تدريب فرخ شيهانه

[ابو جروح]

السلام عليكم

طرحت فرخ شيهانه والأخوان بالمنتدى ماقصروا زودوني بروابط طرق تدريب الصقور

لكن احسها مختصره وماهي بالتفصيل

وقالوا التدريب من 10 ايام الى 20 يوم وبعدها يكون الطير جاهز للقنص ؟؟؟

انا لي شهرين وماهقيت نخلص انا وياه ؟؟؟

صحيح علمني الصبر والتعب على اصوله

بس بصراحه احس باقي شوي واستسلم ...

اللي سويته >>>

مرحلة التدهيل وخلصت منها

وسميته وقمت ادعيه وقت العلف وصار يجي على الكف والعلف من مسافة 2 الى 3 متر

بس المشكله يوم بعد يوم حاولت ابعد المسافه بالتدريج علمآ بأني مجوعه من يوم الى يومين احيانآ

صار يطير ويتعداني ويوقع بمكان ثاني,,,,,,,,,,,, ياولد انا هنا ,,,, ومطنش

الين اقرب منه وبعدها يجي

نقلته على الكف وين ما اروح كان يكافخ كثير والحين اقل من اول

المطلوب >>>

1/ وشلون اخليه ما يكافخ نهائيآ على الكف او التكايه ؟

2/ وشلون اخليه يجي من مسافات بعيده وانا واثق انه بيجي بدون ما يهج ويروح عني ؟

3/ وشلون اعلمه يهد على الحمام لأني جوعته يومين وفكيت قدامه حمامه والظاهر ان قلبه طيب حيل ماطاوعه يذبحها كأنه أول مره يشوفها ؟

تكفون ياهل الخبره ساعدوني.....

[راعي مرعوب]

ج1::: علف الطير علي الكف او علف الطير علي التكيه بعض الاحيان او كثر نقل طير ونك تخليه علي كف واجد تنقله وتخليه مفرع او لاحد يجي من ورا الطير
ج2؛؛؛؛ تدعيه بسبب يعني بخيط لاكن انتبه لاتملع الطير اول شي تبي معاه من قريب او كل يوم زيد المسافه شوي لي توصل معاه مسافات بعيده تتاكد انه الطير محتاج علف او ماراح يهج منك او كل ما يتجاوب الطير مع اكرمه شوي بعد ماتتاكد انه محتاج علف شيل عنه الخيط
ج3؛؛؛؛؛؛؛ اول شي تخليه ينقز علي الحمامه من قريب لاتخلي الحمامه تطير او اول مره اكرمه منها بعدين حاول انك يومين تدعيه بلملواح او يوم اتخليه يهد علي الحمام تشيل منه ريش وتخلي فيه ريشتين او كل يومين او ثلاث اتزيد تخلي ثلاث بعدين اربع وكل يوم تزيد لين تتاكد انه يلحق الحمام سلم او لاتخليه يفلس من الحمام تدريج لين يلحق نصيحه لاتهده علي السلم لين تتاكد من ليقاة الطير
اتمني اني افدك وبختصار و ان شاء الله الاخوان مايقصرون ان اخطات والله يوفقك
والشاهين مايخذ وقت من 15 يوم الي 25 بالكثير

[mr-r]

1/ وشلون اخليه ما يكافخ نهائيآ على الكف او التكايه ؟ خله على يدك واجد طول وانت تنقله واذا كفخ برقعه واذا كفخ وهو مبرقع لا تشيل برقعه لن راح يحسب ان المكافخ هو الي يخليك تشيل البرقع وبعد مايركد وهو مبرقع فرعه واذا كفخ ثاني مره سو نفس الحركه واذا طوله مره رشه بخاخ ماء من داخل جنحانه وراسه وسدره بس مو على طول ترشه بالماء اصبر عليه اشوي

