(( خيــــــــــــــــ صور ـــــــــمتي ))

[فتى الدهناء]

بسم الله الرحمن الرحيم



السلام عليكم ورحمة الله وبركاته



أضع لكم صور لخيمتي التي اشتريتها من شهر ونص تقريبا واليكم مواصفاتها :
- 4×4 ( مهوب دفع رباعي ) مساحتها بالمتر مربع
- في كل الزوايا الأربع سحابات .. أستطيع من خلالها فتح أي جهة أريدها ( وهذي الميزة أساسيّة عندي )
- فيها باب واحد .. ونافذة وخرج
- تنزانيّة .. ومضمونة من المصنع انها ماتدخل ماء ( غير المرّة الأولى )
- سهله التركيب ماتاخذ ( عشر دقايق ) للي عارفها
- سهلة التصفيط ..
- حجمها صغير مقارنة بكبرها وهي مطقوقة .. إذ تستطيع أن تضعها في شنطة أي سيّارة حتى ( الاكسنت ) استانسوا ياهل الاكسنت :D
- عندما تكون مصفطه تكون في كيسين ( كيس : للعواميد والأطناب ) ( كيس: للخيمة )

[فتى الدهناء]

الآن الى الصور :



( وهي مطقوقة .. :D )



http://www.mekshat.com/pix/upload/images13/mk11498_dsc01007.jpg





( وهي مطقوقة بعد :p .. بس الصورة من جهة ثانية )



http://www.mekshat.com/pix/upload/images13/mk11498_dsc01011.jpg





( من الداخل .. وهذولا ثلاث من الشباب .. خامدين بعد الفجر ( حمد لله .. في أحد ينام هالحزّة في البر !!:confused: ) .. معليش طلعت برا الموضوع .. ايه تلاحظون أن الصورة لنصف الخيمة باعتبار العمود مركز القطر :D .. وماشاء الله ماخذه الثلاثة بالراحة .. فلو ضربنا 3× ( نق2) ..<< أقول بلا فلسفة .. يعني تاخذ ستة مرتاحين بالنوم والشخير :)



http://www.mekshat.com/pix/upload/images13/mk11498_dsc01098.jpg

[ابو شهد]

الله يعافيك
لكن ما علمتنا وين تباع وكم القيمه
وشكلها ممتاز والرواق مرفوع يعني ظل برا الخيمة

ماعينا الا علمك الغانم
لك الود بلا حد

[فتى الدهناء]

( بعد الطقّ :D صفطناها ) وهذا حجمها مقارنة بكلن من :
1- المركى
2- الشاكوش - ويسمّى ( مطرقة ) (1)

http://www.mekshat.com/pix/upload/images13/mk11498_dsc01115.jpg

وسلامتــكم ,,:j

---------------------------------------
(1) يسمّى الشاكوش ( مطرقة ) .. ارجع الى ( لسان المحيط ) على قولة أحد الشباب :D

[فتى الدهناء]

والله ياأنت مكيّم ... يابو شهد .. ماشاء الله عليك ..
<<< دايل أب .. يالله يرفع الصور ...

أشكرك أبو شهد .. وثاني مرّة هد السرعة وانا اخوك.. ترا الطريق مراقب بالردار ( ابتسامة بتكشيرة )

[نسناس ليل]

يعطيك العافيه يا فتى الدهناء. والله الخيمة هذي جيده ..بس اللي ابي اعرفه من وين اشتريتها وكم سعرها هذي الزيده يبووووووووووو

[أسامة]

خيمة روعة
بس من وين وكيف وكم سعرها و...و...و...و....و...
لا تخلي شي شرشحها لنا
ومشكور مرة ثانية

[ابو شهد]

يخليك ربي
انا استغربت اقول وين الصور والا اللقى ردك صور اروح يمين تزل صوره ثانية قلت
نعدل المشاركة ابرك

لك الود بلا حد
اخوك ابو شهد

[سهيم الليل]

السلام عليكم ورحمة الله وبركاته

اخي الكريم / فتى الدهناء
كل عام وانتم بخير وعيدك مبارك والله يعيده عليك وانت بصحة وعافيه والله ما شاء الله تبارك الله خيمة مسكته
وحبيت اسئلك عن عدة اشياء وتحملني ماعليش من واقع تجربتك لها هل هي عملية وقوية وتنصحني اشتري وحدة مثلها وكم قيمتها ووين تباع وجزاك الله خير

[ابوسليمان119]

ممتازة جدا بس ....... هاو متش <<<بالعربي كم سعرها يالغالي.

