راعي العجراء ورخصه القياده

[راعي العجراء]

السلام علاكم ورحمة الله وبركاته



اليكم سالفة راعي العجراء ورخصة القياده (السواقه)



قبل سنين يعني من اربعين سنه وحولها رحت للمرور ابا اطلع رخصه قياده وكان الاختبار للسواقه خلف مبنى المرور بالناصريه توقف بالسياره عند الباب الجنوبي ثم يركب معك اللي يختبرك ويحرك المرأيه براسه ويخليها تميل اوما يسكر الباب زين ويقول تحرك والا يصرخ بصوت عالي وقف وقف
اويشر بيده على اليمين ويقول لف يسار ياهوعليه حركات نصف كم
وانت ماغار يدك على قلبك ماتدري وش يقول لك تجيك أم الركب وأم تسع لعبة الشيبان من اول وام جنيب في ساعة واحده من الروعه تشيب عينك وانت تحتري النتيجه لايق او غير لايق وانا ماغار ناشف ريقي لو تصب بحلقي وايت ماء مارويت من العطش علما بأني اسوق من ثلاث سنوات ولم يحصل لي ان صدمت اوحكيت حتى برصيف
المهم دخلت الاختبار للسواقه ونجحت واعتبرت نفسي حضرت الدكتوراه
ويوعدوني عقب صلاة الضهر اخذ الرخصه المهم مارحت قعدت عندهم من الفرحه اخيرأ
جاء الفرج وهم ينادون على الاسماء الا واسم راعي العجراء معهم وانا اروح واخذ الرخصه وامشي من عندهم وانا ماغار اناضر فيها مره ادخلها في مخباتي ومره اطلعها واتفرج علاها
المهم رحت للسياره وانا امشي على الرصيف واطلع الرخصه من مخباتي واقعد اطالع فيها
الا وماسوره لوحه مكتوب عليها عدم استعمال المنبه مدري ممنوع التجاوز وانا اصفق فيها الا والرخصه شوي الاداخله بحلقي ولا بالجبهه صعرور ازرق قلت مايخالف كل شي لجلك يهون ولجل عين تكرم مدينه
اخذتها وانا اركب السياره واجيك رايح للبيت بالشميسي وصلت تقاطع الخزان مع العصارات وقفت عند الاشاره وانا اطلعها واتبرقها شوي واعطيها بوسه واشوف صورتي واعطيها بعد بوسه المهم ولعت الاشاره وانا ادخلها في مخباتي وامشي بالجهه الثانيه فيه دباب المرور كبر الجاموسه المصريه مستعجل يبي يقطع الاشاره والخط لي والرخصه في مخباتي ويبني اوقف انا شفت دباب المرور قلت خلاص معي رخصه بس مدري بيروح طوالي والا بيلف يسار المهم يوم شفته قريب لي تبرجلت وادق فرامل وهو يدق فرامل الاوالدباب متزحلق هو والسواق الدباب راح وقطع الشارع وضرب بالرصيف والرجال مثل اللي يتزحلقون على الجليد
وانا اوقف ورجليني ماتشيلني من ام الركب يالله فال خير انا وهالرخصه اول صفقت وانا على رجولي لوحة المرور وبالسياره تسببت في دبابهم وانا انزل واروح يمه سلامات قال الحمدلله ماجاني شي وانا اللي اخطيت علاك انا قلت ابلحق على الاشاره ولا امداني علاها اوديك مستفشى قال لا بس خلني اشوف الدباب وش جاه قلت انت تبا الرخصه تشوفها قال لا روح لهلك قلت سم وابشر
قلت خلني اوريك الرخصه قال ياخوي روح مابا منك شي قلت له اجل السلام علاكم
بس اللي قاهرني اني رحت وهو ماشاف الرخصه
انتهت السالفه وارجوا ان تكون اعجبتكم
وفي النهايه
سبحانك اللهم وبحمدك لااله الاانت استغفرك واتوب اليك


