كتمه وتقطيع في الباترول + الحل

[نآآآصر]

السلام عليكم ورحمه الله وبركاته

حياكم الله جميعا


قبل كم يوم وديت موتري الورشه كان عندي لي منشق بغيره و قلت مره وحده بخليه يوزن البلوف لان فيها صوت تك تك تك المعروف
و الرجال ميكانيكي ممتاز
المهم
جيت اخذ الموتر من الورشه بالليل شغلت الموتر ومشيت
الموتر قام ينتع من زود التقطيع والكتمه حتى اني افضي القير وادعس الضغط مايتعدى 3 من الكتمه
الموتر ماقدرت اسرع فيه من ذا العله واعلى سرعه وصلتها هي 110 مايتعدى او اقل
المهم رجعت له من بكره وركب معي وجربنا السيارة
ماكملنا اخر الشارع الا وهو يقول ارجع خلاص
انا توقعت العله من شغله اللي سواه امس اللي هو وزن البلوف
لكن قام الرجال وفك غطاء الكلبليتر وطلع العلبه اللي فيها فلتر الهواء وقام يقطع ب ليات الكلبليتر و قال رح جب مترين ونص نفس الليات ذولي اللي هي حقت الكلبليتر
ويغير كل الليات ويرجع كلش مكانه ويقولي مع السلامه
فعلا كانت من ليات الكلبليتر لا احد يتهاون فيها قد تكون سبب للكتمه والتقطيع
حتى ان الموتر تغير عزمه و صفاوته 100 % بدرجه غير متوقعه

[ابرق نثيل]

الله يعطيك العافيه على الافاده والتوضيح

[فتاح الجواد]

الله يجزاك خير
عندي استفسار اذا كانت السيارة واقفة المكينة تكون صافية؟ولا ما تبين التقطيع والتفتفة الى بعد المشي؟

[نآآآصر]

لا مع الوقوف ولا احلى منها لكن مع الدعسه تبين الكتمه

[عاشق البرادوv]

انا عندي سفاري 91 اذا عبيت فل بنزين يقطع ويطفي واذا مسكت خط يقطع ويطلع دخان اسود لين ينقص البنزين عن الفل ويصفي بس فيه هواء بالتانكي على طول واحس ان فيه شي يطبخ جوة التانكي ممكن من الفلتر والا ايش افيدوني مشكورين