مكسيما مصيبه

[كبدالبعير]

السلام عليكم ورحمة الله وبركاته



أرجوو من المشرفين الحريه في تعبير الرأي وعدم حذف موضوعي لأنه يهم جميع من



له حق علي في هذا المنتدى أو الزوار لكي يطلعون على حقيقة مكسيما من نيسان



أشتريت قبل سنه وخمسة اشهر سياره مكسيما 2010 من الوكاله مع نزلتها



وليتني ماشريتها طبعا انا أخذها تأجير منتهي بالتمليك وعرضتها عندكم هنا في المنتدى
السالفه ومافيها إني توي مطلعها لها شهر معي وأوديه لأول صيانه المهم وانا طالع من الصيانه بسبوع تقريبا



طلع فيها تفته في المكينه ورجعت للوكاله سويت فحص ولا طلع في الفحص شي



يقولون كل شي سليم وطلعت من عندهم ورجعت نفس السالفه مره أخره وأستمريت على الحاله هذي أكثر من سنه وشهرين وأنا يوم موديها للوكاله ويوم مطلعها



يقولون مافيها شي مره يطلع معي المهندس ويقول عندك مشكله ومره يطلع يقول السياره مافيها شي انا صراحه طابت النفس منها غيرت فيها كل قطع الغيار ولا صلحت الي يشمله الضمان والي مايشمله على حسابي سويت الي وراي والي دوني
عرضتها عندكم هنا في المنتدى محد يعطيني وجه رحت وديتها للمعارض محد يسومها طرحو أكثر من أربعين الف تمنيت إني مأخذتها ولا ركبتها ولا شفتها



سياره جدا غبيه دورت لي اكثر من شهرين احد يتقبلها مالقيت احد اخر شي جيت اشكي الوكاله عشان يرجعونها قالو ادفع تقريبا عشرين الف عشان نرجعها جاني واحد يحب المكسيما قال انا ابيها بكل عيوبها واكمل اقساطها وتنازلت عنه بالواسطات بقلة حياء عشان اتنازل عنها سياره غبيه سياره معجبينها في سن المراهقه



أنا اوجه نصيحه السياره غير مرغوبه في السوق في كل مكان



صحيح إن شكلها الخارجي حلو بس السياره ليست عمليه ولا تحافظ على قيمة خمس دقايق



أخر شي قبل أسلمها الرجال الي انا بعتها عليه صلحتها بخمسة الاف ثم عطيتها الرجال قلت إبراء للذمه خلني احاول إني اصلحها وأنا أعرف إني ماسويت شي



شباب لايغرونكم الي في المنتدى يمدحون السياره ولا يقولون هذي شي هذي عمليه



وأبي أشرح المشاكل غير التفته



السياره مطاباتها قويه عشان الجنوط مقاس 19



السياره تغير الجنط كل فتره عند أخذ أي مطب قوي تكلفة الجنط الأصلي فوق الثلاثه بس مدري كم قيمة



كفراتها تغيير كل سته شهور مغيرها وانا مستخدمها سنه وخمسه شهور مرتين



سريعة التحبيل كفراتها تتراوح من 650 إلا 1500



البطاريه مغيرها بعد ماشتريتها بثمانيه شهور بقيمة 350 ر



الفحمات تغيرها الأماميه تغيرها كل ستة شهور وقيمتها 800 وبعد التخفيض 650 طبعا بس الأماميه



تغير الكويلات بقيمة 2500 ريال



فك الثلاجه بقيمة 500 ريال فقط والتركيب



تغير فلتر الهواء كل تغييرة زيب بقيمة 180 وبعد التخفيض 130



صوت هواء في الباب حق السواق والمعاون



صوت في الباب عند فتح الباب بالريموت غريب جدا



سقوط اللحيه الأماميه بدون أي سبب بعد تحلل المسامير وتركيبها



طقطقه قويه في الكبوت عند سرعه عاليه لدرجة تحسب الكبوت يطير من الهواء



تشغيل اللمبة حقة مانع الإنزلاق لازم تعبيه كل شهر زيت



تعبئة زيت القير كل شهرين



طبعا القير متغير وحديث ولا عرفو يضبطونه لأني سألت عن التفته غير الوكاله



عند ورش يقولون المشكله في القير رح للوكاله وشف وش يقولون طبعا أنا كل مأدخل السياره الوكاله يأكلون علي 300 ريال إلا خمس ميه وموقف السياره اكثر من عشرين مره والله ماتصدقون وأقوفها كل أسبوع ولا أسبوعين وتجلس عندهم من يومين إلا أسبوع على الموال هذا لين مليت منهم



