المساعد الشخصي الرقمي

مشاهدة النسخة كاملة : استفسار بسيط ..


أبو جاسم 97
12/09/2011, 02:48 AM
السلام عليكم ..

استفسار يا أخوان .. أنا مبتدىء في الطيور وحبيت اعرف من اهل الخبره كيف يتم تعليف الوحش .. بمعنى احطها له حيه ولا اقطعها .. وهل اضعه على يدي ..
عبدالرحمن بن ذياب
12/09/2011, 04:03 AM
أول شئ طال عمرك اعرف ان الوحش ما ياكل إلا وانت مبرقعه
يعني برقع طيرك و خذ لك نسر ( قطعة لحم ) و امسحها برجل الطير و هو مبرقع
بينزل راسه ناوله القطعه وانت تناديه باسمه و عيد عليه هـ الحركه ولا يتعدى العلف ثندوة حمامة
ولا خلصت امسح على صدره بهدوء وناده باسمه و لا جيت تشربه مويه سوي نفس هـ الطريقة
هذي في بداية ايامه معاك في ثالث او رابع يوم خذ لك حمامه حية يا طويل العمر
ورح بالطير لمكان وسيع شوي زي الحوش و اربط الحمامه في حبل و حطها قدام الطير بمسافة قصيرة
و الطير يكون مربوط في وكره و لكن طول السبب له شوي خله يتحرك مترين ل 3 امتار و فرعه
لا شفته راح للحمامه خله يذبح و ينتف شوي من الريش و روح له وانت تصوت باسمه وصوتك
يكون أعلى من الهمس بقليل يعني لا ترفع صوتك زود و انت ماشي على ركبك ويديك
وانتبه لا تروع الطير و أذبح الحمامه و طلع قلبها وقدمه للطير بيدك و خله ياكل ضعف اللي كان ياكله
و في كل يوم تزيد المسافة و تحاول انك تعلفه في الشلو طال عمرك و لا شفت الطير باله من العلف ماهوب منك
أدعه بدون سبب
ان شاء الله اني اكون افدتك
وإذا عندك اي مشكلة راسلني على الخاص
و نسمع راي باقي الاخوان
أبو جاسم 97
12/09/2011, 04:14 AM
بصراحه الناس اللي مثلك وشرواك بهالمنتدى أنا أشوف انهم مكسب كبير لمكشات ويثرون المنتدى بخبرتهم الكبيره .. الف شكر لك
عبدالرحمن بن ذياب
12/09/2011, 04:29 AM
ما سوينا إلا أقل من الواجب طال عمرك وشرواك الطيب
صالح الحنيان
12/09/2011, 06:28 AM
فادك اخونه الصقار ابو جاسم وتقبل مروري