المساعد الشخصي الرقمي

مشاهدة النسخة كاملة : طلبت دربيل من برا .. وتم طلب ترخيص لـ الدخول ..؟


abo-3abd
15/08/2011, 10:25 PM
السلام عليكم ..

يالربع طلبت دربيل (زايس) من موقع امازون وعند وصوله للمطار

تم طلب ترخيص لدخوله ,, !

بالرغم من ان نفس النوعيه متوفره لدى محلات الرمايه وغيرها ..

اللي مر بنفس المشكله .. الله لا يهينه يعلمني وش الحل ..؟

وكيف وكم مدة الاجراءات ..؟

وشكراً ..
الحصان 1
16/08/2011, 01:26 AM
الله يعينك على التزنت عندنا
طيب دربيل ليه ترخيص لايكون فيه قاذف صواريخ
هههههههههههههههههههههههههههههه
abo-3abd
16/08/2011, 01:57 AM
7
7

هههههههههه

آمين .. الله يعين الجميع ,,

ما أدري عنهم ..

شكل الشحنه هذي طاحت عن واحد نشبه خخخخ

مع العلم ان اخوي قد جاب دربيل ووقفوه في المطار

وعلطول مشوه .. يعني السلعه ماهي مخالفه ..
ابو كشتة
16/08/2011, 02:21 AM
شف فيه ناس طلبت درابيل ودخلت الدرابيل
وفيه واحد لما وصل السعودية اذكره تحول الدربيل مادري لقسم الاسلحة والمتفجرات
وانا طلبت دربيل مع عشر طلبات ثانية بعد يومين توصل باذن الله عاد شف الدربيل يوصل معها ولا لا
بس انا من خوفي من المصادرة ماطلبت دربيل يسوى الدربيل هذا قيمته 48 ريال
لو اضمن مايتصادر كان اشتريت حبيب القلب زايس او شوارفسكي بس ياخوك غاليه وفيه احتمال تتصادر
ياحبي للغطاط
16/08/2011, 05:09 AM
الشكوى لله وانا اخوك حتى الدربيل فيه بهذله؟الله يرحم الحال بس
سعد القاسم
16/08/2011, 05:17 AM
لا حول ولا قوة الا بالله
والله مشكله

وش صار معك وانا اخوك ؟
Abo gssar
16/08/2011, 05:43 AM
ممكن كان مكتوب عليه من بلده عبارات تدل انه اكسسوارات بنادق
او شي يستخدم في الصيد يعني من هذا القبيل من العبارات اللي توصف
القطعة راح تتعقد الامور او يتصادر اذا طب عند واحد نشبة لكن اذا كان
مكتوب عليه وصف انه عدسات تقريب او ماشابه ان شاء الله ماراح يتعقد كثير
وهذي المشكلة هي اللي خلت اصحاب محلات الصيد يحتكرون السلع ويبيعونها
لك بسعر خيالي والا لو يسمحون بدخول الدرابيل خصوصا اللي تركب على البنادق
كان شفت اسعارها كيف عند وكلاها في السعودية
الله يكون في عونك
فهد666
16/08/2011, 10:30 AM
الله يعينك ويخلف عليك
abo-3abd
16/08/2011, 10:35 PM
شف فيه ناس طلبت درابيل ودخلت الدرابيل
وفيه واحد لما وصل السعودية اذكره تحول الدربيل مادري لقسم الاسلحة والمتفجرات
وانا طلبت دربيل مع عشر طلبات ثانية بعد يومين توصل باذن الله عاد شف الدربيل يوصل معها ولا لا
بس انا من خوفي من المصادرة ماطلبت دربيل يسوى الدربيل هذا قيمته 48 ريال
لو اضمن مايتصادر كان اشتريت حبيب القلب زايس او شوارفسكي بس ياخوك غاليه وفيه احتمال تتصادر

ان شاء الله تتيسر امورك ويدخل الدربيل ..