طبعا فيه مشاكل كثيره بس هذا الي يحظرني



لحد يجيني يقول السياره حلوه ولا أستعمالك هو الي مسوي هذا



أنا احطها في عيوني وأحسن إستعمال أستعمل سيارتي ولا يسوقها غير إلا مثل أخوي ولا عمي مثل المره يعني شي قريب ومحافظ عليها لأبعد درجه



بس أنا أقسم بالله اكتب الكلام هذا لأني منقهر قهر منساه دائم وتوبة من المكسيما مأشتريها طول عمري ولا عاد أفكر فيها









ويعطيكم العافيه وشكرا يانيسان

[ابو مناخ]

الله يعينك وعزالله انك تهجولت لكن الله يعوضك بأحسن منها

[ابومازن2]

الله يعوضك خير منها ويمكن كان لك فيها شر وانزاح منك والخيرة فيما اختارها الله

تحياتي لك

[riyadh5113]

الله يعوضك بغيره وان شاءالله تكون ابرك منها

[الكنقرس]

اللهـ يكون بعونك صدق

لكن الحمد لله انك خلصت منها

تبي الصدق لا تتعدى تيوتا وبس

والله يعوضك بالخير

[فرخ قطا]

الله يعوضك خير وصدقت المكسيما نادره جداً ليست عمليه
الله يعوضك بالموتر الي تكرفه كرف ولا ينقص ولا ريال

[koogak]

الله يعوضك بخير منها
وبالنسبه لي ما اعتقد شركة نيسان طلعت سيارة صح
غير الددسن والباترول ومن تالي بعد هالثنين لك عليهم

[باث 2002]

يالغالي مع نسيبي مكسيما 2010 لها والله العالم سنه ومافيها أي مشاكل وبالعكس قاعد يمدحها ..وأخوي الكبير قاعد يدور سياره ونسيبي ينصحه فيها ,,
ومع ولد جيرانا برضوا مكسيما 2010 وماشاء الله يروح عليها للجنوب كل شهر ..
عشان كذا لاتحكم على سياره وحده ..يمكن اللي معك فيها عيوب مصنعيه :eek: ويمكن واحد عطاك عين حاااااره :mad:
بالتوفيق ;)

[تناساني]

الله يعينك

متأكد ان موديلها 2010
العيوب اللي ذكرت احس انها بموديل 1990

الحمد لله اللي فكك منها

وشكراً لك لانك اضفت لنا معلومات عنها وعن بلاويها

[نيشان تميم]

قالها لي واحد الله يذكره بالخير ..

سيارة تطلعها من حوش الوكالة .. لاتدخلها عندهم أبدآآآآآ حتى لو مشت 1000 حق الصيانة المجانية لاتوديها

وأترك عنكم الضمانات وخرابيط الوكالات .. وماخبرنا أحد قد أستفاد من ضمان في سيارة ولا جوال ولا أي جهاز الا ماندر !!

طبعآ قلت لخويي ليه ؟

قال أنه في أغلب الوكالات مهندسين مايخافون الله وياخذون بعض القطع ويركبونها على سيارة ثانية علشان ترجع لهم بعد فتره .. طبعآ من باب تغطية أعمال الوكالة عند الشركة الام !!

الحاجة الثانية .. اذا دخلت السيارة عندهم بعد ماتمشي 1000 .. يخفضون من سرعة البلوف علشان ماتكون نشيطة بزيادة ويكلفهم الضمان

وفعلآ .. جربت طريقة الرجال كذا مره .. وكل السيارات الي شريتها جديدة عال العال ياربي لك الحمد وعسى الله يحفظها من كل شر ..

أخوي كبد .. السيارة بدالها سيارات وأهم شئ .. أنك بألف صحة وعافية

وكل عام والجميع بخير والله يتقبل منا ومنكم الصيام والقيام ...

