هل هذا الكلام صحيح ياجماعه ابي رايكم !!!

[المغرم]

السلام عليكم ورحمة الله وبركاته

مبارك عليكم الشهر الكريم

إخواني الغالين

أنا اليوم رحت اغير زيت اليوكن 2010 عند بترومين

وقالي الفلبيني حق تغيير الزيت بعد ماشبك جهاز صغير تحت الدركسون

السياره لازم اطلع منها الكربون الي فيها علماً ان السياره ماشيه 20400 كيلو

وقالي تبي تكلفك تقريباً 450 ريال والوكاله تبي تصلحه لك ب 1000 ريال

بس أنا مأخذا بكلامه وغيرت الزيت فقط

وقلت خل اشاور إخواني في مكشات

وشرايكم هل هذا صحيح او لا؟؟؟؟؟

[ج س م]

وعليكم السلام .... وهل انت تشتكي من شي في السيارة

[المغرم]

اهلين اخي... لم اشتكي شي في السياره

[VTC 2002]

اهلاً بك اخي والله اللي اعرفه إن الكربون له جهاز لقياسه عن طريق الشكمان مثل الذي في الفحص الدوري اما الجهاز الذي شبكه تحت الدركسون اعتقد انه كمبيوتر لفحص السيارة لان فيش الكمبيوتر موجود تحت الدركسون والحمد لله انك ما طاوعته لان شكله نصاب واذا كنت ما تشتكي من شي بالسيارة فالتوكل على الله وما عليك من كلامه

[WWS]

مادام مؤترك ماشاءالله تبارك الله مابه خلاف
ماعليك من اللي يقؤؤل كربؤؤؤؤن ؤمااكربؤؤؤؤن
هذا يبي بس دراهمك ...
الله يرزقك من واسع فضله

[GMC4Ever]

ما أعتقد لكن أخوي ممكن أسألك سؤال... ليش ما تغير الزيت بالوكالة وتفحص؟

[المغرم]

والله يالغالي الكلام على الوكالات كثير وغالين وبنسبه لي ماقد جربتهم...

انت وش رايك...

[GMC4Ever]

أنا برأي وأنا أخوك السيارة جديدة الله يعطيك خيرها ويكفيك شرها

دخلها الوكالة يسوون لها فحص الـ 20 ألف ويبان في التقرير إذا صحيح تحتاج تنظيف من الكربون ولا لأ. ويمكن تكون تحت الضمان أو من ضمن نفس خدمات فحص الـ 20 ألف.

الوكالات ما في شك أغلى لكن شغل مضمون وتحط يدينك في ماء بارد وتريح راسك من دوخة الورش. ترى والله كثير منهم يتعلمون في مواترنا... لو الموتر قديم أقول ممكن وما في مشكلة لكن موتر جديد ما شاء الله وما مشى شيء حرام أطببه عند ورش يتعلمون عليه.

هذا رأيي والأمر في البداية والنهاية يرجع لك.

[السلمان2010]

ياخي مادامك ماتشكي من شي لاتعرض السياره بعدين تندم الله يعطيك خيرها

[You Like Me]

وعليكم السلام والرحمه
يخوي بترومين ذولي ترا لحسه يكرهونك في السيارة
سيارتك جديده ماعليك منه وهذا ناوي يطلع الدراهم منك وبس
بعدين حتى لو في كربون والا فيه الطاعون يا اخي سياراتك مازالت تحت الضمان
وحرام والله يلعبون فيها على الأقل إلتزم بالتشييكات مع الوكاله لحد ما ينتهي ضمانك بعدين اسحب عليهم
مشكلتنا في هالوكالات بالوقت الحاضر انه بعد سنه من شراء السيارة توهم يكتشوفن العيوب التصنيعيه
فبعض الوكالات تتصل عليك ويقولون تعال في قطعه كذا لازم تتغير وبعضهم لا ما يتصل اذا انت مواضب على التشييك وجيت كان بها غيرو لك المطلوب واذا ما جيت آخر إهتماماتهم

بعدين انا سامع ان بترومين هذه كلها زيوت معاد تكريرها
من مصانع الخرج والله اعلم

[escape_man]

لا تغير الزيت الا بمراكز ACDelco التابعة للجميح

هذا ذا كنت تعاني من مشكلة بموترك

[جمس_454_97]

اخوي الغالي انا جيتهم وقالو لي عن الماده الي عندهم لاكن انا مانصحك تحطها لانها ممكن تخرب عليك البخاخات
واذا عندك كربون ماتصلحه عند حق زيت فيه ورش متخصصها والكربون غير بواجي وسيارتك جديده لا يلعبون فيها نصيحه

[Avalanche]

ينقل للقسم الصحيح ....

[sgl2002]

ياخوي انت مافهمت قصده

انت تدري وش يبي يوصله الفلبيني؟؟

يبيك تشتري من عندهم حاجة ب٤٠٠ ريال تنظف المكينة وهو له نسبة فيها

المهم ماعليك منه

[واثق الخطوه-]

نصيحة اخو ابعد عن بترومين تراهم نصابين انا معي سفاري جديد اول ما طلعته من الوكاله مشيت عليه 5000 ورحت لمهم كانو حاطين عروض تعبي بنزين ببلاش ويوم فك السره الفلبيني قال صديق فيه مشكله قلت وش فيه قال زيت فيه كربون ههههههه لازم سوي غسيل مكينه قلت لا بس غير زيت والموتر جديد يوم جى يبي يغير الزيت ويسحب لي فوق قلت هاذولي نصابين وش يضمن لي انه زيت جديد قلت لا عب علب وهو بدى يخنفس قلت تخنفس ولا ما تخنفس مستقعد لك خخخخخخ ويوم خلص والى يومك هذا ولا عاد طبيتهم

[بدوي جنوبي]

نصب X نصب

تمنيت أنك حشرته وسئلة عدة أسئلة
كيف يطلع الكربون
والجهاز كيف يحسب نسبة الكربون
واصلا لابد يكون فيه نسبة كربون في عملية الاحتراق مهما كان

[ابوضيف الله]

الكربون يقاس عن طريق الشكمان ممكن يختلف في السيارات الجديدة ويكون عن طريق الكمبيوتر
حتى لو كان صادق في كلامه لوتمسك اي خط وامش بسرعه معتدله ١١٠الى١٢٠ حدود ١٠٠كيلو بيطلع الكربون اللي في الموتر كله هاذا اللي اعرفه حسب معلوماتي

[جوالأجواد]

نصااااابين بترومين
انا صار لي مثلك بالضبط معي جمس ماشي عشرين الف فقط وقال لي فيها كربون!!!!!!
فسفهته وقلت له غير زيت فقط وعاهدت نفسي اني ماعاد اطب عليهم