المساعد الشخصي الرقمي

مشاهدة النسخة كاملة : بشتري وابي رايكم .. فحياكم ..!!


دليلة1
11/10/2011, 05:34 PM
السلام عليكم ورحمة الله ..


حياكم الله أعضاء ورواد منتدانا الغالي مكشات..
حقيقة ما أدري كيف أبدأ .. أرزاق مالنا فيها نصيب ولا بتعود وناخذ منها النصيب ..!!

كان العزم لشراء سيارة تلبي حاجتي وهوايتي قبل سنتين وكانت العين على مرادي
ال fg كروز لكن كل ما قربنا أبعد وبمسافات في السعر ووصل لبحر الأربعين ..!!
أنا يهمني أنظمة البر من دفلوك وغيرها أكثر من الاكسسوارات
ولا أدري الوضع يبي يستمر ولا بيتحسن وينزل السعر
ودراهمي فبداية المية يمكن تدخل للطعشات والآن أضفت خيار آخر وهو الفور تشنر 2012 ..
فشوركم ونصيحتكم يا أخوان ..!!
ابو زنعاف
11/10/2011, 10:50 PM
عليك بافور شنر موتر يالولد وجرب وشف منت خسران النشاء الله
يكفيني نظرة
11/10/2011, 10:57 PM
فور شنر بس احرص على 6 سلندر وابعد عن 4سلندر
abo mani3
11/10/2011, 11:02 PM
عندك الاكستيرا نيسان تراه ممتاز وعزمه ازين من الجيوب الثانيه

وفيه دفلوك وترى معروفه سيارات الاوف رود في امريكا غالبا يا اف جي يا اكستيرا

وتراه موب ذاك الراحه اذا انت متزوج وعندك عيال

انه سست زي ربع التويوتا
ضيف الغضا
11/10/2011, 11:27 PM
حسب تجربتي و تجربتي قليلة و بكل صراحة و موضوعية :ــ
لو كنت مكانك كان المية ألف و طعشات !!
ما أضيعها في سيارات غير شعبية تتعبني صيانتها و قطع غيارها
!! حتى لو كانت 2090 !!!
و لكنت دورت لي مستعمل نظيف gxr موديل 2006 2007 أو تاهو 2010 أو 2009
سيارات مليانة و قوية و فخمة و صيانتها و قطع غيارها في كل مكان
لكن انتبه !! ال gxr و التاهو لا تقرب الفل كامل ترى أيضاً صيانتها متعبة جداً
و ال vxr ابعد عنه إلا إذا تقدر عليه شبه جديد !!
عام 2005 اشتريت لي جيب vxr 98 و كان نظيف جدا ًو الى اليوم أكده كد ..
و الله يعينك و ييسر أمرك و يكتب لك كل خير ...!
عيون الذيب1
12/10/2011, 12:29 AM
استخر الله اول شي ومن شاور الله ما خاب
والله يكتب لك اللي فيه خير
رفيع المقآم
12/10/2011, 12:45 AM
تسانك تبي رايي

دور لك جي اكس 97 نظييف

والله لتدعيلي طول عمرك

تاخذه حول الستين تزيد او تنقص

والباقي اشتر لك موتر للديره صغير ولا يصرف بانزين

والله العلي العظيم اني اقول الناس مهبل وش يبون بالكسر جيوب م 97 الحمدلله على نعمه العقل

لكن بمجرد التجربه تغير رايي 10%

تخيل اذا عشقت الدبل الثقيل تقومه بخامس ويقوم كنه بثاني وكلام عن تجربه

وحديد في حديد تلعنه ويقول زدني

وانت ع راحتك

وتراك شاورتني ومن استشارك دخل في ذمتك

وهذا رايي لك كاخ عزيز ومكان اخوي
دليلة1
12/10/2011, 05:51 AM
نصايح طيبه وبارك الله في الجميع..
رايكم للفورتشنر والموتر ينشد به الظهر في البران وعلى الطعوس ولو كان فيه بعض العيوب من التنسيم والرساوة والامان وولد عمه ماهو بعيد عنه .. لكن الشكل جديد والسعر ارتفع وان كان بحدود اليد وان الله اراد انتظرنا شوي لين ينزل من سعره ونسمع من جربه .. أخوي ضيف الغضا رايك حكيم لكن ما مثل الجديد عارف باموره واحواله .. والخيارات الثانيه مبروكه لكن العين على هالمواتر والله ييسر لنا الأول على سعه وخير ..
حائل 2010
12/10/2011, 05:55 AM
الفورتشنر 4 سرندل لا تاخذه خذلك 6 اقوى واحسن
الشقردي 205
12/10/2011, 05:59 AM
إخوي نصيحه دامك تبي موتر لـــلـــبـــر خــذ ســفــاري من 90 لـ97 هذا خله حق البر كد ومد . . .


واشتر سياره ثانيه من الوكاله اللي نفسك فيها وخلها للديره . . .


والجيب العن والديه بالوديان . . .
عاشق وسم
13/10/2011, 11:24 PM
الاف جي وبس .. ما انصحك بالفورتشنر ابداً

تظل أراء شخصية ... والله يختار لك الخير وين ما كان .
احمد الواصل
13/10/2011, 11:44 PM
اخوي دليلة والله مااعلم عنها كلها وانشاء الله الاخوان ينورونك ويخبرونك بالافضل

بس انا ياشباب ابي اشتري اف جي
و الافضل ايهم السعودي او الخليجي وايهم افضل مديل
تكفون افيدوني بالله عليكم وابيه من ناس مجربين ماهو من شركة يقلون
لاهنتم جميعآ