استفسار عن قربة ماء الهدلق ... تكفون يا النشاما ....

[بن نويشر]

حيا الله الربع كلا بأسمه

شرية من سوق الخيام بالغرابي قربة ماء الهدلق
ومن يوم الجمعة حتى كتابة هذا التقرير وهي تخر خرارة بشكل موب صاحي ، شكلها ما تكمل ساعة ، وانا كل شوي اقول ان شاء الله بتضبط .. بس للأسف ما فيه فائدة ، والظاهر ان بويمن غشني .

سؤالي يالربع : قربة الهدلق الأصلية تجي بكتابة تحت القربة صنع في المانيا ولا لا ؟؟؟
وهل فيه اصلي وتقليد ؟؟

عطونا الخبر الأكيد قبل لا اروح للي باعنيها وفرغ باقي القربة على راسه ..

[هبوب الشمااال]

انا سالت وقالولي فيه الهدلق بضمان وفيه بدوون ضمان
وان شاء ان النشاما مب مقصرين معك

[خط ليزر]

حياك الله اخوي بن نويشر
يجي منها اصلي وتقليد ولابد انك تخمرها في ماء لمد ة ثلاثة ايام وبعدها تسخدمها تمنياتي لك بالتوفيق

[عبون الجواء]

الله حي يا بن نويشر
نقع بالماء لمدة يوم كامل وترا النتيجه واذا ما ضبط معك
نقع بالماء والملح وان شاء الله تضبط معك
تقبل اخوك / ابو عبدالله

[ال-رايق]

حيا الله الربع كلا بأسمه




[/SIZE]



الله يحييك ومن يقرأ,,,,,,,
مطارة الهدلق اللي عليها الكلام مكتوب عليها بالانقليزي صنع في المانيا واسم المورّد بالعربي والدولة
ولازم حسب تجربتي تكون صغيرة وزنها 5 وماتاخذ يوم حتى تشد وان كان الدعوى خرخرة خصوصا
,,لكن اذا هي تندية هذا كلام ثاني.

[صب لي فنجال]

الله يحيك اخوي والجميع
انا شريت العام الماضي نفس اللي عندك وعانيت من تهريب الماء ونصحوني انقعها في مويه وسكر لمدة يومين وأنساها اكثر من يومين وفعلآ جابت نتيجه وبالتوفيق لك وللجميع :good2:

[ابو سعد 77]

انا عندي نفس المشكلة شريت وحده بـ 45 من المقرن للرحلات بشقراء ومستانس به عبيتها وانا عند المحل ومسكت الخط يوم وصلت مرات ووقف اصلي وبعد ماصليت جيت ابشرب من القربة صرات فاضية وانقرت ورديتها لراعي المحل وقال مارجعها كثير ناس كذا تصير معهم وقالي راعي المحل السعودي نقعها بموية وقلت ابشر وطلعت ونقعتها ولا فادت.. وجدعتها بالبيت..

وبعد فتره رحت القصيم وشريت من المرباع لادوات الرحلات قبة ماء الهدلق وارد الكويت اصلية بـ35 وطلعت وجيت البيت ونقعته بماء لمدة 24 ساعة بالظبط وعبيته ماء ولكن مافيه فايدة تندي بشكل قوي يعني بتفضى قلت بلاش قربة


والان مادري وش الحل؟؟

تحياتي..

[البنيون]

عبها ماء ونقعها يومين او 3 ايام

اذا ما فادت معك نقعها بمويه وشوي سكر لمده يومين

واذا ما فادت الطريقتين حطها وطايه بالسياره لأنها مغشوشه

[النوبل]

حسب تجربتي لمطارة الهدلق

تعبيها ماء لاحار ولابارد (متوسط) وكل مانتقصت تزودها

أحيان تضبط خلال 3 أيام وأحيان 5 أيام

في البدايه تخرخر الماء وتخف لين تصير تندي فقط

[ابوعدي]

طريقة مجربه
رح صب باقي القربه على راس راعي المحل وتبي تضبط :)
اخوي عب القربه ماء وحطه بسطل فيه بعد ماء الى الصيف الجاي:s لأن الشتاء:l جاء وماله حاجه وشف النتيجه وترى التنديه شي طبيعي واذا ما ندت ما بردت خلها يوم واحد بالسطل واستمتع بماء القربه
واذا مانت عجل طريقة استاذنا النوبل ممتازه
موفق خير

[بن نويشر]

الله يجزاكم خير على تفاعلكم ، ونخدكم في عرسكم إن شاء الله

والظاهر ان القربة مثل قال اخي الكريم (البنيون) بتصير وطاية للموتر ...

[عبسي4800]

حياك الله اخوي بن نويشر
يجي منها اصلي وتقليد ولابد انك تخمرها في ماء لمد ة ثلاثة ايام وبعدها تسخدمها تمنياتي لك بالتوفيق

نفس الكلام

واذا تبي القربة الصحيح عندك القربة الي تفصل تفصيل تكون 4 طبقات
1 - بلاستك
2- نفس قماش القربة
3- اسفنج
4 - قماش خيشة ( خيشة رز مثلا)

بالاضافة الى تركيب بزبوز ترمس ماء

الصراحة ناهية وانا حصلتا بسوق الجردة ببريدة والي يفصلها اسمه غنام اذا تبون رقمة جبتة

ويعلم الله اني لا اعرفه ولا لي فية اي صله

بس شغل القربة جاز لي وحبيت انكم تستفيدون

ولكم شكري وتقديري