عاجل استفسار: طريق الرياض المدينة - الرياض مكة

[خط الديرة]

السلام عليكم ورحمة الله وبركاته

شهر مبارك عليكم

ياليت تفيدوني بإذن الله ناوي اسافر بعد فجر اليوم من الرياض إلى جدة تقريبا برا
وجهتي المدينة الاقتصادية شمال جدة ب100 كيلو

فأي الطريقين افضل

1//طريق الرياض القصيم المدينة

2// طريق الرياض الطائف مكة ...

ياليت تشرحون لي الطريق من البداية واريد السريع والمسافات تقريبا كم بالكيلو
وهل يوجد محطات؟!

وهل في غبار وسافي ؟عشان نعمل احتياطاتنا من بدري

وطبعا ودي ارتاح بعد 400-او 500-او 600 كيلو لأن معي الاهل ولا حقدر اكمل الطريق ....فياليت إن في مكان او محطه فيها سكن بهالمسافة تقريبا برضو تدلوني عليها

واكون شاكر لكم مقدما

[خط الديرة]

الووو وينكم انا نويت احرك والله يسهلنا

[شعيب الحزيمي]

ما ادري

لكن وجه تعرفه ولا وجه تنكره

وان شاء الله يفيدونك الاخوان

[عقيق الرياض]

اكسب عمره في هذ الشهر الفضيل وسافر عن طريق الرياض مكة
وريح بعد 600 كيلو يعني الطائف

[خط الديرة]

جزاكم الله خير والعمره الله يسرها بإذن الله بوقت ثاني صعب الحين

بس الاخوه المتواجدين دلونا على الطريقة
....

فكرت احرك على القصيم بعد ساعتين إذا الله ييسر واريح فيها واحرك بعدين ...

بس ابغى اعرف الخط كيف وكيفه بالليل سريع؟في شبك لأن الواحد نظره على قده ...

[العريني1]

حفظك الله في حلك وترحالك
1- الرياض - الطائف - مكة - جدة
من الرياض الى الطائف بحدود 800ك تقريبا ثم الى مكة بحدود 90-100ك من السيل الكبير
ثم مع طريق الخواجات بحدود100--ك وهو سئ جدا.. ثم الى موقعك 100ك شمال جده
والطريق مليء بالمحطات


2- الرياض - القصيم - المدينة - جدة
من الرياض الى القصيم 350 تقريبا ثم الى المدينة بحدود 450كتقريبا ثم الى موقعك شمال جدة 350ك تقريبا مع طريق المدينه مكه تفرق مع مفرق - صعبر- الى جده
الطريق مزدوج بالكامل ويوجد محطات في الطريق .. لكن حاول تعبي من القصيم لقلة المحطات الى المدينه
.......................
ملاحظة لايوجد مكان مناسب للراحة بعد 500- 600 ك اما الطائف او القصيم او المدينه...
شخصيا اقترح الرياض القصيم المدينه جده... الطريق سيكون اقل ازدحاما خصوصا مع كثرة المعتمرين في طريق الرياض الطائف


وفقك الله ويسر امرك

[ابوشوق المزيني]

عليكم السلام ....

انا من سكان المنطقهة الغربية

افضل طريق لك الرياض ثم القصيم ثم المدينة ثم جدة

الطريق من المدينة الى جدة مريح ... ملاحظة يوجد طريقين كلها ممتازة

1 من المدينة الى جدة مباشر الخط سريع ومريح 450 كيلو

2 من المدينة الى ينبع خط سريع ومباشر وجديد 230 كيلو يعني ساعتين

من ينبع الى جدة خط رهيب 300 كيلو

توصل بالسلامة واي خدمة

[خط الديرة]

ابوشوق والعريني بيض الله وجيهكم مشكوورين وماقصرتوو
وماعليكم الطريق من المدينة إذا وصلنا المدينة بإذن الله ماعلينا ديارنا ومعروفه الله يحفظها ويحفظ جميع الديار....

لكن اسمحولي بس اتمنى توضحولي زياده الطريق من الرياض للقصيم سريع صحيح ؟

وكذلك من القصيم للمدينة؟
وعلى ماسمعت وكلام اخ العريني إن بعد القصيم مافي محطات إلا لازم تخرج عن الخط ...صح؟

وياليت لوتشرحلي من هنا من الرياض اي طريق واي مخرج ...وكذلك من القصيم

علما إن شاشة الملاحه موجوده وماتقصر لكن حابين نستفيد منكم ومن معرفتكم بارك الله فيكم

لأن بصراحه الواحد يخاف يلخبط ويروح مع القديم ....للقصيم ...هذا إن وجد

[المهند القاطع]

الله يرجعكم سالمين اهم شي السرعة

[إحساس يتيم]

من الرياض إلى القصيم كله محطات وشبك حمايه والله يستر عليكم جميع
والركاده وأنا أخوك زينه في كل شيء
ومن القصيم إلى المدينه أيضاً الطريق حلو وفيه محطات ولكن دائماً احرص ع تانكي البنزين يكون مليان أوفوق النص ..

ومن الرياض تمسك طريق الملك فهد شمال وتتوكل ع الله وتشيك بنزين من المحطات بعد ماتطلع من الرياض
وتشيك ع هواء الكفرات والله يستر عليك ....

[خط الديرة]

السرعه ان شاءالله ماتزل 140 ...بس الله يكفينا شر المتهورين....وساهر

[خط الديرة]

تسلم اخوي احساس يتيم ولا عدمنا من نصايحكم