صوت صرصرة في الهايلوكس 4x4 2005 ارجوا المساعدة

[محتري السيل]

وعليكم السلام يابو خالد وصبحك الله بالخير

ومادامه صرير ماهوب قرقعة او أحتكاك أن شاء الله المشكلة تكون بسيطة
تأكد أن فحمات البريك الأمامية والخلفية غير منتهيه
وأنصحك تمر أقرب بنشري وطل تحت الموتر يمكن فيه واضح يحل المشكلة
أسأل عن الورش الممتازة في منطقتك يمكن الفني المختص يفيدك
وماشاء الله موترك شكله مازال جديد بس يمكن كثر التطعيس وطلعات البر والمطامر أثر على الجلد
فحاول تغسل السيارة بستم لعل وعسى
وانتبه من الوكالات ترى ماعندهم الا الدجة وحرامية ونصابين ( في الغالب )

وبالتوفيق

[أبو خالد 12]

محتري السيل صدقت والله بكلامك عن الوكالة أنهم حرامية ونصابين وأزيد من الشعر بيت انهم أغبياء ومغفلين تصدق كذا مرة غيروا لي الزيت وحطوا لي 4.8 لتر بس مع ان ماكينة الهايلوكس الدفرنسين تحتاج إلى 6 لتر وبينت لهم ان عيار الزيت ناقص بس انهم قالوا عيار الزيت ما هو دليل!!! وما عرفت الصحيح إلا يوم رجعت للكاتلوج ومكتوب فيه 6 لتر لأن الكارتير اكبر من الهايلوكس العادية وكتبت عن الموضوع هذا في مكشات وما قصروا الأخوان .
زيادة على كذا خذوا علي مرة أجر تشحيم الموتر 150 ريال مع ان التشحيم بالبنشري ما يتعدا عشرين ريال!! .
أذكر أول مرة جبت الموتر للصيانة اندهش الفني الغبي وقال ليش رافع الموتر فوق ومركب جنوط! مع ان الرفعة والجنوط من المصنع ما هو مني وما اقتنع إلا بعد ما شاف وحده ثانية مثل سيارتي ، تصور الغبي ما يعرف يفرق بين الهايلوكس العادية والدفرنسين وهذا حصل لي في صيانة الوكالة فرع الفيصلية .

المهم نرجع لمشكلة الصرصرة ، انا غسلت الموتر بستم بدون ديزل بس ماء وصابون وما راح الصوت .
الصوت ليس من فحمات الفرامل لأن الصوت لا يتأثر بضغط دواسة الفرامل .
أحتمال انه صوت إحتاك أنا شكيت بإنه صوت رمان بل العكوس الأمامية بس الصوت يختفي وهذا ما يحدث إذا كان رمال بل تعبان .
الصوت يبدأ من تحرك السيارة ويختفي عند سرعة 80 كلم/ساعة .

أنا الحين شاك انه الصوت جاي من الكفرات وهن نوعية دينلوب مقاس 205 جنط 16 لأني قريت موضوع في مكشات يقول ان كفرات دينلوب تطلع صوت صرصرة مع الوقت .

أخيراً أشكرك على مساعدتك وأهتمامك ولا زلت انتظر المزيد من الآراء حول هذه المشكلة .

[ال تي]

السلام عليكم
الصرصره مع البرد طبيعيه حتى مع الكامري لن الوكيل يركب ربالت في جده مثل المكيف والمسجل لو تقارن مع الخليجي تلاحظ الفرق ولا المرتبه الخلفيه حقت 2005 تجي بدون قطع تثبت المرتبه من ورى كذا يوفر على حسابنا

[قرناس الشمال]

السلام عليكم
اخوي على كلامك شكلة صوت سيور
يطلع اذا ما حميت السيارة
وهذي بسيطة شوي شحم وانتهينا
لاكن المشكلة عندي
صوت صرصرة عند المطبات الخفيفة>عيون القطط<
وشكلة من الديكور الامامي
ومهبلبي هالصوت ما ادري وش الحل
بعض الشباب يقولي ربطة تربيط داخلي
وثاني يقول ركب مساعد استرالي
وثالث يقول ركب جنوط خفاف
ولا ادري ويش الحل
افيدونا ودمتوم سالمين
السيارة Gxr 2002

[ألنشمي]

راعي الهلي
جرب تشد أو تهز أو تعدل على الصاجات الى تحت القير الدبل والرديتر لازم واحده منهم مرتخيه أو أنها تلامس.

http://www.mekshat.com/pix/upload/images13/mk20888_000.jpg

[أبو خالد 12]

بصراحة الصوت معقدني مدري من وين يجي والغريبه كل ما كان الجو بارد كل ما زاد الصوت ، اليوم راح اوديها للوكالة وأوقفها لين تبرد بعدين اشيك عليها مع الفني .
راح اخبركم وش يقول ولو اني خايف من فنييهم لأن نصهم خرطي .