أخوك أبو سليمان

[فتى الدهناء]

عنيد عرقة





أسامة





أبو شهد





سهم الليل





مقلوب بالعكس



حيّاكم الله ... وأبشروا بالسعر ... ( مع انّي ماأدري وش لون نسيت أحطه ):confused:



السعر يلقروم 1450 ريال

وبالنسبة للمكان ... ( مع انّي خايف ان المشرفين يمنعون ذلك ) .. لكن أبحط المكان .. وإن ارتأوا أن يحذفوه أو يتركوه ..فالأمر لهم

المكان : سوق الخيام ( الغرابي ) محل ( الزهراني ) ... ومصنعهم على شارع ( المية ) من مخرج 15 وانت متجه شرق الإشارة الثالثة ( اشارة المقبرة ) ... قبلها بخمسين متر على اليمين ..

والرقم أظنه عندي ... إن طلبتوه

وبالنسبة للخيمة :

جربناها قبل سنتين مع أحد الإخوة في طلعة لمدّة أسبوع ( لينه - الصمان ) .. وكان موسم أمطار ) فكانت روعه .. وكانت اللي معه 3×4
وثباتها .. إذا طقيتها زين ..منتاز بالحيل

وكذلك يوجد عند المحل .. مقاس 3×3 ( دفع ثلاثي) :D
بــ 900 ريال ان ماكنت واهم .. تنزانيّة ..

وأتمنّى أنّي أجبت على أسئلتكم ::


===========================
عندي إضافات :
# لمّا شريت الخيمة منهم لم تكن كل الزوايا بسحابات ( أي أن هناك جهة واحد هي التي تستطيع فتحها فقط وهي الجهة المقابل للجهة اللي فيها الباب ) << أمحق تعبير .. عساكم فهمتوا بس
# فشرطت عليهم أنهم يحطون سحابات في الزاويتين الثانيّة .. ( حتى أستطيع فتح أي جهة أريد ) وفعلا أصلحتها في مصنعهم ( شارع المية ) وطلبت حبال إظافيّة وعمودين وأطناب كذلك ... فأصبحت أستطيع ( فتح جهتين ):D سواءا متقابلة أو متجاورة << قلبها رياضيّات


وسلامتكم

[سهيم الليل]

السلام عليكم ورحمة الله وبركاته
كفيت ووفيت سؤال اخير الشاكوش تبع الخيمة ولا لا امزح معك بس بجد خيمه مسكته بس المضلة اللي ممتده ماشاء الله قدامها انت اللي قايل يضيفوها او هي كذا يعني معها الحديد الخاص بالمضلة اذا بغيت تمدها وتخليها مضله 0 والرواقات مشبوكة فيها او منفصلة الله يعينك على كثرة اسئلتي خل صدرك ميدان ياحميدان وجزاك الله خير

[الدهماني]

الله يجزاك خير على المعلومات

بس لو تكملها بالصور والسعر ومن وين نشتريها ؟

[فتى الدهناء]

سهم الليل ::::::: حيّاك الله .. المظلة ... هي نفس الرواق لكن اذا فتحت سحّابين تقدر ترفعها ... ( وهي يجي معها عمودين زيادة للمظله ) ... لكن أنا طلبت عمودين أخرى ... لوفكرت أفتح مظلتين .. وترا الرواقات من الخيمة وفيها يعني ماهي منفصلة

وعلى فكرة ... الشاكوش ... مهوب مع الخيمة ( ابتسامة صفراء )

---------------

أخوي الدهماني ....... انا حطيت الصور .. والسعر .. وكل التفاصيل .. ( غريبة ) ماطلعت عندك !!

