وش اطلق طريقة لعمل القهوة العربيه الي تمسك الراس صح .

[راكان الشلاقي]

شباب مساكم الله بالخير وصبحكم الله بالخير ان شاء الله

لي كم يوم وانا احوس في القهوة ولا قدرت اضبطها صح
ابيها لا شربتها ما انسى طعمها ابد

وش رايكم يا اخواني هل من مجيب ؟؟

[الساري502]

احمس القهوة وانت قاصر على النار لين تصير شقرا وطلعت ريحتها وخلها تبرد شوى وعقبها اطحنها ولقمها فى البريق وخلها تطبخ ربع ساعه بضبط وحط فى الزمزميه او الدله هيل وزعفران وشوى عويد وحليب سايل شوف اخوى اهم شى يكون الهيل توة مطحون والقهوة حلاتها توها محموسه ومطحونه يكون لها طعم

[wafi4sa]

المقادير
بن محموس اللون بني مشقر
هيل درجة اولى
زعفران ممتاز
ماء
طريقة عمل القهوة:
ضع القهوة بالملقمة وصب عليها ماء واتركها تغلي حتى يصبح لون الماء كلون البن
ملاحظة اول ماتغلي يطلع لها رغوة شل هذة الرغوة وارمها
ثم اترك القهوة تطبخ على نار اقل من هادئه
ثم اتركها تصفي ثلاث دقائق تكفي
بعدها هبش الهيل تهبيش ( دقل الهيل ) حلاة القهوة الهيل توه مهبوش
ضع قليل من الزعفران مع الهيل بالدلة البغدادية
صب القهوة من الملقمة شوي شوي
ثم حط الدلة على النار حتى تشوف الهيل يطفح فوق لا تترك الهيل يغلي بس قلبه واحدة تكفي
ثم صبها بفنجال الصين ياضريف العيال
وسلامتك
اتمنى اننى وفقت بالوصف

[ابو أمجاد]

المقادير
بن محموس اللون بني مشقر
هيل درجة اولى
زعفران ممتاز
ماء
طريقة عمل القهوة:
ضع القهوة بالملقمة وصب عليها ماء واتركها تغلي حتى يصبح لون الماء كلون البن
ملاحظة اول ماتغلي يطلع لها رغوة شل هذة الرغوة وارمها
ثم اترك القهوة تطبخ على نار اقل من هادئه
ثم اتركها تصفي ثلاث دقائق تكفي
بعدها هبش الهيل تهبيش ( دقل الهيل ) حلاة القهوة الهيل توه مهبوش
ضع قليل من الزعفران مع الهيل بالدلة البغدادية
صب القهوة من الملقمة شوي شوي
ثم حط الدلة على النار حتى تشوف الهيل يطفح فوق لا تترك الهيل يغلي بس قلبه واحدة تكفي
ثم صبها بفنجال الصين ياضريف العيال
وسلامتك
اتمنى اننى وفقت بالوصف

شرح وافي وكافي ولابعده شرح

[الاسكريم]

ماشاء الله

[هآوي الصيد]

اهم شي نوع القهوه ..

وتوزن الماء على الدله ..

[الوايلي2012]

احرص علي نوع القهوة الزينة

[ssssdiver]

راعي الفناجين الصينيه طول عمرك على الطريقه السنعه ويجعله في ميزان حسناتك.

[صخب]

ماقصروا الاخوان

واضف الى ذلك احرص قبل اضافة القهوة للماء ان يكون فاتر او قريب للغليان

لو اضفتها لماء بارد بتنقع بالماء وتزيد المراره واطبخها بعد الفوران اقل شي 10 دقايق على نار هادئه

[شيخ العبدان]

بيض الله وجه الجميع
لا غلت المويه حط مقدار قهوتك فنجال كان المبهار نصه ماء و خله يطبخ على نار هاديه 10 دقايق ثم حط الهيل يكون توك طاحنه و انتهبه لا تطيش عليك مدة 5 دقايق ثم ابعدها عن النار خلها تركد ثم زلها
وعوافي

[MNH]

