وش الفرق بين الخلفه والبكرا [الأرشيف]

مالي حظ

17/08/2011, 11:12 PM

يعطيكم العافيه ياأخوان ... ودنا نشتري خلفه ولا بكرا وش الفرق بينهم

.. وش تنصحونا فيه نبي راعيه الحليب الزين .. للشايب ...

الله يجزاكم خير

فهد 333

17/08/2011, 11:30 PM

راعي النوادر

18/08/2011, 12:25 AM

نصيحتي اذا تبي حليب خذلك ناقه مجهم وتكون خلفه هديه وشبب تكون بالكثير ام ثاني او ثالث
تشتريها خلفه احس عشان تشوف هي هديه أو لا عشان ماتتعبك في الحلب وتشوف حليبها واجد او قليل
والمجهم معروفه هي اكثر حليب من باقي الالوان الثانيه
والله ييسر امرنا وامرك

راعي العريف

18/08/2011, 02:42 AM

هههههههههههههه
شلون خلفه ولا بكرا
اولا اسمها بكر ومعناها اللي الان توها والد
وذا تقصد البكره معناها اللي لسى ماضربها الفحل
وذا تستفسر عن الخلفه الخلفه سلمك الله هي الناقه اللي توها والد ويمكن يصير لها 4 شهور وهي تسما خلفه
ومن ناحية الحلب انا صراحه اشوف الوضحاء او العفراء هي اكثر حليب من المجهم بس كثر لها اللعف
وشكرا

هههههههههههه , والله أناء ضحكت على سؤال صاحب الموضوع :D بس ضحكت على معلومتك أكثر ان الوضحاء أكثر حليب من المجهم هههههههههه أول مره اسمع ذالمعلومه :D
مع كالمل احترامي لك ولصاحب الموضوع بس من باب المداعبه :)

الرويضة اون لاين

18/08/2011, 02:44 AM

حذ خلفة مهجهم لأنها اكثر حليييب وان خذيت ام ثاني او ثالث بشرط سالمة ولا فيها عذاريب ابرك لك عشان وفرة الحليب..

والاخ اللي يقول العفرا اكثر حليب اتوقع انها يقولها من باب المداعبة ..

فهد 333

18/08/2011, 03:53 AM

والله يالربع كل واحد له ذوق وكل واحد يحب اللون اللي يعجبه
بالنسبه لي انا اشوف الوضحاء هي راعية الحليب ولا فيه قصور بعطيا الله

مالي حظ

18/08/2011, 05:57 AM

الله يبيض وجيهكم .. وعيطيكم العافيه

ابو منور 93

18/08/2011, 06:09 AM

ياشين الي مسوي فاهم
اجل الوضحا اكثر من حليب المجهم

سفيرالنوض

18/08/2011, 06:15 AM

المجهم دائم اكثر حليب لكن الوضحاء حليبها بنظري افضل من ناحية الطعم
ومن ناحية الفوائد الغذائيه الله اعلم مافيه فرق

قزيزالنعام

18/08/2011, 04:00 PM

مرحبا اخوي العزيز قصدك البكر والبكر دئم لبنه قليل اخذ ثنو او ام ثالث وتبي الحليب الكثير المجهم وتبي الحليب الحلو الوضحاء والحمرا

مالي حظ

18/08/2011, 04:25 PM

نبي الحليب حلو الطعم ... مانبي الكثره

DOHIM

18/08/2011, 04:30 PM

العفرا احلا حليب والملحاءاغزر

راعي العريف

18/08/2011, 10:42 PM

عيك بصغيرة السن والي توها والد ( مصغر ) وأن حصلت حمراء ياسلام سلم , مع العلم أن السكر في الحليب يختلف من ناقه إلى ناقه بغض النظر عن اللون ولكن الحمر غالباً مايكون حليبها سكر
تحياتي

النـادر

19/08/2011, 01:34 AM

الله يرزقك باللي تسرك دامك تبي البر بشايبك

الحليب الواجد في المجهم وكل ماصغر سنها كان افضل للحليب ودامك تبي الحليب الحلو فاكثر الحمر حلوة حليب والوضح فيها حليب طيب وحلو والقل والكثر والحلاوه ماهي على كل حال لها علاقه باللون واحرص تحلبها انت لاتشري على يقولون وخابرينها و.....و......

