مدري وش اللي مغري الناس بالصيد ؟؟

[حفيد اعقيل]

.
.
قلت :


مدري وش اللي مغري الناس بالصيد = هو التعب وإلا الخسـاير والانكاد


أحدٍ يفوّت ياعرب فرحة العيد = وأحدٍ يضيّع زوجته هي والاولاد
أدري شـقا لكن بالابيات تاكيد = اقولها دومٍ على روس الاشهاد
انا احمد الله عايش فرح وسعيد = ماكدره ركضٍ ورا طير وطراد
صيد الخواطر غايتي وين مااريد = تسـوى طيور الجو قمري وغرّاد


فرد الشـاعر قائلاً :


جتني بيوتٍ من خيار الاناشيد = ابيات تو اثيابهن بيض وجداد



رفع بهن صوته بشجبٍ وتنديد = ويقول طرد الصيد ياعل ماعاد
وانا انصحه يآخذ من العلم تجويد = ترا الهواية مابها سجن وقياد
والبر مابه غير كسب الاواليد = اللي لهم مع جمعة الطيب ميعاد
والصيد مابه غير طرد اللواهيد = لاجن على صدره مجاميع وافراد
والدلة الصفرا على النار تحديد = لاصار معك اجواد من نسل الاجواد
اي المدينة واي حزم الجلاميد = إن كان ابومالك من العلم يزديد


ورد الشـاعر الآخر قائلاً :

ياراكبٍ فكس آر مزيون وجديد = من مصنع اليابان موديل جداد



ألفين فوق اثنا عشر تو تحديد = اللون بيجٍ(ن) مامشى دروبٍ بعاد
سوّاقه اللي مايحب التراديد = خرّيت بدروب الصحاري والاوهاد
يلفي على رجلٍ يحب الاناشيد = ابن ..... ياشوق مزيون الانهاد
انا اشهد انه من خيار الآواليد = لولاه ماهو للمقانيص جحاد
ترا الهوى ياصاحبي جرحه يزيد = واكثر هوايات البشر دوم تزداد

احدٍ يحب الزرع ومقابل الغيد = واحدٍ يحب العلم وللخير يزداد
.

.
ونحن بإنتظار بقية المشـاغبات ..
إلى لقاء ..
.
.
.

[يوسف الخليفة1]

حياك الله أخي العزيز حفيد اعقيل

وهل الأبيات الأولى لك

[ذراع الذيب]

السلام عليكم ورحمة الله وبركاته,,
مسيت بالخير ياخوي,,

ابيات قمة القمه صحة السنتكم جميع وكلنـ يغني على ليلاه,,
تحياتي لك,,

[حفيد اعقيل]

حياك الله أخي العزيز حفيد اعقيل




وهل الأبيات الأولى لك


.
.

أشـكرك أسـتاذي على الترحيب

والأبيات الأولى نعم لي وأنت تجدني كتبت في الأعلى ( قلت )

كم أنا سـعيد بأن يشـرف متصفحي من هو على رأس الهرم هنا ..

لك خالص الود ..

.
.

[حفيد اعقيل]

السلام عليكم ورحمة الله وبركاته,,

مسيت بالخير ياخوي,,

ابيات قمة القمه صحة السنتكم جميع وكلنـ يغني على ليلاه,,


تحياتي لك,,


.
.

وعليكم السـلام ورحمة الله وبركاته ..

مسـاك رضا وسـرور ..

صح بدنك يالغالي ..

والقمة عندي هو في مثل هذا التواجد من قبلك ..

شـرفت كثيراً بذلك ..

.
.

[يوسف الخليفة1]

ما تدري ان الروح تنهج بلا قيد=سرسوح ترعا في خلاها والانجاد
والبال درهم مثل وضحا المفاريد=مفلاها زملوق السهل بين الاذواد
فيما اشتهت نفس الفتا تمشي السيد=ما حسبت في مبتغاها للاجهاد
بيضا الهوايه ما يصرّفها توريد=لو صدروها تنكس لدم الاكباد
كم صيرمي يضرب على خالي البيد=يسج رايق داغر الصيد له زاد
مع كل موسم يعطي القلب تجديد=مرباع باله مبتغا كل صياد
صفير قدره مثل حس التغاريد=حساسها باحشاه تعطيه الامداد
والصيد لو ذقته لحقت الشواريد=جرب وتلقا وارد القاله وكاد
ما يعطي الهاجس عن العلم توكيد=والعنتره ما تنسب لغير شداد
والدوم ما يثمر على عالي الغيد=والكسر ما يقوا مجاميع الاعواد
قنص المولع ما عليه المناقيد=لا صار للواجب من الدين ينقاد
العيب يسري بالردايا المساويد=اللي تنازا عن مدانقها الاجواد
كم علتن تحتاج كيّه وتبريد=وكم عافيه تتلا عوافيها الانكاد
اليا تهيّت راحة البال والصيد=والجلسه اللي فيها شيخن وقصاد
مع فوح دله من خيار البغاديد=بها حميس البن والعرن وقاد
جرب وصوف القول يابن الاجاويد=ما مثلها باجنيف والصين واتشاد
في طلحتن خضرا سقتها المراعيد=تسعين ليله غدّرت فيها الانواد
وان كان ما تبغا من العمر تجديد=انت ومزاجك قلبك لمثلك استاد
نلقا هوايات الخلايق معاديد=شعيبها في مدهل الفكر يزداد

[ريف النشاما]

مساجلات شعرية مميزة

تسلمون جميع

[imBeba]

عليكم السلام ورحمة الله وبركاته
ماشاء الله

[ضلع سلع]

ارى بيت القصيده او دعني ابالغ بيت القصائد جميعها لان هذا ما يحدث بالفعل :

أحدٍ يفوّت ياعرب فرحة العيد
وأحدٍ يضيّع زوجته هي والاولاد

نقلت الواقع ببيت شعر فياليت قومي يعقلون ، لا امنع من الوناسه وسعة الصدر وانا شخصيا كل جمعه لازم اكشت لتصفية الذهن والهروب من كبت المدينه وضغوط الحياة ولكن يوم بالاسبوع لا ضير مقابل من يقضي عند اهله يوم بالاسبوع .
قصيده رائعه بعد ماكتبت شوي من الرد رجعت قريتها ما شاء الله قصيده جزله وردود جزله ولكن هي الافضل بنظري الشخصي.