مطلوب افضل ورشه صيانه تويوتا ..!!

[الساهر2003]

السلام عليكم ورحمة الله وبركاته

الله حي اخواني اعضاء منتديات مكشات ,,

انا عندي الجيب المبروك الي في التوقيع ( جيب GX 2005 ) ودي اسوي له صيانه كامله من و الي ..

ابغي ورشه شغلها حلو ويكون ذمه اهم شي , وان حصل سعر حلو خير وبركة

طبعا موقعي الرياض وودي اسوي له تشييك كامل على كل شي ,,

قلنا مالها الا اهلها اهل مكشات والله يعيينكم علينا .. :D

[يالبى الهلا]

يستاهل المبروك عندك المقصات الاماميه الاتغيرها بالكامل غير الجلب بس والايقولك ماتجي الابالمقص كامله كذاب بعيد عنك انا مغير الجلد وما كلفت علي شئئ كذلك الاعمده الخلفيه مغير الجلب فقط وجلد البدي الاتغيرها فقط شد عليها

[الساهر2003]

هلا بك اخوي يالبى الهلا وبيض الله وجهك ع المرور والافاده ,,

بالفعل انا ابغي ورشه شغل نظييف ومايكون فيها غش واستعباط في الصيانه

[Messerschmitt]

يا هلا والله ومرحبا

شف يالغالي

خبرتي باللاندكروزر ( خصوصاً الهدد ) تمتد لاكثر من 17 سنه

لاني مشتري هدد موديله 94 ولا يزال معي .

اذا تبي شوري ونصيحة اخويه

لا تسوي له صيانة ابداً دامك ما تشتكي من مشاكل ( الحرص الزايد احيانا مصيبه)

لانك اذا دخلت بوه الورشه من اول مره عز الله انك تبي تبتل تدخل بوه

مثل منت عارف ما فيه احسن من قطع المصنع , وابو جميل ما يجيب لك نفس جودتها

بسبب سوء التخزين ومدة بقائها بالمخازن واختلاف شركات الانتاج.

عشان كذا خله بلد يا حبي لك , ما راح يطلب منك شي بإذن الله دامك ما تجور عليه .

وأخيراً , عز الله ان الموتر وقفة

ما شاء الله تبارك الرحمن

الله يطعمك من خيره ويكفيك شره .

[الساهر2003]

كل الشكر اخوي Messerschmitt على المرور والافاده ,,

والله وانا اخوك الموتر من فتره وانا مستنكره فيه اصوات خفيفه خصوصا في الخط وبعض الاوقات يجي فيه مثل النفضه يتفتف .. وودي اشيك على اذرعته ومساعداته لانه ماشي واجد معي وحبينا ناخذ شوركم

[ابوراكان تبوك]

اولاً افحص بطن السيارة اذرعه مقصات - جلد مقصات - ومساعدات - عكوس - و ركب واعمدة الدوران وتشحيم حراري هذا اهم شيء كلها من عند مكان واحد اي محل ميزان تثق فيه
ثانياً غير البواجي وفلتر الهواء
باقي الامور تربيط ووزن بودي على حسب حالة السيارة اغلبها بنفسك تقدر تسويها

[N255]

اذا بالقصيم بدلك علي واحد ممتاز لجميع سيارات التا يو تا

[Messerschmitt]

دام الدعوه كذا يا خلفهم اجل انصحك بميزان العضيب الخاص باللاندكروزر

تلقاهم بالصناعيه القديمة, يفحص لك المكينه بالكمبيوتر

ويشيك لك على الرّكب والاذرعه ويفحص لك العكوس

وان شاء الله مضمون

[الساهر2003]

بيض الله وجيهكم وبالفعل الواحد في هالمنتدي يحس انه بين اخوانه وربعه ,,

وان شاء الله اني نويت امر ع العضيب اللي عندنا في المصيف اليوم والله يكتب لنا ولكم الخير وبيض الله وجيهكم مرة اخرى

[Messerschmitt]

ياليت تعلمنا النتايح يالذيب

[الساهر2003]

هلا والله ومرحبا ..

اسف ع التاخير والحمد لله الموتر الان معي له يومين والامور ان شاء الله تمام ,,

طبعا الصيانه شملت بطن الموتر من الصدام للصدام ,, من جلد واذرعة وتوازن ومقصات حتي صوفة الدبل والقير واخر شي سوينا ترصيص ارضي ,,

ماشاء الله الان الامور طيبه باقي بس اغير البواجي والفلاتر من برا لانهم قالو بنسوي لك تصفيه كامله للمكينه بـ 800 ريال وقلت مايحتاج انا اسويها برا ,,

دعواتكم لنا بالتوفيق ,,