[أبو ممد و ح]

الله يعوضك بحسن منها

والله احس اني صدعت لاكن ربي يعينك

[أبومفلح]

الله يعوضك خير منها

[Farros992]

اول شي يا صاحب الموضوع فين الادلة على الكلام اللي تقولة

سعر الاقمشة الامامية من الوكالة 270 ريال وهذا بعد ازمة اليابان
http://img220.imageshack.us/img220/1865/img1000000326.jpg (http://imageshack.us/photo/my-images/220/img1000000326.jpg/)

تبديل زيت القير كل 100 الف كيف تقول كل شهرين وهذا ان دل دل على كذبك وتلفيقك للموضوع
http://img220.imageshack.us/img220/7347/img1000000319j1.jpg (http://imageshack.us/photo/my-images/220/img1000000319j1.jpg/)

[سكناااان]

الله يعينك حاجه تقهر..

[عفشك مكمل]

معليش

معليش

كلامك مع احترامي لك يفتقر للمصداقية او انك رجال تعفل الموتر

موتر جديد ومغير له كفرات وبطارية وفحمات و وكويلات

لايكون ليموزين وانا اخوك ؟

من اروع السيارات الي مرت علي المكسيما في صبرها وقوتها

صحيح شبابية انا معك

صحيح خفيفة وخطره انا معك

لكن بالتحمل والمكدة عز الله انها ياباني صح

[رسلان الوايلي]

يراجل لتكذبون الرجال خويي معه واحده جديده خبط قيره بدون سبب وهذهي موقفه بحوش اهله

[م م ع 686]

ودي اصدقك بس قوووويه

اعرف اكثر من واحد معهم ولا يشتكون من شي ابد

[الهايم 18]

السلام عليكم ورحمة الله وبركاته

وعليكم السلام ورحمه الله وبركاته

أرجوو من المشرفين الحريه في تعبير الرأي وعدم حذف موضوعي لأنه يهم جميع من



له حق علي في هذا المنتدى أو الزوار لكي يطلعون على حقيقة مكسيما من نيسان
نعم لهم الحق ولكن بصدق


أشتريت قبل سنه وخمسة اشهر سياره مكسيما 2010 من الوكاله مع نزلتها
حلو


وليتني ماشريتها طبعا انا أخذها تأجير منتهي بالتمليك وعرضتها عندكم هنا في المنتدى
السالفه ومافيها إني توي مطلعها لها شهر معي وأوديه لأول صيانه المهم وانا طالع من الصيانه بسبوع تقريبا
هههه متأكد انك عرضتها في هذا المنتدى ؟؟


طلع فيها تفته في المكينه ورجعت للوكاله سويت فحص ولا طلع في الفحص شي



يقولون كل شي سليم وطلعت من عندهم ورجعت نفس السالفه مره أخره وأستمريت على الحاله هذي أكثر من سنه وشهرين وأنا يوم موديها للوكاله ويوم مطلعها



يقولون مافيها شي مره يطلع معي المهندس ويقول عندك مشكله ومره يطلع يقول السياره مافيها شي انا صراحه طابت النفس منها غيرت فيها كل قطع الغيار ولا صلحت الي يشمله الضمان والي مايشمله على حسابي سويت الي وراي والي دوني
ماشاء الله تدفع وراك وقدامك ؟؟والسياره على الضمان ؟
عرضتها عندكم هنا في المنتدى محد يعطيني وجه رحت وديتها للمعارض محد يسومها طرحو أكثر من أربعين الف تمنيت إني مأخذتها ولا ركبتها ولا شفتها
اها عرضتها هنا متاكد ؟؟من صحه كلامك ؟؟


سياره جدا غبيه دورت لي اكثر من شهرين احد يتقبلها مالقيت احد اخر شي جيت اشكي الوكاله عشان يرجعونها قالو ادفع تقريبا عشرين الف عشان نرجعها جاني واحد يحب المكسيما قال انا ابيها بكل عيوبها واكمل اقساطها وتنازلت عنه بالواسطات بقلة حياء عشان اتنازل عنها سياره غبيه سياره معجبينها في سن المراهقه
اها يعني الحين ملاك نيسان ماكسيما صارو مراهقين ؟
حلو حلو ..
يعني تصف نفسك يوم اشتريتها بانك مراهق ؟؟تعجني !!


