أفتوني في أمري مآجورين >< ((بخصوص شراء جيب من قطر))

[عاشق الخطامة]

السلام عليكم ورحمه الله


أخواني .. ما أطول عليكم ادخل في الموضوع سيدا


أريد شوركم وما خاب من استشار خاصة الرجال شرواكم


أنا أريد شراء جيب لاند كرورز GX أو GXR ودراهمي 70 الف تقريباً .. وأدور مديل 2003 - 2004


ولاسف اللي عندنا يـا جيب معفول وماسك سعره والا نظيف مبالغ في سعره


وشفت جيوب قطر ومواصفاته ووهو الجيب اللي في بالي وأرغبه صراحه


:: لكن فيه مشكلة ::


وهو قرار منع استيراد السيارات المستعملة فوق 5 سنوات بالسعودية


يـ أهل الخبرة أنا رجال بستخدم ولا أفكر بالبيع نهائياً


سؤال الرئيسي في الموضوع : -


هل يوجد طريقة أقدر ادخل السيارة .. يعني ما عندي مشكلة لو كانت السيارة لوحات قطرية أو غير ذلك


وواسطه ما عندي واسطة .. واسطه الله سبحانه



اخيرا ..


هذا بعض الجيوب اللي جازت لي عطونا رايكم


(( مع العلم أنه تم الاتصال والتأكد من الأسعار ووجود السيارة ))


ويقولون السعر قابل للتفاوض .. أنت تعال ومالك الا طيبه الخاطر


أضغط على الرابط /



2004 Toyota Land Cruiser Land Cruiser GX (http://www.carsemsar.com/ar/listing/listings/2004-toyota-land-cruiser-land-cruiser-gx-88.html)



2003 Toyota Land Cruiser Land Cruiser GX (http://www.carsemsar.com/ar/listing/listings/2003-toyota-land-cruiser-land-cruiser-gx-85.html)



.


.


انتظركم

[غلطه ثمنهاروح]

أخوي .. عاشق الخطامه
تأكد من الموديلات الي أنت طالبهن
الظاهر ماتدخل من الجمارك ولا يصدرونها لك
وبالطريقه بتكون خسران .. تأكد والله يحفظك

[عاشق الخطامة]

داري .. الله يجزاك خير

يبدوا أنك ما قريت الموضوع :)

[غلطه ثمنهاروح]

أخوي عاشق الخطامه
السلام عليكم .. تأكد من الجمارك
لأن الموديلات قديمه ويمكن ماتدخل السعوديه

[غلطه ثمنهاروح]

لو لك علاقه مع واحد قطري
تكون السيارة بأسمه
ويعطيك عليها تفويض
عادي وتمشي

[عاشق الخطامة]

الله يعطيك العافية أخوي

جاري البحث بإذن الله في التفويض وطريقته

بنتظار الأخوان وحلول آخرى

[ابرق الكبريت.]

ممكن تسجلها باسم واحد ثقه ويسوي لك وكاله او تفويض
بس اتوقع ممكن تسجلها باسمك. تكون لوحاتها قطرية
ومحد بفيدك غير مرور خليفه بالدوحه اذا في امكانية او لا
وحاول تاخذ رقمهم بانك تتصل ع 905 وتاخذ رقم الدليل القطري
وتكلم المرور قبل تضرب المشوار
والله الموفق

[عاشق الخطامة]

أخوي/ ابرق الكبريت
بارك الله فيك .. ما قصرت

بينتظار بقية الاخوة

[تصر يحات]

نا سمعت انه يدخل بس يكون بسمك 3سنوات ماتبيعه

[عاشق الخطامة]

أخوي/ تصريحات

أيضاً أنا سمعت قريب من هالكلام

من يفيدنا بالعلم الأكيد

[تصر يحات]

انكانه صحيح انت خذ واحد والثاني لي انا ادور ومافيه الا كسر ابد انت اختر واحد والثاني لي وانا بسئل الي اعرفهم عن الموضوع وبرد لك

