فيه محترفين يصيدون بشاطئ الخبر او دمام

[سافيلو]

لو سمحتم لي حدق على سيف وصاد في هالفتره
يقولي ويش صاد وين بالضبط
ولكم جزيل الشكر والتقدير

[mitchell]

روح الجبيل هالايام الكنعد يطلع والله يوفقك

[مكشات بحراوي]

اها يالجبيل احلى صيد صته في حياتي ايام حلوة

[إلنترا 2005]

يا طويل العمر اخر اخبار الصيد للاسبوعين هذي حسب تقارير الشباب

كورنيش الخبر و الدمام ما احد جرب فيهم و الاغلب ان وضعهم دماااار

اما عندك العقير و الزبنة و بحر البترومين فالشباب صادوا فيها قبل فترة شعوم و قرقفان احجامهم اكبر من كف اليد بشوي وهو حجم طيب و لا باس به ابدا

و العزيزية بعد فيها خير حول شاطئ تالا

و لا تخاف يالغالي الموسم في اوله×و اتوقع انه موسم طيب باذن الله

و الله يرزقك الجميع من فضله

[صياد الخبر]

السلام عليكم


بخصوص الخبر


من اسبوع جنعده ام 16 كيلو بفرضة الخبر بداية الممشى


ومن اسبوع ايضا في شاطى تالا الشباب 3 سبيطيات من ابو 4.5 تقريبا


ناس ثقة


بس بقولك شيء مهم


الناس اللي اسولف لك عليكم ناس مرابطه ما وراهم لا ولد ولا تلد ولا سفرة ولا خواشيق ( ملاعق )


يعني اجي الصبح قبل الدوام اشوفهم


اجي بريك الغداء الظهر اشوفهم


اجي بعد العصر نهاية الدوام اشوفهم


ومن بعدها تجيك القصص وتشوف بعينك الثلاجات وتشوف الصور


هذة انصادت هالوقت هذا انصاد هالحزة وهالمجرة


ف لا تروح ساعة وتقول مافي صيد


او تروح يومين ورا بعض وتقول مافي صيد


من بغى الدح يا خالي ما يقول اح


واسئل غيري من عشاق البحر وشف وش يقولون


ايام تصدف تجي وتروح طعومك واليمه تخلص تقل ربي مسخرك تعلف السمك


وايام تجي تصيد قرقفانه تشكها بميدار ( جلب ) وتنطله بحر تجيب لك ابو 20


والاول والاخير


ارزاق من الله سبحانه وتعالى



وبالتوفيق


ودمتم

[مهجول بحري]

كفو والله يا صياد الخبر كلام سليم ميه في الميه ..
والسبيطي نطلعه كثير بس لازم نرابط يوم كامل وانت وحظك ..
والله يوفقك ولا تيأس وحاول وراح تتوفق بإذن الله أهم شي تكون تعرف طعم كل سمكه ..
وأنا أكثر ما أصيد السبيطي بالمنكوس وعن طريق المد وفي العزيزية أكثر ما يضرب قبل إكتمال السقي بساعة تقريبا والأحجام الكبيرة أكثر ماتضرب في قمة الثبر ..
وأكيد كل واحد بيقول كلام غير بس هذه تجربتي وبالذات المنطقة إلي تكون يمين شاطي الغروب في العزيزية .
وسلامتكم

[سافيلو]

الف شكر لكم
احد يوصف لي وين شاطى تالا
ماعرفه وين

[حداق الخبر]

شاطي تالا


وانت متعدي العزيزيه اللي بعد الدوار
تجيك على يمينك مدينة الترفيهيه

يسارك البحر اللي فيه قصور
تمشي سيده كأنك رايح الهافمون
الين يجيك قصر ابيض على يسارك
تعداه شوي
وتجيك لفه على اليسار وفيها شجر كثير
ومكتوب لوحة / منزل الصناع
ادخل معها وابتل سيييييده
تلقا البحر في وجهك بالظبط
هذا شاطئ تالا
بالتوفيق

[ابو وغش]

لا تعب نفسك استاجر قارب واطلع لفاح للكنعد وان شاء الله تطلع قيمة الاستيجار ومكسب