من الدمام الى النماص

[ساري القايلة]

بسم الله الرحمن الرحيم
السلام عليكم
طاب صباحكم و ظهركم و عصركم و مسائكم و ليلكم حسب وقت القراءة
واضح من العنوان انه وراي سفره طويله و الله ييسرها ان شاء الله
ولكن ودي اختصرها شوي و اشوف اماكن جديدة
وسؤالي هو عن الطرق من الرياض الرين بيشة القوبا حلبا هل اكتمل؟
و هل فيه مقطعة؟
و هل احتاج جركل بنزين حيث ان سيارتي اف جي شرابه ما يكفي 400 كيلو في الخطوط المزفلته؟
واذا ما يحتاج هل يوجد بنزبن 95 على الطريق؟
وا يضا هل الطرق موجود في خرايط 2012 ؟ ولا لا اتعب حالي و احدث الجهاز
ناوي اسافر الخميس الجاي و تكفون ابي رد في اسرع وقت.
جعلها الله في ميزان حسناتكم
ولكم نصيب من دعاء الوالده اذا وصلت عندها

[sultan911]

تكفى انتبه تجي معه والله يوم الاثنين الاسبوع الي راح جيت معه بغيت اهلك انا واحد اطفالي كذب علي شخص يقول الطريق متواصل وفيه بعض القطعات البسيطه اطولها 70 كيلو ويوم رحت معه وقلت افيد المنتدى الغالي شفت الموت القطعه الي يقول 70 كم مشيت اكثر من ميه كيلو بعدها انتهت الردميه وانتهاء الطريق وتفرعت الطرق وطحت برمال وانفج علي لي الاديتر الصغير الي يجي خلف المكينه ولا فيه احد مر علي وقمت بتوصيله بقطعه حديده وكلبسات كانت معي حتى وصلت بدوي الله يجزاه خير واسعفنا بالماء ولي من الوايت الي عنده وعلمني بطريق يوصل لهجره قريبه منه ويقول كثير الي جوني مضيعين الطريق وهو الوحيد الي حصلته ويقول لي كم يوم فقط في هذا المكان والحمد لله قلت ابي اختصر الطريق حدود 600 كلم وبقيت يومين في الطريق والطريق متاهه وفيه واحد اخبرني انه ضيع ولا رده الا وادي الدواسر بعد ماحصل واحد ووصله ولا كان هلك نصيحه لاتروح معه والمحطات غير موجوده والهجر بعيده عن الطريق يعني اذا ماتعرف موقع الهجره بتمرها مادريت عنها نصيحه لاتروح معه والله سيارتي من الغبار امتلت لو تشوفها تقول اني دافنها
قالت لي عجوز الله يجاها خير قبل اروح وسمعت ولدها يوصفلي الطريق طريق طويل وامن خير من طريق قصير وخطر
وهذي نصيحتي لك واذا عزمت تروح معه خل معك خوي بسياره اخرى واخذ معك ماء كثير وبنزين احتياط وبعض القطع الي تخاف تخرب عليك في الطريق والله يحفظك ويرعاك
محطات بنزين مافيه
وخمسه وتسعين اطلب ربك حتى لو وجدت هجره فيها محطه مافيها 95 وعلى فكره الهجر الي اقول ممكن تحصلها ترى الطرق لها بريه بدون علامات وليست قريبه من الطريق ولا يمكن ان تشاهدها الا اذا احد دلك عليها او كنت تعرف موقعها
على فكره تراني قريب منك في الدمام اذا تبي تشاهد سيارتي مابعد غسلتها ههههه

[ساري القايلة]

يعطيك العافية اخ سلطان
والحمد لله على سلامتكم
للاسف صعب تلقى خوي على هالمشاوير الطويلة
وانا معتمد على الله ثم الكنود و القارمن
وناوي اتزود بالمويه و البنزين
وهي سفره و تمشيه
ولكن المفارق و التقاطعات شوي تخوف فاذا مالقيت وصف واضح لكل مفرق وتقاطع من الاخوان شكلي ببطل و الف الف شكر على النصيحة