2/ وشلون اخليه يجي من مسافات بعيده وانا واثق انه بيجي بدون ما يهج ويروح عني ؟ طوفه كم ييوم بعدين اطلع في مكان وسيع وخذ معك واحد واربط رجل الطير بحبل طويل والطرف الثاني بالوكر وجبلك حمامه وربطها بحبل ومو طويل وامسك طرف الحبل وخل خويك يفك عليك الطير وحاول انك تسحب الحمامه عشان تتحرك ويشوفها الطير وانشالله بيجيك واذا جاء لاتخليه ياكل واجد وسها له هاذي الطريقه لين تحس انه قام يجيك بدون تردد بعدين طول المسافه اشوي اشوي بعدين فك الحبل من الوكر لين خلاص تحس انمه قام يجيك بنفس طيبه بعدين فكه بدون حبل

3/ وشلون اعلمه يهد على الحمام لأني جوعته يومين وفكيت قدامه حمامه والظاهر ان قلبه طيب حيل ماطاوعه يذبحها كأنه أول مره يشوفها ؟ زي الطريقه الي فوق بس لاتهده ولا انت واثق منه ونتف الحمامه له لا تخليه تطير واجد




واذا كان عندي غلط في اي معلومه ياليت الاخواني يصلحونه وانشالله اكون افدتك وسامحني على الاطاله

[عبدالرحمن بن ذياب]

وعليكم السلام ورحمة الله وبركاته
ان شاء الله اني افيدك يا طويل العمر

/ وشلون اخليه ما يكافخ نهائيآ على الكف او التكايه ؟

1- ان الطير لا جا بيكفخ وهو مفرع ( بدون برقع ) برقعه لين يهدأ وبعدها فرعه
2- ولا كفخ الطير بعد ما تبرقعه لا تفرعه على طول عشان ما يتعود ويحط في باله انه لا كفخ بتفك برقعه
2/ وشلون اخليه يجي من مسافات بعيده وانا واثق انه بيجي بدون ما يهج ويروح عني ؟

نقلاً عن موضوع ل المشرف ابو رداد
1 / تقوم بوضع الطير على وكر او على الارض (حسب نفس الطير)
وتربطه من نهاية المرسل بخيط (يجب ان تكون نهاية الخيط عندك)
اويكون طرفي الخيط احداهما في نهاية المرسل والثاني في التلواح
ومتوسط الخيط بيدك
تفرع الطير وتحاول لفت انتباهه من خلال اصدار اصوات وتحريك التلواح
حتى (ينقز)على التلواح
(بعض الطيور خجوله اكثر من اللازم اذا عسرت اسحبه سحبه بسيطه بحيث ينزل على الارض)
2 / لما الطير ينقز على التلواح اتركه يذبح او يانس الدم
3 / اسحبه بشكل خفيف واذا شفته يريد ترك التلواح توقف حتى يعود ينسر اوينتف وبعد ذلك كمل عملية السحب
حتى يصل الطير عندك
4 / الصندق الخشب يحافظ على نظافة طعام الطير ويحافظ على ريشه
(سعر الصندوق 20 رهم والصق عليه تارتان ويوميا يغسل ويوضع بالشمس)
أرفع الطير وتلواحه وسمانته الى اعلى الصندوق
هذا الكلام اول اسبوع تحتاجه فقط
بعد فتره تلاحظ ان الطير روحه ينقز على الصندوق ويصير صديقه هههه
(الخطوات مبينه في الصور ادناه)
http://www.mekshat.com/pix/upload02/images81/mk8675_w2.jpg
بعض الطيور مايعرف يذبح وبعضها يعرف
وفي كل الاحوال يجب ان تذكي الحيوان المربوط في التلواح
(مايجوز تتفرج عليه وهو يتعذب)
وهذه الحركه زينه للطير ايضا
(يتعلم الذبح لانه مباشرتا يقوم ياكل من الرقبه وكذلك يشعر بانك تريد مساعدته وليس اخذ الطام منه)
بعد فتره تلاحظ ان عزل الطير عن التلواح
1 / يجب ان تشعر الطير بانك تساعده لا ترتيد ان تاخذ طعامه
(تنتف الريش وتحاول تلفته الى المناطق الي فيها الهبر هههههه اهم شي لاتزعله بهالمرحله)
وحاول ان تقطع ورك او قطعة لحم بعيده عن الي منشغل فيها الطير
2 / لما تشوف الطير خلص الفريه او يوشك ان يخلصها
ضع الورك او قطعة اللحم على الكف قدمها للطير وحاول ان تخفي التلواح ومافيه
3 / سوف تلاحظ ان الطير سوف يصعد على الكف وينشغل بقطعة اللحم او الورك
4 / خلال هذه الفتره حاول ان تخفي التلواح في مكان لايراه وسط الصندوق كما فعلنا او ان تضعه خلفك
وكما مبين في الصور ادناه
http://www.mekshat.com/pix/upload02/images81/mk8675_w4.jpg


