الفزعه ياهل البل جزاكم الله خير

[راعي العريف]

السلام عليكم ...مساكم الله بالخير جميع عساكم في أتم الراحه, والله مافيه إلا سلامتكم
يالربع عندي قعود لقي يروح جذع الزمان الجاي , والقعود أن بتل على حالته الراهنه فعز الله أنه وكووول , مواصفاته عشان تبين الصوره على النحو التالي :
من يوم تقبل علاه يقب الهدير ويقلب عينه , وإذا جيت أقيده أو أفكه من الرباط لازم رجالين واحد واقف عند نحره ومعه عصى والثاني يربطه أو يقيده , لأن لو يقيده أو يربطه رجال لاحاله يطمن عليه إذا إبطىء يعني بالكثير نص دقيقه , يعني الغافل يمكن تروح عليه .

أتمنى محد يقول عرضه القصاب , لأن الأجرب كااااااايف كل ما منه وبعدين راس وساس , ولا نيب عز الله سامح منه لين أشوف طرحه.
الزبده: سؤالي هل فيه طريقه أقدر أخلي طبعه مثل باقي الركاب (الزمول ) ويصير الطبع كايف ؟
أتمنى الي عنده حل يفيدني وله مني دعوه تالي اليل من قلب صادق
تحياتي :)

[ساحووق]

مرحبا براع البل

طال عمرك المههم عط القعود خبز وحكله واودهله واااهم شششششي لاتضربه ويمكن القعود

احدن يضربه غيرك وانت ماتدري وازين شي له الهجاااااار اهجره واشبكه لحااله

وخذ حذرك منه
والله يبااركلك ويرزقك من الانتاج الطيب
والله اعلم

[ابو الشبرميات]

ما شاء الله تبارك الله


الله يعينّا واياك وكل مسلم



بالنسبة للطبع الاقشر
فيه احد ضاربه او مروعه بالسيارة وهذا اللي خلاه يهاب منكم من تقبلون عليه



تطبيع القعود
عليك بالخبز والتمر خلها معك دايم


وتعال للقعود كم مرة في اليوم وحك له
واول ما تبدا تحك له مع عيزه بعصا طويلة او مشباح
ولا تخلي القعود يشوفها علشان ما يجفل
يعني تعال مع وجهه وصوت له وناده وعطه الخبز وخل واحد ثاني يحك له
بعد فترة تبي تشوف تغيير في طبع القعود


غير اماكن الحك من يوم للثاني
مع النحر وبين رجليه وجنوبه ورقبته وهامته وخشمه
واي جهة تقدر تحكها لاتخليها ابد


تعاهده بالخبز والتمر لاتغفل عنه ابد
وباذن الله طبعه يتغير ويهدي


وبالتوفيق لك ولكل مسلم
وعسى ربي يرزقك منه فوق ما تتنمى


,,,

[محمد 33]

اهم شي لاتمنه حتى لو زان طبعه وصار كايف والله يوفك وتشوف الانتاج الي يسر خاطرك منه

[راعي العريف]

ساحوق,أبو الشبرميات. محمد 33 ,
أول شيء مشكورين على النصائح, بس فيه سوء فهم بنسبة لحالة القعود , يالربع القعود مهوب جفول , لو أنه في الحزم وطلق وعارضته يوقف وتحكله وتسوقه وترده من وين ماتبي , بنسبه إن أحد يضربه , مافيه أحد يضربه , لكن المشكله بشكل أوضح , لو مثلا حكيت له وأنا واقف عند نحره إذا خيذيت شوي يرد راسه علاك؟! ونفس الطريقه عند الرباط والقياد الاجرب يرد راسه, يعني القعود مهوب جفول أبد , بس يوم كان حاشي بارزاً زينه بين الحشو وفيه واحد من الربع متسلط علاه كل ماجانى راح عند وقام يلعب معه ومن عقبه وبعد فتره خرب الطبع وقام يدور المطارح والعلوم الي مهيب زانه.

