المساعد الشخصي الرقمي

مشاهدة النسخة كاملة : هل يستطيع الوكري صيد الكروان ؟؟


بو عزام 2011
26/09/2011, 01:27 PM
السلام عليكم

انا عندي ثلاث اسئله عن الوكري اولاً : هل يستطيع الوكري صيد الكروان ؟؟

ثانياً : ما هي مواصفات الوكري هل هو سبوق ام لحوق ؟؟

ثالثاً : ما معنى كلمة طراد ؟؟

و ارجو من الشباب الرد السريع لا هنتو والله اوفق الجميع
راعي ضويانه
26/09/2011, 01:29 PM
اولاً : هل يستطيع الوكري صيد الكروان ؟؟
ايه وبعضها يصيد غرانيق وحباري على شوف عيني


ثانياً : ما هي مواصفات الوكري هل هو سبوق ام لحوق ؟؟
والله سبوق ولحوق كلها نفس المعنى لكنها ماهي ميزه فيه لكن بعضها سبوق


ثالثاً : ما معنى كلمة طراد ؟؟
يعني يطلب الطريده بكل حالتها سواء سريعه او مرتفعه


اتمنى اني افدتك
جزاء الشمري
26/09/2011, 01:31 PM
ماقصر راعي ضويانه معلومات قيمة
مغاتير
26/09/2011, 01:33 PM
معني كلمة طراد
هو الطير الي يستخدمونه الطواريح لتنزيل الطير الاخر
اذا شبكوه وطاره يهد عليه الطراد
واغلب الوكاري طراد وشواهين
بو عزام 2011
26/09/2011, 01:41 PM
مشكورين على هذا الرد السريع و ما قصرتو و الله ازيد من امثالكم
عبدالرحمن بن ذياب
26/09/2011, 01:48 PM
فادوك الاخوان و الطراد هو إحدى طرق شبك الصقور و هي تعتمد على تربية وكرية ل هـ الشغلة
و أفضلها الوكارى السودانية و تحياتي لك
مدهل الطير
26/09/2011, 01:53 PM
الوكري طالع عمرك من احقد الطيور على الصيده وانا ممنن صقرالوكري طرحت به طيور كثر واخرها العام طلع على حبارى وصادها .وميزته اذا تعلم الطلع خلاص ارقد,,, طلعه حقاق. لاكن قليل منها اللي يلحق .وهذا عن واقع تجربه معي ومعا من عرفتهم.
راعي البرقا
26/09/2011, 02:00 PM
ماقصروا النشامى بالاجابات وبالنسبه للوكارا والسمقان انا اشوف مالها دخل بنوع الطير لان الطيور تختلف بالطبايع والفعل ولو ان النوع واحد وبعض الوكريات ينومسك والطيور عموما من حرار وشياهين ووكريات مثل الاوادم فيها اللي ينومسك وفيها اللي يغثك وفيها الصامل وفيها ميت الحيل وهذا من رأيي وفيه اللي اخبر مني والله يوفقك
بو عزام 2011
26/09/2011, 02:08 PM
مشكورين على الرد الطيب


ولكن كيف اعلم طيري على الكروان؟؟
درب المحبه 8
26/09/2011, 02:50 PM
جبله دجاجه بلون وحجم الكروان ولو اكبر عادي ونزل الطير شوي وفرع عليه اذا هد عليها فصيل ابشر بالكروان واذا ماهد حاول انك تحد الطير عليها خذلك صافق حمامه وحطها بين جنحان الدجاجه وخل الطير يجود الدجاجه وينسر من صافق الحمامه شوي لما يفهم انها فريسته وبعدها برقعه وحاول تهده من مسافه ابعد شوي واستمر علا هالطريقه لما يذبحها ويهد عليها من بعيد وخله يعلف منها براحته

بالتوفيق
مخلاب خامس
27/09/2011, 01:46 AM
السلام عليكم ورحمة الله وبركاته
يقول المثل اطيب الطيور وكري وارداها وكري
مع العلم ان من اول يصقرون الوكري بشكل كبير لصبره وجلادته
والسبق في بطن الطير وكري او غيره لكن المتعارف عليه ان السبق فيه مب ذاك الزود ولكل قاعدة شواذ
وبالنسبة لصيده للكراوين مافي شي يمنعه من صيد الكراوين
وفيه ميزة في الوكري انه الغالب تلقاه صايد الثلاث حبارى وكروان وارنب
وطراد معناه انه يستعان به في شبك الطيور وهذا من جسارته يعني يهدون على الطير الوحش وهو يعلف او في يده نقل اللي هو قطعة من الريش
والشجاعة معروفه في الوكري
والسلام ختام اتمنى اني قدمت شي يفيدك ويفيد الجميع والخطا وارد وشكراً
اللهم صلي على محمد