أنا اوجه نصيحه السياره غير مرغوبه في السوق في كل مكان
ماشاء الله غير مرغوبه ؟؟
ودليل على ان مبيعات نيسان مكسيما منذ نزولها فوق وانته تقول كلام من تأليفك ؟
يعني كلها الارقام والبحوث الي مسوينها ارقام الخبراء بتوقف عليك انته ؟؟




صحيح إن شكلها الخارجي حلو بس السياره ليست عمليه ولا تحافظ على قيمة خمس دقايق
هههههه جملتك فوق ان دلت دلت على انك لاتفقه شي في السيارات ..
لانه خلنا ناخذ الرنج روفر حلو سياره لها سمعتها و وو وو و
طلعها من الوكاله تنزل على طول نت 60 الف الى 100 الف خخخخخ
قويه 5 دقايق




أخر شي قبل أسلمها الرجال الي انا بعتها عليه صلحتها بخمسة الاف ثم عطيتها الرجال قلت إبراء للذمه خلني احاول إني اصلحها وأنا أعرف إني ماسويت شي
ههههه ماتحس انه كلامك متناقض ههههههه
في البدايه تقول ماعرفت المشكله و الوكاله ماعرفو المشكله وفي اخر لحظه اشتغلت عندك الحاسه المليون وقالت لك صلح المشكله ههههه نكمل المسلسل الكوميدي




شباب لايغرونكم الي في المنتدى يمدحون السياره ولا يقولون هذي شي هذي عمليه
على العكس الشباب مادحوها الشباب كل واحد منهم قال تجربته لسياره


وأبي أشرح المشاكل غير التفته



السياره مطاباتها قويه عشان الجنوط مقاس 19
شي طبيعي جدا جدا جدا .
سياره تعليقها رياضي شو تتوقع ؟؟ويوم تقول قويه تحسسني انها سيكل خخخخخخ




السياره تغير الجنط كل فتره عند أخذ أي مطب قوي تكلفة الجنط الأصلي فوق الثلاثه بس مدري كم قيمة
خخخخخ والله اذا انته تسوق سواقه ماتنوصف ف الله العالم خخخ مع انه ناس وصلت عندهم السياره فوق 100 الف وماشكو منها




كفراتها تغيير كل سته شهور مغيرها وانا مستخدمها سنه وخمسه شهور مرتين

شي يفوق الخيال ههههههه اقول متأكد انه السياره مركب اطارات ؟ولامركب بلاستيك ؟؟بدل الاطارات ؟




سريعة التحبيل كفراتها تتراوح من 650 إلا 1500
عادي مافيها شي ويوصل سعر الكفر على حسب نوع الشركه ويوصل فوق 1500 لكن في اطارات مناسبه


البطاريه مغيرها بعد ماشتريتها بثمانيه شهور بقيمة 350 ماشاء الله غيرتها على حسابك ؟
شكلك ماتقرى كتيب السياره !!!
والغريب انه التبديل على الوكاله في هالحاله
يالله نكمل المحاضره الفكاهيه




الفحمات تغيرها الأماميه تغيرها كل ستة شهور وقيمتها 800 وبعد التخفيض 650 طبعا بس الأماميه
ههههههه قويه يعني الحين الفحمات عندك اغلى من الانفنتي اف اكس 50 ؟؟؟اوما قويه و احد الاعضاء فوق حط لك الدليل وانه الرقم الي قلته مادري من وين طلعته اهنيك على الرقم العجيب الي مايدخل العقل




تغير الكويلات بقيمة 2500 ريال
هههههههههه اووووه شي اقوى ويفوق الخيال ..
كويلات مره وحده ؟؟
الاخ يستعمل بنزين سباقات مخلوط مع الايثانول شكله


فك الثلاجه بقيمة 500 ريال فقط والتركيب
ههههههههههههههههه
:D:D:D:D:D:D:D
اخ بطني
وليش فكيت الثلاجه ؟
كنت تحاول تبدل البطاريه من الثلاجه مثلن ؟؟





تغير فلتر الهواء كل تغييرة زيب بقيمة 180 وبعد التخفيض 130
:D:D:D:D
خخخخخخخ
انزين دام انك شفت انه التغير غالي في الوكاله في محلات برع ارخص ومعروف انه سعر الوكاله غالي



صوت هواء في الباب حق السواق والمعاون
اتفق معاك بس هذا على الظمان والمشكله كانت في دفعه 2010 ومش كل السيارات كم سياره .والوكاله تحلها هالمشكله





صوت في الباب عند فتح الباب بالريموت غريب جدا
خخخخخ الله على الكلام الجميل
يعني الحين مثلن تتوقع يوم تفتح القفل يطلع لك صوت ساعه بيج بين ؟؟ولا ودك يطلع حسين الجسمي ويغني :D




سقوط اللحيه الأماميه بدون أي سبب بعد تحلل المسامير وتركيبها
اقول لو تقول هالكلام لهندي بيتقلب على ظهره وبطنه ضحك وموت قويه قويه مره وحده تحلل المسامير
بصراحه انته :good2::good2:




طقطقه قويه في الكبوت عند سرعه عاليه لدرجة تحسب الكبوت يطير من الهواء
طبعا الكبوت يهتز بس بشي بسيط لكن بالي وصفته
حسستني انه الكبوت على سرعه 200 يقولك بس وقف وقف ماودي اموت






تشغيل اللمبة حقة مانع الإنزلاق لازم تعبيه كل شهر زيت
اتصدق اخوي يعبيه كل مره لما يشغل السياره
:D:D:D:D
ماتدخل العقل ههههههه
كل شهر ؟؟
:eek::eek:




تعبئة زيت القير كل شهرين
شي يفوق كلمه مابعد الخيال
الحين زيت الماكس ينفحص كل 40 الف ويتغير على 80 الف او 100 الف ..
وانته كل شهرين تعبيها ؟؟




طبعا القير متغير وحديث ولا عرفو يضبطونه لأني سألت عن التفته غير الوكاله
بدايه الموضوع تقول انهم ماعرفو المشكله ؟
والحين تقول القير تم تبديله !!!
تناقض وااااااااضح





عند ورش يقولون المشكله في القير رح للوكاله وشف وش يقولون طبعا أنا كل مأدخل السياره الوكاله يأكلون علي 300 ريال إلا خمس ميه وموقف السياره اكثر من عشرين مره والله ماتصدقون وأقوفها كل أسبوع ولا أسبوعين وتجلس عندهم من يومين إلا أسبوع على الموال هذا لين مليت منهم
توك تقول غيرت القير ؟؟والحين تقول انك بعدك تبحث حل عن المشكله ؟





طبعا فيه مشاكل كثيره بس هذا الي يحظرني



لحد يجيني يقول السياره حلوه ولا أستعمالك هو الي مسوي هذا
لا ياعزيزي انا مابقولك استخدامك فيه وفيه
انت من الاساس احتمال 100% ماعندم ماكس ولاجربتها او ودك فيها
بس يقول المثل الي مايطول العنب حامض عنه يقول





أنا احطها في عيوني وأحسن إستعمال أستعمل سيارتي ولا يسوقها غير إلا مثل أخوي ولا عمي مثل المره يعني شي قريب ومحافظ عليها لأبعد درجه
وااااااضح
صدقت كلامك المتناقض بشكل غير طبيعي





بس أنا أقسم بالله اكتب الكلام هذا لأني منقهر قهر منساه دائم وتوبة من المكسيما مأشتريها طول عمري ولا عاد أفكر فيها

واضح انك مقهور وماعرفت تكتب الموضوع فان دل دل على انك شي من الاثنين اما انه ماعندم ماكس او ماعندك ماكس









ويعطيكم العافيه وشكرا يانيسان

على العموم انا مستعد اناظرك امام الناس الي حطيت قدامهم هالموضوع وصدقوك !!!!
واتحداك ترد علي هنا
لانك مارديت هناك ف بشوفك ترد هنا ؟
شباب .
لو تلاحظون كلامه ماله اساس من الصحه ..فيه تناقض عجيب
طبعا هو طلب في منتدى مجاور ان لايتم اغلاق الموضوع
كمل الموضوع فتره ومارد وتم اغلاقه
وبعد فتره نزل بنفس القصه ..
طبعا الاخ قبل هالموضوع نزل موضوع يقول فيه انه وده يبيع السياره لانه بيسافر برع والسياره في حاله ممتازه <<<انتو مركزين على كلمة في حاله ممتازه ؟؟؟
وبعدها نزل هالموضوع ؟؟
انتظر ردك يابطل .
وعلى العموم كل موضوع تنزله مثل هذا راح ارد عليك بالمثل ..
اعذروني على الاسلوب بس في شي اسمه واقع او لما واحد يكتب من مخيلته ..
واعتذر من المشرفين ايضا على هذا الاسلوب . ..

