شوركم يا رجال

[الطرقي]

شباب عندي هايلكس كفراته كفرات وكالة عرض 195

ودي أركب أعرض عشان أرتاح في الرمل

بغيت أحط عرض225 بس قالو لي كل ما عرض الكفر أجهد الموتر وضره:(

ويقولون إن عرض الكفر الزايد عن عرض الوكالة يثر علي الكلتش والأذرعة وغيرها

وشار علي واحد من الشباب بأني أحط 205 عشان ما اتعب الموتر واجد وأرتاح أنا

وقال لي واحد ثاني إنه حاط في هايلكسه كفرات كابرس وإنها ما شيه زي الحلاوه

وتكفون لا تبخلون علي بالراي

س1:هل الكلام صحيح إن عرض الكفر أزود من عرض الوكالة يضر الموتر ؟:confused: :confused:

س2:وش نوع الكفرات اليابانيه الي زينه في الرمل وحليله للي بيمسك خط؟:confused: :confused:

ولكم مني جزيل الشكر والتقدير..... ;)

[ذيب الصمان]

حيا الله الطرقي ( كتبتها صح علشان ما تهوش علي;) )

اول شي الهايلكس كم موديله وكم غماره ؟؟؟؟


اقولك شي الكفرات لعريضه على حسب السياره ودئما لا تحسب كل معرضت وكبرت

الكفرات في الرمل تمشي احسن لا هذا مفهوم خطاء شف كل سياره وكفراتها على حسب

المكينه يعني الشاص ما يضره كبر الكفرات بس تحط كفرات كبيره على ددسن ولا هايلكس


ما ينفعه في الرمل بلعكس يضر مشيه يثقل على الموتر بس تحط كفرات عريضه شوي مو

مرره تساعده وخاصه اذا كان لين في الرمل ينفع لاكن ما يعيش كثير تروح النقشه بسرررعه

يعني كل مكينه ولها كفراتها المنابه

عمومن لي رجعه لهذا الموضوع بعد ما تجاوب على الاسئله الي فوق

[الطرقي]

أشكرك علي تجاوبك عزيزي

الهايلكس 98 غمارتين

وكلامك صحيح أخوي إن النقشة تنمسح بسرعة

وأنا أدري إنه كفرات سيارتي حقت الوكالة هي أفضل شيء من نا حية الجودة وإنها تصبر وتتحمل

وإنه كل ما عرضت الدعسه صار الكفر ما يتحمل "سنه وتنمسح النقشة" وللمعلومية إن كفر الهايلكس اللي من الوكالة 8 طبقات بس الكفرات العريضة 4 طبقات

يعني زي كفر الكامري والسيارات الصغيرة

وترا الحين السيارة تمشي زي الحلاوة بس إذا عرض الكفر تا خذ راحتك شوي بعدين يصير مو لا زم أخلي الكفر علي 12 أو10 إذا بغيت أطاعس

وتري الهايلكس ما أخذة إلا للبر ما أستخدمه داخل البلد

وأتعبناك بكثرة أسألتنا

وأشكرك علي إهتمامك بالموضوع


مع تحياتي لك

[ذيب الصمان]

وش دعوه اخوي الطرقي ازعجتنا حنا كلنا نستفيد من بعض

اعرف كثير من اخوياي راعين هلكسات

فيه واحد من اخوياي راعي هلكسات يعني مدمن شي اسمه مطاعس وهايلكس ومجرب

اكثر الكفرات وبسئله لك وش احسن شي للهلكس الغمارتين وبردلك بس خلني اقابله

هو ما معه جوال ولا كان اتصلت عليه

[الطرقي]

خلاص أخوي إذا قابلته إسأله وتراي مانيب مستعجل

واللي مخلين من أول ما أغير الكفرات تضارب أراء الناس

وصراحة إني خايف أنكب بشيء شين علشان كذا متروي

وإن شاء الله إن الفود بيجي منك

[أيمن]

السلام عليكم ..
وصبحكم أو مساكم الله بكل خير وعافية ..

وحياك الله أخوي الطرقي وأخوي أسد الصـ ....عفوا ذيب الصمان ..