لاهنتوووووو

[حب لاينتهي]

خل الماء يغلي

بعدها حط القهوه واتركها على نار هاديه من ربع ساعه إلى ثلث

وحط الهيل بالدله وزل القهوه

وبالعافيه

[لامبالي]

اهم شي الماء اللي تسوي منه القهوة
هو اللي يخرب بعض المرات طعم القهوة
وماشاء الله الشباب افادوك

[الجهنيF]

الله على الفنجال مع هجعة النــــــــــاس...... بدلال نارٍ مايبطل سنــاهـــــــــــــــا
مع حمسة يملا بهــا كل محمـــــــــــاس.. ..ويقلبــه قرم يعـرف استواهــــــــــــا
قم يافرج شبّه تر الكبد والـــــــــــــرأس ... العين اشوفه قازيه من خطاهـــــــــا
حط الجروم اللي من العام يبـــــــــــاس .... .ليـاما يطوح ضوها مع فضاهــــــــا
واحمس على جمـــر ترى ماله اجـناس..... .وكفـّه ليا منه عرقها غشــاهــــــــــا
واودع بهاره هيل ورهه بالاجـــــراس ...... ياخالط الفنجال تر هو حلآهـــــــــــا
ودقه بنجر يسمعه كل نعـــــــــــــــاس...... ولاتغلق الضبة على من بغاهــــــــــا
وصفـه وصبه تر هو الصفى بقيــــاس...... ماهو خطاة الخامل اللي طهاهـــــــا
اللي يحطه باوسط النار مرفــــــــــاس ..... لما يطير قبوها مع غماهــــــــــــــــا

[.أبوأحمد]

طيب الحين جزاكم الله خير انتم تقولون حط وحط بس نبي المقادير عشان نقيس صح وتظبط القهوة

[nyhhhh]

يالغالي عني انا وهذي طريقتي بالقهوة

1- فنجال بن هرري باشنفر غامق

2- احط الماء بالمجرك وخلي الماء يغلي

3- احط البن مقدار فنجال ونص ملعقة صغيره عويدي بالمجرك

4- لاطلعت الرغوة ارمها ووطي النار وخلها تطبخ حول 30 دقيقه ومرات 40 دقيقه لين ريحة المطبخ قهوة هههه

5- اطحن الهيل وحطه بالدله او ثلاجة القهوة

صب القهوة بالدله وبالعافيه

[.أبوأحمد]

يالغالي عني انا وهذي طريقتي بالقهوة

1- فنجال بن هرري باشنفر غامق

2- احط الماء بالمجرك وخلي الماء يغلي

3- احط البن مقدار فنجال ونص ملعقة صغيره عويدي بالمجرك

4- لاطلعت الرغوة ارمها ووطي النار وخلها تطبخ حول 30 دقيقه ومرات 40 دقيقه لين ريحة المطبخ قهوة هههه

5- اطحن الهيل وحطه بالدله او ثلاجة القهوة

صب القهوة بالدله وبالعافيه
وفقك الله
بس 40 دقيقة جدا صعبة لان اذا جاك ضيوف او شي ودك تعجل عليهم بالقهوة والقدوع

[bzlol]

٤٠ دقيقه بتطلع القهوة مر علقم القهوة لا تتعدى ربع ساعه ولا تنقص واهم شي النار واطيه ولا تشتري الا قهوة نوع ممتاز خولاني اطيب شي

[1980]

انا اعطيك الطريقه اللي مابعدها طريقة.

خل الموية تغلي،،. وبعدين هات كوب حق شاي. وحط فيه شوية سكر. وحط عليه حبة شاي ليبتون. وكذا راح تكون امورك في السليم.


ولو جاك ضيف. هات له عصير ربيع من الدكان وخلاص.




زمن ام رقيبه. انتهى خلاص

[1980]

دعابه دعابه. لكن القهوه العربية كلها زينه باي طريقه عملت. لاتدقق كثير.