اخيكم راعي العجراء

[النبهاني]

وعليييييييييييييييييييييييييييييكم السلام ورحمة الله وبركاته
اولا اشكرك على عدولك عن الاعتزال
ثانيا اشكرك بعد على جبر الخاطر بالاستمرار بالسوالف ماركة ( سوالف راعي العجراء )
( قال لا بس خلني اشوف الدباب وش جاه قلت انت تبا الرخصه تشوفها قال لا روح لهلك قلت سم ابشر
قلت خلني اوريك الرخصه قال ياخوي روح مابا منك شي )
وانا اقول يا أخي راعي العجراء يعطيك العافيه على هالاسلوب الفكاهي الفريد المميز
لاتحرمنا منه الله لايحرمك الجنه

[قوافي ( أم نهار )]

حياك الله اخوي
حيا الله الابداع المتواصل
كل هالفرحه وهي رخصة سياره اجل لو طياره وش كان صدمت فيه
اولها لوحه واخرها الطامة الكبرى رجل الحكومه واهم شي حلال الدوله الدباب
على العموم خطاك الشر
اسعد الله كل اوقاتك بالمسرات مثل مااسعدتنابقراءة هذي السالفه المميزه
تحياتي.اختك
..قوافي..

[أبوعابد 22]

هههه راعي العجراء فرحان بالرخصه اجل
والله وانا واخوك انا اول ما طلعتها أشطف النقط ابيهم يقلون وين الرخصه
ابي اجربها ولا احد قالي وين رخصتك مغير الاثبات والاستماره
واما اول قبل لا أطلع الرخصه اول شي يسأل عنه هو الرخصه

[رجل من أقصى المدينة]

أنا أشهد انك راعي عجرا والنعم. والعسكري ما قصّر....
بس لو انه كمل جميله وشاف الرخصة يا أخي.

[محمد الدوسري ٢٠٥]

@اضحك الله سنك ياراع العجراء@

[مغامر بحر]

انت جميييل جدا يا أخي
بارك الله فيك وطول الله عمرك على طاعته
تحياتي : مغامر بحر

[صقر نجد99]

وعليييييييييييييييييييييييييييييكم السلام ورحمة الله وبركاته

ههههههههههههههههههههههههههههههههههه

من اولها ماصوره ودباب

الحمدلله على السلامة

[راعي العجراء]

وعليييييييييييييييييييييييييييييكم السلام ورحمة الله وبركاته

اولا اشكرك على عدولك عن الاعتزال
ثانيا اشكرك بعد على جبر الخاطر بالاستمرار بالسوالف ماركة ( سوالف راعي العجراء )
( قال لا بس خلني اشوف الدباب وش جاه قلت انت تبا الرخصه تشوفها قال لا روح لهلك قلت سم ابشر
قلت خلني اوريك الرخصه قال ياخوي روح مابا منك شي )
وانا اقول يا أخي راعي العجراء يعطيك العافيه على هالاسلوب الفكاهي الفريد المميز

لاتحرمنا منه الله لايحرمك الجنه


هلابك يالنبهاني والله يمسيك بالخير
اشكرك اولا على شعورك النبيل نحو راعي العجراء
وعمته منيفه وتراها تسلم علاك
والبارح ماغار تسوي ملح بارود وتكثر الكيله بالمقمع مدري شنهي ناوية عليه
الله يجيب العواقب سليمه شف عاد وشهي ناويه
بس عساها تنتحر ولا تبلشنا بخلق الله
بس الحق علاها وتزوجها يالنبهاني وفكنا من اللي يراسها
ومالك الا اجر فيها وبورعانها السبعه اليتمان

[راعي العجراء]

حياك الله اخوي

حيا الله الابداع المتواصل
كل هالفرحه وهي رخصة سياره اجل لو طياره وش كان صدمت فيه
اولها لوحه واخرها الطامة الكبرى رجل الحكومه واهم شي حلال الدوله الدباب
على العموم خطاك الشر
اسعد الله كل اوقاتك بالمسرات مثل مااسعدتنابقراءة هذي السالفه المميزه
تحياتي.اختك

..قوافي..


