الديآنا 27 هل تطرح القمري والصفآري ؟؟

[حمرآن النواظر]

السلآم عليكم ورحمة الله وبركآته . .

بأختصار ~ انا يالربع نويت على ساكتون ديانا 27 من عند صآب

لكني مآعرفت ، نآس تذم البندق وناس تمدحهــآ !!

وانآ والله مدري هل هي تطرح القميري والصفآري ؟؟؟

تكفووون يالربع عطوني العلم ، كانها بندق طيب اليوم العشآء بشتريهآ . .

وشكرا ً للجميع :)

[قمري عمري]

بالنسبة للـ24 حسب التجربة

صدت فيها دخل كثير حول العشر ملايين دخله << امزح هههه

و بالنسبة للصفاري مناسبه نوعا ما

والـ27 اخت الـ24 مهنا ذاك الفرق

بالنسبه للقميري تصيد بس موب زي الـ85

اقترح عليك الـ80 فايروخ اذا كان صيدك صفاري و قميري

ولو انها مو موجوده في كل فروع الرميح

اذا ما حصلت عليك بالـ35 ديانا

[شاص المقناص]

السلام عليكم اخوي انا بالنسبه لي جربت ديانا 27 لصارت القميريه قريبه تجيبه بس انصحك لا تشري ديانا لانهم قبل 3 سنين غيرو ديانا وصارت خياس يعني اول ماتطيح ولا يلمسه شي ينكسر المنشاف ويطحلك مسمار

[تركي البقيلي]

افادوك الذياب

[Al Rasee]

تطرح ان شاء الله

لكن اسمها ((صفار)) وليس صفآرى

[قمري عمري]

تطرح ان شاء الله

لكن اسمها ((صفار)) وليس صفآرى


تختلف تسميتها بين الناس

و انا من يومي صغير و ابوي ياخذني للبر معه و جدي و كلهم يسميها صفارى للمفرد و صفاري للجمع

[حمرآن النواظر]

جزآكم الله ألف خير وماقصرتو يالنشاما

بأذن الله اليوم بشتريهآ والله يوفق :)

[____GMS____]

انا عندي ديانا 27بس لها اكثر من 15 سنة وصدت بها القمري والصفاري والسماني والدخل بس زي ماقالوا امكن الجديدة تغيرت.

........................................تقبل مروري............................................. .....

[محب العقاب]

نصيحة لوجه الله تمعن فالكلام هذا وأفهمه زين وتلقى الخير


أخي الكريم


أولا : أهم شيء تبين نوع الصيدة أو الطريدة (دخل , قميري , ضبان)
فهذه هي الطرائد الأساسية وقس على ذلك باقي الطرائد.


ثانيا : أفضل الشركات (شخصيا وعن واقع تجربة) هي الفايروخ


ثالثا : وكيلها هو الرميح وبالنسبة للتصريح مايبيعك إلا من سن 21 سنة وطالع
وتشتريها وبعد شهرين يجيك التصريح
وأهم شيء بطاقة الأحوال وصور شخصية (إثنتان تقريبا) ويسمح أمرك.
...
وبالنسبة للأنواع (المقاسات):
إن كان صيدك دخل بحت من غير طيور أخرى فايروخ مود.27 تمام التمام .


وإن كان صيدك مابين دخل وقميري وعلى هذه الشاكلة فنصيحتي لا تتعدى فايروخ مود.35


أما قميري بحت وطرائد متوسطة إلى كبيرة عليك بالفايروخ مود. 80


وإن كان صيدك ضبان بحت فعليك بالفايروخ مود.90


هذا والله أعلم وصلى الله وسلم على نبينا محمد
إن أصبت فمن الله وإن أخطأت فمن نفسي ومن الشيطان
والله ولي التوفيق



وبالنسبة لل27
خوي لنا طارح بها صفارية
بس المسافة قريبة يعني تقدر تقول 15 متر


http://www.mekshat.com/vb/images/misc/progress.gif

[smk115]

تطرح ان شاء الله

لكن اسمها ((صفار)) وليس صفآرى

الظاهر انك كويتي


حنا يا اهل نجد نسمي الوحدة صفارة والجمع صفاراات

[قلب الداهية]

صفاراات اجل ههههههههههه

[أبـو مـدمـر]

والله من يوم كنت صغير وديرتنا كلها يقولون له (( صفري ))شيبانا وشبابنا للواحد والمجموعه ( صفاريه )

بس الاحظ في الأونه الأخيره انهم يقولون له ( صفاره )

وبالنسبه للـ 27 انا كنت اصيده بها بس في المزارع اصير اقربه واتبين له من ورا النخل ويكون قريب
وإذا رميته على طول يحول موات بس اذا كان شريطها قوي
وانا أنصحك بها

[حمرآن النواظر]

تم شراءهآ ولله الحمد . .

والبندق طيبه بالحيل .. رميت حمامه قآمت تخمس مكانهآ ماشاء الله تبارك الله
لكن مشكلتهآ الوزن . . وزنها ثقيل تكسر الظهر
بس اللي يهمه قوة البندق مايهمه وزنها
وانا شخصيا ً انصحكم بهآ

[هويدي]

عالبركه تكسره بالعافيه

[smk115]

صفاراات اجل ههههههههههه


وش المضحك ؟؟

[smk115]

تم شراءهآ ولله الحمد . .

والبندق طيبه بالحيل .. رميت حمامه قآمت تخمس مكانهآ ماشاء الله تبارك الله

وآنا آنصحكم بهآ

الله يعطيك خيرها ويكفيك شرها

[Al Rasee]

الظاهر انك كويتي


حنا يا اهل نجد نسمي الوحدة صفارة والجمع صفاراات

حياك اخوي لا ماني كويتي من نجد الله يصلحك :)

[قمري عمري]

صيدوا الصفاري مدري الصفارات مدري الصفارة هالحين

و بعدين تهاوشوا على اسمها ههههههههههههه

دعابة لا تاخذون الموضوع جد