[الأحول]

صادق ياكبد البعير //// معي ماكسيما 2008 وخبط القير (بكتب عن وكالتهم بعنوان -وكاله من غير بواب- وراح تقرأ عنهم شي اول مره اعتقد يصير في عالم الوكالات)

[كاشت وحداني]

الدنيا حظوظ
انا ما بقول انك تللفق وتكذب

لكن بقول ان الغريب ان الوكاله تلفق كلام وتصدقه وتدفع اللي وراك واللي دونك
فيه اشياء انت غيرتها فيه سيارات موديل 99 ما تغيرت فيها
الامر الثاني بما انها تاجير منتهي بالتمليك كان خليتها عندهم ولا تسدد لهم اي قسط
ولما يكلموك رد عليهم وقلهم كيف اسدد على سياره واقفه عندكم حصلت معي عند عبداللطيف جميل وبدلو لي موتر ثاني جديد

اذا تعثرت انت في موتر فليس ان جميع النوعيه من هالمواتر فاشله
معلومه : واحد من الشباب معاه ماكس جديد 2010 وصار عنده تفته والسبب انه عبا بنزين 91 وباقي ربع التانكي وحط 95
بعد تقربا ثللاث تعبيات 95 راحت التفتفه

[كاشت وحداني]

الهايم 18
تحليل واقعي ومنطقي

[قدر مكتوب]

لاحول ولا قوه الا بالله ياجماعه احسنو الظن يمكن الرجال صادق وترى يمكن سيارته ماوفق فيها او فيها مشاكل , ويمكن انه راعي خطوط وطرقي ماتدرون !!! ويمكن انه يعفل الموتر شوي او له اولاد او اخوان يعفلون السياره

احسنو الظن

[د. أبورويشد]

أرجوا من الإخوه
زيارة هذا الموضوع
لنفس الرجال
في منتدى الأخبر بالمكسيما وملاك المكسيما
منتدى نيسان أرابيا
وشوفو ردود ملاك المكس الحقيقيين
http://www.nissan-arabia.com/vb/showthread.php?t=645

وأيضا هذا الموضوع
http://www.nissan-arabia.com/vb/showthread.php?t=64601

يبدو ان الرجال نصااب وحااقد
وناشر هالموضوع في أكثر من منتدى

[دل البحار]

اخواني ترى من مقولة ناس معاشرين الوكالات يقولون السيارات حظووووووووووظ يا يكون حظك زين وتخدم معك عمر من غير مشاكل الا مشاكل بسيطه
ومنهم من يبلش وتوه طالع من الوكاله
اضف ترى العييييييييييييييييييييييييييييييييييييين حق
كل عام وأنتم طيبين

[العابر2222]

يمكن شاريها مستخدمه أو رجيع من الوكاله وكان عليها من مستخدمها الي قبل تعديلات فلاتر وخرابيط ومفجره
ورجعها راعيها وهي ما مشت واجد ... وتوهق فيها أخونا

[مطعس ركض]

مع احترامي الشديد انت نصاااااااااب
انا معاي مكسيما 2010 وما سويتلها صيانه الا 1000 كلم بس بالوكاله
والباقي كله اغير زيت في محطة ادريس ون ستوب

ماشاء الله تبارك الله عليها ماشاء الله
من الرياض الى القصيم الحفر رفحاء الدمام الكويت مكه الطائف
مشيتها في اقل من سنه 50 الف
ولا قالت اح
بس زيت وفلتر ( وفلتر هواء وفحمات امامي مره وحده) و 260 ريال من الحمراني
كيف خليت الفحمات ب 600 !!!!!!!!!!!!!!!!!!!!
بصدقك والا اصدق نفسي
ولا علي من الوكاله ولا صيانتهم
ياخي خافوا ربكم المكسيما خايسه لحد يشتريها
لكن ثق تماما ان لها اهلها ولا راح يتركونها
وما تحسفت يوم على اني شريتها سياره قويه مصنوعه في امريكا

[باترول للأبد]

ياخوي في كل منتدى ناشر هالقصه !!

[ذيب الفاو]

نصيحه لك ولكل شخص

اي سياره تنزل موديل جديد لاتنقز وتشتريها وتقول ابكشخ

خلها لين تاخذ وضعها بالسوق وتشوف وش وضعها للمستهلك

اما المكسيما فهي سياره فاشله جدا جدا

مانجحت الموديلات القديمه بتنجح الموديلات الجديده !!

طبعا لاء

[دونت 1]

اخوي كلامك غير منطقي والي بيشوف الموضوع الحقيقي والردود من اصحاب المكسيماء من من ملاكة
يشوف الروابط الي فوق ردينا علي الرجالة بئدلة واثباتات ويسحب ولا يرد علي الموضوع
انا مابقول انك نصاب ولا حاقد بس الزوار يشوفون الردود وموضوع الي مافية مصداقية ويحكمون عليك

[سطام vip]

يغلق الموضوع