خزان الوادي يهرب من عند الصرة !! وش الحل تكفون ؟؟

[يا سلام سلم]

يا اخوان ،، السلام عليكم ،،


صباح / مساء الخير ،،

عندي بارك الله فيكم خزان الوادي ويهرب من عند الصرة تهريب خفيف ، وانا ما ادري وش الدبرة ،،

قلت مالها الا اهل الخبرة ،،

عطوني الحلول المقترحة بارك الله فيكم ،،

لان عندني سفرة للجنوب الاسبوع الجاي ،،

لكن عندي كم سؤال ،،

1/اذا كنت انا بلحم التهريب وش نوع الغراء المستخدم ؟

2/ هل فيه محلات تلحم الفيبر ؟

هذا اللي عندي وانتم عطوني اللي عندكم ،،

وبالتوفيق ،،

[قطع عشره]

السلام عليكم ورحمة اللة وبركاتة مساك اللة بالخير هدي قد صارت لي وجبت الصمغ الي يخلط ولطست الي بين الفيبر والصرة الامنيوم او مدري ستيل والحمدللة ضبط ولة هالحين حول سنة

[يا سلام سلم]

بارك الله فيك قطع عشرة ،،

والله لا يهينك ،،

الظاهر هذا اللي بيحصل ،،

لكن ننتظر اراء الشباب ونشوف ،،

[شاص]

لا تسوي به شي إذا كان تحت الضمان .. لأن ضمانه حسب خبري 5 سنوات .. رح لهم يبدلونه أو يصلحونه

[نسري بالليل]

اذا ما فادك الوكيل مالك الا زي ما قال اخوي قطع عشرة
دائما اجيب اللحام البارد ( العصار اللي يجي اثنين ) تخلطهم ويزبط ان شاء الله

[خط ليزر]

حياك الله اخوي ،،،،، من الحلول
1- حاول مع الوكيل يبدله
2- زود عليه شطرطون السباكه وجربه برا السيارة
3-اخر الطب الكي حطله لحام معجون
تمنياتي لك بالتوفيق

[يا سلام سلم]

والله ياخوان ما ادري هو تحت الضمان او لا
اخذته من اخوي وأخوي ما يدري عن فواتيره
وأخاف انه ماخذه من واحد
ما ادري لو امر الوكالة تتوقعون يصلحونه
نسيت اشكر الجميع

[storm way]

بسيطه وانا اخوك رح للوكيل وقلهم هذا التانكي يهرب ماء من الصره تبون تصلحونه ببلاش ولا بفلوس ما تفرق

والامر سهل جدا راح يسونه لك في 5 دقايق

[بلطي]

الله ييسر امرك
لكن اسمع عن ناس يروحون للوكيل ولا يطلب فاتورة
ويبدله لهم

[جيبي جايزلي]

جرب منتب خسران شي رح للوكيل

[يا سلام سلم]

وين الوكيل بالربع
كبرت السالفة برأسي
اللي يعرف وصفه يعلمني
ومشكورين جميعا

[شاص]

تلقى رقمهم محفور على الخزان

[يا سلام سلم]

تلقى رقمهم محفور على الخزان
الله لا يهينك يا شاص
ولا يهين باقي الشباب
بكرة نكلمهم وعسى الله يعين
وراح نوافيكم بالنتائج
بالتوفيق للجميع

[اصيل نجد]

اذا مالقيت تجاوب من الوكيل فيه طال عمرك غراء عصارين يخلطن مع بعض قوي جدا قيمتهم 5 ريال وصناعته امريكي مجربه ودايما استخدمه لاي شي وسريع النشفان يعني خمس دقايق وهو زي الحديد لك تحياتي

[يا سلام سلم]

لا هنت يا اصيل نجد
الصمغ هذا من ضمن الخيارات
لكن عطوني يومين وافيدكم بالتفاصيل
كلمت المصنع وانتظر التجاوب

[اصيل نجد]

ربي يوفقك للاصلح تحياتي

[يا سلام سلم]

ربي يوفقك للاصلح تحياتي

الله يبارك فيك فيك يا اصيل ،، والله يوفقك ويوفق الجميع ،،

[شاص]

بشر .. عساهم صلحوه ؟

[اصيل نجد]

الله يوفقك ويرزقك انشاء الله

[يا سلام سلم]

طيب يالربع ،،

مسيتم بالخير ،،

ابشركم تم التواصل مع محلات خزان الوادي بالرقم المحفور على الخزان،،

وكلمني واحد سوداني اسمه حسن ،،

وهو حسن اسما على مسمى ،،

والله ما كنت متوقع ابدا انه بيصلحه لي ،،لكن ربك كريم ،،

تفاصيل الاتصال ،،

السبت :العصر كلمت الرجال قال لي وين موقعك قلت له مخرج خمسة قال زين جنب المحل شوي واكلمك ،،

بعد ربع ساعة دق ياخذ وصف البيت ،،

الساعة خمس ونص والا الرجال عند الباب يقول هات الخزان ،،

لين اللحين وانا مفهي ومستغرب حسن التعامل اللي اشوفه من حسن،،

اخذ الرجال التانكي وقال انتظر اتصالي ،،

الاحد: اتصل علي قال الخزان خربان وهذا سوء استعمال لان البزبوز مغير ومشدود زيادة لين كسر الفيبر ،،
قلت طيب ؟؟ قال ولا يهمك مالك الا اللي يرضيك ،،

الاثنين : العصر اتصل علي يقول ترا بدلنا لك الخزان بخزان ثاني جديد !!!

