احسن خبز للبر تعال وشف

[برق الحلوه]

بسم الله الرحمن الرحين


اولا امسي على الجميع بالخير واتمنى تكونون بصحه وعافية


طرت على بالي فكرة وحبيت انقلها لكم وتجربون ومتاكد انها بتصلح لكم وتفك ازمه


اكيد كل منا اذا طلع للبر يعاني من الخبز لانك اذا شريت صامولي او مفرود حلاته باول يوم وباقي الايام الله بالخير يا متكسر ولا ميبس ولا متقطع وفي الشتا لازم تسخنه شوي وحوسه
المهم عشان ما اطول عليكم انا صار لي سنتين تقريبا اذا طلعت للبر ما اخذ خبز لكن اكيد فيه بديل الا وهو القرصان الرطبه او ما يسمى بالشلفه عند بعض الناس (القرص الي يحطونه ع المفاطيح ) هذا بالنسبه لي من ابدع ما يكون


مميزاته :
1-ما يتغير طعمه ولا طراوته
2- خفييف ع المعده واطعم من الخبز
3-ما يحتاج تسخنه حطه بالثلاجه وانتبه له من الما وقبل تبدا تصلح فطورك طلع قدك


عيوبة :
1-مو اي محل يضبطة صح <<<للي يحب يستطعم
2-لازم تطلبه وتجهزه قبل الرحله بفتره لانك يمكن ما تلقاه جاهز
3-يعتبر غالي بالنسبة لباقي المخبوزات


اترك لكم التجربة واتمنى لكم دوام التوفيق والنجاح


تقبلوا تحياتي ,,,

[ابو بدر العتيبي]

والله انك صادق الله لا يهينك

[عبدالمحسن 1]

فيه خبز تورتيلا ممتاز فيه حار ( فلفل ) وفيه بارد ..
المهم الخبز هذا مبرد .. ويتحمل درجات حراره مختلفه .. يحمى شوي ويصير طيب ..

[برق الحلوه]

ولا تهون اخوي ابو بدر

التورتيلا يبي لنا نجربه فكره مش بطالة يعطيك العافية اخوي عبدالمحسن

[آلجنيدي]

مساك الله بالخير
والله مادري وش تقصد بالخبز يمكن قصدك المطحن الي هو الصاج
لكن ابي اعطيك خبز يمكن تحصله عندك ولا لا . الي هو الخبز العراقي والباكستاني . يقعد معك ثلاث ايام وهو طري . ولا يحتاج لا تبريد ولا تسخين

[أبوعابد 22]

يعطيك العافيه اخوي

[برق الحلوه]

مساك الله بالخير

والله مادري وش تقصد بالخبز يمكن قصدك المطحن الي هو الصاج
لكن ابي اعطيك خبز يمكن تحصله عندك ولا لا . الي هو الخبز العراقي والباكستاني . يقعد معك ثلاث ايام وهو طري . ولا يحتاج لا تبريد ولا تسخين

مساك الله بالنور يا هلا ومرحبا

الخبز الي انا اقصده تحصله عند المحلات الي يبيعون قرصان وفيه ناس تسميه شفله وفيه من يسميه قرصان رطب عموما هو مثل القرصان بالضبط لكن طري مو يابس

الخبز العراقي او الباكستاني تقصد الملوح ؟؟

[برق الحلوه]

يعطيك العافيه اخوي
الله يعافيك يابو عابد وحياك

[Al3rands]

مشكوووووووووور

[صدق النوى]

يعطيك العافيه يا برق الحلوه

[محلات الكشاتة]

طريقه أفضل من الخبز
وتشكر على طرحها

[كشته 111]

شكرا برق الحلوة علي الموضوع ، وودي اضيف ان الخبز الفرنسي يفيد في البر زي الشفلة لان ميزته الحفاظ علي الطراوة والطعم والجودة فترة طويلة ، و تقطعه شرائح دائرية وتدهن الماكولات علية مثل الجبن والمربي او تقطعه شرائح اصغر وتاكل به الفول والادام .
وهو نفس الخبز اللي تصلحة بعض المطاعم عليه الثوم والجبن .