[متفائل777]

السلام عليكم ...
الخيمة رائعة جدا...........
السؤال ياغالى عن ارضيتها هل هى مشبوكة مع الخيمة او مالها ارضية اصلا ....

[ابوسليمان119]

مشكور يــــ فتى الدهناءـــــا وما قصرت

صراحة شرح كافي وشاهي <<<قصدي كافي ووافي :D :D

وما قصرت

أخوك / أبو سليمان

[نقا خريم]

جربناها قبل سنتين مع أحد الإخوة في طلعة لمدّة أسبوع ( لينه - الصمان ) .. وكان موسم أمطار ) فكانت روعه .. وكانت اللي معه 3×4
وثباتها .. إذا طقيتها زين (((((((((.منتاز بالحيل ))))))




وسلامتكم
((((((منتاز))))):D :D :D :D
الله يخزي شيطانك
ذكرتني بالشيبان (الله يحفظهم ) يقولون ل(ممتاز) (منتاز)
ثم ودك يقولونها باليوم ميه مرره وتفطس من الضك اليا بكره
عاد مدري انت متعمد والا خطأ املائي:(
وسؤالي لك عن الخيمه
وش لونها من ناحيه الثبات وقت الرياح والعجاج
ووراها غاليه شوي
في موضوع لواحد من الاعضاء بخيمه البيع والشراء نسيته والله الرجال ياعها ب(1000) ريال
وهو يقول انه ماستخدمها الا مرتين
او زاد السعر لانك مركب سحابات؟؟؟
وشكرا لك على رحابة وسعة صدرك
وتقطّع خيمتك بالعافيه ان شاء الله .... والا اقول
قبل لاتقطعها عطنياها هديه:D :D :no2: :D :D
وتقبل تحية محبك
نـــقـــا خـــريـــم

[nahham]

هلا بفتى الدهنا

تقول السعر 1456 ريال

هل السعر يشمل الموجود في الخيمة - الصوره رقم ثلاثه - لاني ابي الخيمة فاضيه

ههههه امزح

بس من جد روعه انا افضل 3 ×3

تسلم وتقطعها بالعافيه ان شاء الله

[هداج]

http://up3.w6w.net/upload/18-01-2006/w6w_200601181953244049f466.JPGولكن عندي أنها خفيفة ( شفافة ) خاصة جوانبها ؟؟؟؟

[فتى الدهناء]

متفائل ::::::::::: أشكرك ... والخيمة ليس لها أرضيّة .

مقلوب بالعكس :::::::::::::: أشكرك :p :D يا معكوس بالقلب ;)

نقا خريم :::::::::::::::::: والله انك منتاز ..:D أكيد مقصوده أخوي .. لاتحرجني :p .. والخيمة من ناحية الثبات .. جيدة .. بالنسبة للسعر اللي ذكرت .. هل هي تنزانيّة ومضمونة من الماء .. وهل هي 4×4 ؟!.. والسحابات ماتفرق السعر ترا ..


نهّام ::::::::::::: خخخخخخخخخ :D أضحك الله سنك ..

هدّاج :::::::::::: كذا التنزاني .. تلقاه خفيف لكن دافيء ومانع للماء .. بعكس الباكستاني اللي غاطه 24 أو أكثر تلقاه ثقيل .. ويلهم الماء .. ويالله يتسفّط ....... وان كانك خايف من البرد ..... فتراها دافيه .. من تجربة .. وعلى فكرة .. هي غاطين .... ولا أنصح بالقماش الداخلي الفاخر .. لأنه ممكن يتنتّش

حيّاكم الله

[2bo_klod]

السلام عليكم




الله يطعمك خيرها ويكفيك شرها




اخوي انا عندي وحده نفسها ومن نفس المحل 1400 ريال



والله يعافيك لاهنت عندي سؤال اذا بغيت اركب سحابات لها اوديها لهم يركبونها ببلاش والا ادفع لهم؟؟



ومشكوووووووووور

[فتى الدهناء]

أبو خلود .. حيّاك الله ..

