كفرات الشاص....

[شاص]

السلام عليكم جميعاَ..
حبيت استفسر يالربع عن أفضل الكفرات للشاص(التويوتا طبعا)هل هي دنلوب شد بلاده ، والا بالون 900 والا الشاهين أو به شي مضبوط غيرهن؟ إلا عنده علم والا مجرب حداهن يعلمنا الله لا يهينه

[جــلــمــود]

السلام عليكم

اخوي الشاص انا بشور عليك وانت براحتك

انا مجرب الشاهين لفتره طويله والبالون بأنواعه و اخيرا الدنلوب

الدنلوب الشد بلد على الشاص الي شبيه بنقشة الشاهين هذا من ناحيتي مجربه ممتاز بالبر وبالخط مثل الشاهين الاصلي

اما البالونِِ 900 لا يقربك لان البالون السوموتومو الياباني مايركب الا بلستك ولا يصلح معه التيوبلس خصوصا اذا كان الجنط شمبر والبالون التويو يجي بعض المرات مغشوش اندونيسي ولا ماليوي ومكتوب عليه ياباني ( هذا كلام راعي بنشر بالغرابي ) وعموم البالون ( يتسحل بسرعه ) ولاهنا رساوه بالخط وبالمطر يبهذل بس صراحه خذ منظر فقط

والشاهين وش خليت احسن كفرات جربتها بالحقيقه بالرمل لا يعلى عليه وبالخط راسي ولا له صوت مزعج مثل بعض الكفرات القاسيه ولكن با ( الجلد ) والحصى ما اضنه يزبن لذيك الدرجه يعني حليل بس ماهو مثل الكفرات الجبليه طبعا

بس كل هالانواع اذا كان الجنط شمبر ماراح تخارجك لان الشمبر مثل منت عارف لازم لستك

اما اذا كان موترك من القديم ابو سته مسمار يمديك تركب جنوط بليزر او اي جنوط ثانيه غير الشمبر واستمتع بالقياده

وعلى فكره البالون اذا تبي المنظر الزين الخمس طعش احسن والشاهين اذا تبي الشاهين التسع ميه العريض الطويل فا مايركب الا جنط خمس طعش اما الشاهين الطويل النحيف شبيه الدنلوب الي يجي على الشاص شد بلد فهو ماجي الا 16 وباقي المقاسات ماعندي خلفيه عنها


وسامحنا على القصور يالغالي


جـــلــمود

[المولع]

جزاكم الله خير
على فكره جنوط البليزر ياخوي جلمود تصلح على الشاص م 94 بدون خرط يعني تركب على طول
وهل هي تصلح في الربع الخالي يعني الدعوى رمال ورباضات
واين توجد وكم سعرها\ والسلام عليكم:what:

[شاص]

تسلم ولا يسلم ردي العزايم...
عز الله انك كفيت ووفيت يالجلمود وبيض الله وجهك ما قصرت وجزاك الله خير

[جــلــمــود]

هلا اخوي الشاص ولو حنا بالخدمه



اخوي المولع

الي اعرفه ان جنوط البليزر ماتركب على الاند كروزر بجميع انواعه ربع , شاص , صالون الا بعد الخرط
وتوسيع الفتحة الوسطية ولا اضن ان هنالك استثناء في الـ 94 على حد علمي

اما اماكن بيع جنوط البليزر فكما تعلم الجديد غالي وغير متوفر الا نادرا جدا اما المستعمل موجود ولكن ايضا نادر وخصوصا النظيف منه

وهي نوعين نوع عريض بفتحات داخليه صغيره على شكل مستطيلات وهو بعرض 8 انش و 15 ارتفاع

والنوع الثاني
بفتحات داخلية شبيهه بفتحات الشمبر الي يجي شد بلد على الشاص الخليجي وهذي عرضها 6 انش
وغالبا تجي 15

وموجوده عند بعض البناشر بالغرابي ولكن فيه واحد بوصفلك مكانه مره وتراه رجال حبيب وناصح ورخيص

الوصف ///

طبعا تعرف شارع الريلل الي فيه محلات العدد والمواطير اخره من جهة الغرابي ( وجهك غرب ) ينتهي السايدين يصير سايد واحد قبل ماينتهي السايدين يصير قدامك عماره صغيره فيها مجموعة بناشر طبعا يتيامن الشارع عن العماره هذي وتصير العماره بيسارك
اذا صارت العماره يسارك وقف عندها وأسأل عن واحد اسمه ( فريد ) تراه يماني مطحول قصير ونحيف الماريه يلبس ثوب شتوي حتى بالصيف
اذا شفته تدري ان اسمه يمين وهو يسار

أسأل عنه وخله يوريك الجنوط الي عنده وحرررصه على النظيف وحتى لو قال ماعندي الحين نظيف قله دورلي وابجيك بعد مده تراه مايقصر يدورلك
وابعد عن الي فيه تلحيم واشرط عليه يرشها لك بويا فضي تراه مايقصر والافضل انك ماترشها وتركبها على طول عربن عليها وقله بجيك بكره احصلها منظفه ومرشوشه

وعلى العموم المستعمل اسعارها من الثلاثميه وخمسين للخمس ميه ( اربع جنوط ) على حسب النظافة

حتى الكفرات اسأله عنها يفيدك ترى


وتقبل تحياتي يا المولع ويا الشاص



جــــــلــــمـــود

[فرد حمزة]

العزيز / جــلــمــود

السلام عليكم ورحمة الله

مشكووووووور على الشرح الوافي ، والله يجزاك كل خير

لكن موتري بليزر وهذي جنوطه اللي يوم أشتريه ... وش نوعهن ؟ هن اللي تتكلم عنهن أعلاه أو غيرهن

وإذا ماعليك كلافه تقولي رايك بهن ؟ وش الأفضل أخليهن ولا أغيرهن ؟

جزاااااااااك كل خير مقدماً

أخوك ... فرد حمزة
http://www.mekshat.com/pix/upload/images/3162-f.jpg

[جــلــمــود]

الله يسلمك يا فرد حمزه

اخوي فرد الجنوط هذي الي بالصوره جنوط عاديه ماتجي شد بلد هذي مثل الجنوط الي تجي على السفاري القديم بس الي على موترك اعرض 8 انش

بس الي اعرفه ان هالنوعيه من الجنوط ثقيله شوي خصوصا مع البالون لكن الشد بلد على ماسمعت اخف منها خصوصا مع كفرات الشاهين ولا الدنلوب

وتقبل تحياتي

[فرد حمزة]

جزاك الله خير على التوضيح

تحياتي لك ... أخوك فرد حمزة