المساعد الشخصي الرقمي

مشاهدة النسخة كاملة : موضوع مميز : شارك بطريقتك الخاصة في طبخ ....؟؟؟


حسن الخاتمة
28/01/2006, 04:23 AM
.
.
.
.
.
.
.
.
.

حيالله الربع وشلونكم وعساكم طيبين ..
اقول ولا ما اقول ؟؟:j


بصراحة حصل بيني وبين احد الأخوان :director: تحدي في طبخ الذبيحة يوم له ويوم علي في مخيم بعد الأختبارات:looney: وكل سيأتي بخروف نعيمي جذع ( الله ييسر لنا واحد مربرب قولو آمين )

المهم سويت فيه شقردي وأنا منذو سنوااااااااااااااااااااات ما طبخت ذبيحة وقبلت التحدي:good2:


لكن من زود الحرص:type: طمرت على الجهاز وكتبت ما تقرأونه

وللعلم سبق أن كسبت جولات معه في طبخ الدجاج:hot: والرجاااااااااال مقهووووووور

وسويت في فااااااهم وبعدين حصل ............ اقول لا يكثر هرجي بس المهم عطونا اللي عندكم عااااااجل:alarm:

نبي شغل احتراف رجاااااااااااااااااااااااء ( لا واتشرط بعد:j )
حركات
29/01/2006, 02:15 AM
بسم الله الرحمن الرحيم

اذا تبي تطبخ الذبيحه كامله يعني مقطع اللحم ارباع او مفطح تسوي الاتي ولا فيه اسهل منها طبعا بعد ما تنظف اللحم

تكون مفوح ماي يكفي لحمك وقدرك اللي تبي تطبخ فيه وتصقط اللحم فيه مع البهارت اللي تبي والبصل والطماط

وتخليه يطبخ لين يستوي بعدين تملحه وتخليه شوي بعد الملح بعدين تطلع اللحم وتحطه بقدر ثاني ثم تحط رزك على

مرقة اللحم

حنا في البر ما نحط زيت شحم الخروف يكفي واذا حسيت انه يبي دهن حط شوي زيت بمقلااه ودفه شوي لا تخليه يقدح

ودره على الرز وحرك الرز بشوكه كبيره عشان يتاوا الرز ما يصير شي حب وشي لين ولا تنسى علوب الفلفل الخضر اول ما تكب الرز حطهم عشان ريحة الرز تصير خطيره

وبالعافيه

واسفه على الاطاله
حسن الخاتمة
29/01/2006, 09:54 AM
ما قصرت أخوي كفيت وفيت لكن
الماي اللي في القدر أخليه حااااار يغلي ثم أنزل اللحم ؟ أو ماء دافئ ثم انزل اللحم حتى يغلي ويطبخ جيدا ً

يقولون أنها تفرق ؟؟ صحيح

طيب ممكن المقادير المضبوطة :
طماط
بصل
الملح أظن يكفي اربع مرات جمع اليد
هل اضع القرفة
والليمون الأسود
الهيل
العويدي/مسمار
يعني أضيف هالحركااااااات أو أخليه سادة :طماط وبصل وبهارات ؟ أيش اللي يضبط أكثر ؟؟
حركات
29/01/2006, 09:26 PM
السلام عليكم ورحمة الله وبركاته
بالنسبه لأسئلتك , هذي اجوبتها:
1- خل الماي فايح (يطبخ)
2- كل الحالتين زينه بس لو تحط لومي اسود وعلوب فلفل خضره يكون ازين
3- للخروف الكامل تحط طمام اكثر من عشر حبات وسط والبصل حط من اكثر من ست حبات بصل كبار
اما الملح فحسب رغبتك انت تحط وتذوق

وهني وعافيه على قلوبكم
ولا تنسونا بالدعاء



اسف على الاطاله
حسن الخاتمة
30/01/2006, 12:57 AM
ألف شكر ومما قصرت صراحة وبيض الله وجهك وجزاك الله خير
سحاب1111
06/02/2006, 11:29 AM
مشكورين وماقصرتو
راعي الزين
07/02/2006, 09:44 AM
بالنسبة للرز اذا قرب يستوي _ يعني بقى فيه شويت مويه _ يكون معك في هذي الحالة كاسة فيها موية بالزعفران وتصبها على الرز

وبعد مايستوي اغرف وشوف الطعم _ أظنك بترفع ضغطه مع القهر،ولاراح ينافسك ابدا _ ولاتنسانا من خالص دعائك..
حسن الخاتمة
09/02/2006, 08:39 AM
والله حركة خطيرة ....الزعفران ؟؟

انا احطه مع اللحم ويعطيك نكهة روعة عند تقميره على الجمر مغطى بالقصدير فوق وتحت ( بديل للفرن)
وطريقتي اني احط شوي زعفران مع كاس ماء واسخنه على النار ثم ارشه على اللحم

هل هي نفس الطريقة مع الرز؟

يعطيك العافية يا راعي الزين

وابشركم كسبنا الجولة ولله الحمد وشغل محترم وخطييير
حسن الخاتمة
09/02/2006, 08:54 AM
اذكر بعض الإظافات الراااااااائعة مثل إضافة الزعفران على اللحم طلع شئ رائع
وانتظراقرب فرصة لأضيفه مع الرز كما ذكر أخي راعي الزين جزاه الله خير

إظافة مـــــــــــــــــــــــاء الـــــــــــــــــكــــــــــــــــادي يضاف قبل نضج الرز
والله انك تدعو لي ، بشرط ان يكون اصلي ومقدار الإظافة على حسب الكمية اللتي تطبخها

خروف كامل = أربع أو خمس فناجيل كادي
الدجاج = ملعقة كبيرة لكل دجاجة
حسن الخاتمة
09/02/2006, 04:42 PM
لكن هل يضبط زعفران + كادي مع الرز كل واحد افضل من الثاني لكن ‘ذا اختلطت مع بعض وش الطعم اللي بيطلع ؟؟؟؟؟