مشاكل وأصوات ما بعد غسيل البستم (ديزل) .

[ضاري الشمري]

السلام عليكم ورحمة الله وبركاته ..
مساكم/صبحكم , الله بالخير أعضاء ومشرفين وزوار منتديات مكشات المتميزة
.......................
مثل ما انتم شايفين بعنوان الموضوع ‘ مشاكل وأصوات ما بعد غسيل البستم (ديزل) ‘
وطبعاً أقصد ما يلحق هذي المشكلة من تلف الجلب والجلد والأذرعة واحتكاكات السست المزعجة والمقلقة وبطن السيارة .
أنا اخوكم ضاري الشمري قدر الله علي واشتريت موتر جديد من المعارض ( سييرا غماره 2011 ) مستعمل استعمال حشمة ونظيف ما شاء الله تبارك الله ومضمون لكن !
صاحبه قبل ما يبيعه ويوقفه بالمعرض غسله تغسيل كامل وحط الموتر وراح عنه ووصى العمال انهم يغسلون الموتر تغسيل كامل والظاهر انهم غسلوه بستم ديزل .
طبعاً الشاهد من الكلام اني يوم طلعت الموتر من المعارض مابه خلاف وتمام الحمدلله وما شاء الله . لكن اللي أقلقني إني يوم طلعته من البيت حصل طقطقه بتحتي الموتر واحتكاكات وأصوات مزعجة (ومقلقة) لدرجة اني قلت الموتر به بلاء . واذا مشيت عليه خفيف وفي شارع ماهو متواسي اسمع الطقطقة من السست واذا لفيت او لفيت الطارة كاملة احس بطقطقه تقل ان الموتر يتحكحك كله وطقات تنرررفز :mad::mad: .
فقلت يومين وتروح لكن ما راحت وبالعكس يوم اني دققت بهن وضحن اكثر !!
المهم سألت لي واحد معه نفس الموتر ونفس الممشى والمواصفات , قالي انه قد غسل الموتر بستم ديزل < وطلعت له نفس الاصوات لكنه سهجهن ونساهن وجلست فترة وراحت مع الغبار اللي مسك بالسيارة من تحت لفترة طويلة شوي تراوح ما بين اسبوعين لثلاث اسابيع ؟؟ ويوم سكرت منه الله يجزاه خير تفائلت خير وقلت أبنساهن ويروحن .

فالسؤال هنا / هل حصلت هذي الحالة لاحد من قبل ووش حلها وهل هي مشكلة يبيلها ورش وشغل ؟ أو انها تروح مع الوقت وهذا من فعل الديزل الله لا يعيده .


وسلآمتكم ..

[جلمود الحره]

اخوي ضاري راعيه غسله ولا العمال المشكله ماهي في غسيل البستم يمكن في طول الوقفه في الشمس تعرف هذي جلد ربل مع الحركه تلين ومع الوقفه تيبس وماأظن البستم يسوي كذا على طول لانك تقول الموتر جديد دايم نغسل بستم مالاحظنا شي
يادوب اصوات هوينه تختفي على طول (شيك على بطن الموتر كله والله يحفظك)

[sgl2002]

اخوي معروف غسيل البستم ديزل يعدم الجلد ويجففها

انتظر لين يجيها الغبار مع الوقت وبيرجع جديد

بس شحم الركب والسست والعمود وما استطعت

[باترول.]

نصيحتي رح لمحطه وخل يغسل السياره بالماء والصابون مع الفرك لازم يفرك واذا تبي المحطه فيه محطه بحي الريان حول الممشى

[هاوي شجن]

أنا غسلت موتري بستم قبل 3 سنوات
ومثل ما تقول طلعت فيه أصوات وحكحه
وأهملت الموضوع كامل ولا همني
وبعد 4 أشهر من غسيل البستم
قررت آخذ اجازه وأروح اتمشى في الجنوب
المهم اني رحت أشيك ع السيارة وأسويلها تربيط
فقالو الربلات عندك تقطعت ولازم تغيرها
قلت مو مشكله غيرو الربلات أعطوني فواتر القطع اللي ركبتوها
وجيتهم اليوم الثاني واخذت الموتر وما شاء الله تبارك الله تقول وكاله
ومن بعدها صرت أغسل بستم بالماء والصابون بس , وما أخليه يحط لا ديزل ولا زيت
والى يومك اذا رحت أربط الموتر يطلب ربل أو ربلتين و بعض الأوقات ما يطلب شي
ونصيحه للي يبي يغسل بستم (ماء وصابون) فقط ولا تخليه يحط شي غيرها

[ضاري الشمري]

جزاكم الله خير يا شباب وما قصرتوا . لكن اذا هي على الوقفة اخوي ماله الا اسبوع واقف بالمعرض وتحت مظلة !! ويحركونه . والبستم يسوي تسذا وأردى وخذ هالمثالين ..
اخوي معه همر h3 غسله بستم وبدون ديزل وطلع له صوت بالسست اليمين وضاق صدره وكل ما طلع يضيق صدره زود . ومع الوقت والله نسينا انه فيه او جاه شي راح بدون ورش ولا غسيل ولا شي الحمدلله
والمثال الثاني واحد اعرفه بالقصيم معه نفس موتري غسله بستم ديزل وطلعت له اصوات يقول مزعجة وتركه فترة اقل من شهر وراحت من نفسها حتى اني كلمته شخصياً . وراعي الموتر اللي شريت منه اعرفه وما شاف على الموتر شي ابد .! يعني هو الاقرب انه من البستم الله لا يعيده وتوبة منه .
لكن أنا سؤالي هل يعني فيه شي اقدر اسويه وما سويته او اني اخلي الغبار يمسك عليه مع الوقت يلين ؟
وجزاكم الله الف خير على تفاعلكم