ابو زنعاف

19/08/2011, 02:33 AM

عليك باحمر او وضحاء ثنو ما فيه فرق عن البكر

الفهران

19/08/2011, 02:46 AM

عليك بالحمرا اذا تبي الحليب الحلو واذا حصلت حمرا كانت ذلول هذا هو المطلوب

ابو الشبرميات

19/08/2011, 06:25 PM

الله يجزاك خير على برك بوالدك

اذا انت تبي علاج لمرض معين ووصفوا لك البكر خذ لك بكر

ومعها وحدة ثانية منيحة لكم ولضيوفكم

الابل كلها خير وبركة وحليبها غذاء ودواء باذن الله

لكن ان كانك تبي المنايح الطيبة اللي كل ساعتين والا 3 طاسة

وحليبٍ حلو وخفيف

دور لك من الساحليات الحمر

وان كانك تبي الحليب الواجد لا تعدى المجاهيم وتلقى فيها الحلو وغيره

لكن احرص على اللي توها منتجة
لان حليبها يكون اطيب وانفع
باذن الله

وفقك الله لما يحبه ويرضاه واخواننا المسلمين

,,,

ابو زنعاف

20/08/2011, 02:35 AM

كل ساعتين او ثلاث وين الغالي ارحم الابل ياخي سويت مثل حقين الشبوك الي يبيعون الحليب

اورنس الشمري

20/08/2011, 03:54 AM

بالنسبة للأخ راع السؤال أتوقع يقصد البكرة إلي أول ولده له (يعني أول انتاجها)

بالنسبة لي المغاتير أطيب حليب ولكنه أقل من المجاهيم

بركاني حربي

20/08/2011, 04:33 AM

الحمرا حليبها طيب وحاول تكون توها والد فيكون الحليب حلو

و إنت كنت تبي كثرة الحليب عليك بالمجاهيم

و إنت تبي تمتع نظرك فالوضح يا زينها ما شاء الله تبارك الله عطايا الله بإذن الله راح أقني من الوضح

الشقردي 1

20/08/2011, 06:11 AM

يا اخوان فيه بعض الوضح تحلب وفيها بركة ويمكن اخونا عنده منها (ماشا الله) الله يبارك له والاغلب ان المجهم اكثر حليب من المغتر بس حلاوة حليب المغتر تستمر معها كل عمرها والله اعلم والملحا الين ثالث بطن ويفتح الله والله اعلم وحلاوه الحليب بشكل عام يأثر عليها نظافة ماعونها من الصريف ونوع العلف والممشا وكل ما دررت اكثر ونظف ماعونها احلو الحليب ولكل قاعدة شواذ
وانصحك يالأخو تشوف لك راعي خبرة وعنده ذمة يختار لك ولو تاخذ ام ثاني واشترط سلامتها من الامراض وتجنب العجور والي قد ارتفع حوارها

راع الريمة

21/08/2011, 01:55 AM

الحليب ...

مشهور بكثرتة بالمجاهيم

أما الألوان الثانية تختلف ...كل لون- فيه بعضها تملا سطوله وبعضها ماتملا غطا علبه ماء صحه هه

بدرالبراك

21/08/2011, 02:08 AM

الحلا بحليب الوضح والكثرة بالمجهم الهديه

أبو علوى

21/08/2011, 09:50 PM

وين أنت يا طويل العمر عشان نخدمك

الأعضاء ما يقصرون يخاوونك لو انت قريب من أحدهم وأبشر بسعدك إن بغيت الناقة أم الحليب السكر والدوا

عاااشق الطير

22/08/2011, 12:54 AM

خذ الكلام الي يصحي من النوم الخلفه الي ولدهاء من 3شهور وفوق والبكر الي اول مره تلد والمصغر الي توهاء والد وبنسبه للحليب كل الابل مبروكه وكثرت الحليب في المجهم وحمر النعم معروفه ولا يختلف عليهاء ثنين وحلاوة الحليب في المغاتير ولا يختلف عليهاء ثنين ونصيحه اذا تبي الوالد يدعيلك خذله وضحى بكر وحرص على الهديه المبروكه واذا شريت وشرب الشايب لاينساني بدعوه واذا تبي اشوفلك خلفه ابشر ارسل رقمك على الخاص

القنصل,,,

22/08/2011, 09:50 AM

انت شكلك منت راعي اباعر والوالد بعد
القضيه اكبر من انك تدور منيحه
سوال انت تعرف تحلب الناقه لمنك شريتها ولا ماتعرف هنا السوال

شوق الغنادير

23/08/2011, 04:53 AM

حياك اخوي بالنسبه لسؤوالك عن البكره ولا الخلفه انا اقول اذا انك تبي تمنح يعني حليب عليك بالمجهم الخلفه ولا يكون سنها كبير ولا زم العلف على راسه كل يوم ور اح ترهي عليك من الحليب انت وجيرانك