استفسار بخصوص اماكن العبور الكــــويت

[مشاري الهذيل]

السلام عليكم ورحمه الله وبركاته


ارجو الافاده بخصوص المنطقه الافضل في العبور لطيور الحرار والشياهين في الكويت

كلنا نؤمن بأنه كلن ونصيبه وكلن ورزقه ولكن ودك تتعب في منطقه معروفه ويستاهل الواحد يتعنا بها ارجو الافاده يا طواريح الكويت

والله الهدف اني بتمشى بمنطقه يمر فيها الطير والشيهانه وجميع طير جارح منها اتسلى ومنها ان الله كتب لي نصيب الحمدلله

ارجوووو الافاده انا اعلم انه في كل مكان يمر الطير والدعوه ارزاق ولكن سؤالي واضح ابي منطقه وحده فقط اللي هي الافضل

[راعي هباش]

اتعب علا كسارت الكيماوي شمال لين الدواجن علا الدشاش هذا ولله اعلم×

[قرناس الكويت]

السلام عليكم


يا مشاري الهذيل .. والله ياخوك انا بعلمك
من عرفنا عبور الحرار والشياهين ..

ذكر طرحهم دايم ( بالصبيه ) وخصوصا ً ( بحيث )
هالمنطقه قريبه من جزيره بوبيان .. وبينك وبين ايران بحر
يعني الحرار تجي من ايران أقرب مالها .. منطقه بحيث .. والله أعلم

والله يرزقك ..

[عبرود الشمالي]

سلام عليكم ورحمة الله وبركاته

حسب الخبره علي البحر من صوب جزيرة بوبيان &&& وذا تبي تبع وفروخ شياهين من كليو 60 علي طريق السالمي الي حد شقايا علي ابرق الحباري لان في المنطقه طريق عبور الجميع انواع الطيور الي تعبر علي الكويت فالوقت الحالي ^

وشكرن

ووووتقبل مروووري

[ALAMIR]

احرص على الرتقه و الأبرق

واسال الله رب العرش العظيم ان يرزقك بالنادر ويرزق جميع المسلمين

[فهد الدقباسي]

المنااااااهيل كل سنه ينطرح فيها

والطير ابو 18 الف طرح المناهيل وانا بنفسي طرحت فيها شيهانه وافيه 15 ونص اب15ونص وطرحتها بنص شهر 10 وماجاب قيمتها وراح للشيخ من شيوخ البحرين

بالمناهيل

[مساح الريضان]

ياخوك اذا بتمشي وبتغير جو ومكان عبور عليك بالصبية تشرح الصدر ومكان عبور وعسي الله يرزقك بالنادر

[الكعمي]

أخي الكريم الكويت كلها عبور خصوصا المناطق الشماليه مثل ماذكروا الاخوان والله يوفقك ويوفق الجميع

الكعمي----------------

[راعي مرعوب]

عليك بالصبيه وبوبيان
والله يرزقنا وياكم بالخير والامطار

[شاهين2]

الله يرزقك النادر
الكويت كلها معبر وركز علي الصبيه واللياح والكسارات
يقرب لك احمد الهذيل؟

[مشاري الهذيل]

بيض الله وجيهكم كلن بأسمه وعسى الله يرزقكم بالحلال الطيب

والدينكم للجنه

اخوي فهد الدقباسي انا صارلي تقريبا 3 سنوات اسمع بناهيل السالمي ولا ادري هي وين بالضبط

مره كنت بصفاه الجهراء اشتري غنم والا ذيك العجوز قالت ياولدي انت تشتري بالجمله ليه ماتروح مناهيل السالمي يبيعون اهل الغنم هناك فما ادري من يومها وانا افتر ادور المناهيل سبحان الله ماحصلتهم

ولو اني لما افتر بالبر اشوف مناهيل واجد بس مادري هي المقصوده والا لا

السؤال الحين المناهيل وين ابي شرح

[فهد الدقباسي]

اخوي ثاني لفه يمين عند الارتال امش مع القار الين يميل لمه تشوف الزباله اكرمكم الله لف قبلها

في سكه امش معها الين تدش بالكساره اول ماتدش بالكسار اخذ يسار الي توصل عند برقيه

عنندها شاليه وخيمه

طوف الزبر وخل الشاليه وراك وكمل اليين تقلقى تيول هذي المناهيل

من البرقيه اليين التيول لاكن لازم تنوع بالامكنه يوم المناهيل ويوم الدواجن بس الدواجن مانصحك تروحلها لانها

زحمه والصبيه هم زحمه المكان هذا بتلقه في لانه كل زباير وكل سنه ينطرح فيها طير

[بواحمد2008]

اول شي بعد السلام اتمنى من الله ان يرزقك ويرزق جميع مسلم اللهم امين ,ثانيا الكويت كلها خط عبور والسبب صغر المساحة وجغرافيتها على خط العبور فعلا ,قصة العجوز عجبتني هههههه الله يوفقك ,
اخوك ابو احمد

[مغاتير]

عليك بالصبيه وبوبيان
والله يرزقنا وياكم بالخير والامطار
ماقصرو الاخوان لاكن افضل ماكنين عطاك العلم
والسبب كله علي البحر وقريب من العراق وايران
يعني حرار وشواهين والله يوفقك ويرزقك بنادر