طريقة جديده لزيادة عمر البطارية . أدخل وعطنا رايك .

[K.S.A.A]

السـلام عليكـم ورحـمــة اللــه وبركاته
مساء الخير للجميع


كثر الكلام عن البطاريات
كم عمرها ؟؟؟
وماهي الأفضل ؟؟؟

وبالأمس قابلت لي رجال عنده بعض المعلومات عن كهرباء السيارات بشكل عام
فقال لي هالكلام وبصراحه أقتنعت وقلت أعرض هالموضوع في منتدانا العملاق وأشوف أراء الشباب والمجربين .
يقول هالرجل :
( لما تكون مسافر أو ماسك خط طويل وأنت بالنهار شغل أنوار السياره )
قلت له : ليه وش السبب ؟؟
قال : هذا يساعد على تجديد شحنات البطارية وبالتالي يزيد عمرها الأفتراضي , لأن الدينمو يشحن البطارية
< طبعا هذا شيء متعارف عليه >
وعندما تكون على خط طويل فان الدينمو يستمر بالشحن لحد ماتتعبأ البطارية فل والدينمو يشحن
مما يجبر البطاريه على إضاعه الشحنات بطرق سلبية.
أما أذا قمت بتشغيل الأنوار فأن البطارية تستهلك الشحنات
وهذا يجعل البطارية تجدد شحناتها لأنها وجدت مخرج للشحنات الزائده عن حاجتها .
وقال : شف الأمريكان دائمآ الأنوار شغاله عندهم حتى بالنهار .


فما هو رأيكم أيها الأخـــوان ؟؟؟

[البرنس 1]

السلام عليكم ورحمة الله وبركاته ,,,,,, كلام سليم 100% .

[yazn2322]

وعليكم السلام ورحمه الله وبركاته ,,

صحيح الكلام , والدليل فعلاً السيارات المستورده من امريكا الأنوار الأماميه لازم يكون فيها شي والع

[الكاشوت]

هالكلام نسمعه من زمان

[wafi4sa]

بارك الله فيك وشكر على هذا الموضوع
انا اول مرة اسمع بهذة المعلومة
لكن هل لها اساس علمي هنا السؤال .......؟؟

[هويدي]

حسب ماسمعت من فني الكترونيات يقول البطاريه لازم تستهلك وتتفلل بشكل مستمر

مشان ما تموت الخلايا الكهربائيه .. مع مرور الوقت تفضى بسرعه والله اعلم ... البطاريات عموماً جوال لابتوب غيره

ويعطيك العافيه على المعلومه

[زمزم 100]

يـــا عـــــرب

اللي أعرفه أن الأمريكان عندهم هذه الخاصية لأن الأجواء متقلبة في أمريكا
.. مرة مطر .. ضباب .. ثلج .. يعني توقع أي شيء .

[K.S.A.A]

مشكورين على الحضور والمشاركه
والكلام هذا ماأدري هل له أساس علمي أو لا !!
وفعلآ أخوي زمزم انا قلت للرجال نفس كلامك لأن الأمريكان عنده ضباب وأمطار
قال مو كل أمريكا بعض الولايات فيها أمطار وبعضها لا .
لكن يقول ويصر ويجزم ان النظريه اللي هو يقول مفيده للبطارية .

والله أعلم ,,

[Magellan]

عادة تشغيل الانوار ليست بسبب فقط الاجواء متغيرة عندهم،
هناك سبب بأنه ينبه السائق لوجود سيارة خلفه ام مقابلة له ،
لأن كثير من الطرقات عندهم غير مزدوجه وخصوصا الريفية

[محمد السالم]

ما اضن الكلام صحيح لانه الدنمو به دقمه فاصل اذا تعبت البطاريه يوقف الشحن
هذا والله العالم

[بن لوتيه]

الكلام هذا صحيح
لكن بالنسبه للسيارت الحديثه اللي موديلها جديد
لا تحتاج لمثل هذا الشي لان الدينمو يوجد به فاصل اذا اكمل تعبئه البطاريه
والله اعلم
منقول من كهربائي سيارات

[رحال7]

للسلامه فقط
لتنبيه السائق امامك بحيث يعرف انك خلفه او السائق المقابل

[ماون ماركز]

الكلام غير صحيح للأسف يا صاحبي ..

البطارية لها عمر أفتراضي .. مع الصيانة
بدون صيانة تستهلك قبل نهاية عمرها الأفتراضي

جميع السيارات القديمة والحديثة فيها جهاز يفصل البطارية عن الدينمو اذا شحنت

بالسيارات القديمة كنا نعرفه بأسم كتاوت البطارية .. الأن بالسيارات الجديدة أصبح كرت أكتروني صغير داخل الدينمو .. او بمكان قريب له بالكبوت .

الأمريكان سياراتهم عندهم مواصفات يشتغل النور مع السويتش .. مثل بعض السيارات اللي عندنا الأن

في دول أروبا .. اضاءة الأنوار بالنهار عليها مخالفة .. لذلك مواصفتهم مختلفة عن الأمريكان

+++

اللي يعدم البطارية عند الكثرين هو الجهل بالصيانة .. والجهل بطريقة أعطاء الأشتراك لسيارة ثانية متعطلة

البطارية لا تعبىء الأ ماء مقطر
تعبىء البطارية والسيارة شغالة فقط

طريقة الأشتراك
السيارة الشغالة توصل الأسلاك موجب وسالب بالبطارية
السيارة المتعطلة .. الموجب بالبطارية والسالب بجسم السيارة

تحياتي