حرارة بعد تنظيف الرديتر !! اخوي حجازي ولا يهون الجميع

[turkiq]

السلام عليك ورحمة الله وبركاته
اخوي اصيل حجازي والربع مايهونون ... خلوني ادخل في السؤال على طول


عندي باترول قديم موديل 86
حرارته كانت عادية واذا ارتفعت ارتفعت وهو واقف مع المكيف
بس ارتفاع مقبول نوعا ما يعني قبل النص بشوية
واموري كلها طيبة من ناحية رديتر وكلتش مروحة وهواية ... الخ


رحت الله يسلمك ونظفت مجاري التبريد في المحرك مع الرديتر بطبيعة الحال بأستخدام مكينة التنظيف
الي تعمل على تدوير مواد تنظيف .. طبعا عند فني رديترات وحرصت اني املء الرديتر من جديد بماء رديتر اصلي حق نيسان
ولا حظت انهم كاتبين عليه ما يضاف له الماء وفعلا عبيته بدون اضافة ماء.


اللي حصل الان ان الحرارة ترتفع عندي حتى وانا ماشي في خط طويل مثلا الي النص ويمكن اكثر
وقبل الحكاية هذي ما كانت ابدا ترتفع عن الربع وانا ماشي !!


هل معقول ان موية الرديتر لازم اخففها بماء عادي؟
احيانا اقول يمكن السر في موضوع التنظيف .. يمكن جبت العيد ؟
اذا جبته ... كيف جا ؟؟ :)


ما ادري وش تحليلكم للموضوع ؟


اخوكم تركي

[altheeeb79]

اخي أول شئ تأكد من البلف أكثر العلل منه يكون مايقفل ويفتح صحيح وخصوصا بعد الغسيل أو فكه وترجيعه. مجرد رأي والاخوان أدرى مني .

[التفق]

السلام عليكم حله بعلبه ماء مقطر وجرب وبأذن الله تضبط امورك:good2:

[راعي الركيات]

اذا الماء ينقص تاكد من غطار الرديتر

ركب اصلي

واذا الماء ماينقص تاكد من طرمبة الماء هل تعمل بالشكل الصحيح او لا

واذا انت مركب بلف للحرارة فكه في الصيف

رديتر الباترول القديم كبير ونظام التبريد فيه مايحتاج الي بلف لحجز المياة في الرديتر حتي تبرد

[BLA6K]

1-الديتر متعبي هواء
2- يوم عبى الديتر ماء كانت السيارة باردة والبلف قافل والحين احتمت السيارة و فتح البلف ولكن نقصت مويه الرديتر يعني تأكد من نقص المويه

[aaali2]

مجرد راي ........اللي يتبين لي انك بسب التنظيف حركت الاوساخ وتسدد الاديتر ..
اذا غيرت الاديتر رايح تشوف الفرق..ياليت لو تجرب تاخذ اديتر احد من ربعك وتشوف الفرق ..

[aaali2]

لازم تتاكد ان البلف مفكوك... او لازم تفكه في البدايه وتشوف..

[أحمد محمد1429]

المشكله عندك من الأديتر

[العمده 0ون0]

وعليكم السلام ورحمة الله وبركاته
اخوي تركي
الاخوان كلهم ماقصروا معك
لاتوسوس
اذا امورك كلها طيبة من ناحية رديتر وكلتش مروحة وهواية ... الخ
هذي سببها محلول التبريد كثافته عالية ووظيفته هي عملية تزييت ومانع للصداء فقط0
خفف من محلول التبريد الثلثين او النصف تقريبا وتأكد لا (يكون فيه هواء او تنسيم في دائرة التبريد) وان شاء الله تنتهي مشكلة الحرارة0

امرك بسيط ان شاءالله
ومايمنع انك تشييك على قفزان الخراطيش و الاهواز حق الموية مرة واحدة0

هذا والله اعلم
وسلامت الجميع
:s

[مركز حراره]

يطهر لي والله اعلم ان الجهاز بدون فلترفخرجت الاوساخ من المكينه وسكرت الرديتر سيخ الرديتر
لافضل التسييخ مع الغسيل لضمان عدم عودت الاوساخ لرديتر