استمر على هذا الحال اربع ايام الى خمس ايام
وكل يوم بعد المسافه اكثر كل يوم زيد 5 أمتار
حتى يخلص الخيط او السبب
ولكي يطمئن قلبك في اليوم الاخير خلي المسافه ضعف طول الخيط وادعاه
اذا جاك الطير وماعنده خلاف باليوم الي بعدها اطلقها مري
خلال هذه الفتره
1 / لاتخدع الطير وتعطيه التلواح خالي (يجب ان تربط فري او حمام حي في التلواح)
2 / لاتترك نقل الطير وخصوصا في المساء
3 / اذا كنت تدعى الفجر / العصير حطه على وكر وامامه صحن ماء والعكس صحسح
يتعام الطير السبح وشرب الماء من الصحن وكذلك اشعة الشمس مفيده للطير
لكن لاتطول الفتره ( نص ساعه في البدايه وزيدها يوميا 10 دقائق)
بعد ذلك ننتقل الى مرحلة الدعو بدون سبب او خيط والتعليم بنفس الوقت



((مرحلة الدعو بدون خيط او سبب))


هذه المرحله مافيها شي جديد ...
http://www.mekshat.com/pix/upload02/images81/mk8675_1418.jpg
تخلي رفيقك يهد لك الطير أو العكس من مسافة 30 متر تقريبا
يفضل ان يكون جالس الي يدعى والي يهد
(حتى لايتروع الطير)
ولاتدعاه والتلواح خالي
يفضل ان تكون فيه فريه او حمامه (مذبوحه)
(خلي التلواح يدخل مزاجه ويجيه مستقبلا خالي)
استمر على هذا الحال من ثلاث ايام الى خمس ايام
ويوميا بعد المسافه شوي (تقريبا 5 امتار)


,,,,
((مرحلة المسح أو الشلو))
مافيها شي جديد ايضا غير تسحب التلواح ولاتعطيه للطير
ان استمر في طياره أعطيه التلواح
وان نزل عندك حاول تركض في التلواح ولاتعطيه الا يمسح
التلواح هنا يكون غير خالي ايضا (فريه او حمامه مذبوحه فيه)
بعض الطيور مايتعلم المسح بسهوله
الحل اما تبعد المسافه
او تضع له شي حي في التلواح (حمامه او فريه)
ملاحظه مهمه
زيادة عدد المسحات يكون تدريجيا
يوميا زيد مسحه واحده لمدة خمسة ايام
وبعدها زيده مسحتين يوميا لمدة خمسة ايام اخرى
وبعدها يوميا زيده اربع مسحات يوميا
علشان الطير لايكره التلواح ويدخل مزاجه صحححححححح
لوهديت له حمام او غير شي لاتهتم
وهذا مقطع فديو لاول مسحه لـــــ(خطر)


,,,,
كل ماتقدم من كلام ينفع تطبيقه على الوحوش والتفاريخ
ومن الرد القدم ان شاء الله
انا شخصيا اطبقه على التفاريخ حصريا
الوحش استمر في بناء اللياقيه حتى يمسح 40 او 50 مسحه
وعقب ابدأ في تعليمه
اما التفاريخ (وهذا الخطأ الذي يقع فيه اغلب الصقاقير)
ابدأ بتعليمها اول ماتتعلم المسح (مسحتين ثلاث)
يعني التعليم وكسر الحواجز يباري بناء اللياقه
((مرحلة التعليم وبناء اللياقه))