هلابك ياقوافي وحروف الجمال والمعاني
هلابك يامن تكتبين وتبدعين
في كلمة تكتبينها باسلوبك الجميل تضعين لك عشاق لهذه الكلمه
فمرحبا بك ياقوافي الحرف في متصفحي
فشكرا لك من الاعماق
والحمد لله اللي جت طيحت دباب ماهيب طيحت اتريلا
تحياتي

[ابو زنعاف]

الله يعطيك العافيه ياخي راعي العجراء استمر على هاذى المنهج واسعد الله ايام وايام الجميع

[ابو زنعاف]

اسف قصدي ايامك

[ابو زنعاف]

صرت مثل طاش معاد نقدر نفوت قصصك الله يسرك

[راعي العجراء]

هههه راعي العجراء فرحان بالرخصه اجل
والله وانا واخوك انا اول ما طلعتها أشطف النقط ابيهم يقلون وين الرخصه
ابي اجربها ولا احد قالي وين رخصتك مغير الاثبات والاستماره
واما اول قبل لا أطلع الرخصه اول شي يسأل عنه هو الرخصه

هلابك يابوعابد
وبعدين ليه ما افرح بالرخصه
يااخي اول قبل مايكون معي رخصه وسرعتي معقوله
لااقطع اشاره امسك يمين واحترم المارين
واعرف ان القياده فن وذوق واخلاق
ومن يوم اخذت الرخصه
وهالرخصه فيها سكني وانا متغير 90 درجه بمقياس رختر
سرعه وهبال ونقاصة عقل
وكل عاير فيه بصمة راعي العجراء ماهنا عاير ماحكيت فيه
تقول قعود فيه جرب ماهنا جذع طلحه ماتحكك فيه
شاكر حضورك

[راعي العجراء]

أنا أشهد انك راعي عجرا والنعم. والعسكري ما قصّر....
بس لو انه كمل جميله وشاف الرخصة يا أخي.

هلابك يارجل من اقصى المدينه
اسعدني حضورك بهذه السالفه
ياعم انا راعي عجراء ولكن لو ينفج الجربوع ضاعت روابعي
ويمكن يغمى علي من الروعه
علشان كذا اتسلح بالعجراء علشان يخافون مني
والا اذا طق الباب ماجسر افتح الا معي الشغاله تجسرني
ياعمي انا حابي على سراميك ورخام يعني ولد نعمه
مامريت على صكات بقعاء ولا ذقت لوعاته

[راعي العجراء]

@اضحك الله سنك ياراع العجراء@

وانا لي سن حتى يضحك
الله يرحم الحال اسنوني كلها على الجنط تقول واحد منسم على الكفرات بيدخل الدهناء يحطب

[راعي العجراء]

انت جميييل جدا يا أخي
بارك الله فيك وطول الله عمرك على طاعته
تحياتي : مغامر بحر

الجمال كله في حضورك يارجل
ان من دواعي سروري تواجدك في متصفحي لاحرمنا هذا التواجد
اطال الله في عمرك وصخر الله لك ماتريد
تحياتي

[راعي العجراء]

وعليييييييييييييييييييييييييييييكم السلام ورحمة الله وبركاته

ههههههههههههههههههههههههههههههههههه

من اولها ماصوره ودباب

الحمدلله على السلامة


هلا وغلا ياصقر نجد
وبعدين
ماشفت شي هذي وهي خصوصي وشلون لو هي عمومي
كان صفقت راسي بهالكباري ودحدرت على اركبي بالانفاق

[راعي العجراء]

الله يعطيك العافيه ياخي راعي العجراء استمر على هاذى المنهج واسعد الله ايام وايام الجميع

هلابك يابو زنعاف
وانت يالغالي استمر على حضورك معنا في هذه الخيمه
فحضورك مكسب للجميع
ودامت ايامك كلها سعاده

[سليمان الربيعان]

هههههههههه ربك ستر ما صار شي اكبر من الي سويته
نتظر جديدك من الابداع والتميز
تقبل تحياتي...