[المهاجر انا]

الهيل طيب بس اذا ما طحن زين تراه يشرق
قدام عيني واحد شرق وبغا يروح لولا رحمة الله ثم ضربه من الخلف لين طلعت حبات الهيل
انا واعوذ بالله من كلمت انا افضلها بلمسمار فقط

[1980]

طيب المسامير مو ممكن تسوي مشاكل او شي للمتقهوى؟؟

[سايلنت ايجل]

طريقتي في عمل القهوه كالتالي
طبعاً لازم تكون القهوة موزونه مع الماء ويوجد معيار للقهوه السودا للكوب الواحد اللي هو 7 غرام تقريباً لل200 مل تقريباً وهذا للقهوة السودا لكن جربته على القهوة العربيه وكانت النتيجه ممتازه
وعدلت في الوزنيه واستقريت عليها طبعاً اذا كان بتسوي لتر قهوة وهو غالباً
واللتر الف مل
طبعاً بما إن عندي الف مل يعني راح احط 5 ملاعق ممسوحه وهذا مهم
القهوة نوعها خولاني من الرفاعي قهوتهم تعجبني بصراحه وطبعا ما تكون مطحونه انتبه لاتطحن القهوة الا اذا بغيت تسوي لك دله خذ اللي يكفيك واطحنه لان لو انطحنت القهوة مع مرورالايام تخف نكهتها وريحتها
ودرجة الطحن لاتكون ناعمه جداً تكون درجة 8 تقريباً او اطحن واوزن انت بس لاتكون ناعمه اهم شي
بالنسبه لطريقة العمل من المهم ما يكون الماء مغلي والسبب عشان تاخذ راحتها القهوة وتتعزز النكهة اكثر في الماء
طبعا بدون اضافات قهوة وماء فقط
وتنتظر حتى تغلي اول ما تغلي ننقص النار على اقل شي وانتظر ربع ساعه ولا ننسى نزود الماء من البدايه يعني بدل ما نحط لتر نحط لتر وربع عشان عملية التبخر ناخذها في الحسبان
وبعد كذا تشيل القهوة من النار وتحطها على جنب وخلها تهدا وتنزل براحتها في قاع البراد طبعا في براد القهوة لان باقي نصفيها
بعد ما تهدا وتنزل في القاع نحط هيل وزعفران في الدله او الثلاجه شريت زعفران الكيلو ب14000 ريال
انا اخذت 10 غرام ب150 ريال
والهيل من النوع الهندي الفاخر
تحط الهيل والزعفران وتصب القهوة واذا صبيت القهوة في الدله او الثلاجه لا تشرب على طول انتظر 5 دقايق خل الهيل الزعفران ياخذون راحتهم وتتعزز نكهتهم وبالعافيه عليكم وسلامتكم

[1980]

الزعفران ابو ١٤٠٠٠ الف هذا وش نوعه. وش اسمه ومن وين،،، وليش ب١٤ الف

[داموك 1]

طيب الحين جزاكم الله خير انتم تقولون حط وحط بس نبي المقادير عشان نقيس صح وتظبط القهوة

ياابو احمد والاخ راكان حياكم الله
ماقصروا الشباب وضحو كل شي الله يعطيهم العافيه والباقي يتوقف على مزاج الواحد هل يبي القهوه
خفيفه او وسط او ثقيله لما يحمسها ومقاديرها حسب حجم معاميله وكمية الماء اللي يحتاجها فاذا قلنا
لترماء نضع له فنجال قهوه وهيل وكم راس عويدي وكميه بسيطه من الزعفران ومع الغليان ينقص الماء وتبدا تتركز المقادير وانت وخبرتك تحكم على قهوتك هل كل شيء مضبوط وايش اللي تقول انك زودت
او نقصت فيه من درجة الحمس او العويدي او الزعفران او كمية الماء او الهيل ثم تبدا بعد ذلك في
ضبط الكميات حنى تسير قهوتك على كيفك ولما يشرب المسير الفنجال يبادرك بقوله
ياما حلا الفنجال من ايد ابو احمد مزعفر يلصق على الصين ساعه
لا واجد نقص ولا قليل زيد مثل الدواء للداء وافق نفاعه