وكاله من غير بواب

[الأحول]

استميح المشرفين الكرام عذرا في كتابة هذا الموضوع ولكن مايدفعني لذلك هو محاربة من يحاول استغلال هذا الشعب الطيب او المقيمين الاعزاء وقد اعماه الجشع والطمع ولم يفكر في يوم تشخص فيه الابصار(في اي مجال كان) وان كان موضوعي الان عن وكالة سيارات كثر الحديث عنها وعن وكالة عبداللطيف جميل(مافي دخان من غير نار) ولكن لان هذا حصل لي شخصيا مع وكالة نيسان فسوف اكتفي بالكتابة عنها واليكم ماحصل:
معي ماكسيما 2008 خبط القير وطبعا ماراح اروح لوكالتهم لانهم بيصلحون القير وبيسوون شي في المكينه عشان تخبط وترجع لهم يصلحونها كما هي العاده وذكر بعض الاخوان ذلك في كثير من تعليقاتهم على مواضيع نشرت عن الوكالة 000المهم رحت لواحد فنااااااان وطلب مني قطعه اجيبها من الوكاله (وعطاني القطعه ) 0
رحت للوكاله اللي بالصناعيه(عطيتهم القطعه) جلس الموظف يقلب في جهازه بعدين في كتلوج عنده كبير 00قلب عيونه 00حك راسه 00فرك خشمه 000رفع راسه وقال صديق ايش هازا000قلتله تسألني انا 000انا قلتلك قطعه خارجيه بالقير بس هذا اللي اعرفه 00هز راسه كنه يرقص على مقطع موسيقى وقال روخ وكاله في خريص شوف مدير كبير000دريت انها تصريفه بس وش اسوي 0000رحت للوكاله في خريص لقيت شابين سعوديين(عطيتهم القطعه) ماعرفوا نادوا كبير البياعين اعتقد باكستاني شافها 000قربها عند عيونه 000بعدها شوي عن عيونه 00شاف الجهاز 00قلب الكتلوج 00قال شوف صديق روح ورشه شوف مهندس (ورشتهم جنبهم ) رحت لقيت مهندس قلت شف اي سياره نفس موديل سيارتي وعطني رقم هالقطعه قال ماعندي الان 2008 بس ايش هالقطعه ؟ وانا انتفها من يده وروح للصاله اللي فيها خدمات العملاء (اللي جاي بيشري -عفوا قصدي جاي بيتورط-واللي يسأل عن خدمات الشركه - واللي واللي ) المهم وقفت بنص الصاله ورفعت صوتي -يارجال 00يالوجيه الطبيه شوفوا هالقطعه اللي بيدي لا البياعين ولا المهندسين عرفوا وشهي --- شوفوا وكاله وش كبرها ماعرفوا قطعه من سياره هم وكلاها -- اقسم لكم بالله العظيم ان هذا حصل لي شخصيا مع وكالتهم وياويلي من ربي يوم الحساب كاني ظالمهم

[قدر مكتوب]

حقك ياخوي لو رفعت صوتك وجزاك الله خير انك حذرت الناس ونصحت الجميع , الله يعينك ويسهل امرك وكل وكاله العن من اختها (قالو طلقها وخذ اخته , قال الله يعلنه ويلعن اخته)

[صاحب الذود]

ما اقول الا الله يعينك وكاله بكبرهاا ماعرفة القطعه
بس زين انك تكلمت في الصاله

تقبل مروري

[abo naser 1]

هذا واحد من الشباب معه مكسيما قديمه اعتقد97م جا وقت الصيف وجت العروض من الحصالات قصدي الوكالات بالصيانه وخصوصاً التبريد ومن ضمنها عرض وكيل نيسان الحمراني كشف مجاني على التكييف مع خصم 30% قطع الغيار خوينا مكيفه متعطل قال فرصة نكشف على مكيف ها القرنبع وفعلاً دخلها للصيانة يفحصونها قالو غذاً نتصل بك وفعلاً اتصلو فيه وقالو له الكمبرسر عطلان وقيمته ب 4500 ريال مع الخصم مصنوع من ذهب وتقنيه عاليه + تعبئة واجور اليد = هاك العده فوق 5000 ريال . خوينا قال لالالالالا خلوها ابجي اخذها كل قيمتها 10000 نصلح الكمبرسر 5000 معقوله طلع الموتر واخذ كم شهر جا يوم وهو حول الصناعيه مر صاحب تكييف وقف بيشوف كود الله يفرجها ولا هاك الوليد شامي توه جاي ومفتح مخه ومابعد تلكع من شغل البربسه الي في الصناعية كشف عليها مر علبت الفيوز ومعط واحداً منها وبدله من عنده ودق المكيف والا ساعتك هذي وهو شغال وكلها 1 ريال قيمة الفيوز مع الاكرامية10 على كذا فعلاً فيه ارباح 1000000% لدى الوكلاء لدينا في جميع المجالات سواءً الحمراني او غيره
والقصص على هذا الشاكله كثيره لاكن لا يتسع المجال



1=5000


5000%

5000%


المقاطعة هي الحل

[مطعس ركض]

ازيدك من الشعر بيت والله يشهد على ما اكتب ومعاي شباب سعودين
كنا نتدرب ميكانيكا في شركة عبداللطيف جميل فرع طريق خريص
والله ثم والله ان الفني فاتح مكينه وهو يركب الهلل الي تجي تحت البلف
وعنده بلف ماركب زين راح جاب علبه ببسي وقصها ( اطراف الببسي الجوانب )
ماهوي الغطى الي فوق اوتحت لا الجوانب الزرقاء الي عليها شعار ببسي
المهم وبالمشرط حط ها تحت الهلل حق البلف وقصها وركبها
هذا شغل وكاله وطبق الراس وتعال يازبون شيل شغل وكاله بالببسي

[فرخ قطا]

ازيدك من الشعر بيت والله يشهد على ما اكتب ومعاي شباب سعودين
كنا نتدرب ميكانيكا في شركة عبداللطيف جميل فرع طريق خريص
والله ثم والله ان الفني فاتح مكينه وهو يركب الهلل الي تجي تحت البلف
وعنده بلف ماركب زين راح جاب علبه ببسي وقصها ( اطراف الببسي الجوانب )
ماهوي الغطى الي فوق اوتحت لا الجوانب الزرقاء الي عليها شعار ببسي
المهم وبالمشرط حط ها تحت الهلل حق البلف وقصها وركبها
هذا شغل وكاله وطبق الراس وتعال يازبون شيل شغل وكاله بالببسي

ههه قويه ذي الله يستر من تاليها
ودنا نجرب الوكالات الثانيه
مثل مستوبيشي بس نخاف اردا من ذولا على العموم تعرف لك على ميكانيكي
وريح راسك

[الأحول]

عيدكم مبارك - مشكورين جميعا وبدون استثناء على مروركم الطيب والله لايوريكم مكروه

[هاوي بندق]

الله يعين المسلمين

[ماشي على همي]

لاحول ولاقوة الابالله
الله يعينا على هاالوكالات اللي ماتخاف رب العالمين