[تصر يحات]

عطني رقمك اذا جاني خبر عن الموضوع دقيت عليك وعلمتك

[تصر يحات]

لرف



لرفع

[عاشق الخطامة]

شكراً على تفاعلك أخوي


ولك رسالة خاصه

وبنتظـار من يفيدنا بـالعلم الأكيـد

[ابوعبدالله 22]

هلا اخوي .. انا كنت بالدوحة قبل 3 اسابيع والحقيقة تفاجأت يوم شفت السيارات .
اولا اسعارها غاليه جدا ولو تحسبها مع فرق العمله والجمارك تطلع عليك اغلى من السعودية وهم عارفين كم اسعار الجيوب عندك باليوم .
ثانيا النظيف نارد جدا ماتحصله الا الموديلات الجديدة .. اما اللي راح عليها 3 سنوات واكثر غالبيتها معدومة وغير نظيفه .

وبالتوفيق

[عبدالله 102]

انا اخبر واحد من جماعتنا شرا لاند 98 وجابه بلوحات قطرية بس الكلام هذا مبطي

تأكد من مرور قطر وجبها بلزجات قطرية ازين لك بس المشكلة في البيع بعدين ما تقدر تبيعه اللا في قطر على ما اظن

[عبدالله 102]

وتأكد وانا اخوك من ممشاهن ترا ممشى 250 ألف في قطر يعتبر كثييييير جداً اذا قارنته بمساحة قطر

[عاشق الخطامة]

حياك الله _ أخوي أبو عبدالله 22
أنا متابع للمنتديات القطرية ومواقع البيع والشراء المعروفة عندهم
وصدقت تجد من المعروض أسعار مرتفعه مثل لقيت سفاري97 سعره 38 الف ..
ولكن بصفه عامة الاسعار مناسبة



حياك الله _ عبدالله 102
فعلاً صدقت وبالنسبه للبيع أنا أريد أستخدم ولا أفكر في البيع نهائياً
واذا اضطررت لاسمح الله للبيع عرضته عندهم في معارضهم .. الشكوى لله

[ابو نايف 111]

السلام عليكم
متابع بصمت
اشكر صاحب الموضوع
انا احسب انا الحالي
اتمنا الي يحرف طريقه
يبلغنا

[حروف الهجاء]

الله يقسم لك اللي فيه خير

[الدوسري 111]

بتوفيق لك عسى يسهل امرك

[أبوسعد111]

السلام عليكم ورحمة الله وبركاته
أخوي عاشق الخطامة
أولاً:
لو تكرمت عندي تنبيه على قولك:
(( وواسطه ما عندي واسطة .. واسطه الله سبحانه ))
أرجوا ان تتقبله بصدر رحب:
(س/هل يقال: ليس لي واسطة إلا الله للقبول في هذه الوظيفة؟
الجواب:
قال الشيخ عبدالرحمن البراك حفظ الله (لاوالله لايجوز){التعليق على الحطاوية ش1}
وكذا حرم مثل هذه العبارة الشيخ ابن عثيمين رحمة الله {الباب المفتوح 122,160}
السبب في تحريم عبارة "مالي واسطة إلا الله" أن الذي يتوسط في أمر يكون عادة في درجة مثل أو أدنى من الذي يتوسط عنده, فيرجوه أن يقبل شفاعته ووساطته في أمر ما, وهذا محال في حق الله ولا يليق به سبحانه,
وفي الحديث: (ويحك! إنه لا يستشفع بالله على أحد من خلقة إن شأن الله أعظم من ذلك)وإن كان فيه مقال "لك معناه صحيح" كما قال الشيخ ابن عثيمين رحمة الله.)