[ابوفهوود]

يامحلا سوالفك ياشبيه وائل كفوري والله اني كل مامليت جيت ادور على سوالفك

اتمنى لك كل خير

[الربذي]

السلام عليكم ورحمة الله وبركاته



الي
بس اللي قاهرني اني رحت وهو ماشاف الرخصه
انتهت السالفه وارجوا ان تكون اعجبتكم
وفي النهايه
سبحانك اللهم وبحمدك لااله الاانت استغفرك واتوب اليك


اخيكم راعي العجراء


ياهلا والف غلا براعي العجراء تصدق ان سوالفك صرقعه
سبحان من عطاك خفة الظل
اما سالفة الرخصه كان المرور يدري معقديني قبل الرخصه بالمخالفات وبعد الرخصة
فرحت يوم شفت اول تفتيش كاشخ بالرخصة
ويوم جيت ابي اعطيهم الرخصه قالو تفضل انقهرت وتصدق كم سنه واهم مااطلبوها مني لين انتهت وانواع التعقيد الرخصه مطوفه ههههه
وقبل الرخصه ماامغط ظهري

[الربذي]

وعليكم السلام ياهلا والف غلا براعي العجراء تصدق ان سوالفك صرقعه
سبحان من عطاك خفة الظل
اما سالفة الرخصه كان المرور يدري معقديني قبل الرخصه بالمخالفات وبعد الرخصة
فرحت يوم شفت اول تفتيش كاشخ بالرخصة
ويوم جيت ابي اعطيهم الرخصه قالو تفضل انقهرت وتصدق كم سنه واهم مااطلبوها مني لين انتهت وانواع التعقيد الرخصه مطوفه ههههه
وقبل الرخصه ماامغط ظهري

[راعي العجراء]

هههههههههه ربك ستر ما صار شي اكبر من الي سويته

نتظر جديدك من الابداع والتميز

تقبل تحياتي...


هلا وغلا يابو ربيعان
الحمد لله ماغار صفقت ماسوره وطيحت دباب
وابشر طال عمرك بالجديد ان شاءالله

[راعي العجراء]

يامحلا سوالفك ياشبيه وائل كفوري والله اني كل مامليت جيت ادور على سوالفك

اتمنى لك كل خير

ويامحلا حضورك يابو فهوووووووووووووود
والله يوسع الصدر
وأنا وسوالفي تحت امرك
لاعدمتك

[Al3rands]

ههههههههههههههههه الله يرج ابليسك العسكري بلش بالدباب وانت تلزم عليه انه يشوف الرخصه

[راعي العجراء]

وعليكم السلام ياهلا والف غلا براعي العجراء تصدق ان سوالفك صرقعه
سبحان من عطاك خفة الظل
اما سالفة الرخصه كان المرور يدري معقديني قبل الرخصه بالمخالفات وبعد الرخصة
فرحت يوم شفت اول تفتيش كاشخ بالرخصة
ويوم جيت ابي اعطيهم الرخصه قالو تفضل انقهرت وتصدق كم سنه واهم مااطلبوها مني لين انتهت وانواع التعقيد الرخصه مطوفه ههههه
وقبل الرخصه ماامغط ظهري

هلا يالربذي والله يمسيك بالخير
ياخوي الصرقعه في بعض الاحيان زينه توسع الصدر
وخاصه لاصار ذاك اليوم عليك واجب ماحليته
اشكرك على تواجدك يالغالي ولا تقاطع شوفتك توسع الصدر
وتبعد المغثه من سوايا عمتي منيفه