ان كنت بتركب سحابات ... قلّهم ان فيه واحد ركب سحابات .. من عندكم ببلاش .. اللي هو أنا ... لأني أنا أعتبرته عيب .. وقالوا لي خلاص نركب لك سحابات ..

وان طلبوا منك قروش .. فهي ماتتعدى خمسين .. مع تخريم الأطراف اللي تحت .. علشان المظلة تثب على عمدان

[خباري الصحاري]

الله يعطيك العافية على هذة المعلومات القيمة بس مات شايف ان سعرها مبالغ فية ان شريت خيمة 2×3 بسعر 450 ريال وعند المحل الى شريت منة 3×3 بـ650 ريال والمحل موجود بنفس الشارع الي تقول مخرج 15 شارع المية بعد بنك الرياض محل ((واحات الرحلات))
خباري الصحاري

[غيّام]

كفيت ووفيت الله يعافيك وبيض الله وجهك وعز الله انها خيمه ممتازه وتقطعها بالعافيه

[الجرنـاس]

مثل ماقال صاحبي


خيمة روعة
بس من وين وكيف وكم سعرها و...و...و...و....و...
لا تخلي شي شرشحها لنا
ومشكور مرة ثانية

[فتى الدهناء]

خباري الصحاري

حيّاك الله يالغالي .. الخيمتين اللي تقول عنها الله يحفظك .. أظنها ليست تنزانيّة .. وهذا الواقع .. أنا أعرف واحد في السوق .. ووراني رواق كنّه تنزاني .. وقال : ترا هذا باكستاني جديد .. شبيه التنزاني .. وقال لي : من يوم نزل هالنوع والسوق يلعب لعبته .. يبيعك ويقولك تنزاني وهو باكستاني .. مايعيش أكثر من خمس سنين أو أقل بعد ومهوب مضمون من الماء ..

أنا الله يطول عمرك على طاعته .. يوم جيت أفصّل الخيمة ... رحت لمحل بيع ( اللفات ) الجملة .. وحسبت أنا وياه أمتار الخيمة 4×4 التنزانيّة .. طلع قيمتها شرا فقط .. (1000) تقريبا .. يعني 3×3 التنزاني يطلع عليك الرواق فقط من غير تفصل وحديد وبطانة وحبال وأطناب بــ ( 750) التنزاني التنزاني .. لاحظت

المهم أنا كنت ناوي أفصّل ويم أدخل ذاك المحل وأحصل نفس الخيمة اللي أبي أفصّل زيها .. ونفس الرواق تنزاني .. وبــ 1450 ريال ..مع انّه في الموسم قبل شهر ونص
قررت أشريها .. ولا أتعب نفسي في تفصيل ..
واللي خلاني أجزم عليها .. واحد ( سوداني ) يشتغل في الخيام .. يعرفه خويي .. جبناه يتأكد من الرواق .. وتأكد .. ونصحنا .. نشريه ..

أرجوا أني وضحت الإشكال .. وأشكرك


(غيّام )

وبيّض الله وجهك يوم تسود وجوه


(algrnas)

راجع الردود .. أعلاه << :D

[الجارمن]

عزا الله انك جبتها يا فتى الدهناء
من زمان وانا ادور مثل هذه الخيمة
ما خليت ولا فتفوته عن هذه الخيمة الا قلته ........ مشكور
يعني لو رحت للمصنع اشتري منهم ما يحتاج اسألهم عن الخيمة ما خليت شي:good:

مشكور وما قصرت
لكن عندي بعض التساؤلات البسيطة
ممكن تقولي وين شارع الميه هذا
وبعدين هل لون البطانة واحدة لجميع الخيام
يعني هل فيه الوان اخرى للبطانة
وبعدين هل فيه قطعة تغطي السحاب عند نزول المطر طبعا هذه القطعة تكون لازقة بالخيمة وعند نزول المطر يتم تغطية السحاب عشان ما يخر

[دسم الشوارب]

مشكور يافتى الدهنا على الموضوع
من زمان وأنا أدور خيمه مثل هذي كبيره في النصب وصغيره بعد التصفيط ولو انها غاليه
ذلحين انشالله أشغل وأطق لي مثلها
وشكراً مره أخرى