ثانياً:
بالنسبة للسيارات بقطر
عندك عدة إشكاليات
1- أنت تعرف أن نظام الجمارك لايسمح إلا بأخر 5 موديلات (إطلع على موقع الجمارك للتأكد) لذلك صعب عليك تدخل سيارة أقل من ذلك.
2- أنا لاحظت بقطر أن أسعار السيارات ألي تقدر تدخلها للسعودية مرتفع عن أسعار السيارات ألي ماتقدر تدخلها وأعتقد أنهم عارفين أن السعودي بيشتري من عندهم.
3- تدخل لك سيارة بنفس الموديلات ألي ذكرت (2004 - 2003)عن طريق واحد قطري وأنت تشتريها منه بالسعودية وتكون معك بدون تغيير اللوحات (هذه لا أعرف عنها شئ , وممكن تمشي معك بما انك ما عندك نيت بيعها)
4- بالنسبة للجيوب ال G أو GX أو GXR أو VXR اللي تقدر تدخلها (يعني أخر موديل 2007)قيمتها لا تقل عن الـ 100 ألف وأنت وحظك بالنظافة والممشى.
5- في حالة أنك بتزيد فلوسك وبتروح تشتري أنتبه لعدة أمور:
(قيمة السيارة + رسوم الجمارك + رسوم تخليص السيارة من عندهم بالمرور القطري + رسوم اللوحات والفحص بالسعودية عند المواصفات والمقاييس) كل هذه إذا كان مجموعها يجيب لك سيارة بالسعودية فلا تكلف نفسك تروح لقطر.

وإذا تحتاج أي توضيح راسلني على الخاص وأبشر به

دمت بحفظ الرحمن

[عاشق الخطامة]

الدوسري + حروف الهجاء

حياكم الله .. وجزاكم الله خير على هالدعوة الطيبة

[عاشق الخطامة]

حياك الله أخوي أبو سعد .. وعليكم السلام ورحمه الله

أولا: جزاك الله خير على التنبيه ولو التعديل متاح لعدلت العبارة

الله لا يحرمك الاجر يا رب

وبيض الله وجهك ما قصرت بإضافتك .. وفعلاً كلامك صحيح

وأنا أتكلم عن مديلات 2003 - 2004 لمن يريد الاستعمال ولا يفكر بالبيع هل من الممكن

دخولها للسعودية بلوحات قطرية أو أي طريقة أخرى

[عاشق الخطامة]

حياك الله أخوي أبو نايف 111

وعليكم السلام ورحمه الله

شكراً لك على تواجدك

[بومحيمل الخالدي]

ربي يعطيك العافية . ..

مالي خبرة في سؤالك ولكن حبيت أقولك . ..

أنتبـه وخلك حريص عند الفحص في قطر فـ الشريطية متفقين مع أكثر

الفحوصات اللي في قطر فـ المعروف في محلات الفحص

أن يطلع لك السيارة بكل عيوبها من ضربات ومحركات بكل مافيها ..

أنا من الشرقية وبالتحديد الجبيل وبما أن أكثر اللي عندنا نسابة وجماعتهم في قطر

فـ لنا بالخبرة فيها ,, كان يمدحون فحص هناك أسمه الألماني وهو اللي عليه الشهرة والطلب

فـ اللي شغالين جايهم الربح جايهم الشريطي يبخششهم ويقولك الموتر مافيه شي بابا كوويس :)

