أطلب النصيحة في سوبر سفاري 2005

[saco22]

السلام عليكم
الله يجزاه خير اليشور علي في شراء سيارة السابق ذكرة أعلاة (أمزح معاكم) سوبر سفاري 2005.
أنا دوامي في الجبيل و ساكن في الخبر و يوميا رايح جاي 100كلم يعني 200 في اليوم.
السيارة حادها راعيها بـ 65,000 ريال ماشية 145 ألف أبيض مافحصتها لسه بس كنت عند سمكري و قالي انه الموتر مضروب من الرفرف اليمين قدام و مصلح.
في الحقيقة مالي بالبر بس ودي بجيب و أول مره .
و هل فحص المحلات اللي عند المعارض تكفي لتشييك الموتر.
على كلام راعيها انه جهزها لسفرة خط طويل و هون لدواعي خارج الإرادة.
بس وش رايكم أشتريه ولا وجع راس. أنا مستعد أوديه صيانة دورية بس هل فيه خرابات و مشاكل؟

[السرايا]

السعر هذا ما تحصل فيه مثل هذه السيارة (سوير سفاري) وبهذا الممشى ...تأأكد من الصدمة لا تكون مؤثرة بالسيارة وتوازنها ....
وأنت بحاجة إلى شريطي ... فهم (جن) في اكتشاف الصدمات ..ومعرفة نظافة السيارة ..وتحديد سعرها ..تصدق بعظهم يحدد لك الصدمات وحجمها في الظلام التام الخرمس - ما شاء الله لا قوة إلا بالله-...أما راع الورشة اللي حاط بنقالي ومع ضواية (كشاف) فلا يهمك ...إلا إذا كان راع الورشة سعودي موثوق وصاحب بخص في هذا المجال فنعم...

[saco22]

تسلم
أفهم إنه غالي ولا رخيص سعره, طيب و الحل بالفحص ؟:D

[مقطع العروق]

والله ماشاء الله سعر حلووو واذا هو سوبر فل بعد احلا واحلا باختصار (رخيص)

واذا انت ما شريته انا شراي وخبرني خاص بس انصحك تفحصه زين زين

لان احيانا الصدمات اللي زي كذا تتطلب تعديل بالدفرنس اذا هي قوية وتكلفة تعديلها تووصل لل 1000

بس اهم شيء الشاص ولا يبين الا بالفحص والباقي فحص مكينة قير دفرنس امامي وخلفي دبل والباقي قطع يمكن تغيرها الاسهلاكية ركب جلد رمانات كفرات عادية جدا
وبالنسبة للداخلي وانت بتشتري اهم شيء الديكورات تكون راكبة مضبوط ومحافظ عليها ولو ببعض الاهتمام

وصدقني اذا شريت باترول بتدعيلي

لانه ماشاء الله يتميز بخفته واي مكان ان شاء الله ما يردك بس لا تتهور

والله يباركلك فيه ويعطيك خيره ويكفيك شره مقدما

[السرايا]

رخيييص
بس احذر ...لا تقع ضحية الغش ... تأكد من أن الصدمة لم تؤثر في السيارة بشكل يعيبها ويخل في توازنها.. قد تكون الصدمة مؤثرة على الشاصي أو الدفرنس ...
عموماً أنت بحاجة لواحد من ربعك العارفين ..وافحص السيارة ..ومسها بالخط ..وجرب الدبلات بالرمل ..وتأكد هل الممشى حقيقي ..لأنه شوي على هذا الموديل غالباً ..
وصل صلاة الاستخارة وادع دعاءها..
وتوكل على الحي الذي لايموت ...
وطرب راسك ..

[قناص خلاوي]

سعر الموتر اذا نظيف نظيف ممتاز
لكن احس انه خليجي وملعوب فيه
وبما انك راعي مشاوير يومية انصحك بموتر صغير
ارخص سعر واقل استهلاك والله يدلك على الصالح

[saco22]

مشكورين على النصايح وانا انشالله بكرة بحاول أفحصة و أردلكم خبر.

