لملآك السييرا 1500 سؤال بخصوص البنزين وصرفيته

[ضاري الشمري]

السلآم عليكم , صبحكم الله بالخير جميع ..
مثل مانتم شايفين بالعنوان أنا مالي فترة قصيرة شارين سييرا الحمدلله
وابي اعرف اللي يعبون 91 و 95 ويا ليت يكتبون كم يعبون بالريال من الـ91 ولا الـ95 وكم يجلس معهم وسط المدينة ولا بسفر .

[Rain-exam]

مرحبا يالغالي . .
بالنسبه لسعة التانكي ماعندي خبر اختلفت من موديل لموديل
انا موتري سييرا 1500 موديل 2006
اعبي تقريبا وهو فاضي ب 40 ريال ويوصلني مايقارب 580 كيلو . . بنزين 91

[ضاري الشمري]

جزاك الله خير اخوي على تفاعلك الطيب . وافهم من كلامك ان الـ95 يوصلك لـ700 كيلو تقريباً ؟ مدام ان الـ91 يوصلك لـ580 وهو يصرف اكثر من الـ95 اجل الـ95 يوصلك اكثر بـ140 كيلو تقريباً اذا المعادلة جيدة والصرفية بطرق السفر مناسبة ز لكن في داخل المدينة الصرفية تكون عالية جداً وهذا شي متوقع ومعروف .
شاكر لك مرورك مرة اخرى

[Vortech]

اخي عنده حجم 2500 مكينة 6.0 لتر... اذا هو فآآآضي نعبيه بــحول الــ 45 ريآل

لكن يطلع لنا في الطبلون المسافه المتبقيه 390 كيلو متر... ما بعد جربناه كم يوصل ولكنه والشهآآده لله يصرف الصراحه... مش صرفيه قويه ولكنها تعتبر صرفيه مب بسيطه.

وأعتقد ان الـ 95 يستهلك أكثر من الــ 91 يعني الـ91 يوصلك أكثر من الـ 95 حسب وجهة نظري وخبرتي في سياارات ثانيه... والاخوان بيفيدونا في النقطه ذي ان شاء الله ... أهل الخطوط...

[قطب 999]

من المعروف ان الجموس تشرب بنزين شرب ماهوب صاحي واقلهم فئة 1500

[Bader-M]

وعليكم السلام

اذا كنت تقارن الجمس بالباترول و الاندكروز فان الجمس عموما اقل صرفية منهم

ونوع الوقود تستطيع استخدام وقود 91 دون اي مشاكل

صوما مقبولا أن شاء الله

[ضاري الشمري]

الحين شلون . مهو الـ91 صرفيته اكثر لقلة نسبة الاكوتين فيه ؟ والـ95 نسبة الاكوتين في اعلى ؟ وعشان كذا يقولون تبي بنزين ما يصرف لكن له ضريبة ان فلوسه غاليه . واذا تبي رخيص لكن ضريبته يصرف بسرعه . معليش اخوي اعتقد انك اخطيت يوم تقول ان الـ91 اقل صرفية

[باترول.]

نصيحتي لا كنت بالديره عب 91 ولا كنت تبي تسافر خذ95 والخلط بالسيارة عادي تخلط 91 و95 انا اعرف واحد يسوي نفس الي قلتلك بالديره 91 اذا سافر 95 لا بعد معه GX-R

سعر91 بالنزين 60 هللة وسعر 95 بالنزين 75 هللة

يعني الفرق بينهم 15 هللة

[ضاري الشمري]