[البانداالرشيق]

يمكن الجلب من تحت يبيلها تشحيم
أو يمكن على نفس الشكمان فيه حديدة ( حلقة ) يمكنها منحله ( متحركه من مكانها )

[أبو خالد 12]

الأخوان الأعزاء ، اليوم رحت للوكالة (وكيل عبداللطيف جميل في حائل) وركبت الفني معاي بالسيارة وسمعته الصوت وكان الصوت عالي وواضح جداً .

الفني يقول احتمال عمود الدبل يحتاج تشحيم ، قلت له انا توني مشحم السيارة كلها عند الوكيل قبل اقل من شهر ، قال أجل عمود الدبل يحتاج تغيير !! قلت طيب ارفعوا السيارة وافحصوا عليها من تحت قال الحين زحمة تعال بوكرا الصبح . قلت خلاص الوعد ان شاء الله الصبح ، قال احسن لك ودها للرياض لأنه هنا مافيه قطع وراح تآخذ أيام في الورشة !.

أنا بصراحة شاك ان كلام الفني صحيح ، معقول عمود الدبل يخرب والسيارة ما عدت 17 الف كيلو للحين يعني توها جديدة بقراطيسها وأنا محافظ عليها مرة ، أظن والله إن كلام الفني ما هو صحيح ! وش رايكم يالربع أحد يشور على أخاف يلعبون فيها بالوكالة !!! .

[Waleed1]

السلام عليكم

بس هذى مشكلتك بسيطة الصوت هذا جاى من سير السيارة وبكل بساطة يبيلة شوى شد، وأذا ماراح عطة شوى زيت زيتون أمزح زيت خفيف جداً وأنسى الموضوع وسلامتك.

[أبو خالد 12]

الباندا الرشيق اشكرك على ردك ولكن انا شيكت على الحلق والصاجات وكله سليم وبالنسبة لتشحيمهن انا مسوي تشحيم كامل عند الوكالة من حوالي شهر كلفني 150 ريال بس ما راح الصوت .
الأخ waleed1 ما اظن ان الصوت من السير لأني اذا طفيت المحرك وأنا ماشي ما يروح الصوت يستمر حتى والسيارة تمشي طافية .

الأخوان الفني يقول إحتمال عمود الدبل خربان وش رايكم كلامه صحيح ؟ أسلمه إياها وأتوكل على الله مع ان السيارة جديدة ومحافظ عليها أخاف يطلع شي ثاني .

[دسم الشوارب]

المشكله بسيطه جداً

أحد السيور مرتخيه وتقدر تشده بنفسك ماياخذ منك الا خمس دقايق
ولا رح للكهربائي يشده لك بـ5ريال ان كثر
تصيرلي احياناً وانا متأكد
وبالتوفيق

[أبو خالد 12]

الإخوان الأعزاء ، أنا زيادة في التأكيد رحت للصناعية ومريت ثلاث ورش ممتازة :

الورشة الأولى ميكانيكي تركي يقول فيه فضاوة في العكوس الأمامية وإحتمال الصوت من رمان بيل العكوس! .

الورشة الثانية ميكانيكي هندي قال شحم الموتر!! .

الورشة الثالثة ميكانيكي هندي قال فيه حلقة أو وردة موجودة في داخل عمود الكرنك أو قير الدبل يمكن تكون مرتخية من داخل!!! .

جميع هذه الورشات خالفت رأي فني الوكالة حول عمود الدبل لأنهم يقولون العمود سليم .

أنا حقيقتاً قررت أن أترك الصوت كما هو وأتوكل على الله سبحانه مع العلم أني طالع قريباً في رحلة 200 كيلومتر داخل النفود الكبير إلى عليم الضمى واسأل الله العزيز القدير أن ما تغدر بي السيارة وتخرب بالنفود لا حولك ولا حواليك لأني شاك إن هذا الصوت غدار .
أخيراً أشكركم على المساعدة التي قدمتموها لي وهذه هي عادتكم يا كتاب مكشات تحبون تقديم المساعدة والخبرة لذلك أشكركم من جديد . أخوكم أبو خالد .

[غضنفر]

معروف اي هايلكس بالدنيا اذا تحرك يطلع صوت من السست
يمكن يكون الصوت من السست جرب فك وحده ثم شف اذا بتسمع الصوت