[صالح الغفيلي]

بالنسبة للخط من بيشة الى النماص انا مررت فية قبل العام وكان خط السيرمن بيشة الحازمي الجفرالبهيم قوقة القوباء عندها انتهى الاسفلت ومشينا مع الردمية طلوع ونزول حتى طلعنا على حلباء على طريق والطريق لابأس فية لكن ماذكر اخوناsultan911 (http://www.mekshat.com/vb/member.php?u=156028)
ان فية رمال ومقطعة ماواجهنا شئ الا اذا كان طلع مع طريق غير هذا والبنزين متوفر بكل القرىالمذكورة وماحتجنا بانزين على الرغم ان سيرتنا باترول يشفط البنزين بسرعة

[ساري القايلة]

يعطيك العافية اخ مرير
الاخ سلطان يتكلم عن المنطقة بين الرين وبيشة و هي المنطقة اللي فيها المشاكل
اما المنطقة بين بيشة وحلبا فانت ما قصرت وضحتها و ان شاء الله ما فيها خوف بسبب كثرة القرى و وجود ارسال الجوال
انا بحثت في كثير من المواقع و لكن كل المواضيع قديمه من سنه و نص تقريبا و لكن ابي واحد مشى الطريق الصحيح مؤخرا و يعطينا اخر اخباره و المفارق و المخارج الصححيحة
انا و الله ودي اتمشى و لا ودي اقلبها مغامرة غير محسوبة

[راعي الرجم]

يقول المجربين واهل الخبرة الاولين : سهل الدروب ولو طالت
امشي زيادة كم ساعة ولا انهك نفسي وسيارتي والوقت حر
ومقاطع لو كان الوقت براد ومعك خويا كم سيارة
ولا ناس مجربة الخط واهل خبرة
اقول توكل على الله
لكن ما تسوى اعلك سيارتي والدعوى فرق كم ساعة
ياكثر المزفلت ودروبة
عندك خط الرياض ظلم الخرمة رنية بيشة وش زينة
او الرياض وادي الدواسر رنية بيشة
والله يكتب الي فيه خير

[ابو الوفاء1]

السلام عليكم
اخي الكريم

والله انا ما مشيت هذا الخط وان شاء الله ما راح امشي معة والسبب بسيط وهو ان الطريق من الدمام الى المكان الذي تريدة يمكن تمشية على اسفلت وناس تمشي معك طول الوقت , يا اخي احد الاخوان نقل لك التجربة التي مر فيها وهي الى حد ما مريرة . نصيحة خذ الطريق الاسهل حتى ولو كان طويل ولا تنسى نحن الان في فصل الصيف والحرارة علية جدا والسيارة الجديدة قد تخرب مع هذه الحرارة . فقط نصيحة وانت من تقرر مع تمنياتي لك بسلامة الوصول الى اهلك .

[يارب الجنة]

كم تطلع عليك كيلو الرياض الرين بيشه النماص ؟؟


شكل مافيه فرق وطريق الدمام الرياض وادي الدواسر الى النماص يطلع عليك 1500 كيلو والخط 100%


والطرق الثانيه ما ادري عنهاا !!

[ساري القايلة]

راعي الرجم
ابو الوفاء
محبوب
شكرا على مروركم
المقصد ليس توفير الوقت
مع ان الخط راح يختصر اكتر من 400 كيلو ولكن احتمال
اقطعه في وقت اطول عشان المقصد تمشيه
و المقطعه في الطرق اقل من مية كيلو حسب معلوماتي ولكن يبدو انا الاخ سلطان اخطاء في احد مفارق الطريق
و المقطعة يا اخوان عبارة عن طريق مرصوص ممهد غير مزفلت
ولا يوجد مناطق رمليه او صخرية كبيره تشكل خطر
الاخ محبوب الطرق من الدمام الى ديرتي عن طرق الوادي وابها اكثر من 1600 كيلو
و عن طرق بيشة اقل من 1100 كيلو
400 الدمام الرياض
650 الرياض بيشة ديرتي
شكرا لمروركم