مشاركة مني أحببت أن أبين للأخ الكريم الطرقي بعض ما جربته تجربة خاصة في شأن الكفرات ..
وخصوصًا كفرات الهايلوكس ..
بالنسبة لاستفسارك عن أن عرض الكفرات يضر بالموتر ..
أقول لك .. نعم لكن فيما دون موديل 98، أما الموديلات الجديدة فإنه لا يضرها عرض الكفر، إلا من ناحية واحدة فقط ..
ألا وهي أنه فيه إجهاد نوعًا ما للموتر .. وأعني في ذلك الكفر العريض جدا، بمقاس 225 فما فوق، فيمن يركب جنوط الفورد ثم يتفنن في تعريض الكفر ..
لكن وبشكل أعم فإن عرض الكفر يساعد في رساء الموتر، في الطرق والمنعطفات مما يجعل الهايلوكس قليل "الزّحفات" وكذا يساعد في خوضه للرمال بيسر وسهولة وخصوصًا إذا جعلت ضغط الكفرات ما بين 15 - 20 أم النقصان عن هذا الرقم 14 فما دون فإن به إضرار بالغ على الكفر .. كما تعلمون ..
لكن وبالتجربة فإن أفضل حجم للهايوكسات الجدد - أعني من موديل 98 فما فوق هو المقاس التالي:
15 / 75 / 205
فبالنسبة للرقم الأول أعني به مقاس الجنط وهو خمسة عشر كما هو معروف لحجم جنوط الهايلوكسات الجدد.أم الثاني فالمراد به طول ارتفاع الكفر.
أما الثالث فهو عرض الكفر - كما تفضلت سابقًا - .
أم بالنسبة لأفضل الماركات فأظن وبلا منازع هي ماركة YOKOHAMA اليابانية، وخصوصًا مع ظهور النقشات الجديدة القوية .. ولو أن سعرها شوي غالي، لكن .. تستاهل
وأوصيك بنوع يسمى AA، فهو من أجود الأنواع، لأن هناك أنواع أخلرى أقل منه جودة، مثل نوع AB ..

حقيقة .. أرجو أن أكون قد أجبت الإجابة الصحيحة على أسئلتك واستفساراتك ..

أخوك

[أيمن]

الأخ الكريم البري رد على موضوعك في مكان آخر .. أظنه سهوا منه ..

هذا هو الرد :

"معلومه يمكن تفيدك
اخوي الطرقي حبيت اعطيك بعض الاراء بخصوص سؤالك وهي ان تركيب جنط عريض مره يعني لامن الي مشو وراك بشفون اطرافه بشكل كبير هذا صدقني انه يثقل حركة السياره ويضل الكفر يضرب في الرفرف بس احسن شي اذا كانك مصمم ركب الجنوط الي تجي بعد حجم جنط الوكاله وجرب ولا تنسى ان ضغط الهواء في الكفرات الاربع يلعب دور .اما بالنسبه لنوع الكفرات الجيد هناك عدة انواع والي ياليت تسأل عنها علشان تتأكد من كلامي لانها صراحة تصبر على الخطوط وعلى الحصى وهي: 1_ كفرات دنلوب 2_ كفرات هانكوك 3_ كفرات بريجستون وهي ممتازه للددسن . واتمنى لك حسن الاختيار واذكرك بعدم الاتعجال والاستشاره من اصحاب الخبره قبل كل شي ."

نصا من موضع الرد

[البري]

اخوي المستشار شكراً لك على التصحيح وانا صراحه اسف لكم على هذا الغلط لانه بين علي لخبطة بين اضافة الرد والموضوع الجديد وحصل الي حصل وعموما اشكرك على نقل الموضوع مع الردور .

[الطرقي]

:) عز الله يا جماعة الخير إنك كفيتو ووفيتو ووضحتو لي الصورة كاملة

والله يديم لنا هالمنتدي الي نتعرف فيه علي هالوجية الغانمة

وأشكرم أخوي أيمن علي معلوماتك المفيدة ووالله إنها قيمة جدا جدا

وو الله إنك صادق إت المفروض أكتبه في منتدي الأجهزة والعدد :D :D بس الجايات أكثر:D :D

بس أخوي أيمن دايم يوم أطاعس أخلي الكفرات علي 12أو10 وما كنت أدري إنه فية ضرر وياليت تبين لي هالموضوع

ومن نا حيت الكفرات صحيح إنه كفرات يو كو هاما أفضل الموجود بس إنه ميب زي الكفرات اللينة:D يعني إنها كفرات تحميل تنفع لمستوبيشي:D

وكونها غالية والله ما يستغليها الواحد لأن سعرها فيها ولأنها للك وللزمن

وبعدين وش رايك بعرض 215 مع العلم إني راح أستخدم نفس الجنط مانيب مغير جنوط الموتر

وأشكركم جميع وكثر الله خيركم:D

[أيمن]

السلام عليكم

الأخ الكريم البري .. الحمد لله حصل خير .. وكل واحد يصلح سيارته ,, :D :D
الأخ الفاضل الطرقي ..
بالنسبة لما تفضلت به من استفسارك عن المشكلة في إنقاص الهواء عن المستوى المذكور في الأعلى .. فإنه وكما توصي به شركات الكفرات عمومًا، والمختصين في هذا المجال .. أن الحد الذي لا يجعل الكفر يتآكل وبالأخص جوانبه هو ما بين العددين المذكورين في الأعلى .. فإن نقص عن ذلك فهو عرضة لهذا التآكل .. لكن إجعل إنقاص الهواء عن المستوى المذكور، في الحالات الحرجة فقط ..
وكما تفضل الأخ السمح .. فإنه من المهم أن يكون في جعبت أي سيارة، وخصوصا السيارت البرية "ماطور" أو منفاخ هواء ..

