هل الشيهانه التركيه فاشله في صيدها؟؟؟

[قناص الهمله]

بسم الله الرحمن الرحيم

صباح ومساء الخير

كنا قاعدين في المجلس والربع يتعايون على الشيهانه التركيه

الي يقول انها طيبه والي يقول من 10 طيور يجي فيها 1 الطيب

فقلت خلني استشير صقاقير مكشات

[عاهد بن علي]

صبحك الله بالخير
التركيه الي مطروحه في شهر سته وسبعه تتعب الصقار حتى تجيد اما الي مطروحه في شهر ثمانيه وتسعه تكون جيده لانها اكثر خبره في لطيار والصيد قد اعتمدت على كفها اكثر

[بن محجن]

بسم الله الرحمن الرحيم

هلا وياصباح الخير أخوي
قناص الهمله

بنسبه للطيور توافيق ومن بعد الله
وكل ما تأخر وقت الجلب مثل ما تفضل الأخ عاهد كان أفضل
ان كان في الشياهين التركيه أو الفارسيات

وتحياتي

بن محجن
10/9/1432ه

[ابوعزيز2007]

والله شفته مع واحد من الجماعة في الساحل العام يلحق على شاهين جير كمن وحده وشواهين بحريات

[راعي الدويمع]

فيها الطيب وفيها الخيب وصابعك ماهي سوا

[راشد حسين]

اخوي فيه الطيب وفيه الخيب

واول شي واخر شي ترجع لصقار

[ابو فهاد0]

اخوي قناص الهمله

الشواهين التركيه زي ماتفضلوا اخواني بدكرها ان المطروحة متاخر تاتيك طيبة
والطيور توافيق طال عمرك
بس الاغلب في الشواهين التركيه تجيك اشهوانيه يعني يوم تجيك جناحها مسكت وطيب بالحيل
ويوم تجيك مرة ردي جناحها

[hawwamT]

نفس كلام الاخوان..التركية يطرحونها وهي تو طارت من العش ولذلك يقولون فاشلة..أكيد ح تكون فاشلة..ماعندها اي خبرة..وانا بنفسي اشتريت تركية آخر الوقت..يعني طارت وصادت مئات المرات..المهم بعد ما هديتها لقيتها كأنها بحرية في الهدد والصيد..

[بدرالدجا]

اخوي قناص الهمله
مسيت بالخير ,,
مثل ماقال اخوي راعي الدويمع
فيهن الطيب والخيب
اذكر وحده كانت مع واحد من الربع
ذابحه ثلاث حبااي ووحده كانت معي
ماهي قد الهقوه ومثل ماقال اخوي
اصابع يدك مي سوا

[هاوي هدد 11]

لالالالا
الشياهين التركية ماهي فاشلة الا ماندر
صقرتها 9سنوات متتاليه ماعمرها خابت معي
اهم شيء لاتضعفها
أهدها في أي وقت ماتقول لا
أخذتها من رياجيل شرواكم يقولون فاشله وفعلت معي
فعل طيب حيل
ولكن في البدايه أصبر عليها
للأسباب التاليه:
مطروحة بدري
تغير الجو من بارد الى حار
شوفو هدادهن في مواضيعي
الصقر من صقاره

[النـادر]

على ماشفت الفاعل منها ماله مثيل واكثرهن خايبات اما ليش مادري

لكن ينجح من العشر وحده والا ثنتين

[((ابو وعد))]

أتوقع ان الشواهين جوعها حار ولاطاحت بيد صقار محترف بتفعل يقولون الطير من صقاره والبركة من رب العالمين
قبل عدة سنوات اتذكر اني شريت شيهانة عيا احد يسومها من طول ساقها وبرودة علفها وعصاوتها كلن يصد عنها لاشافها واشتريتها مظطر ماكان عندي طراد يمكن اتذكر ب500 ريال وراعيها ماكود انه يبيعها
الحاصل ان الله طرح فيها البركة واصبح فيها قوة بالطرد وسرعة ماشفت مثلها لا اله الا الله وهديتها على الحقبيات والحمام واسعدتني وصرت اقنص مرتاح ومتطمن ويوم شريتها كنت متشائم منها
راعيها اللي باعها يوم شاف فعلها عطاني فيها 2000 وذاك الوقت ماتوصل الجبليات 2000 اطلق جبلية ماتتعدى 1800 في ذيك السنة.... البركة من رب العالمين نطلب من الله البركة في بيعنا وشرانا ونتوكل عليه ومانخيب ان شاء الله

[دعاس]

