المساعد الشخصي الرقمي

مشاهدة النسخة كاملة : ماهو أفضل مكتب لجلب عمال تربية المواشي؟


راعي العريف
20/07/2011, 09:57 PM
السلام عليكم
أخواني ودي أجيب لي راعي هندي , ولا أدري وش أفضل مكتب أتجه ألية أو أفضل طريقة لجلب العامل الغنم المثالي , ومن هم أفضل ديره في الهند التي يتواجد فيها رعاة الماشية ، وعلى ماقال من نشد ماضاع , وقلت أبستشيركم في هذا الموضوع


تحياتي
أبو محمد
راعي العريف
21/07/2011, 01:26 PM
ياربع تــــــــــــــكــــــــــــــفــــــــــــــــــو ن شوي تفاعل ودي أجيب لي راعي هندي للحلال ولا أستغني عن أشواركم
محمدالزبيدي
21/07/2011, 01:40 PM
حي الله راعي العريف

الهندي يمدحونه لكن يحتاج بعد توفيق الله عز وجل إنك تبحث عن هنود مقيمين عند أهل الحلال حواليك

واستشر كفلائهم وشوف شغلهم اللي يعجبك منهم أطلب منه أن يبحث لك عن راعي من نفس الديرة اللي هو جاي منها

ولا تستعجل

أما المكاتق جلها تبحث عن المكاسب بغض النظر عن خدمة صاحب العمل

والتوفيق بيدين الله

الله يوفقك للخيار المناسب
ابو الشبرميات
21/07/2011, 01:51 PM
العمال توفيق من الله


ونجاحهم من فشلهم حسب التدريب والتوجيه من الكفيل ومتابعته لهم


واهم شي تشوف لك واحد امين مثل ما قال الاخ محمد الزبيدي وتعطيه الفيزة


وتحرصه على الدقة في الاختيار والسرعة في الاجراءات


وعلى ما نسمع من الناس ان الراجستانيين هم من افضل الرعاة لانهم اهل حلال في الهند اصلاً


اتمنى لك التوفيق من الله وجميع الاخوان


,,,
ABU MANSOUR
21/07/2011, 03:23 PM
.

أضم صوتي لصوت الأخوان علبك بالهند و راجستان بالذات

وأبتعد عن السوداني تراه شيخ و مايشتغل

وأبتعد عن المكاتب ترى يجببون لك واحد والسلام

ولللأسف الشدبد أن الهندوس يقدسون العمل أكثر من المسلمين وهذي حقيقة مؤلمة.

.
طالع سهيل
24/07/2011, 07:50 AM
اسئل الله لك التوفيق

من واقع تجربه .

( البنجلاديشي + النيبالي ) للأغنام والماعز

( السوداني + البلوشي الباكستاني ) للأبل
النبع الصافي
26/07/2011, 04:22 PM
ومن تالي
الهندي والبنقالي واليمني والسوداني
متغيرين شويتين والوضع مهوب اللي أنت تبي
الله يعين الجميع
مرعي السرحاني
27/07/2011, 08:38 AM
اذا ماتعرف احد مثل ماتفضل ابو الشبرميات قدم على الهند ولاية راجستان يبي يتعبك بس باللغه اما الخيل و الابل و الغنم خذ عيال.

الله يوفقك
بدوي جدة
27/07/2011, 06:47 PM
الهنود يمدحونهم وخاصة اللي من راجستان ولكن الهند ما ترسل رعاه أنا عندي تأشيرة راعي هندي وكلمت مكتب فالهند وقال ان الحكومة الهندية موقفة الرعاه و المزارعين والله يكتب اللي فيه الخير راحت تأشيرتنا بلاش مكتب العمل ماهو راضي يغير الجنسية الا بمعاملة جديدة ورسوم ثانية
ذيب الفاو
27/07/2011, 06:55 PM
شوف ياخوي عمال الحلال المناسبين خصوصا للاغنام هم الهندي والنيبالي والسوداني فقط وهم اهل هالشغله من قديم
ولاكن السوداني غالي راتبه جدا جدا
ولاكن صعب صعب صعب جدا هالوقت تحصل اي مكتب يستقدم لك عمال اغنام من هالجنسيتين لأنهم تركو هالشغله واتجهوا للعمل بالزراعه بدول اوربا واستراليا ..
بس مالك الا تشوف لك راعي قديم وثقه عند احد ربعك وتعطيه الفيزه ويرسلها ويشوف لك راعي على نظره ويخبره هو

وبالتوفيق ..
سلطان11
28/07/2011, 04:49 PM
والله الهنود اذا نصحو مافيه زيهم رعاة
قبل ستة اشهر استقدمت راعي هندي لاكن تاخر عليا لاني حطيت مدينة نسيتها الاجرات حقت الراعي تتاخر عندهم
ماني فاكرها دلهي او بمومبي
علما باني مسوي الوكالة لاحد المكاتب من بدري وماجاني الاقريب
الافضل لو لقيت من مدينة كيرلا لانهم اعلبها من البادية الهندية
تقبل تعليقي والسلام عليكم
مروبع
29/07/2011, 12:27 AM
ياخوك المكاتب ولانيب معمم الاغلب ماحولك احد ارسل تاشيرتك للهند لراجستان ومانتب نادم
راعي العريف
29/07/2011, 10:35 PM
أشكر الجميع وبيض الله وجيهكم , والمعذره والله منيب عند النت الفتره الماضيه .

طيب يالربع كيف أرسل الفيزه لراجستان ؟ أعطيه من بتحديد ؟ كيف الطريقة يالربع والله ما أعرف شي في هالمجال , تــــــكـــــــفـــــــونـــ الفزعه يالنشاما.
ABU MANSOUR
30/07/2011, 07:29 AM
.

أول شىء نق الألفين حقة الأستقدام لاستخراج التأشيرة ولازم تحدد الجنسية والمكان في الهند(راجستان).

وبعدين رح لمكتب زين من مكاتب الأستقدام وخله يسوي لك وكالة (المبلغ من 150 الى 300)ولازم تحدد أسم المكتب اللي في الهند اللي بيكون التوكيل بأسمة.

وبعدين عط صورة التأشيرة وصورة البطاقة المدنية لواحد ثقه هندي علشان يرسل الأوراق أو يوديها بنفسه للمكتب اللي في الهند.

و بكذا تكون وفرت على نفسك دراهم واجد وأتعاب المكتب اللي في الهند يدفعها الراعي.

واذا تبغى أتعابك تستردها ممكن بس هذا أعتقد مايجوز.

وسلامتك يالغالي!
.
.