[سوبر VTC]

نعم اخوي كلامك صحيح
و حتى كلام العمدة صحيح لازم تخفف المحلول
لازم تخفف المحلول و هذا كلام راعين ورش خبرة و راعين محلات قطع غيار
و الامثلة كثيرة بعد تنظيف السلندر و الاديتر احتمى الموتر
مع العلم انه سابقا كانت الحرارة طبيعية
تبي الموتر ترجع حرارته طبيعة فرغ المحلول بجالون نهائيا
و حط مقطر فقط و شف وشلون تنام الحرارة

الامثلة


احد الربع معه جيب م2001
قام و غسل السلندر و الاديتر طبعا كل سنتين يغسل السنلدر و الاديتر
و حط جالونين 2 محلول تويوتا جالون ابيض
يوم قبت الحرارة على النص
تخيل و هو ماسك خط بالليل الحرارة تحت النص بشعرة
بالديرة ليلا الساعة 11الكبوت و الرفاف نار
الهواء اللي طلع من المروحة ليلا حار جدا
المهم
فرغ المحلول و حط ماء مقطر و لكن بدون محلول
الشاهد نامت الحرارة :good:



باترول فتك غسل السلندر تغيير بلف تسييخ اديتر
عيت تنام الحرارة
على ذمة الرواي يقول حط محلول تويوتا جالون و الباقي مقطر
و زانت الحرارة :good:



قصة قديمة على وقته 200ال :D:p

حط محلول و مسك خط الحرارة اتش
قام و فرغ الاديتر و حط ماء عادي
و ضبطت الحرارة :good:


الشاهد من الكلام
لازم تكون نسبة المقطر اعلى من المحلول
المحلول اذا كان اكثر فان الحرارة ترتفع لان اذا كان غالبية الاديتر محلول
فان طرد الحرارة يتاخر كثيرا
و الشاهد مثال الجيب اعلاه + 200ال :D


رابط مميز لاخ اصيل حجازي :good2:



أحمر / أزرق / أخضر / زهري / وردي ! أي لون مـنآسب لمـُبـرّد قربة التبريد { اللديتر}؟؟؟ (http://www.mekshat.com/vb/showthread.php?t=410160)




ان انصح بمحلول علبة لتر ونص بارد و يطرد الحرارة بشكل اسرع
محلول مرسيدس بنز علبة بيضاء و استكر ازرق
محلول بي ام دبليو علبة مدورة مثل علبة صابون فيري :p
كلهن يجن لتر و نص و الاخر لتر ربع
يجي بعدهن اصلي اصلي محلول برستون امريكي جالون اسود
افضل مليون مرة من ايسي ديلكو
يدعم كلامي راعي ورشة امريكي ثقة ينصح به
حتى صاحب محل تسييخ اديترات مايحط الا منه
ثم جالون ابيض باستكر ازرق من شركة جي ام GM
اذا حصلته بالوكالة فهو ممتاز
لكن يقوم عنه برستون 50/50 اي مخلوط و جاهز

[turkiq]

بيض الله وجهيكم جميعا على الردود الطيبة وتحية خاصة لمشرفنا ..
انا بس شكيت لاني قلت يمكن صنعوا نوعية جديدة
من موية الرديتر جاهزة ما تحتاج خلط .. لكن يظهر والله العالم ان هذي التعليمات المكتوبة على
الجالون تناسب الاسواق الباردة.

بخفف موية الرديتر وشوف .. ان شاء الله تكون السبب.



اخوي سوبر VTC ... حاولت ارسل لك رسالة خاصة بس ما قدرت .. شكل صندوق الرسائل عندك مليان
عندي استشارة ضرورية مستعجلة .. كيف اقدر اتواصل معك؟

[الشرقيه 03]

وكالعاده بدون رد الله يجزاك خير !!

اتمنى من الاخوان اللي يطرح مشكلته لاينسى
اخوانه اذا لقى حل مشكلته ويفيدنا ويكسب دعوه واجر
لكل من قرأ .