طلب مساعدة عاجلة في ايجاد ماطور كهرباء للبر

[صياد شرقاوي]

السلام عليكم ورحمة الله وبركاته

مساء الله للجميع

يااخوان حبيت منكم النصيحة ياطويلين العمر حبيت اشتري ماطور كهرباء صيني 800 فولت والقيمة في حدود 400 ريال ولكن المشكلة ان اغلب المواطير الصينية في الوقت الحالي تجي مكس يعني تخلط الزيت والبنزين حتى مايدخن ويخرب واحسن ان سعره غالي ومايستحق فحبيت نصيحتكم في ماطور صيني نوعية جيدة او ماطور من نوع هوندا مايزيد عن 2000 واط لأني لقيت نوع هوندا 650 واط قيمته مايقارب 1100 ريال ولكن ماعجبني شكله اللي فيه حديد في الجوانب وتشيله من الجنب انا ابغى اللي فيه يد ويشال من فوق وحجمة صغير ومعقول طبعاً هذا لقيته وسعره مايقارب 1500 ريال ولونه احمر ومافيه اصفر لأن بعضهم يقول ان الاحمر هو اصلي والاصفر تجميع هندي فياليت نصيحتكم اهم شي السعر لايزيد عن 1500 ولو قل شوي يكون افضل ;) الاخ بخيل وبالنسبة للكهرباء هل الهوندا مثلا يجي كهرباء 110 و 220 ولا فقط 220 لأن الاغلبية تجي 220 فولت

[اصيل نجد]

اللى اقدر افيدك فيه ان الهونداء الياباني لايعلى عليه منحيث الكد وتوفر قطع الغيار وبالنسبه للكهرب احرص على 220 افضل بكثير لاان كهرباء 220 منتضمه وفقك الله للاصلح

[خط ليزر]

مثل ماقال اخوي اصيل الله يوفقه هوندا اوماطور روبن الياباني ومن واقع تجربه تمنياتي لك بالتوفيق

[عبون الجواء]

مثل ما قال ابو اصيل عليك بالهوندا الف واط 220 ياباني اصلي كاتم صوت لك ولزمن طويل
تكلمت عن جربه سابقه لي

تقبل تحياتي اخوك ابو عبدالله

[faiz-111]

قبل يومين شفت هوندا بساسكو ب 1499 يعطي تقريبا 8 امبير وحجمه حلو صغير

[الزعازع]

انا شريت astra korea ...
3000 واط من سوق الحراج اخو الجديد بسعر 800 ريال

[عيشه قشرا]

الصيني والي فيه تخليط زيت وبنزين هج عنه مالك الا هوندا ولا سوبارو روبن ولا ينمار وبالعلامة كلهن زيت لحال وبانزين لحال واخوك يتكلم من خبره عندي سوبارو روبن ياباني 2500 واط اعبيه زيت ماجنتيك كل اسبوع لاني استعمله واجد ويقعد معي شغال 20 ساعة على جركل بنزين 95 كبر قارورة المنهل واريحه ساعتين بس ولا كلفني الا 2500 ريال

[دل البحار]

عندك الهوندا اسمه eu20 كاتم صوت 2000 شمعه ما يخلط زيت مع بنزين سعره غالي بحدود 4000 الاف وفيه ياماها وكمان الهوندا ياباني بتلقاه لكن ماهو كاتم صوت وثقيل
المختصر المفيد ال هوندا eu20 وفك على نفسك شويه يا رجل الدنيا ما تستاهلش الشح
ممكن تلقى مستعمل ونظيف او عرض بالشركه لسعره يعني ع 3800 ريال ولك ولززززززمن

[mr-albreak]

خذ اللي تحتج وانا اخوك ولاتح فلوس في شي مالك حاجه فيه
ولاكن علمك طيب ماخاب من استشار
والشباب ماشاالله ماقصرو وانا بزيد عليهم شي
واحد من الشباب اشترى ماطور كهرب صيني من عند محلات العدد مثل خشيم والعبدالكريم
اخذه بـ 2000 ريال ومااشاالله يقوم مخيم من لمبات وتلفزيون ورسيفر
و للمعلوميه تراه بنزين لحاله والزيت لحاله مو خلط له اربع سنوات كل سنه يكشت فيه وشغال زي الحلاوه
لاكن على الاستخدام صاحبنا بعد كل طلعه يوديه تشييك ويغير زيته ويطربله الى الطلعه اللي بعدها واموره طيبه
اتمنى اني اكون قدمت المفيد وتقبل مروري
باالتوفيق انشاالله

[ابوطيف2]

شوف الياباني صعب تلقاه فيه وكالة هوندا عندهم المواطير بس تجميع هندي

[صياد شرقاوي]

الله يعطيكم العافية على الردود والافادة
وجزاكم الله خير

[شاهي العلمين]

خذ ماطور روبن الياباني لونه أصفر وصدقني راح تدعيلي ياخوووووي
والله عندنا بالمخيم شارينه له اكثر من ست اشهر لا يطفي ولا يضعف وصوته زوين

ماشاء الله لا قوة الا بالله

[هوازني]

خذلك ماطور كهرب 2000 واط هوندا اسمه U20
رائع وكاتم صوت
انا اخذته بـ 3300 قبل شهرين

[talak511]

الله يسير امرك والاخوان ما قصرو الله يبيض وجيههم