[النداوي712]

يا خوان الرجال الي حاد صادق وهذا سعره في السوق وانتم في المنتدى تبالغون في الاسعار الله يصلح الجميع

[قناص خلاوي]

يا خوان الرجال الي حاد صادق وهذا سعره في السوق وانتم في المنتدى تبالغون في الاسعار الله يصلح الجميع

عساك ع القوة اخوي
دور لي مثل هالموتر والممشى بهالقيمة
ولك سعي طيب ماهوب الف ولا الفين ولا ثلاثة
وتراي صامل بالحيل

[saco22]

أبشركم فحصت الموتر اليوم في المعارض اللي في الدمام و طلع اللي فيه:
- بالأول قبل فحصه الموتر من داخل لاعب فيه الغبار و منظف بس يبين إنه موقف و مكشوف من زمن.
- الإيرباقات طالعات و مرقعات أي كلام.
- التنجيد كأنه موتر ماشي 300 ألف مو 140 ألف.
- ماله مفتاح سبير و الرموت يفتح السيارة بس ما يقفلها.
- اللوحة الأمامية معروشة و ملصمجه و فيها 15 فتحه.
- على كلام راعيها مضروبة من الجنب بس الفحص يبين إنها مصبوغه كلها و فيها دقه من الخلف بعد.
- القزاز الأمامي مبدل تجاري.
- الشمعه يمين مبدلة عادي مو زينون (يعني وحدة صفراء عادي و و حدة بيضاء زينون).
-الدفرنش الأمامي يهرب زيت يمين و يسار.
- الدركسون فيه فضاوة.
- المكينة و الجير و الدبل سليمات.
- فيه صوت في الكمبرسور.

الصراحة إنقهرت سواقته حلوه بس وش رايكم يتربع ولا ما يمشي لأني أبي أستخدم يستاهل 65 ألف ولا واجد

[العتيبي 88]

يا خوان الرجال الي حاد صادق وهذا سعره في السوق وانتم في المنتدى تبالغون في الاسعار الله يصلح الجميع


حبيبي دور لي نفس المواصافت سوبر وفل ونفس الممشى ولا ماشي 200 بعد وابيض وللك 5000 ريال سعي وتراي جااد

لاكن الكلام بالهوى ،،، ماحد يدري ...

[العتيبي 88]

أبشركم فحصت الموتر اليوم في المعارض اللي في الدمام و طلع اللي فيه:
- بالأول قبل فحصه الموتر من داخل لاعب فيه الغبار و منظف بس يبين إنه موقف و مكشوف من زمن.
- الإيرباقات طالعات و مرقعات أي كلام.
- التنجيد كأنه موتر ماشي 300 ألف مو 140 ألف.
- ماله مفتاح سبير و الرموت يفتح السيارة بس ما يقفلها.
- اللوحة الأمامية معروشة و ملصمجه و فيها 15 فتحه.
- على كلام راعيها مضروبة من الجنب بس الفحص يبين إنها مصبوغه كلها و فيها دقه من الخلف بعد.
- القزاز الأمامي مبدل تجاري.
- الشمعه يمين مبدلة عادي مو زينون (يعني وحدة صفراء عادي و و حدة بيضاء زينون).
-الدفرنش الأمامي يهرب زيت يمين و يسار.
- الدركسون فيه فضاوة.
- المكينة و الجير و الدبل سليمات.
- فيه صوت في الكمبرسور.

الصراحة إنقهرت سواقته حلوه بس وش رايكم يتربع ولا ما يمشي لأني أبي أستخدم يستاهل 65 ألف ولا واجد



اولا كل عام وأنت بخير ياغالي ...
ودامك فحص الحمدلله الموتر تحصله مقلوووب دام الارباك طالع اعرف انه مقلوب ولا الصدمه قويه لان الصدمه الخفيفه مايطلع الارباك ...

والعداد تحصله مرجعه الى ورى ولا مفصول فتره ومرجع وتبي نصيحة أخ لأخوه الموتر مايصلح اذا صار مصدوم مايصلح ولا يستاهل القيمه ذي تبي تأخذ للك 2002 ورررررده بالسعر ذاا ... ممشى ..

السواقه صحيح طرب ويطربك مجنوون راحه ورساوه وخفه بس الي زي كذاا مايصلح ياغالي ،،،

موفق خير وتقبل نصيحة أخوك ،،،