبي لنا منها واحمدي الله .
المهم ذا الشاة قعدت عند خوينا فتره وكانت تدر لهم حليب طيب وكثير رغم ان العلف اللي يجيبه لها قليل
الا ان صحت الابووعياله زانت وسمنو على حليبها وفي يوم من الايام ...
كانت المره حول المغرب تحلبها وهي اللي يعورها بطنها وتلفت الا ماعندها احد
لا العيال ولا ابوهم وهي اللي تاخذ راحتها تطلق الصوت – اعزكم الله - يوم انتبهت للشاة انها تضحك ضحك
غريب كنه ضحك آدمي .. المره جفلت منها وسوت نفسها ما انتبهت كملت حلبها ودخلت البيت .. يوم جاء
ابوعيالها قالت له : اسمع يا ابو فلان – الاسم مايحضرني نسيته والله - انا شفت في الشاة شوفتن تروع
وابيك تردها مكان ما لقيتها .. قال ابد هذا رزق من ربي ولانيب راده هذي اوهام اذكري الله يا مره
وتعوذي من ابليس لكن الحريمه موجستن خيفه ولا ارتاحت ابد قالت اما انا ولا الشاة في البيت
المهم المره خذت عيالها وراحت في بيت لاهلها الله يغفر لهم وسكنت فيه وكان عندها جار يقاله أبو علي
جار لهم من فتره ويعرفهم ويعرف اهلها اول وكان نعم الجار .
وفي اليوم اللي طلعت فيه المره من البيت في الليل .. دخلت الشاة على الرجال وهو نايم يوم فز وارتاع
منها ويسمي بالله ويذكر كلام ام عياله . قامت الشاة تكلمه قالت له انا ما اغذيتك انت وعيالك كذا ابيكم
تسمنون وآكلكم بس تخير ابداك من وين يوم انه دكته الندامه ليتني طعت ام العيال وهي اللي تاكله
وراحت تدور على العيال وامهم وعرفت مكانهم من ريحة حليبها المميز كانت تشمه عن بعد ..
وصلت للبيت اللي فيه المره والعيال وطقت الباب .. الحريمه تحسبه احدى جيرانها يوم فتحت
الا والله الشاة وهي اللي تدفر الباب وتدخل .. قالت يالله عطيني احد العيال بتبدا به .. المره فطينه
قالت لها ابشري وهذا حقك اغذيتينا وماقصرتي الا وش صار على ابو فلان : قلت اكلته خلاص والدور لكم
قالت لها ابشري بس وش رايك قبل ماتاكلين وليدي الاول نرقص لنا شوي ونستانس .. قالت الجنيه زين
قالت الحريمه يقولون ان غناكم ورقصكم زين مره وريني وقامت الجنيه ترقص وتصفق وتهيجن
يوم قضت .. قالت لها المره الحين دوري بوريك رقصنا وقامت ترقص وتصفق المره باعلى صوتها
وتقول :
يا أبو علي يا جارنا = يا شوفتن في دارنا
ترقص وتطق الغما = تبي حدا عيلانا
الين سمعها أبو علي وفهم المقصود .. وهو يطب من السطح ويسمي ويتعوذ منها ويعطيها الشوزل بين عيونها
وتسلم الام والعيال .. وتمت سالفتنا اليوم علها نالت اعجابكم
وسامحوني على السرد الرديء
غفر الله لجدتي واموات المسلمين
عندي لكم سبحونه كانت جدتي الله يغفر لها ويرحمها ويضيفها رحمتة تسبحنها علينا
في الليل كنا ننام في السطح (( الطايه )) ونفرح متى بس تجي ونلتم عليها يازين ذيك الايام
السالفه تقول كما كانت ترويها لنا الجده : هاك الواحد والواحد الله في سماه العالي وكل ابليس مخزيه الله
كان فيه هاك الفقير اللي يكد على حماره - اعزكم الله – ليقتات لعياله تورد الماء لذا ويحمل غريضات ذيا
وعلى ها الحال وكان عايش ومستور رغم القل كان حامد لربه وشاكر واحيانا تمر الايام مالقا شي يجيبه للعيال
المهم في يوم من الايام وهو معود لبيته هو وحميره ويحصل له ذيك الشاة السمينه وكان ضرعها مليان بالحليب
وهو اللي يسأل من مضيع له شاة من فاقد له شاة مالقا أحد قال الحمد لله هذي عطيتن من الله لي ولعيالي
وهو اللي يجيبها للبيت يوم دخل طارت عيينات الحريمه والعيال من الفرحه وش ذا يا ابو فلان قال :
رزق ساقه لنا الله . قومي احلبي لنا منها واحمدي الله .