وهذي صور له ،،


http://im10.gulfup.com/2011-10-12/1318417550141.jpg (http://www.gulfup.com/show/Xqwofjm4sgbkgo)


http://im14.gulfup.com/2011-10-12/1318417809491.jpg (http://www.gulfup.com/show/Xqwosxzsljissc)

[أبوسليمان السهر]

مافيه أي مشاكل نجرب النصيحة وتسلم على النصيحة

[بنت القناص]

السلام عليكم ورحمة الله وبركاته
بالنسبه لنوع الخبز اللى تتكلم عنه ماعرفه وياليت تنزل صوره له علشان نستيفد
اما انا بالنسبه للبر ما فيه احلى من قرص القصديره على الجمر ومايبيله شغل كثير مويه وملح ودقيق دبي وتكون العجينه طبعا قاسيه وتلف بالقصدير ويعمل ثقوب صغيره جدا علشان يتبخر ويستوي تماما

[اااالرااااكد]

خبز باندور ممتاز جداُ

[رسيس نجد]

فكره طيبه 00000مشكور 0

[ضابط الايقاع]

تسلم على هالمعلومه

[راعي البل2]

طيب أعطنا طريقة أعداده لو سمحت

[بن نويشر]

يا خوي فيه خبز باندون مسكت ويقعد معك حتى ثلاث أيام ولا يتغير ولاهم يحزنون ...

جربه مره سيعجبك بالمره

[ابو سمر]

الله يعافيك .. هالخبز روعة وعندي أهم من اللحم إذا لقيته على الذبيحة، طعم جداً ولو تأكل واحد كبر كبوت السيارة ما تشوف إلا العافية وخفيف على الكبد..

بس المشكلة ما نلقى اللي يسويه إلا في أماكن بعيدة جداً..

[wafi4sa]

بارك الله فيك
شكراعلى هذا المعلومة

[زايد بن بدران]

لاتنس خبز البندوره اللبناني

[برق الحلوه]

اشكر الجميع ع المرور والعفو لكل من شكرو

[برق الحلوه]

السلام عليكم ورحمة الله وبركاته
بالنسبه لنوع الخبز اللى تتكلم عنه ماعرفه وياليت تنزل صوره له علشان نستيفد
اما انا بالنسبه للبر ما فيه احلى من قرص القصديره على الجمر ومايبيله شغل كثير مويه وملح ودقيق دبي وتكون العجينه طبعا قاسيه وتلف بالقصدير ويعمل ثقوب صغيره جدا علشان يتبخر ويستوي تماما
هذا وانا اخوك تحصله في المحلات الي تبيع قرصان وان شالله احاول انزل صورة له عن قريب وقرص القصديره يختلف عن الي انا اقصد

الي اقصده انا يحل محل الخبز

[عويس]

هذا الي يقصدة الاخ صاحب الموضوع

http://www.mekshat.com/pix/upload05/images231/mk68369_jj.jpg

http://www.mekshat.com/pix/upload05/images231/mk68369_2.jpg
http://www.mekshat.com/pix/upload05/images231/mk68369_3.jpg

http://www.mekshat.com/pix/upload05/images231/mk68369_4.jpg

http://www.mekshat.com/pix/upload05/images231/mk68369_5.jpg

وله عدة انواع منها القرصان (ناشف ولين)
والمصابيب وفي رواية (نديلات )
والمراهيف وهي المقصوده هنا
و خبز الرقاق

وعلى العموم عملها سهل جداً وممكن اي واحد يتعلمها بسرعه وتصير كل يوم تسوي خبزك بيدك افضل وانضف و اطزج (من طازج)


الصور من النت