الله الله قالوا راجع قسم الاسلحة والمتفجرات ..

بأشوف وش يصير وبأبلغكم لـ تعم الفائده ..
شلة قنوص
16/08/2011, 10:43 PM
الله يكون بعونك
ويعينك على العباقره الي عندنا
الحصان 1
17/08/2011, 02:05 AM
ياخوي لاتتركه رح طالب فيه واشتكهم
على الاماره اذا كنت في الرياض ترا بعضهم
يسوي هالحركة على شان ياخذه انشب في حلوقهم
abo-3abd
17/08/2011, 05:29 AM
ياخوي لاتتركه رح طالب فيه واشتكهم

على الاماره اذا كنت في الرياض ترا بعضهم

يسوي هالحركة على شان ياخذه انشب في حلوقهم


اخوي الحصان
الشحنه ما راح تتصادر
هم يقولون يا تجيب تصريح ولا أبلغهم اني معاد ابي السلعه
ويرجعون الشحنه للمكان اللي جت منه
و يرجعون فلوسي لي :good2:

والله يكتب اللي فيه الخير
خالد الغنامي
17/08/2011, 07:22 AM
الدربيل العادي غير ممنوع حتى في موقع الجمارك نفسة

الممنوع الدربيل الليلي والناظور حق البنادق فقط
قناص1975
17/08/2011, 10:29 AM
ما اعتقد فيه شى ما امخالف يمكن الليلى نقول صح اما الدرابيل العاديه وش الضرر
منصور الفايز
17/08/2011, 10:51 AM
الدربيل العادي غير ممنوع حتى في موقع الجمارك نفسة

الممنوع الدربيل الليلي والناظور حق البنادق فقط

نفس كلام اخوي خالد:)
اكيد فيه خطاء غير مقصود ... روح لمّهم وشوف واستفسر


انا طلبت اكثر من مره ووصلت وما فيه اي مشكله
وطلبت ليلي وجاء .. وطلبت مره ثانيه ومسكوه :(... جلس بالجمارك تقريبا شهر ونص ورجع لامريكا وعن طريق الشحن رجعته لـ امازون لكن بعد وجع راااس

وان شاء الله يوصلك اخوي
بالتوفيق
ابو دحيم
18/08/2011, 02:16 AM
والله يخوي مالك الا حل من من اثنين

1- تراجع قسم الاسلحة والمتفجرات في شرطة النسيم وشف وش يقولوون.
2- ترجع دربيلك للبائع
abu_saleh
18/08/2011, 03:46 AM
الله يعينك شف لك واسطة يسنع امورك بالنسبة للأجهزة الي فيها شك انها تتصادر خل البائع يحطه لك في كرتون يخالف نوع الموجود مثلاُ دفيدي بلير وإلا جوال أيفون
واحد من الربع جاب من الصين رسيفر دريم بوكس وصادروه وهو هنا يباع في كل محل دشوش المهم رجع للمصدر وقال للبائع حطه في كرتون دفيدي بلير وارسل لي ثاني مره وفعلاً والله مهوب فاضين يفتحون كل الكراتين
الكاوي1
18/08/2011, 03:55 AM
الله يعينك على ماابتلاك النظام يحير اليوم مسموح وبكره ممنوع
اكسجيين
18/08/2011, 05:42 AM
اعانك الله اخوي

وياليت تأكد لنا هل هو ليلي او عادي

لآن بيني وبينك ناوي اطلب وبعد موضوعك خفت يروح علي وادخل متاهات اعادة الشحن
ركن برزان
18/08/2011, 07:30 AM
يا اخوي بالعربي يبيلك واسطه ويمشي امورك

وين محجوز فيه دربيلك في اي منطقه يمكن اكون اعرف احد فيه والله يعينك
abo-3abd
18/08/2011, 04:37 PM
اشكر من تفضل وتجاوب بالرد
باللنسبة لل