الي أتمنى ألقى له حل من عند الله ثم من عند هالحوات الغانه كيف أجعل القعود مايرد راسه علي ؟ لو أقعد حدر يداه نص ساعه مثل باقي الركاب ؟
والله يجزاكم خير على كل حال ):

[قزيزالنعام]

يتغير الى ضرب ويهون
والقعود احرص منه يمكن يصير مكول معلم من صغره على العب
تحياتي لك

[راعي العريف]

يتغير الى ضرب ويهون

والقعود احرص منه يمكن يصير مكول معلم من صغره على العب

تحياتي لك

المووت الحمر ياقزيزانعام,طيب إذا كان من صغره معلم على العب ماله حل؟
تكفووون يأهل البل الي عنده طريقه لايذخرها القعود غالي علي , والله يستر لا أصير معه على قول المثل ( من الحب ماقتل ) وغيب شمسي هههههههه
تحياتي:)

[SS1]

البعير مضروب ومشين طبعه

اهم شي لا تجيه بعصا ولا تضربه بشي حار مثل الخيزرانه الدقاقه يكون ضربها حار على جلد البحير
وهذا هو السبب في حدمة البعير وحقدة
وعليك بالخبزالخبز الخبز والتمر واندبه بسمه وعطه وحكله بيدك او بعصى ولا تومي عليه ابد

[عابر الموج]

رفيقك هو الي خرب طبعة انتبة منة والله يعينك لازم معك شخص اخر عندما تجية

[ساحووق]

ايه هذي المشكله من رفيقك
كان عندي قعود والعب عليه وبغا يقص ظهري ههههه

وتاالي يدور المطارح واللعب وتبهبد

لكن انتبه من القعود ومثل ماقالو الاخوان

وقعودي والله بعته ولالقيته حل

[ابو عيصvxr]

سلام عليكم بنسبه للقعود كان عندنا قعود مثله طبعه شرس لكننا عسفناه والحمدلله صار احسن مما كان

[المحلسي]

بالنسبة لي شريت لي خلفة طيبة وحلبناهاعند راعيها اول وهادية
المهم ويوم جناها في المزرعه وبعد فترة تغير طبعاها بالمره ماتقدر تقرب عندها واكتشفت ان العامل المصري يضربها لي بغا يحلبها اكتشفته يوم جيته في الوقت الغير معتاد اني اجيه المهم كرشت المصري وسفرناه مهوب كفو لعب في الحلال وبديت معها بالخبز والتمر وجبت لي سوداني وشوي شوي والحمده الله تغيرت بالمر تجي حدرها وماتقول شي انتبه من العامل

[رادار2009]

اخوي اول شي البعير ماهو اكله ..واذا تحك ارقبته زين وبسيط عليك مثل ما قالوا الاخوان .. الخبز التمر وبسياسه .. والعصا نصيحه لا تجيبها عنده .. واذا ورطت وهي معاك .. حك فيها بين يدينه تحت الرقبه .. وشوي اشووي يصير طبعه زين ..
ثانيا .. عوده على الرسن والعقال ...
من البدايع والله يطرح لك البركه فيه اخوووي

ملاحظه ما يخرب الحلال الا الراعي الجبان ....والذي ليس لديه درايه بالابل

[عاااشق الطير]

اخوي ابشتريه منك وفكك منه لايذبحك ابك بعنياه ههههههه امزح الله يرزقك وعليك وانا اخوك بالخبز وقاردله وبقولك حاجه اذا ماسويتهاء انس انه يصير مقاردي قيده وقصر قيده وربطه بسلسه مدة سبوع وكل يوم اجه وعطه خبزه خله لاشافك يطيح الي براسه ويدورك وهم شي الربط وانا اخوك

[نايف الذيب]

اخوي

ادخل عليه انت ومعك واحد واضربوه لين يبرك

وكر عليه الضرب من يوم ليوم

لين يدري انكم عازمين

وبعدها قيده لازم يدري انك عازم عليه

تحياتي