وهذه المرحله اهم المراحل وخصوصا لفروخ الطيور المفرخه
لان مستقبل الطير..... يكون في هذ المرحله
(هذا مالمسته من خلال التجربه والله اعلم)
,,,
اول مايبتدي الطير يمسح ثلاث مسحات
قبل ان ابدأ بدعو الطير ... اقوم بتعليمه ثم ادعوه (في نفس الوقت)
البدايه تكون مع الحمام
(اياك ان تهد حمامة قويه للطير تشك مجرد شك انها تسبقه)
(تراك تخرب طبوع طيرك / مايتعب نفسه على صيده عقبها )
اهم الاشياء التي يحققها هدد الحمام
1 / يعلم الطير العزيمه (الصمله)
2 / يعلم الطير فن المراوغه
3 / يعلم الطير التعليق
4 / يطلق جناحين الطير (يزيد اللياقه)


لكن هدد الحمام وحده له مشاكل !!!!!
(اتبع الخطوات علشان تحافظ على طيرك ويتقن كل شي / التلواح والحمام والمصيدات الكبيره)
,,,
أول حمامه فكيتها لخطر
(ام ثلاث مابقي فيها من ريش غير الموس والطويله والثالثه)
http://www.mekshat.com/pix/upload02/images81/mk8675_1q.jpg


وعقب مايصيد اتركه يذبح وينتف على راحته
http://www.mekshat.com/pix/upload02/images81/mk8675_2q.jpg
احاول اخذ جزء من الحمامه (علشان اقنعه فيه بعد قليل)
http://www.mekshat.com/pix/upload02/images81/mk8675_3q.jpg
اقوم بدفن او اخفاء الحمامه واعطيه الجزء الي شلته قبل قليل
(دفن الحمامه صورته لكن ضيعت الصور هههه في الجايات نوضحه ان شاء الله)
http://www.mekshat.com/pix/upload02/images81/mk8675_4q.jpg
اخرج الحمامه من الرمل واربطها في التلواح
ادعي الطير وخله يمسح وفق الجدول الي رسمته وثم اطعمه من حمامته مايكفيه
http://www.mekshat.com/pix/upload02/images81/mk8675_5q.jpg
((تابع لمرحلة التعليم وبناء اللياقه))


الدعو يكون يوميا ... ويسبق الدعو التعليم
وتكون المصيدات الي تعلم عليها طيرك بالتدريج
حسب الحجم وصعوبة الصيد


وافضل المصيدات للتعليم بعد الحمام هو (الفزن)
لان اغلب الطيور ماعندها مشكله مع الفزن
http://www.mekshat.com/pix/upload02/images80/mk8675_e2.jpg
طريقة التعليم :
امسك الطيرعلى يدك وخل خويك يبتعد 10 الى 15 متر ويرمي الفزن
ولما تشوفها ارتفعت شوي فرع الطير وعطه سبوقه
ولمايصيدها خله ياخذ راحته معاها شوي بالذبح والنتف (اعطيه نسير)
http://www.mekshat.com/pix/upload02/images80/mk8675_e3.jpg
وهذا مقطع فديو يوضح اكثر اضغط على العباره الي بين القوسين لتحميل المقطع


(الهدد على الفزن) (http://www.2shared.com/file/4040187/7d58c868/_online.html)


ومن بعد ذلك نجي لطريقة عزل الطير عن مصيدته وهو راضي هههههه
الصور تعبر اكثر وهي بالتسلسل
http://www.mekshat.com/pix/upload02/images80/mk8675_e4.jpg
,,,
http://www.mekshat.com/pix/upload02/images80/mk8675_e5.jpg
,,,
http://www.mekshat.com/pix/upload02/images80/mk8675_e6.jpg
,,,
http://www.mekshat.com/pix/upload02/images80/mk8675_e7.jpg
,,,
عقب ماتبرقع الطير وهو راضي اخرج الفزن من الرمل
http://www.mekshat.com/pix/upload02/images80/mk8675_e8.jpg
,,,
انفضها من الرمل هههههههه
http://www.mekshat.com/pix/upload02/images80/mk8675_e9.jpg
,,,
اربطها في التلواح
http://www.mekshat.com/pix/upload02/images80/mk8675_e10.jpg
,,,



3/ وشلون اعلمه يهد على الحمام لأني جوعته يومين وفكيت قدامه حمامه والظاهر ان قلبه طيب حيل ماطاوعه يذبحها كأنه أول مره يشوفها ؟