الدربيل العادي غير ممنوع حتى في موقع الجمارك نفسة

الممنوع الدربيل الليلي والناظور حق البنادق فقط

هلا اخوي خالد

موقع الجمارك مكتوب فيه الاسلحو و المعدات العسكرية يعني قوة تحجييييير
----------------------------------------------------



الله يعينك شف لك واسطة يسنع امورك بالنسبة للأجهزة الي فيها شك انها تتصادر خل البائع يحطه لك في كرتون يخالف نوع الموجود مثلاُ دفيدي بلير وإلا جوال أيفون


واحد من الربع جاب من الصين رسيفر دريم بوكس وصادروه وهو هنا يباع في كل محل دشوش المهم رجع للمصدر وقال للبائع حطه في كرتون دفيدي بلير وارسل لي ثاني مره وفعلاً والله مهوب فاضين يفتحون كل الكراتين


والله يخوي البائع امازون عن طريق النت اعتقد صعبه اطلب تغيير العلبه لسلعة غير
هذولا امريكان ما عندهم لعب
---------------------------------------

اعانك الله اخوي

وياليت تأكد لنا هل هو ليلي او عادي

لآن بيني وبينك ناوي اطلب وبعد موضوعك خفت يروح علي وادخل متاهات اعادة الشحن
دربيل سلاح عادي جدا
هذا رابطه

http://www.amazon.com/Zeiss-Conquest-Riflescope-Z-Plex-Reticle/dp/B001H318QE/ref=sr_1_1?ie=UTF8&qid=1313674508&sr=8-1
====================================



يا اخوي بالعربي يبيلك واسطه ويمشي امورك



وين محجوز فيه دربيلك في اي منطقه يمكن اكون اعرف احد فيه والله يعينك


بيض الله وجهك اكيد لازم واسطه

هو محجوز في جمارك مطار الملك خالد في الرياض
henter666
18/08/2011, 04:59 PM
هذا يعتبر ممنوع لانه دربيل سلاح يركب على السلاح
الله يعينك
abo-3abd
20/08/2011, 12:59 AM
هذا يعتبر ممنوع لانه دربيل سلاح يركب على السلاح
الله يعينك

ممكن بس ليش عند الرماية مسموع وغيره من محلات الصيد ؟؟؟؟
altoop
20/08/2011, 01:21 AM
ياخوي انا طلبت ثلاث درابيل وكلها وصلت من غير مشاكل
حاول انك تراجعهم لان الدربيل يدخل عادي معاد الدربيل اليلي وناظور البنادق تتصادر على طول
abo-3abd
20/08/2011, 01:38 AM
وش ناظور البنادق يخوي ؟؟؟
وش فرقه عن دربيل السلاح ؟
aborajwa
20/08/2011, 01:39 AM
شوف وانا اخوك .. كون درابيل الاسلحة موجودة عند الرماية والرميح وغيره لانهم معهم رخصة استيراد هذه الانواع ..

اجل بكرة اذا سمحو ببيع البنادق والاسلحة تقوم وتنقي سلاحك عن طريق الانترنت وتشريه وتبغاهم يسمحون انه يدخل .. طبعا لا والف لا .. هذه التزامات مع اصحاب التصاريح اللي صرح لهم من قبل وزارة الداخلية باستيراد الاشياء هذه .

اهم شيء اذا سألوك الاسلحة والمتفجرات قول لهم ابغى اركبه على ام صتمه اذا عندك وخل تصريحها معك وان شاء الله تمشي امورك يعطونك خطاب للجمارك يعطونك سلعتك . انتبه تقول ابغاه لخرازة والا سلاح ناري ثقيل .. وقول لهم انك جربت كذا دربيل من اماكن بيعه الرسمية مثل الرميح والرماية وما ضبطت معك .
قناص الديسه
20/08/2011, 04:03 AM
الله يعيينك
abo-3abd
20/08/2011, 06:46 AM
اهم شيء اذا سألوك الاسلحة والمتفجرات قول لهم ابغى اركبه على ام صتمه اذا عندك وخل تصريحها معك وان شاء الله تمشي امورك يعطونك خطاب للجمارك يعطونك سلعتك . انتبه تقول ابغاه لخرازة والا سلاح ناري ثقيل .. وقول لهم انك جربت كذا دربيل من اماكن بيعه الرسمية مثل الرميح والرماية وما ضبطت معك .

