ابي حل ؟؟؟؟؟؟؟

[راعي الاحمر]

السلام عليكم ورحمة لله وبركاته يا جماعة الخير انا صقار مبتدى و ابي فزعتكم ابي اعلم الطير على الملواح كيييييييييف و ابي اهده على حمام

[راعي لادن]

عليكم السلام ورحمة الله وبركاته اخوي أولا انقل الطير على يدك اوعطه نسير لحم فري حار علمه ينقز من الوكر الى يدك ونت لابس الدس أومن ثم اربط فريه او حمامه في التلواح اوخله على الوكر ودعاه من مسافة متر او كل يوم بعدله شوي لاتخليه يأكل واجد شي بصيط بس العمليه تحتاج صبر

[راعي الاحمر]

مكور اخوي على افدتك

[راعي الاحمر]

مشكور
*******

[اقدم صقار]

السلام عليكم
اخواني عندي طريقه تعليم الطير للملواح (الشلو) والله اعلم
اخواني الملواح طريقته سهله بس تبي انتباه شوي
وهي تنسرد في نقاط موظحه ادناه .
1ـ يكون طيرك جاهز يعني ينقز على الدس وهو فاضي (بدون علف) ومدهله مره مافيه نسبة وحاشه وهذي اهم نقطه
2ـ تكون مجوع الطير لمدة 24 ساعه
3ـ يكون الملواح معك وفيه فريه حيه في يدك اليمين ويكون داسه عن الطير لا يشوفه
3ـ يكون الطير على يدك اليسار ومفرع وانت جالس ولا يشوف الملواح وخل جرير الطير طوله متر ونص
4ـ احذف الملواح من تحتك ولا يكون بعيد (على بعد متر واحد)
5ـ بيدوم الطير على الملواح وخله يذبح الفريه ولا تستعجل عليه وخله ينتف عل راحته وياكل شوي مع الصايح وتنده الطير باسمه وبعدين اقطع الرجل من الفريه الميته ونقز الطير على يدك واخف الملواح وراك وبرقع الطير على طول
6ـ ملاحظه مهمه لا تستعجل على عشى طيرك وانت في المدعا لانه يتعود اذا عشيته على الملواح وقطعته من العشى لو ليله يكافخ يبي العشى ربما فيما بعد تبي تهد على اي صيده او حمامه من حمام خوياك في المدعا الا طيرك معشاء انسره نسير بس الرقبه والقلب وراس الصافق .
7ـ من اليوم الثاني زود المسافه مترين للملواح ونفس الطريقه والتصرف مع الطير لمدة 7 ايام .
8ـ بعد اسبوع خل احد يهد لك الطير من يده وهو واقف من مسافة 10 امتار واذا جاك الطير عطه الملواح على طول لا تفلسه(لا تسحب الملواح) لمدة يومين مع مراعات السابق (لا تعشي) .
9ـ نفس المسافه السابقه ولاكن اسحب الملواح اول ما يجي الطير ولوح فوق مع صياح للطير واذا راح الطير ورجع اسحب مره ثانيه واذا رجع الثالثه عطه الملواح مع نفس مراعات ما سبق ذكره (لا تعشي) .
10ـ في اليوم التالي اسحب الملواح لخمس او ست مرات مع الصياح للطير باسمه وبعد ذالك عطه الملواح مع مراعات ما سبق ذكره (لا تعشي) .
11ـ في الايام الباقيه زود عدد مسح الطير للملواح (ملاعب الطير) واذا شفت الطير يبي يجنب عطه الملواح على طول( بحذف او رمي ) الملواح بعيد عنك وراس السبب في يدك وعط الطير عليه مع مراعات ما سبق ذكره (لا تعشي ) .
12ـ اذا تعدى الطير وخاصة الشيهان 20 مره على الملواح عند ذالك عطه حمام منتف من ريشه ( الغواطي او الخوافي ) وخل في الحمامه 6*6 وهد طيرك عليها ولا تستعجل على الطير اذا صاد الطريده وخاصة اثناء الصقاره لانها تبقى صقارتك وبصمتك في الطير اما الحرار خل 4*4 او على حسب جناح الطير اهم شي تشوف ان الطير بيلحق الحمامه يعني لا
( تفلسه ) ولا احد يقول لا معليه بيلحق !!!
11ـ بعدين كل يوم هد اقوى شوي بحاجه بسيطه ولا تستعجل على الحمام القوي لانك اما ملعت طيرك او افلس وخرب طبعه .
12ـ ملاحظه مهمه :انزل للطير والوكر معك واذا جيت الطير وهو على حمامته لا تنطحه ولا تقفاه ولا تكون مستعجل امش بشويش عشان يتعود الطير ولا تكون واقف وانت قريب منه اقل شي مترين بعدين اجلس وانت في جهة جنب الطير ولافظل جهة الطير اليمنى لانك بتستخدم الدس في اليسار وازحف للطير اذا شفته ينتف او يذبح وصح للطير واقرب شوي شوي وبعدين اربط سبق واحد فقط ويكون الموالي لك القريب لك عشان ما يلتف السبق في الصيده خل للطير مجال وخله يذبح وينتف وياكل من طريدته شوي وبعدين امسك الجنحان وانت مطمن راسك على مستوى الطير واسحب كل واحد في اتجاه ونظف الصافق اللي يجيك ( ما يكون الطير ماسكه لا تسحبه من الطير بقوه ...سايسه) ونقز الطير على يدك بعد ما تعطيه القلب او تدل الطير عليه ( باخفاء اللحم من الطير بالدس ويدك اليمين واظهار منطقة القلب ) ولا تكثر عشاه لتلاشي العيوب السابق ذكرها
13ـ لا تستعجل اذا اردت هدد الطير مره ثانيه على حمامه الا اذا شفت الطير مريح مره عشان ما يترك الصيده من التعب وياخذه طبع .
14ـ اتمنى اني سردت ماهو مفيد للجميع واسف على الاطاله واذا فيه اي ملاحظه من احد الاخوان او اي استفسار يامر امر
15ـ خل عشى الطير في موقع اسقرارك (البيت او الاستراحه) لان ما ودك تحرك الطير وهو متعشي ولا يصلح ان الطير ترجه السياره وهومتعشي .
ان اصبت فمن الله وان اخطأت فمن الشيطان
واذا شفتو الموضوع يستاهل التثبيت وملم بما هو مفيد ثبتوه
وسامحوني على القصور
اخوكم ابو منصور

[راعي لادن]

مشا الله عليك انت فعلا اقدم صقار الله يعطيك العافيه

[اقدم صقار]

مشا الله عليك انت فعلا اقدم صقار الله يعطيك العافيه


هلا بك اخوي راعي لادن وشهادتك اعتز فيها وشرف لي ولاكن فيه افضل مني والاسم ما يعنيني شي وعسى الله يعينني على مافيه الخير

[راعي البرقا]

ماقصروا الاخوان افادوك وخصوصا اخونا اقدم صقار جاب العلم وافي راعي العوايد والله يجزاه خير وفالك التوفيق