وش الراي ياجماعة الخير في أفضل مكان للتخييم ؟

[حسن الخاتمة]

السلام عليكم جميعا:
بصراحة ابي اشاوركم حول مكان طيب للربيع،،
لأن بعض الريضان غير مريحة للتخييم منها زحمة الناس ، والنساء واصوات مزامير الشيطان ولا تاخذ راحتك
وعلى طاري الأغاني كأنه (فرض ) ان الكشاته يطولون عليها ويزعجونك الله يهديهم
المهم :
معنا شباب 20 شخص من طلاب التحفيظ والجامعات الله يثبتهم ،، نبي مكان ربيع وهادي
فكرت في روضة نورة أو الحقاقا ؟
لكن الآن فاضية من الناس ومع بداية العطلة كلن يطلع ......................
ادري ان الزين عليه زحمة لكن لو شي اقل ربيع لكن ترتاح نفسيا فيه ؟؟

وش الراي ؟؟ علما اننا في الرياض ....

انتظر ردكم يالنشامى .....

[][عزام][]

السلام عليكم حياك الله اخوي وعلى ما قالوا بعد الاختبارات تبدأ الطلعات للشباب واتوقع ان الرياض يوم الخميس تكون فاضيه لكن بما ان اكثر من شخص نفس وضعك مشرف حلقه ويسألني واللي اتوقع انه افضل واريح لكم كشباب حلقات انكم تذهبون الى الدهناء طبعن اما عن طريق التنهات والا في منطقه ممتازه في طرف الدهناء وماهيب بعيده وقليل الناس فيها الا وهي منطقة سعد 100 كم عن الرياض خط الرشقه وافرق يمين من مخرج سعد امش كم كيلو تبي تشوف النفود على يمينك نقر ما عندك احسن منه والله يوفقنا وياكم واي مساعده امر حنا مستعدين



طبعن للمعلوميه الربيع بقرب الرياض لا يتركز الا في منطقتين التنهات وخريم وكلها زحمه يعني لا تحاول تدور ربيع زين حول الرياض ولا فيه زحمه

[][عزام][]

المعذره اكتب وانا مطفي النور وانواع الاخطاء الرشقه=الشرقيه

النفود اذا فرقت من سعد على يسارك وليس يمينك

[حسن الخاتمة]

بيض الله وجهك اخوي عزام وما قصرت لكن السؤال : هل تقصد مفرق منتزه سعد على خط الشرقية ؟
وهو يبعد فعلا 100 كم لكن به ربيع ؟ واذكر ان المنطقة جميلة نفود لكن خبري بها بعيد

يعني إذا فرقت من سعد الف يسار كأني راجع للرياض ؟؟ ‍‍‍‍

؟

[زقم]

السلام عليكم ورحمة الله وبركاته
ا لمكان اللي ذكره اخونا عزام من افضل الاماكن اللي حول الرياض حاليا0000:good:
وبحكم انكم مطاوعه الله يهدينا
مثل ماهداكم -قولو آمين تكفون-0
0فهذا المكان هادي وجميل وقريب لفيضة المسعودي00
ربيعها حليل00تصيرون تقهوون فيها بالنهار0000والوصف ولا يهون اخونا عزام كالتالي:-
طريق الدمام100كيلو مفرق سعد تاخذه يمين وترجع كنك تبي الرياض يجيك مفرق مسفلت على يمينك
تلف معه ورح كنك تبي شركة ارامكو اللي هناك00اذا وصلت بوابتهم خلها يسارك ووجهك شمال 00ابتل مع الطريف الممهد00تشوف الطعوس يمينك والفيضه يسارك000

والله يوفقكم

[حسن الخاتمة]

آآآآآمـــــــــيـــــــــــن الله يهدينا وإياك لطريق الاستقامة ويثبتنا عليه حتى نلقى الله
ويتجاوز عنا فوالله انا مقصرين وإن لم يتب علينا الله ويرحمنا برحمته لنكونن من الخاسرين

[حسن الخاتمة]

جزاك الله خير أخي زقم أنت وعزام وما قصرتم ويوم الخميس بعـس الفيضة ونستطلع المكان والله ييسر ويعين آآمين

ويظهر ان محطة ابو هيثم على نفس المخرج لكنها جنوب والفيضة على وصفكم يسار ؟

على كذا الماء قريب والتموين كذلك ولا انا واهم ؟

[][عزام][]

الا قريب والله يوفقنا وياكم وترى فيه اذا ما جاز لك المكان هذا اذا وصلت خرج سعد ادخل يمين يعني كأنك رايح للأحساء وعلى يسارك نفود ممتااااازه جدا على العموم انت شف المكاني ولله يسهل اموركم

[حسن الخاتمة]

تم الوصول للموقع المذكور وهو حليل وطيب وتشاورنا مع الربع قلنا نعس غيره ونقارن

ما قصرت أخوي عزام طيب في بالك مكان آخر ؟

معليش كثرنا عليكم ........وجزاكم الله كل خير

[الهزاز]

ودهم الخرخير فياضها فاضيه ولا بها احد

[الفتى المجازف]

اخي الكريم/حسن الخاتمة
جزاكم الله خيرا على جهودكم الطيبة تجاه اخوة لنا يحفظون كتاب الله.
لذا سأقترح عليكم مكانا مناسبا وقريبا نسبيا والخدمات ليست ببعيدة عنه
المكان هو المحارق وانت طالع من الطوقي باتجاه حفر العتش او دوار الصمان التنهات
تجيك الحفنة تعداها تجيك هجرة الطيري ادخل مع مفرقها وامش الين تجيك الهجرة تخترقها من الوسط
وتروح على طول يسار نسبيا يجيك شعيب المحارق وترى ربيعها صاير على شكل بقع حول الشجر
وترى المكان جميل وهادي بعيدا عن الضوضاء والازعاجات بس عليك ان تكون انتقائيا جدا في المكان اللي
سيكون مقرا للخيام وستجد الخصوصية في بعض الاماكن بحيث انك لن ترى احدا قريبا منك.
اتمنى لكم التوفيق والسداد

[حسن الخاتمة]

جزاك الله أخي الفاضل وبارك فيك وتم الوصول لشعيب محارق وهو منطقة جميلة وهادية كما ذكرت

وبارك الله في الأخوان وما قصرتم ولقد استفدت من مشاركاتكم ولله الحمد ، الله لا يحرمنا منكم &