الله كريم اذا كذا هوينه المهم اليوم بروح لهم والله يكتب اللي فيه الخير
abo-3abd
20/08/2011, 06:47 AM
الله يعيينك
امين والله يجزاك خير
مجنون الجنوب
20/08/2011, 08:04 AM
السلام عليكم
كل عام وانت بخير
الله يكون في عونك
اخوي كيف اسوي حساب في موقع مزون والله تعبت ومحتاج اغراض من هناك
The Prince1
21/08/2011, 06:36 AM
هاه أخوي وش صار معاك
abo-3abd
21/08/2011, 08:36 PM
هاه أخوي وش صار معاك

مشكور يا اخي ع سؤالك

السالفة وما فيها رحت لقسم الاسلحو والمتفجرات في شرطة النسيم وقابلت نقيب*** وافادني بــ :-
*انه غير ممكن طلب تصريح او خطاب موجه لمدير جمارك مطار الملك خالد بسبب ان منظار الاسلحة يعتبر من الاجهزة العسكرية وهذا ممنوع منعا باتا.
* يمكن طلب تصريح فقط اذا كنت صاحب مؤسسة استيراد أدوات صيد وهذي معاملة لها تقديم ووضع ثاني.
ثم توجهت لعقيد في القسم وقال :-
* انصحك بصرف النظر في هذا الموضوع لأن فيه اشخاص قد تم استدعائهم للتحقيق معهم .
فحمدت ربي ع السلامة وراح ارجع المنظار للموقع واسترد فلوسي$$

بالنسبة للي طلب كيف يشتري من امازون انا اطلب من شخص ثقة وخبير بهذي الامور بس يطلب مني عمولة 40 ريال ع جميع الشحنة يعني اجمع طلباتي كلهااا واخليه يجيبها مرة وحده
MGS88
21/08/2011, 11:15 PM
معروفة الدرابيل دائما يصير فيها مشاكل يا اما تتصادر ولا توقف انت وحظك واذا وصلك حب يدك مقلوبه وادر انهم ما انتبهوا له

موفق خير اخوي
أميرالعشاق
21/08/2011, 11:45 PM
أخي الكريم..دام إنه دربيل سلاح فهو ممنوع..
لأنهم مسجلين على الكرتون
وأي شيء يتعلق بالسلاح ممنوع..مالك حل الا ترجعه وتسترد الثمن..
وأسأل الله يعوضك بخير منه
ابو نعمه
22/08/2011, 04:20 AM
انا شريت من امازون عن طريق ارامكس دربيل نظر و قواعد دربيل بندقيه و سبته جلد طبيعي و وصلت بالسلامه و ما احد قال لي شي الظاهر ان موظفين الجمارك كلن على مزاجه
abo-3abd
22/08/2011, 03:33 PM
مشكورين اخواني ع المرور والتعليق

ابو نعمه ما شاء الله عليك حظك حلوو

بالنسبة للي يسأل عن منتجات شركة سوارفسكي
http://www.amazon.com/gp/search/ref=sr_in_S_p_4_4237?rh=n%3A3375251%2Cp_4%3ASwarov ski+Optik&bbn=3375251&ie=UTF8&qid=1314016092&rnid=219891011
نـجم الـشمال
22/08/2011, 03:43 PM
الله يرزقك من واسع فضله
شعب السرب3
22/08/2011, 08:31 PM
الغريب في الامر انه بالجمرك انا من شهر تقريبا طالب دربيل نيكون مونارش
ووصل ولله الحمد
الله يجيبلك العواقب سليمة