هذي صارت لواحد من الربع ما ظمنهم وتشكك كان ماخذ له نيسان فتك

وعقب وداه فحص ثاني والله ناسي أسمه أذا لك خاطر نشدت عنه

المهم وداه طلع المكينة رايح فيها وفيه القير : ( ,, الحمدالله ماخذاه وقتها

وفي عندك النصابين هناك وووين ,,,, وأساساً أستخدام أهل القطر للمواتر شين

ألا القليل فيهم ,,, وحلو لو تعرف لك واحد هناك وتخليه يدور لك

لكن بخصوص الموتر قديم وقطري أظن و الله أعلم أن مالك ألا تشوف لك

راعي الموتر ويسويلك تفويض للموتر وأنك شاريه مبايعه أظن *

ولا بالأسعار عندهم ببلاش القديم أذا الكلوزر 98 يوصل سعره على 37 ,,

في موقع أسمه قطر سيل فيه تحصل مواتر ,,, وبعدين أظن النياسين أسعارهم حلوة

من موديل 2006 و 2007 شيك على المواتر بالموقع وقوله أنا بجيك من السعودية

وبمسافة بعيدة عنك ف خلصني من الاخر باخذ أجازة من الدوام وبجيك وشفيه الموتر

أذا قال عددل قوله كم تحسبه بالأخر صدقني يطيح لك 5 ألاف ويمكن زود بعد ,, ,

أنا دقيت على واحد وقلت له نفس هالكلام عقب قالي لا الموتر مقلوب بس مايبان عليه :) ههه

عسى الله يوفقك وتحصل مرادك ,, وخلك من غير عجلة بالبحث ,,

أحترامي

[رسيس نجد]

ليش ما تروح للامارات 0

[عاشق الخطامة]

أخوي/ صدى الرعد

بيض الله وجهك .. ما قصرت

الله يكثر من أمثالك :)

[fawwaz1]

اي نعم صحيح ليه ماتروح الأمارات ؟ اخبر اكثر اللي ياخذون جيوب من برا يجيبونها من الامارات اما قطر ؟؟

[عاشق ونيت]

انا سمعت احد الشباب موظف بادارة الجمارك بالرياض يقول ان الجمارك راح تنزل قريبا قرار يسمح بتصدير السيارات الشخصيه فقط الى موديل 2003 بس تكون استخدام شخصي ولايحق لك البيع الا بعد 3 سنوات من استخدامها على ارض السعوديه
يعني المرور ماراح ينقل سيارتك الا بعد 3 سنوات من استخدامها على ارض المملكه والخبر منتشر مع اكثر الناس عاد مادري هو صدق كذب الله اعلم بس حبيت اعلمك وافيدك وادخل موقع الجمارك او ابحث عن مصداقية هذا القرار بالمنتديات
تحياتي لك
بالتوفيق

[مخطط 2008]

انا رحت لقطر وحصلت السيارات الاقل من 2009 متهالكة ومكدودة ويركبون عليها هدرز ودبة وترهيمات واكسيجن نصيحتي لاتشتري اقل من 2009

[صقر باهله]

السلام عليكم

اولاً الله ييسر لك امورك ويرزقك الموتر الي في بالك

ثانياً الكلام الي بقولة مشورة ورأي شخصي يالغالي

الموتر الي انت حاط روابطها قديمة شوي وماشية واااجد

لكن لو بحثت عن باترول او باجيرو بتلقى شي رخيص واجدد موديل واقل ممشى

وانا سويت بحث في نفس الموقع

وحصلت خيارات كثيرة وممشاها اقل بواااجد من اللاند

وعلى سبيل المثال حصلت موديل 2007 ماشي 45 الف وسعره 78 الف ريال

و 2005 اثنين واحد ماشي 120 الف والثاني 87 الف وسعرهن على 55 الف ريال

وهذا على سبيل المثال لا الحصر

المستعمل وانا اخوك دور على النظافة لان المحيوق بيبلشك من ورشة لورشة

والله ان تعاف الموتر

وهذا راي شخصي لا اكثر ولا اقل

[عاشق الخطامة]

أولاً : شكراً لكم أخواني على تواجدكم :)


--


أخوي / رسيس نجد + fawwaz1


والله أنا ودي قبل ما أسافر من الرياض أحدد في بالي 3 أو 4 مواتر وأشوفهن واعرف


أسعارهن وأتواصل مع المعرض أيضاً وهذا موجود في قطر لوجود منتديات بيع معروفه


عندهم على النت .. كان تخبرون لي مواقع أمارتيه بيض الله وجيهكم




أخوي / عاشق ونيت


أيضاً أنا سمعت هذا الخبر وهو خبر جميل لمن يريد الأستخدام


شكراً لك على مرورك وإن شاء الله يجيبنا العلم اليقين اللي يسر





أخوي/ مخطط 2008


كلامك سليم والمعدل يوضح عليه والود نأخد 2010 أو 2011


ولكن ميزانيتي 75 الف





أخوي / صقر بأهله وعليكم السلام ورحمه الله وبركاته


أولا : بيض الله وجهك على المشوره الطيبة


وبصراحه GX له معزه خاصة بالقلب ولا أبي غيره


والله يرزقني ويرزق الجميع



.