وذلك بوضع سبب طوله لا يتعدى 3 متر في سبوق الطير وربط طرفه الثاني في الوكر وربط حمامة في سبب طوله 3 متر واخذ برقع الطير ووضع الحمامة أمامه مسافة متر ونص ومسك طرف السبب الثاني وتحريك الحمامة فإذا انقض الطير على الحمامة وأمسك بها فلا تتحرك حتى يقوم الطير بقطع راس الحمامة وتحليلها وعندما يبدأ الطير في نتف الريش حاول أن تقترب منه بهدوء تام وأنت منحنى إلى الأرض وصوت له بصوت هادى وناده باسمه حتى تمسك بطرف جناح الحمامة ثم ساعده في نتف الريش حتى تبين له ثنادى الحمامة وساعده إثناء العلف وأخرج قلب الحمامة وقدمه له بيدك ودعه يأكل ثنادى الحمامة بحيث يكون العلف ضعف العلف اليومي. لا تقم بسحب باقي الحمامة من أمامه ولكن حاول أن تقطع رجل أو جناح الحمامة ومسكه باليد التي فيها الدس وتغطيه باقي الحمامة بقطعه قماش ، وتقريب العلف الذي في الدس إلى الطير فإذا نقز الطير على الدس فارفعه واسحب النسر من دون أن يراك وقم بتنظيف بوز الطير بيدك وجمع القطع الصغيرة من على بوز الطير وقدمها له بيدك.


إذا أنهيت هذا التمرين بنجاح فإنك قد أنجزت عملا مهما وحققت فوائد منها ما يلي:


أولا: الطير أثناء مرحلة التدهيل لا ينسى الشبكة التي وقع فيها وغالبا ما تكون حمامة ، وهذه الطريقه
تعلمه قبول الصقار كشريك له في حياته الجديدة .


ثانيا: تعليم الطير على أن تأتيه وهو على صيدته وعدم خوفه منك مما يجعله يهرب بصيدته إذا كانت حمامة أو يختبئ عن الصقار إذا كانت صيدته حبارى .


ثالثا: تعليمه أن صيدته لن تسحب منه وانه سوفا يحقق هدفه وهو العلف مع وجود الصقار بجانبه
واصل دعو الطير من مسافة 10 متر وأكثر وقم بتعليفه بواسطة الشلو ( وهو عبارة عن جنحان حبارى
مربوطة بموازاة بعض ) بحيث يربط العلف في داخل الشلو وتعليف الطير عليه ، وسحبه منه ، وجعله يتبع الشلو، ويمسك به ، ثم يظفر بالعلف الذي بداخله . وتكرر هذه لطريقه مرتين إلى ثلاث في اليوم
يجب أن تخرج خارج المدينه في أرض مستوية وتدعو الطير من مسافات طويلة نسبيا حتى تصل إلى
كامل السبب 50 متر
إذا دعيت الطير من مسافة 50 متر فراقبه عند اقترابه منك فإذا كانت عين الطير تنضر إليك فواصل
الدعو كل يوم ويفضل قبل المغرب بساعة.
وإذا كانت عين الطير عند اقترابه منك تنظر باتجاه العلف وبدا يعلف بدون أن يكترث بوجودك فليس هناك
داعي لوضع السبب ويمكن دعوه بدون سبب .

[هاوي بر و صيد]

جزاكم خير ما قصرتوا
ويا رب انك توفق مع طيرك

تقبل مروري

[راعي الدويمع]

يعطيك العافيه أخوي

[الحربي أبوذيب]

انا اشهد ان الشباب ماقصرو كفيتو وفيتو وانا إن شاء الله بها السنه اني بداي بالصقارة

وهالموضوع يبي يفيدني

[نويت مربآعك]

ماشاءالله اما رد اخونا صقار الجنوب كافي ووافي
ولافيه قصور من الباقيين

[ابو جروح]

بيض الله وجيهكم ,,,,,,, وماقصرتوا ....... وألف شكر لردودكم الرائعه ,,,,

لا هنتوا يالربع

[خالد الرشيدي9]

تقبلوااااااااااااااااااااا مرووووووووووووري وماقصرووووووووووووووووا العيال الله لايهينهم

[قناص2000]

بيض الله وجهك يا صقار الجنوب ولا يهنون الاعضاء كفيت و وفيت الله يعطيك العافية