الله يعطيك العافيه على الموضوع
والسؤال يطرح نفسه
بما انني على صله قويه مع خويانا الرحابنه بسوريا
واغلبهم الشباكه بتركيا اثبتو بواقع80% ان الشياهين اللي تطرح بتركيا ليست من مواكر تركيا بل يتم شبك الجبليات الايرانيات الحمر وفي السود ام راس ادهم وكذلك التركيه اللي عليها الكلام تجي لو هي فرخ نحرها حمر وظهرها فيه رش بالغواطي ومن اندرالجبليات السود اللي يجي راسها اسود وظهرها اسود ولا يجي فيه رش نهائي والوافيه يجي مقاس العرض 15 ونصف وما كل جبليه تطرح بتركيا يعني تركيه حالها حال اي جبليه تهاجرمن روسيا وتقطع البحر الاسود وتطرح بتركيا وش مدري الشباك انها جايه من روسيا ’’وكذلك الجبليه الايرانيه تهاجر من ايران وتشبك بالعراق وتركيا وبالسعوديه وبسوريا .
الشياهين التركيه من مايقارب 15سنه نجيبها ولا بحياتها تعدت5000ريال الا من كم سنه وصلت8000 فهذا دليل ان التركيات اثبتن نجاحهن
لاسباب احب اذكرها لكم:
1-الجبليه من حيث الافضل الجبليه الايرانيه الحمراء
2-الجبليه العراقيه السوداء ام راس ادهم
3-الجبليه التركيه السوداء
مواصفات الجبليه:
اولا /واهم شي انها تقرنس مع الطيور وتطلع مع الطيور او قبلهن
ثانيا/انها تركد بالموتر وتعلم للطلع
ثالثا/قليلة المكافخ ولديها مناعه اكثر من البحري
السلبيات: لاتحب الجوع(القصر)ولا تطوف لازم علف يومي وتعامل معاملة الحر.
اما لااوافق بعض الاخوان اللي يقول من10 تركيات تطلع وحده
البحريه تضمن انها تصيد وتصمل على صيدتها
اللي يقول يضمن ذلك فاعتبر انه ماصقر بالشاهين
لان الجبليات حالهن حال البحريات
والجبليات افضل لانهن يصفن بدري ويهدن بالصفري واسف على الاطاله
الا من كم سنه

[عنيد]

التركيه من واقع تجربة
تبي صقاااااااااااااااااااااااااااااااااااار
وبس
يعني بالعربي فلسفة الحرار والوكارا ماتمشي معها
تبي صقار يمرجها على الطيار اول شيء وماتبي زود تدهيل لازم يكون فيها وحاشة شوي وبعدها علمه طيبه على الكراوين
وبعدها تفرج وماجاك علي

[عيد العازمي]

الله يعطيك العافيه على الموضوع
والسؤال يطرح نفسه
بما انني على صله قويه مع خويانا الرحابنه بسوريا
واغلبهم الشباكه بتركيا اثبتو بواقع80% ان الشياهين اللي تطرح بتركيا ليست من مواكر تركيا بل يتم شبك الجبليات الايرانيات الحمر وفي السود ام راس ادهم وكذلك التركيه اللي عليها الكلام تجي لو هي فرخ نحرها حمر وظهرها فيه رش بالغواطي ومن اندرالجبليات السود اللي يجي راسها اسود وظهرها اسود ولا يجي فيه رش نهائي والوافيه يجي مقاس العرض 15 ونصف وما كل جبليه تطرح بتركيا يعني تركيه حالها حال اي جبليه تهاجرمن روسيا وتقطع البحر الاسود وتطرح بتركيا وش مدري الشباك انها جايه من روسيا ’’وكذلك الجبليه الايرانيه تهاجر من ايران وتشبك بالعراق وتركيا وبالسعوديه وبسوريا .
الشياهين التركيه من مايقارب 15سنه نجيبها ولا بحياتها تعدت5000ريال الا من كم سنه وصلت8000 فهذا دليل ان التركيات اثبتن نجاحهن
لاسباب احب اذكرها لكم:
1-الجبليه من حيث الافضل الجبليه الايرانيه الحمراء
2-الجبليه العراقيه السوداء ام راس ادهم
3-الجبليه التركيه السوداء
مواصفات الجبليه:
اولا /واهم شي انها تقرنس مع الطيور وتطلع مع الطيور او قبلهن
ثانيا/انها تركد بالموتر وتعلم للطلع
ثالثا/قليلة المكافخ ولديها مناعه اكثر من البحري
السلبيات: لاتحب الجوع(القصر)ولا تطوف لازم علف يومي وتعامل معاملة الحر.
اما لااوافق بعض الاخوان اللي يقول من10 تركيات تطلع وحده
البحريه تضمن انها تصيد وتصمل على صيدتها
اللي يقول يضمن ذلك فاعتبر انه ماصقر بالشاهين
لان الجبليات حالهن حال البحريات
والجبليات افضل لانهن يصفن بدري ويهدن بالصفري واسف على الاطاله
الا من كم سنه


اخوي العزيز لاتغارن الجبليه بالبحريه الله يهديك ويهديني وياك

الجبليه الله يسلمك نقلتها وماني قايلك انا صقار بس الله يشهد وبعد الله يشهدون بشر

اني كرهتها والسبب تجي العلمه وما تجي القفري

والسبب هذا اكثر مافي الشيهاين الجبليات على كلام اللي جرب غيري فيهن

......... والمشكله .......

الله يكفيك شر المشاكل انت وانا والجميع


اني ماهديتها على الفقري مره مرتين ثلاث ياليت

الا أكثر من عشر مرات ومالها نيه تجييه والله معاد لها عذر

والقاهرني العلمه تجيه ميتين وصرت من القهر احصل كراوين وهد وماتجيهم بالمره وخلي الشباب يجون ويصيدون الكراوين اللي عند جهازي بشياهينهم

وخليهن علمه لها تجيهم ميتين بس القفري تستلعن لعانه لا لها اول ولا تالي

اقوول خلها على الله


والله لو مو خوف من ربي لرميها وخليها بالدشه

ياخوي العزيز أعذرني على الاطاله

والسموحه منك أنت والجميع ان قصرت بالكلام

تحياتي ...

[قناص الهمله]

الله يعطيكم العافيه

نسمع باقي الاخوان

[قرناس ينبع]

والله مافيهن خير فالميه وحده ونصيحه ابعد عنهن وبعدين الاخ عنيد والله لو تسوي ماتسوي ماتفلح ولو تسوي لها اللي تسوي ولاكن تنجح وحده وتستمر على فعلها والباقي ماتسوي ريال الله يخيبهن هن وحزتهن مع احترامي للجميع

[قناص الهمله]

نسمع باقي الاخوان