[ضاري الشمري]

اخوي اللي تقول تخبر لي محطة به مغسله سنعه حول الممشى بالريان قصدك اللي به صراف الي عند الاشارة ؟
تراي منب بعيد عن الريان . بس اذا هي سنعه وشغلهم حلو وكويسين وطريقتك اللي تقول ممكن تعمل شي بخصوص الاصوات < ما اقول يروحن لكن يعني شي ملاحظ تدريجياً . وان كان هي زينه اروح له ليش لا ووش قصدك بالتفريك يعني اغسله بستم ثانيه ويفرك تحتيه ؟؟ . شورك وهداية الله

[الباثفندر 3.5]

الحل اخذه مني
على طول تروح محطة غسيل و تغسل تحتية الموتر بستم مع صابون و لا ترش شي على الموتر و لا تقرب الشحم نهائيا
و حاول تغسله اكثر من مره بالصابون و بخار الماء(بستم)

[abdull_ah]

انا داااايم اغسل السيارة بستم ديزل شكلي ببطل اغسل بيستم

وخلها مووية وصابون

[شايل جروحي]

طنش تنتعش الموتر بالكثير اسبوعين ويروح شره اسئل مجرب انا كان معاي هايلوكس قبل سنتين نفس طريقتك وطلع بها صوت بعد الغسيل وراح بعدين اقول ادعس بس ادعس

[ضاري الشمري]

ما قصرتوا يالنشامى . والظاهر الحل هو اني اغسله بستم ماء وصابون لان اغلبكم شرتوا هالشور ..

[ابوضيف الله]

اذا السيارة مافيها تهريب وتبي تتاكد من وين لاتغسله ديزل مرة بستم موية وصابون بس
الديزل يعدم الجلد اللي ببطن السيارة
واذا غسلت ديزل علشان التهريب مكان التهريب بس
شيك على المشاحم وشحمها والله كريم

[ضاري الشمري]

طيب مهوب التشحيم فيه سيارات تحتاجه وسيارات ما تحتاجه ؟؟ أنا بتوكل على الله ان شاء الله وباتسر بغسله بستم بماء وصابون واخليهم يفركونه لين يطلع الديزل وهذا كل اللي اقدر اسويه والله الاصوات مزعجة ومقلقة

[باترول.]

طيب قبل ماتغسله بستم شف الاماكن الي تشحم او اذا قضيت وغسلته بستم وده ورشه وخلهم يشحمونه او انت

بالبيت شحمه اذا عرفت الاماكن الي تشحم عاد مايضره اول مرة تغسله بستم

[ضاري الشمري]

والله ياخوي انا ما اعرف اشحم بالبيت !! لكن بجرب التشحيم عند الحفرة

[ضاري الشمري]

يا شباب رحت اليوم للمشحمة عند بنشر معروف . علطول يوم شاف موتري قالي ما فيه وماله تشحيم من ورا بس من قدام ؟ انا ما سمعته وقلت طيب بدخله للحفرة وانزل اشوفه قال خلاص ونزلنا والحمدلله كل شي تمام ولا فيه شي فالت ولا شي عالق لكنه قالي رح اغسله بستم ماء وصابون وخلهم يفركونه وبالفعل رحت بعد ساعة لمغسله قريبه وغسلته بستم فقط ماء وصابون وقلت له فرك زيادة والحمدلله الاصوات راحت بنسبة 80%
وخويي قالي انها بترجع لكن على اخف وتروح بسرعه . اذا جف الموتر .

[حبو 1]

اخوي شحمة كامل مع العمدان ومابين السست و رش بطنة زيت ماكينة بترومين ولا حق السيارات الديزل بس خلة لا تمشي بة على طول خل الجلد تتشرب الزيت وان شاء الله تنتهي

[الغاااااطي]

الصوت اللي انت تقصده يطلع من السست الخلفيه
وغالبا ماتطلع بالونيتات من هايلوكس وددسن وغيرها
ولاتخاف اخوي ترى الوضع عادي واسهل مما انت تتصور
ولكن إذا أنزعجت من الصوت حيل فيه طريقة مكلفة نوعا ما وهي انك تفك السست عند ورشة مرات وتحط بين كل سسته وسسته بلاستيك اسود ثم يركبونها لك وبإذن الله مافيه اصوات

وهذا رقم ورشة مرات بالصناعية دق عليه واستعلم
0506436883
وثابت
012955255
والله الموفق

[aboaody]

والله وانا اخوك البستم مشكله لان الغسيل بالديزل يفك الجلب مع الوقت والغسيل بالصابون والمويه يخلي الحديد يصدي

[ضاري الشمري]

جزاكم الله خير تفاعلكم وطرح الحلول والآراء وما قصرتوا . اخوي اللي تقول اوديه للورشه يشتغلون على السست بالبلاستيك والله انك ما قصرت واكيد هذا الحل من الحلول الكفيلة بزوال المشكلة تماماً وجزاك الله خير على مجهودك بوضع الارقام وتسلم . لكني غسلت امس بستم ماء وصابون والاصوات راحت بنسبة 80% والحين رجعت تقريباً بشكل اخف بكثير وخويي يعرف بهالامور يقولي اصبر شوي بتروح اسرع من قبل ما تغسله .