[فتى الدهناء]

( الجارمن )

حيّاك الله يا غالي .. وشارع المية .. هو الشارع اللي يبدأ من مخرج 15 ( جامع الراجحي الحديث ) ومتجه الى الشرق

والبطانة : نعم لها ألوان أخرى .. وخامات أخرى ... وأرجوا من الإخوة أن لا يأخذوا الخامة الفاخرة .. مثل اللي معي .. اللي كانها في الملاحق .. لأنها ( غير عمليّه ) .. يعني أي ( نتش خيط ) يجرّ اللي وراه .. ولكن أنصح بالخاما العاديّة .. كالتي في الخيام الباكستانيّة القديمة ..
وبالنسبة .. للسحابات .. ماأظن لها غطا .. ولكن مامنها خوف من ناحية دخول الماء .. لأنها عموديّة .. وليست أفقيّة ..

( دسّم الشوارب )

أشكرك .. وتقطّعها بالعافية ..


وعندي ( تنبيه )

هناك عيب بسيط في الخيمة عندما اشتريتها .. وصلحته عندهم اليوم الثاني .. ألا وهو :
( المرابط ) .. اللي تربط على العواميد اللي في الزوايا والأطراف .. فهذه المرابط تكون في منتصف العمود فقط .. وهذا عيب .. لأن اسفل الخيمة .. يكون غير مشدود .. فمع التحرك الهواء قد تتحرك .. وسألتهم فقالوا : حط دفان على جوانب الخيمة !! فقلت :واذا كنت طاق الخيمة في أرض حجريّة .. وليست رمليّة ! فألجمتهم;)
وطلبت أن يضعوا لي مرابط في أسفل العواميد .. فحليت العيب .. والحمد لله

[ابوسليمان119]

يعطيك العافية فتى الدهناء

والله انك وفيت بالشرح .......

بشرحك هذا تخلي الواحد يشري ويخلص كل شغل الخيمة من أول روحة للمحل

ما يحتاج يرجع مرة ثانية ..................والله انك كفيت ووفيت

وشكرا

محبك في الله/ أبو سليمان

[شاص]

جزاك الله خير على الشرح ... لكن عندي سؤالين :
1- هل توجد نفس الخيمة بالشراع التنزاني الأشهب ؟
2- كم ارتفاع العمود اللي بالوسط ؟

[الجرنـاس]

مشكور كفيت وفيت

لاتأخذني يأخ العرب دايمن عجل الله يهداني وياك

عقبال ماتزوج بها (( يعني فيها )) لاتفهمني غلط

[الجارمن]

الاخ فتى الدهناء سؤال اخير
على ما يبدو ان العواميد من الحديد وسؤالي هل يمكن استبدالها بالإلمنيوم

[فتى الدهناء]

معكوس بالقلب :::::::::: حيّاك الله .. يابو سليمان .. وترا مكشات واللي فيه غالين .. << وين شايفهم شاهي:d

شاص ::::::::::: الجاهز اللي أخبره عندهم أبيض ... أمّا الرملي .. ماأظنهم فصلوا منه ... وارتفاع العمود اللي بالنص ..زين .. تقريبا نفس اللي بالخيام العاديّة .. يمكن ( مترين وثمانين ) وهو ثلاث وصل ... وحيّاك

القرناس ::::::::::: حيّاك الله .. ياأخ العرب ..:d .. وأشكرك .. على الأمنية

الجارمن :::::::::::: فعلا العواميد .. حديد أسود ... لذلك الكيس اللي فيه الحديد والأطناب .. وزنه ماعليه
لكن ماأظنهم حاطين ألمنيوم ...

وحيّاكم الله

[الصل الأسود]

مشكووور يا فتى الدهنا
بس وش لونها مع الهوا , هل هي راسيه ؟

[فتى الدهناء]

نعم .. ثابته .. أخوي 4500

وشدتها .. ماشاء الله ..

[(بـــاجــيرو)]

السلام عليكم ورحمة الله وبركاته

الحقيقة أنها راااااائعة ،،،،

[شيزا]

ناس هايسه وناس لايسه