المهم ذا الشاة قعدت عند خوينا فتره وكانت تدر لهم حليب طيب وكثير رغم ان العلف اللي يجيبه لها قليل
الا ان صحت الابووعياله زانت وسمنو على حليبها وفي يوم من الايام ...
كانت المره حول المغرب تحلبها وهي اللي يعورها بطنها وتلفت الا ماعندها احد
لا العيال ولا ابوهم وهي اللي تاخذ راحتها تطلق الصوت – اعزكم الله - يوم انتبهت للشاة انها تضحك ضحك
غريب كنه ضحك آدمي .. المره جفلت منها وسوت نفسها ما انتبهت كملت حلبها ودخلت البيت .. يوم جاء
ابوعيالها قالت له : اسمع يا ابو فلان – الاسم مايحضرني نسيته والله - انا شفت في الشاة شوفتن تروع
وابيك تردها مكان ما لقيتها .. قال ابد هذا رزق من ربي ولانيب راده هذي اوهام اذكري الله يا مره
وتعوذي من ابليس لكن الحريمه موجستن خيفه ولا ارتاحت ابد قالت اما انا ولا الشاة في البيت
المهم المره خذت عيالها وراحت في بيت لاهلها الله يغفر لهم وسكنت فيه وكان عندها جار يقاله أبو علي
جار لهم من فتره ويعرفهم ويعرف اهلها اول وكان نعم الجار .
وفي اليوم اللي طلعت فيه المره من البيت في الليل .. دخلت الشاة على الرجال وهو نايم يوم فز وارتاع
منها ويسمي بالله ويذكر كلام ام عياله . قامت الشاة تكلمه قالت له انا ما اغذيتك انت وعيالك كذا ابيكم
تسمنون وآكلكم بس تخير ابداك من وين يوم انه دكته الندامه ليتني طعت ام العيال وهي اللي تاكله
وراحت تدور على العيال وامهم وعرفت مكانهم من ريحة حليبها المميز كانت تشمه عن بعد ..
وصلت للبيت اللي فيه المره والعيال وطقت الباب .. الحريمه تحسبه احدى جيرانها يوم فتحت
الا والله الشاة وهي اللي تدفر الباب وتدخل .. قالت يالله عطيني احد العيال بتبدا به .. المره فطينه
قالت لها ابشري وهذا حقك اغذيتينا وماقصرتي الا وش صار على ابو فلان : قلت اكلته خلاص والدور لكم
قالت لها ابشري بس وش رايك قبل ماتاكلين وليدي الاول نرقص لنا شوي ونستانس .. قالت الجنيه زين
قالت الحريمه يقولون ان غناكم ورقصكم زين مره وريني وقامت الجنيه ترقص وتصفق وتهيجن
يوم قضت .. قالت لها المره الحين دوري بوريك رقصنا وقامت ترقص وتصفق المره باعلى صوتها
وتقول :
يا أبو علي يا جارنا = يا شوفتن في دارنا
ترقص وتطق الغما = تبي حدا عيلانا
الين سمعها أبو علي وفهم المقصود .. وهو يطب من السطح ويسمي ويتعوذ منها ويعطيها الشوزل بين عيونها
وتسلم الام والعيال .. وتمت سالفتنا اليوم علها نالت اعجابكم
وسامحوني على السرد الرديء
غفر الله لجدتي واموات المسلمين