.


بنتظار بقية الأخوة ومن يفيدنا بالعلم اليقين :


هل يوجد طريقة تدخل السيارة للسعودية (( لمن يريد الاستخدااااااااااااااام ))


لا أتكلم عن من يريد البيع والتكسب

[ابوسفرجل]

اخواني الاعزاء السلام عليكم ورحمة الله ،
في موقع قطر سيل للسيارات المستعمله فوجئت بأسعار السيارات الاند كروز حتى اني وجدت لاند فل كامل 2006 بثمانين الف هل فيه احد من الاخوه الافاضل عنده فكره عن هذا الموضوع وعن هذي السيارات وهل هي نظيفه ام مصدومة ارجو ممن لديه خبره او تجربه ان يفيدنا ولكم تحياتي وتقديري

[عاشق ونيت]

اخوي ابو سفرجل من واقع تجربتي لموقع قطر سيل والتوجه لقطر لرؤية السياره المقصوده
وجدت انها ليست كما بالموقع


يعني مثلا قبل اسبوعين لقيت لاندكروزر جي اكس ار موديل 2006 فضي محدود بـ 87 كلمت راعي السياره
وسالته هل فيها رش او صبغ خفيف قال ابدا السياره مشروطه وبعد المفاوضات طرح لي 2000 ريال
توجهت لقطر وفحصت السياره وطلع فيها رفرفين وكبوت وباب ايمن وبعد ماسالته قال صبغ تجميلي مايضر
ايضا حصلت لي نفس القصه مع جيب جي اكس 2006 ازرق من موقع قطر سيل كلمت راعيه وبعد المفاوضات اتفقنا على 84 الف وطبعا قال لي السياره مشروطه
تبين لي بعد الفحص انه كان عليها هدرز وفيها رش بالباب الخلفي حق الشنطه ومعجون في طرف الكبوت الايسر
فلذلك اخي العزيز لاتغرك قيمة السياره انا اروح هناك القي جي اكس 2006 بـ 80
والقى جنبه واقف جي اكس نفس الموديل بـ 95 والا 93 فتاكد دايما يابو سفرجل ان النظيف ياخذونه اهل الديره مايخلونه يقعد
لان كل اهل قطر يحبون الجيوب وخصوصا من 2007 وتحت


فلذلك يدلك على الخيل اثمانها


تقبل مروري ياصاحب الموضوع بس حبيت ابين لابو سفرجل حتى لا يمر باللي مريت فيه انا

[فهدالاحمد]

اخوي الله يسعدك
انا رحة لمعارض الشارقه بالامارات0ورحة لمعارض قطر
ولا ابحث الاعن الهدد
مافيها الالعب هدرز0والموتر مرشوش0الالي يخفي عنك الاشياء هذي(ترى المكينه والقير رايحه فيها)
اخوي تنظر لك بشي بالرياض افضل (لقيت 2003 هدد0الون ذهبي0في بحر 70الف باعه راعيه)

[مغرم بالفتك]

جزاك الله خير
ماااااااااقصرت
الله يعطيك العافيه
تـــــقــــــبــــــل
تـــحـــيــــاتـــي
اخــوكـــــــــــ
مــــــغــــرمـــ
بـــالفـــتـــكـــ

[قطاع الأرماس]

فيه طريقة غير التفويض من شخص قطري .. وهي انك تطلع بطاقة سكنية بإسمك .. وهذه يطلعها كل المقيمين في قطر من اي جنسية خليجية ولا غيرها .. وبموجب هالبطاقة تقدر تشتري الموتر بإسمك باللوحات القطرية وتدخل به للمملكة بصفتك سعودي ساكن في قطر :)