وبالنسبة لاستفسارك عن عرض الكفر البالغ 215، فأظن أنه مناسب .. وبالنظر إلى كلامك أولا .. فإنك - كما ذكرت - أنك لا تستخدم موترك هذا إلا في الخروج إلى البران فقط .. فبإمكانك، شراء غير اليوكوهاما، مما تراه أنسب وألين .. فاليوكوهاما أفضل من ناحية العمر، ويقاء النقشة، وكذا لها فوائد إن كنت ممن يدخل المسافات العالية في البران، وتسلك الدروب "الجادة" والتي غالبها ما يكثر فيه ما يعدم الكفر، مما يسبب - لا قدر الله - "بنشرته" ..

عمومًا .. أمر الله من سعة .. :cool: :cool:

تحياتي

[الطرقي]

أخوي أيمن ما قصرت ورديت علي جميع إستفساراتي وإنشاء الله إني بأتوكل علي الله وأركب عرض 215

بس حبت أتأكد من شيء حتي تتضح الرؤيا لدي

أناعندي ما طور ولا أطلع من الرمل إلا وأنا تافخ كل الكفرات

بس الضرر اللي إنت ذكرت إنه يلحق الكفر نتيجة الا كون الضغط فية أقل من 14 هل يكون في حالت إني أمشي علي النفد ولا في حالت إني أمشي عل خط ولا بهن جميع

وشاكرين لك:D :D صجيناك بكثرة إستفساراتنا:D معا ليش تحمل:D ;)

[أيمن]

عافاك ربي أخوي الطرقي ..
أنا بالفعل كنت أتحدث أن الضرر في حالة الممشى الطويل في البر .. وكما قلت .. إنه لا بأس من النقصان عن الحد المذكور في الحالات الحرجة .. أما الممشى على "الخط" حالة كون الكفر أقل من المستوى أو على المستوى المسموح به في الرمال .. فهذا أمر آخر .

تحياتي

[الطرقي]

أخوي أيمن أنا كان ودي أتبين إن الحد اللي ذكرت لضغط الهواء في حالة الرمل ولا حالة عامة

وتبينت لي الصورة بفضل الله ثم بضلك

واللـــــــــــــــــــه يزيدك من علمه

وتقبل تحياتي وتقديري الشديدين

أخــــــــــــــــــوك الطرقي

[أيمن]

هلا ومرحبا أخوي الرقي ..

وعلى الرحب والسعة .. وأنا على استعداد أن أجاوب بما أعرفه ..

وكذا أنت .. أظنك على استعداد بأن تفيدني ، فيما أجهله ..

تحياتي

[ذيب الصمان]

هلا اخوي الطرقي انا وعتك على موضوع الكفرات وقابلت الرجال

ويقول خلال تجربته في الهايلكس وافضل ممشى له في الرمل وفي الخط

كفرات شاهين الجديده نازله صغير تركب في الهلكسات وهي بدون خطوط


ولا ادري عن الاعضاء عندك ملاحظات عن هذي الكفرااات ومدى جودتها بس مدحها لي مدح ما يحتاج


:confused:

[الطرقي]

مشكور ياذيب وإنشاء الله إنك إسم علي مسمي

[][اشتاق®لك][]

السلالالالالالالالالالالالالالالالالام عليكم
بالخير ياجماعه
اخوووووووي يالطرقي انا معي هايلكس م1999 ومجرب 5 طقووووم كفرات
واذا كنت تبي نصيحه اخو لخووووووه
عندك اليوكوهاما مقاس 75/215
والله انك ماتندم ولا يهون من قال 75/205
لان المقاس الى ذكره اخوي مقاس مايعيش معك لانه على طول يتشقق مع الجوانب وانت شكلك راعي بر .
وغير كذا هذي الكفرات تبي تريح السياره ولا تاخذ من عزمه انا مركبهن الحين جالسات معي لهن اكثر من سنه واقولك ترررررررى الى يشاور مايخيب وانا اخوك
واذا كنت تبي تركب جنوط مرسدس مقاس 15 عرض7 انش يركبن معك هواء ولا بعد نفس العرض المطلوب
بس اذا كنت تبي تركب مقاس 75/225 ذولي الكفرا عريضات بالحيل وانا اخوك اذا لفيت يبن يحكن بالرفارف لانهن عريضات بالحيل قبل انه يهبطن عزم الموتر .
والله يختارلك الى فيه الخير















اخوووووووووووووووكم اشتاق®لك

[أيمن]

مشكور وما قصرت يا أخ "مشتاق@لك" ..
وعساك دائمًا على القوة ..

تحيتي

[هاوي الله]

^
^
^
^

واحد متحمس للمواضيع

:D :D :D :D :D

وطفى بعدين ! :p


موضوع قديم