ايه لكن اغلب الـ8 سلندر ينصح له بالـ95 . لانه تصرف كثير والـ95 اقل صرفية واحسن للموتر اذا كانت مكينته كبيرة . صح ولا لا . وبعدين الـ91 ملاحظ انه يصرف والله شلون اخوي فوق يقول الـ91 اقل صرفية ؟؟ ونسبة الاوكتين فيه اقل ؟؟ يعني خفيف ويسرت بسرعه !! اما الـ95 اثقل منه ,, والفرق 15 ريال الله اكبر < الناس تاكل الحين من ماكدونالدز وطقته فوق الـ20 ريال وهي كله على بعضه خبزتين وبطاطس وبيبسي !! يعني لو تفكر به ترا الـ95 مهوب غالي وحنا افضل من غيرنا بالامارات تفلل اليوكن على كلام واحد اعرفه فوق الـ130 !!! معقوووله يا ناااس , الحمدلله على النعمة وهنا مستكثرين 50 - 52 ريال على فل الموتر فيه ناس يمكن تبي توفر الريال والله يفتح عليهم ويرزقهم من واسع فضله . لكن لا باس اذا بمخباي اللي يكفي فل الـ95 وعبيت به صح ولا لا يا اخوان ؟ يخدم الموتر اكثر ويجلس معك اكثر وبعدين هو بنزيننا الاول ويوم جاء الـ91 كثر الكلام عنه (سبحان الله) فجأة تسذا صار هو الزين . عند بعض الناس . عشان هالـ15 ريال < ومثل ما قلت لكم يعني البنزين لو تدفع به ما وراك ودونك مانتب متحسف على شي لانه من الاشياء الضرورية ومن الاولويات , لكن شف السراوات عند ماكدونالدز وتلقى الاب يحوول راتبه ما يتعدا في بعض الحالات الـ5000 ريال وفيه ناس على الخط الاحمر والله لكن اذا جته فرصه وملت ايده فلوس فرح وليده بـ50 ريال ويصير عنده عائلة كبيرة والـ5000 تطير المصروف . ويجيك هالولد الله يصلحه يهيضونه اخوياه . ويروح يكش 20 ريال ولا بعد والله العظيم احلف لكم يا رجال اني مرة من المرات تعشيت منه والحمدلله سد جوعي لكن يبقى السعر هبال على هالتلحيسات اللي هم يحطون . فيه ناس تقوم يتركون نص البيبسي والبطاطس ولا يبقي نص الوجبة ويقوم ؟؟ عاد انا مرة سألت واحد قلت له وراك تركت البطاطس والبيبسي حرام عليك والله . قالي يابن الحلال انت ذايقه قلت اي والله ذايقه نعمة كريم !! قال ياخي كله ثلج ومابه غازات < طيب قل ما ابيه ولا تخليه تسذا فيه ناس تبي تشرب الماء العكر مهوب عاد هالمحليات والغازيات (الفخمه) ككككـ . ومير اقوله طيب البطاطس ؟ قال مابه ملح ويابس < عذر اقبح من ذنبه . قلت ايه بس مدام هذا الحال عزالله جاعت الصومال وماتت ؟؟ ( ربنا لا تؤاخذنا بما فعل السفهاء منا ) .. انا طلعت عن الموضوع كثير لكن من حر مابي ـككككككـ

[tevo]

السلام عليكم
أخوي ضاري انا ما معاي سيرا لاكن معاي سوبربان وأفلانش وكلهم مكاينهم وحده هو والسيرا .
السوبر بان أعبيه تقريبا بي 45 -50 ريال يمشيني وسط المدينه تقريبا 600 الي 650 كلم (طبعا مانب ادعس واجد) والبنزين الي اعبيه 91 .
اما بالنسبه للسفر فيمشيني تقريبا 750 -800 كلم وأعبي بعد 91 (غالبا مثبت السرعه علي 140).
وقبل كنت أعبي 95 ولاكن أنا عني ما شفت اي فرق بين الاثنين ومدام السيارة تقبل بنزين 91 ليه اعبي 95؟!
السالفه موب توفير او بخل .
وبالنسبه للصرفيه داخل الديره ما شفت اي فرق بالصرفيه .
وفي السفر ان كان تفرق الصرفيه فالفرق ما يوصل 50 كلم بوجهة نظري وحسب تجربتي .
واذا تكلمنا عموما عن صرفية المكينة فهي ممتازة جدا ولا تصرف وحط في بالك انها 8 سلندر وبمقارنه بباقي السيارات أعتقد هو افضل واحد من ناحية الصرفيه وان كان فيه منافس فممكن الفورد الاكسبدشن .
وشكرا
تقبل الله صيامك وقيامكم.

[ضاري الشمري]

ما قصرت اخوي تيفو بتحليلك . وانا ما اللي اقصده بالتوفير والبخل < فيه ناس لهم نظرة سلبية عن الـ95 ومخلينه بالملايين .!!
واذا انت تقول ان صرفيته داخل المدينة تمشيك من 600 كيلو وفوقها بشوي < انا معي سييرا 2011 غماره 1500 5.3 , معبيه فل 91 يوم السبت وما رحت عليه مشاوير ابد ما عدا مشاوير قريبة والدوران ما ادور به كثير يعني ربع ساعه واوقفه والمكيف مهوب على كل حال اشغله والنهار ما قد طلعت به ابد من يوم عبيته والحين تحت النص ؟؟؟؟ وانا ما امشي به ابد خلال 4 ايام شرب اكثر من نص التانكي < مهيب معقوله وانا هذا اللي خلان افتح هالموضوع . لكن يمكن 95 اصبر ويبطي بالموتر . < لكني توبة اعبي 91 لان حتى راعيه الاول كان يعبيه 95 فالموتر متعود على 95 وانا عبيته فل 91 < وهنا فيه مدخل بالموضوع ان الخلط ما يضر الموتر . لكن سالفتنا عن صرفية الموتر . وبالجاي ان شاء الله ما اعبي الا 95