الحقيقة اني ما صدقت ،،

وقال لي المغرب امرك واعطيك الخزان الجديد ،، قات له خير ،،

وفعلا مرني الرجال وعطاني الخزان الجديد وعزمته وعيا يقلط ،،

** الفوائد :
- الله يكثر من امثال السوداني حسن في حسن التعامل .
- الله يكثر امثال الشركات اللي تضمن منتجاتها بحيث يشتري الزبون وهو مرتاح وضامن الشئ اللي اشتراه .
- اذا عندك شي خربان والوكيل حقهم موجود لا تتردد في عرض المشكلة عليه يمكن عنده حل جذري مثل ما صار معي ،،
- اسأل الناس العارفه واللي تدلك على الخير ( اعضاء مكشات) ولا تستحي اطرح اي مشكلة وانتظر الردود ،،
- استعن بالله قبل كل شي ولا تجتهد وانت ما تعرف وش الطبخه عشان ما تندم بعدين،،
اذا لم يكن عون من الله للفتى *** فأول ما يقضي عليه اجتهاده .

موفقين يالربع ،،
والله يبارك بالخزان ،،
اشكر كل من تشارك معنا بالاراء والله لا يهين الجميع ،،

ان اصبت فمن الرحمن ،،، وان اخطات فمن نفسي والشيطان،،

[storm way]

بالمبارك يا سلام سلم

والصراحه ما قصرو مع العلم ان الخراب من اللي استخدمه وليس سواء تصنيع

واهنيك على انك واجهت واحد يحب مصلحة الموسسه وجاي بنفسه الي موقعك عشان يستلمه بعد

لو واحد غيره والله ما يغيره لو تطير وتوقع والسبب انه بفعل فاعل

على العموم مبروك عليك التانكي الجديد

[شاص]

لا تسوي به شي إذا كان تحت الضمان .. لأن ضمانه حسب خبري 5 سنوات .. رح لهم يبدلونه أو يصلحونه



مبرووووووووووك الخزان الجديد .. تكسره بالعافية .. ولا فيه أحسن من التواصل مع المصدر (الوكيل) مباشرة عند ظهور أي مشكلة بالمنتج للتعرف على الحلول المتاحة والتي قد تكون مجانية أو بأسعار زهيدة .. حتى وإن كان الوكيل فيه مافيه .. تخيل إنك رحت تشتري غراء وتخلّط وتحوس الخزان وبالنهاية ما تضمن يضبط أو لا

[يا سلام سلم]

بالمبارك يا سلام سلم



والصراحه ما قصرو مع العلم ان الخراب من اللي استخدمه وليس سواء تصنيع


واهنيك على انك واجهت واحد يحب مصلحة الموسسه وجاي بنفسه الي موقعك عشان يستلمه بعد


لو واحد غيره والله ما يغيره لو تطير وتوقع والسبب انه بفعل فاعل



على العموم مبروك عليك التانكي الجديد


الله يبارك فيك ،،

وكلامك صحيح ،،

وهذا اللي خلاني ما اصدق اللي قاعد يسويه السوداني،،

الله يوفق الجميع ولا هنت على المرور،،

[يا سلام سلم]

مبرووووووووووك الخزان الجديد .. تكسره بالعافية .. ولا فيه أحسن من التواصل مع المصدر (الوكيل) مباشرة عند ظهور أي مشكلة بالمنتج للتعرف على الحلول المتاحة والتي قد تكون مجانية أو بأسعار زهيدة .. حتى وإن كان الوكيل فيه مافيه .. تخيل إنك رحت تشتري غراء وتخلّط وتحوس الخزان وبالنهاية ما تضمن يضبط أو لا[/CENTER]

بارك الله فيك يالشاص ،،

وكلك نظر وكلك بركة انت والشباب ،،

والله لا يحرمنا من ردودكم الموفقة،،، لا هنت على المرور ،،

[اصيل نجد]

مشال الله ياسلام سلم مبروك الخزان الجديد وربي يوفق هالرجال اللى اسمه حسن عزالله انه رجال طيب ياناس يازين الطيبه كلا يدعيله والله فرحت لك ياخوي موفق خير انشاء الله

[يا سلام سلم]

مشال الله ياسلام سلم مبروك الخزان الجديد وربي يوفق هالرجال اللى اسمه حسن عزالله انه رجال طيب ياناس يازين الطيبه كلا يدعيله والله فرحت لك ياخوي موفق خير انشاء الله
هلا اخوي اصيل ،،

كلامك صحيح ،، وذكر الحيا والطيبين يبين ،،

وهذا اللي صار مع الطيب حسن ،،رجال طيب حصل ذكر طيب ودعوة صادقة باذن الله ،،
الله يوفقنا وياه ،، ويعيننا ويعينه ،،

شاكر لك المرور ،،